KEJADIAN 1
1
Allahn pohol kinang wal tibag ane
1Mun angge man angge elegma keram wal teberuk lit Allahn pohol ha kinang ha wal tibag. 2Wal tibag li kinang pirim-pirim angge ruruk lit mondabi sungguk-sanggak teg latfag. Iken kinang obog toho hondo regma hik teg eneg latfag. We Allah hime eneg ik palimu lebe ruruk latfag. 3#2Kor 4:6Ari turuk latfagma Allahn ele uruk lit, ”O seleg amin,” ibagma seleg atfag. 4Seleg atfagma Allahn yet hibareg fano tibihi pibareg seleg amu, hik amu welamag ulug minggiroho imbibag. 5Seleg ino ilingge suwalfareg hik ino hubanggo suwalfag. Hup atfareg sakan tibagma hup misihim atfag.
6-7 #
2Ptr 3:5
Hup misihim atfagma Allahn ele uruk lit, ”Ik apma fil werehon men pali fil werehon men amu-amu welamag ulug hili angge o ungga hag toho wereg amin,” ibag ane ari wirim atfag. Hili angge ino wal tibibareg 8pohol suwalfagma hup atfareg sakan tibagma hup pirenam atfag.
9Hup pirenam atfagma Allahn ele uruk lit, ”Ik pohol apma werehon amu yenggel atukmu kinang lilog tehon inam amag!” ibagma ik amu yenggel atfag. 10Ik yenggel atfahon ino Allahn ik sene humon suwaltuk lit kinang lilog atfahon unuk kinang suwalfareg kim haruk lit fano tibihi pibag. 11Pibareg Allahn ele uruk lit, ”Kinang inowen hohol anggen tohon men e anggen tohon men mun angge man angge anggen naruk lit ei emberukon wal taneg welaruhuwen wilibukag,” ibagma 12kinangen mun angge man angge wilipfag. Wilipfagma Allahn yet hibareg fano pibag. 13Fano pibagma hup atfareg sakan tibagma hup hinahanam atfag.
14-15Hup hinahanam atfagma Allahn ele uruk lit, ”Kinang selehap turuk angge pohol fam hutuk amag. Ilingge fahet eke, hubanggo fahet eke, hup winag harukon men, mo ilig am wirig am turukmu winag harukon men, An Allah wel naptuk lit enehiyeg toho wereg li winag harukon fahet oho hutuk amag,” ibag ane ari wirim atfag. 16Selehap turuk angge suwon piren wal teberuk lit ilingge fahet mo wal tibareg hubanggo fahet pikalem wal tibareg suhal oho wal tibibag. 17-18Seleg amu, hik amu welamag ulug ilingge men hubanggo men fahet kinang selehap turuk angge itano Allahn pohol fam hutuk tibibag. Hutuk tibibareg yet haruk lit fano tibihi pibag. 19Pibagma hup atfareg sakan tibagma hup uhanam atfag.
20Hup uhanam atfagma Allahn ele uruk lit, ”Ik ahum ke lebe ruruk angge men suwe pohol ke lam-lam laruk angge men anggolo wereg amag,” ibareg 21Allahn ik ahum ke lebe rurukon suwon men toron men suwe pohol ke laruk angge wal taneg werehon men wal tibibag. Wal tibibareg yet haruk lit fano tibihi pibag. 22Pibareg ikma wereg angge men suwe pohol ke lam-lam larukon menen endebuhubonen ikma poholma keleg uhup ulug inineyap enepfag. 23Inineyap enepfagma hup atfareg sakan tibagma hup fuwaben atfag.
24Hup fuwaben atfagma Allahn ele uruk lit, ”Kinang inowen mun angge man angge lebe ruruk angge aben endetukon men endetuk elehon men unuyug fam larukonet ahum sap fam larukonet wal taneg welamuhuben werehap tukag,” ibag ane ari wirim atfag. 25Mun angge man angge lebe ruruk angge wal tibibareg yet isaruk lit fano tibihi pibag.
26Pibareg Allahn nin ele uruk lit, ”Ketiya Nit nunubabut men wirim toho welamag ulug ninahuhe hag toho ap werehap tul. Iren mun angge man angge lebe rurukon suwon toron aben endetukon men endetuk elehon men ik ahummu wereg angge oho suwe arimano obog toho seneg lamuhup,” ibareg 27#Kej 5:1-2; Mat 19:4; Mrk 10:6; 1Kor 11:7Allahn ap wal eneptuk lit At inggareg hag toho wal enepfag. Ap eke, hiyap eke wal enepfag. 28Wal enepfareg it inineyap eneptuk lit, ”Hit famen ap anggolo endebuhubonen kinang aru keleg uhupteg seneg lamuhup. Hiren mun angge man angge lebe ruruk angge ikma kinangma werehonet pohol ke larukonet obog toho arimano foroho lamuhup,” ulug hiyag isibag. 29”Hiren naruk lamuhubon fahet hohol anggen tohon men e anggen tohon men mun angge man angge ei emberukon wal taneg werehon Anden og hisaruk lahi. 30Wam suwe pak aben endetukon men endetuk elehon menen inggila angge naruk lamuhup,” ibag ane ari wirim atfag. 31Allahn obog toho arimano wal tibibareg yet isaruk lit fano anggolo tibihi ulug ahiyeg hibag. Hibagma hup atfareg sakan tibagma hup falfaliken atfag.
Currently Selected:
KEJADIAN 1: YLI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
@ LAI 2018