MATIUS 9
9
Yesus kema'en suang tun pakuak
(Mrk. 2:1-12; Luk. 5:17-26)
1Yesus kenek neak lem biduk lajau nyeb'ang daneu, belek moi sadei-Ne. 2Neak di tun mbin ngen-Si suang tun pakuak de teguling neak tikea. Waktau Yesus kemliak lai imen tobo'o, Si madeak ngen tun de pakuak'o, “Tabahba anok-Ku! Duso-dusonu bi napun.”
3Kekedau gu'au agamo neak di madeak lem atei, “Tun yo mino Allah!”
4Tapi Yesus namen pekeran tobo'o, lajau madeak, “Getai pekerannu jahat? 5Ipe de lebiak mudeak: madeak, ‘Duso-dusonu bi napun’, atau madeak, ‘Klongonba ngen paneuba’? 6Tapi uyo Uku bakea melei tando ngen ko bahwo neak bumai yo Anok Manusia temuan kuaso utuk mapun duso.” Lajau Yesus madeak ngen tun lupuak'o, “Klongonba, naket tikeanu ngen belekba!”
7Tun pakuak'o klongon ngen belek moi daseine. 8Waktau tun-tun kemliak hal'o, tobo'o saben lajau mujai Allah, sebab Allah bi melei kuaso kembiak lai ngen manusio.
Yesus menok Matius
(Mrk. 2:13-17; Luk. 5:27-32)
9Sesudo Yesus teminggea penan'o. Waktau paneu, Si kemliak suang tun penagiak pajak de genne Matius, gidong temot neak kantor pajakne. Yesus madeak ngen si, “Maro totoa Uku!”
Lajau Matius je ngen temotoa Yesus.
10 #
Luk. 15:1-2
Waktau Yesus dong mukmei neak umeak Matius, tekoba kekedau tun penagiak pajak ngen tun-tun de nanggep coa baik neak masyarakat, milem mukmei besamo Yesus ngen penotoa-penotoa-Ne. 11Ade tun-tun Farisi kemliak hal'o tobo'o madeak ngen penotoa-penotoa Yesus, “Getai gu'aunu mukmei sepok penagiak pajak ngen tun-tun coa baik?”
12Yesus temi'uk jano de tobo'o temanye ngen jemawab, “Tun sehat coa perlu dokter tapi tun bolon bae. 13#Hos. 6:6; Mat. 12:7 Senlidikba jano tai ayat lem Kiteb Ade senbut: ‘Uku kemlok atei de baik, ngen coa kurban binatang’. Sebab Uku teko coa utuk menok tun de bi baik meluyen tun de nanggep hino.”
Hal Puaso
(Mrk. 2:18-22; Luk. 5:33-39)
14Sudo'o penotoa-penotoa Yohanes Pembaptis teko ngen Yesus. Lajau tobo'o betanye, “Getai keme ngen tun-tun Farisi puaso, tapi penotoa Bak coa?”
15Yesus jemawab, “Kero pendapet udi? Nam coa! Tamu-tamu neak pesta nikeak besedi atei amen pengaten semanei besamo tobo'o? Sahe coa! Tapi bakea teko waktaune penganten semanei nemok kunei tobo'o. Waktau'oba tobo'o puaso.
16Coa ade tun menet bajau de bian ngen de lambea kainde gi blau. Sebab kain penapit'o bakea semgit bajau'o sehinggo segitne tambea lai. 17Awei'o kulo coa ade tun de temuang anggur blau moi lem katung babok de an. Sebab katung bakea pecuak ngen usak sehinggo anggurne tupeak. Anggur blau harus ne'eng moi lem katung de blau kulo. Supayo keduai-duaine tep baik.”
Anok Pemipin Umeak Semyang
Yesus kema'en suang selawei de megong jubah-Ne
(Mrk. 5:21-43; Luk. 8:40-56)
18Sementaro Yesus madeak ngen penotoa-penotoa Yohanes Pembaptis, tekoba dikup tun ketuai Umeak Semyang tun Yahudi. Si sujud neak adep Yesus ngen madeak, “Anok selaweiku pei ninggea. Tapi minoi tulung nien, Ko teko igai utuk megongne supayo si idup.”
19Yesus kelongon temotoa tun'o sesamo ngen penotoa-penotoa-Ne.
20Neak tengeak dalen suang selawei bi duai belas taun ke'anne bolon teko ma'ok Yesus kunei belakang. Si meker, “Amen uku megong jubah-Ne, uku bakea ka'en.” Lajau si megong ujung jubah Yesus. 21Kerno nadeakne neak lem atei, “Negong kubae jubah-Ne, uku bakea ka'en.”
22Tiko'o Yesus jemling ngen dem'nong selawei'o lajau madeak ngen si, “Tabahba anok-Ku! Kerno udi percayo ngen-Ku, udi ka'en!” Pado waktau'o kulo selawei'o ka'en.
23Sesudo'o Yesus sapei neak umeak pemipin Umeak Semyang. Tiko Yesus keliak pemain-pemain musik utuk tun ninggea ngen dau tun gu'ok. 24Si madeak ngen tobo'o, “Kelueaba udi kutene! Anok yo coa matei, tapi tidua.”
Tobo'o kute temawai Yesus. 25Sudo tun dau'o keluea, Yesus masuk moi lem bilik anok'o ngen megong tangenne. Lajau klongonba anok selawei'o. 26Mako senbeaba kabar tetang hal'o sapei kute daerah.
Yesus kema'en matai duai tun buto
27Yesus lalau kunei di ngen neak tengeak dalen duai tun buto temotoa-Ne. Tobo'o menggang, “Anok Daud, semlenba keme!”
28Tiko Yesus masuk moi lem umeak, ke duai tun buto'o teko ngen-Si. Yesus betanye ngen tobo'o, “Jano udi pecayo amen Uku nam kema'en udi?”
“Pecayo, Bak!” tobo'o jemawab.
29Lajau Yesus megong matai tobo'o samo madeak, “Kerno udi pecayo, jijai jano de udi kemlok.” 30Mako tobo'o nam ngeliak. Yesus minget ngen tobo'o ngen teges supayo jibeak madeak hal'o ngen api bae.
31Tapi tobo'o lalau ngen semiar berita tetang Yesus, moi kute daerah'o.
Yesus kema'en tun bisau
32Waktau keduai tun keluea, suang bisau de nasuk Iblis mbin ngen Yesus. 33Yesus musir roh jahat'o ngen waktau'o kulo tun bisau nam miling igai. Tun dau heran ngen madeak, “Ati perneak keme kemliak hal de awei'o neak Israel.”
34 #
Mat. 10:25, 12:24; Mrk. 3:22; Luk. 11:15 Tapi tun-tun Farisi madeak, “Pemipin roh-roh jahatba de melei Si kuaso utuk musir roh jahat'o.”
Yesus selen kemliak tun dau
35 #
Mat. 4:23; Mrk. 1:39; Luk. 4:44 Yesus kliling kunei do kota moi kota de luyen kunei do sadei moi sadei de luyen. Si ngajea lem umeak-umeak semyang, ngen semiar Bito Baik tetang awei ipe Allah mriteak awei Rajo. Si kema'en tun-tun de saro ngen kute olon ngen cacet. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 Waktau Yesus kemliak tun dau'o, Si selen ngen tobo'o, renyeng ngen coa bedayo, awei domba coa gen pengangon. 37#Luk. 10:2 Lajau Yesus madeak ngen penotoa-penotoa-Ne, “Panenne dau tapi tukang panenne didik. 38Kerno'o minoiba ngen tun temuan kebun, supayo nembo tukang panen utuk manenne.”
Currently Selected:
MATIUS 9: REJ
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
@ LAI 2011 Indonesian Bible Society (Lembaga Alkitab Indonesia)