LUKA 20
20
1Asistanka ato kimi Yeso kuneto pich Kö pö Tororöt* akwomchini chane Lökoy cho Karamach, kïpkonchï tïsï cho echön nko koneti kirurut nko poy. 2Kipka kïtep nyinte lö, “Mwowecha owesyö ne nyï ighonyi tïkuchï? Anta ngo nyo kökoninyi owesyononi?” 3Kuyokyï Yeso lö, “Akanye nyu atepakwa kïgh mwowante 4Kingwïna owesyonay kipatisano Yoana pich, wölo mi Tororöt nya anta kingwïna pich?” 5Kïngölonchï kegh chane lö, “Akiyokyini lö ne nya? Ato kïlecha, ‘Kingwïna wölo mi Tororöt,’ kïlenchinecha, ‘Kï kilö ne tömaghanakwa nyinte?’ 6Kïnyïl ato kïlenchicha, ‘Kingwïna wölo mi pich,’ kïwirenecha koghïn pïchete mi yi, ompöwölo kikughan chane löwïr lö, werkoyon Yoana.” 7Sörömunyi kuyokyï lö, “Mökinkïtöchanye wölo kingwïna.” 8Atoni nyu kïlenchï Yeso chane, “Kïmomwowokwanye tïkwïl lö owesyö ne nyo oghonan tïkuchï.”
Körkeyïn pö para sapipun nyo kikimönokyï ngorï
(Mat 21:33-46; Mrk 12:1-12)
9 #
Isa 5:1. Kitas tagh Yeso kïmwochï chane körkeyïn nyo lentöy, “Kikatkat chi parenyi nyo pö sapipun akumönokyï ngorï. Atolapay kïrutö kore anka akïtöpö wölini nyo kogh. 10Otini kirir sapipun, kïyonta mötworintenyi wölo mi ngorichay tökwipchï akwe walak. Wölo kimuny chane mötworintonay akïyon kïwö kïtuw. 11Kïtas tagh kiyonta mötworinte anka. Kimuny chane nyoni tïkwïl akutö arasï atolapay kïyon kïwö kïtuw. 12Kïyonta chichay ngat mötworintenyo pö sömök. Kïmuny ngorichay nyinte tïkwïl lönay, akutulö paranay. 13Atoni nyu kunonsyö chito par lö, kïgh ne nyo ‘Oghan nya? Konyorwan! Oyontonan werïnyan nyo le chamanenyan, konyïtöy ana nyinte.’ 14Wölo otini kisïwa ngorichay nyinte, kïngölonchï kegh lö, ‘Anyï nyu mïlinto par. Ketïghö kïma tökïlïkwï chicho tïkuchi.’ 15Kutul chane weray ompö paranay pö sapipun atolapay kïtïgh.”
Kïtep Yeso pïchay kïteröy nyinte lö, “Olentekwa idone chito par ngorichoni? 16Nyomwowok, ngwïnöy kïpöröy chane akutö pikö walaka kïngor pareto sapipun.”
Nyini kilïm chane ngalechoni kïlö, “Purörö! Nya kïkïr yïmö meghisyö choni!”
17 #
Tum 118:22. Kïtopön Yeso chane akï lö, “Pköchinokwa lö ne nyu Kikirutchay lentöy,
‘Kawaghaka koghay kisas tekï lö kwïle
kïlïkwï kada nyini tighöy kot kïmïkul?’
18Chi anka tïkwïl nyo pïtyini koghoni, kenyoknyoköy kïlïkwï mïnchïran, kïnyïl ato rulchï chi koghoni, kïngoghöy nyinte lö körpïs.”
Ngala kwaghata surï
(Mat 22:15-22; Mrk 12:13-17)
19Kimukyï koneti kirurut nko tïsï cho echön kïnam Yeso ompö atoni, ompöwölo kisöwï lö, kingölono körkeyïnoni chane. Wölo kimemïcha kïnam ompöwölo kuwagh pich. 20Kïlenyona kïyar chane pöroyïn anka tökïnam nyinte. Otini kighöy lenyoni, kïyonta ghotï cho kigh kegh pich cho karamach tökumï kïnama Yeso ngal cho kimwoghöy, atolapay kuonkoghchï nyinte mori soch. 21Kïlenchï, pïchay Yeso, “Konetin, kinkïtöcha lö, imwoghenyi ainetöy kïpö man. Kinkïtöcha tïkwïl lö, mekïlenyinye pich ainetenyi ompö man machata Tororöt ompö pich. 22Mwowecha köny ngölyontonï. Mïchinecha kekwöghchinö surï Kaisari nya anta ewo?”
23Wölo kïsöwï Yeso ngöghöptöngwa, kïlenyona kïlenchï, 24“Oporwanïn ya ropïyon.”
Kïtep pïchay lö, “Pö ngo mötï nko kaynanï kikikirchi ropïyontonï?”
Kïlö, “Pö pöytoghin.”
25Kïlenchï Yeso, “Otönö Kaisari tïkuchi, otö Tororöt chechi.” 26Kïlenyona kïmökumïcha kïnama Yeso ngölyon nyo kimwagha tawu pich. Wölo kïsisyö lökïr, akïtöngönchï wölini kiyokyï nyinte teputkökwa.
Kangalana Yeso paraku kitutunöt
(Mat 22:23-33; Mrk 12:18-27)
27 #
Ist 23:8. Kïpkonchï Yeso pipö Sadukaytin* walaka pichoni kï pipö Yaudi cho lentöy metutucha pich cho kimeghö. Kipka kïtep nyinte lö, 28#Krt 25:5. “Konetin, mwowecha Kirurut pö Musa lö, ‘Ato rapas chi nyo kitïng korkenyi nyo kitomönye kïsïch monïng, kïmïchini kïmïl werïngwa anka kokononi tökïyichï monïng weri nyay karapas.’ 29Kimi nyu werpö chi cho le mut nko odeny. Kïkensyö weri nyo tagh akïma kïtomö kïsïch monïng. 30Atolapay kwip weri nyo pö odeny kokonay akïma tïkwïl. 31Atolapay kwip nyo pö sömök kokonay. Kirïpkegh lenyoni werchay le mut nko odeny. Kimeghö chane löwïr amosïkïcha kokonay monïng. 32Ato mi lötï, kïma kokonay tïkwïl. 33Kïtepichanyi ye nyu lö, pöyitu ngo kokonay ato tutï pich? Ompöwölo kikikwip chane kï mut nko odeny kokononi.”
34Kuyokyï Yeso lö, “Kensïyi akuyiltoy monekwa pich cho pö osiswechï. 35Wölo pich cho töni Tororöt kimukat kututuna ngwen atökïmïl söpon osis cho pkonöy, kïmökensïyicha anta yilta monekwa. 36Melö tökïmeghsot chane ompöwölo möngisïyi le malayken akï monïngo nyinte nyo Töror tya, ompöwölo kiketutunö chane ngwen. 37#Wuw 3:6. Ompö ngalechï pö kitutunöto pich cho kimeghö, olentan Musa nyinte nyo kiporï lasiny atay kikir ngala sïkwïr nyo kinöghöy. Ompö atoni kimwa nyinte lö, Echotyon, ‘Kï Tororöt pö Apraam, akï Tororöt kï Tororöt pö Isak akï Tororöt pö Yakopo.’ 38Meporunye nyoni lö, Tororöt kï Tororöt nyo pö cho sötote amelö nyo pö cho kimeghö? Ompöwölo tïng pich söpon ompö Tororöt.”
39Otini kimwa lenyoni, kïlenchï koneti kirurut cho kimi atoni, “Owöy konetin, keyokyini chane kïsisyö.” 40Kimwa lenyoni ompöwölo kimökumïcha kïtep nyinte teputkö walaka.
Kangalana paraku Kristo*
(Mat 22:41-46; Mrk 12:35-37)
41Kïtep Yeso pïchay lö, “Kölö ne tökïlentöy pich Kristo kï wero Daudi nya? 42#Tum 110:1. Ompöwölo mwoghöy Daudi nyinte ompö Kitapu Tumwöy lö,
‘Kilenchï Echotyon Echotyontenyan,
Töpenö okumpö ewunyan nyo pö tagh,
43ntökïtenö arïntewunyi, punköku.’
44Otï ye kuröy Daudi nyinte, ‘Echotyon,’ kïlïku nyu Masiya* wero Daudi lö ne?”
Körirchï Yeso pich kïripö kegh koneti kirurut
(Mat 23:1-36; Mrk 12:38-40)
45Akwotini kimi pich kïteröy ngalechi, kïlenchï Yeso kinetankachi, 46“Orip kegh koneti kirurut cho chömöy kunisonchegho sïrokökwa cho koghöch atökutakwes pich ompö konyït ompö donyö. Kïlöy chane ngöcher cho mi tagh ompö kori sowut akwighöy lenyoni nko ompö wölo kyomisyegho. 47Söro chane mïsïktin tïkukwa ompö lïs, atolapay kïsagh sowut cho koghöch tökelentöy karamach. Nyoru chane kirwok nyo wow tya.”
Konut nyo pö mïsïk
(Mrk 12:41-44)
Currently Selected:
LUKA 20: PIPÏLIA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
©Bible Society of Kenya, 2019