IINDUMISO 44
44
Iintlangulo ezidluleyo zikhunjulwa ngexesha lenkathazo
Kumongameli: eyoonyana bakaKora: eyokuqiqa.
1Thixo, sivile ngeendlebe zethu, oobawo basibalisela,
Ngomsebenzi owawenza ngemihla yabo, ngemihla yamandulo:
2Okokuba isandla sakho sagqogqa iintlanga, sabatyala bona;
Saviva izizwe, sabanabisa bona.
3Ngokuba àbalihluthanga ilizwe ngekrele labo,
Àbazisindisanga ngengalo yabo;
Sisandla sakho sokunene, nengalo yakho, nokukhanya kobuso bakho;
Ngokuba wawunesisa kubo.
4Wena unguKumkani wam, Thixo;
Yitsho lubekho usindiso kuYakobi.
5Ngawe sobangqula abasibandezelayo;
Egameni lakho sobagqusha abasukela phezulu kuthi.
6Ngokuba àndikholose ngasaphetha sam;
Andisindiswa ngakrele lam.
7Hayi! Nguwe osisindisayo kwabasibandezelayo,
Ubadànise abasithiyileyo.
8NgoThixo sidumisa imihla yonke,
Sibulele kwigama lakho ngonaphakade. (Phakamisani.)
9Noko ke ùsihlambile, ùsihlazile,
Akwaphuma nemikhosi yethu.
10Ùsibuyisé umva phambi kombandezeli;
Abasithiyileyo basiphangile okwabo.
11Wasinikela njengeegusha ezidliwayo;
Wasichitha-chitha ezintlangeni;
12Wathengisa ngabantu bakho, akwazuza,
Akwalinyusa ixabiso labo.
13Wasenza isingcikivo kubamelwane bethu,
Isigculelo nesicukucezo kwabasijikelezileyo.
14Wasenza umzekelo ezintlangeni,
Abokuhlunguzelelwa intloko ezizweni.
15Yonke imihla ihlazo lam liphambi kwam,
Nokudana kobuso bam kundigubungele,
16Ngenxa yezwi lomngcikivi nomnyelisi,
Ngenxa yokukhangela kotshaba nomphindezeli.
17Oko konke kusifikele, asikulibalanga wena,
Asixokanga emnqophisweni wakho;
18Ayibuyanga umva intliziyo yethu,
Ukunyathela kwethu akuthanga gu bucala emendweni wakho;
19Ukuba usityumze endaweni yeempungutye,
Usigubungele ngethunzi lokufa.
20Ukuba besililibele igama loThixo wethu,
Sazolulela kuthixo wasemzini izandla zethu,
21Úbengayi kuyigoca-goca na uThixo loo nto,
Ngokuba ezazi iindawo ezifihlakeleyo zentliziyo?
22Hayi, Ngenxa yakho sibulawa imihla yonke;
Kuthiwa siziigusha zokuxhelwa.
23Vuka, ùlaleleni na, Nkosi yam?
Qabuka, ungasihlambi kuphele.
24Ubusitheliselani na ubuso bakho,
Ukulibale ukucinezelwa kwethu, nokuxinwa kwethu?
25Ngokuba úsibekeke eluthulini umphefumlo wethu,
Sanamathela emhlabeni isisu sethu.
26Khawusuk' ume usincede,
Usikhulule ngenxa yenceba yakho.
Currently Selected:
IINDUMISO 44: XHO75
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Bible Society of South Africa 1975. Used with permission. All rights reserved.