IINDUMISO 101
101
Ukuzimisela komphathi ukuba abe lilungisa
EkaDavide. Umhobe.
1Ndiya kuvuma ngenceba nangomgwebo;
Ndiya kukubethela uhadi, Yehova.
2Ndiya kuqiqa indlela yengqibelelo;
Ùya kuza nini na kum?
Ndiya kuhamba ngengqibelelo yentliziyo yam
Phakathi kwendlu yam.
3Andiyi kubeka phambi kwamehlo am
Nto inobutshijolo.
Ukwenza ngokunxaxha ndikuthiyile,
Akuyi kunamathela kum.
4Intliziyo ejibilizayo iya kukhwelela kude kum;
Into embi andiyi kuyazi.
5Omhlebayo ummelwane wakhe ngasese,
Lowo ndiya kumbhangisa.
Omehlo aqwayingileyo, ontliziyo igungubeleyo,
Lowo andinakumthwala.
6Amehlo am akwabanyanisayo ezweni,
Ukuba bandiphahle;
Ohamba ngendlela yengqibelelo,
Lowo makandilungiselele.
7Akayi kuhlala phakathi kwendlu yam
Owenza inkohliso;
Othetha ubuxoki akayi kuqina
Phambi kwamehlo am.
8Imiso ngemiso, ndiya kubabhangisa
Bonke abangendawo belizwe,
Ukuze ndibanqumle emzini kaYehova
Bonke abasebenzi bobutshinga.
Currently Selected:
IINDUMISO 101: XHO75
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Bible Society of South Africa 1975. Used with permission. All rights reserved.