Mattheos 9
9
1Hehan wata kin en okipe c̣a akasanpa kihde c̣a iye totonwe kin en ki.
2Unkan iho, wicaśta ṭaṭake cin wan owinja akan wanka e he en ahipi. Unkan Jesus wacinyanpi kin wanyake c̣ehan ṭaṭake cin heciya; Cinś, cante waśte wo; wayaḣtani kin nicicajujupi ce.
3Unkan iho, wowapi kagapi kin wanjikji iyakitedan hekiciyapi; Wicaśta kin de śicaya ia.
4Unkan Jesus canteyuzapi kin wanyaka hehan heya; Tokeca cante mahen taku śica awacannipi he.
5Wayaḣtani kin nicicajujupi ce, eyapi; qa iś; Najin qa mani wo, eyapi kin, unma tukte waśakadan he
6Tuka Wicaśta Cinhintku kin woaḣtani maka akan kajuja kta okihi e he sdonyayapi kta; hehan ṭaṭake cin heciya; Najin wo, nitowinja ehdaku qa tiyata hda wo.
7Unkan najin hiyaye c̣a iye ti ekta hda.
8Tuka wicota he wanyakapi hehan yuśinyayapi, qa Wakantanka wicaśta wookihi hinsko tanka wicaqu kin he yatanpi.
9Unkan Jesus hetanhan iyoopta iyaya hehan wicaśta wan Mattheos eciyapi, mazaska mnayanpi kin en iyotanka he wanyaka; qa heciya; Miyahna u wo. Unkan najin hiyaye c̣a ihakam iyaya.
10Unkan ti mahen wota iyotanka yanka hehan, iho, mazaska mnayanpi waḣtanipi sa ko ota en hipi, qa Jesus kici iyotankapi, waonspewicakiye cin om.
11Unkan Pharisee kin iś he wanyakapi hehan waonspewicakiye cin hewicakiyapi; Tokeca Waonspekiye nitawapi mazaska mnayanpi waḣtanipi sa ko om wota he.
12Unkan Jesus he naḣon qehan hewicakiya; Tona zanipi kin hena pejihutawicaśta cinpi śni, tuka wayazankapi kin.
13Tuka ya po, qa de taku kapi hecinhan sdonya po; Wowaonśida iyomakipi qa wośnapi wacin śni. Wicaśta owotanna wicakico wahi śni, tuka waḣtanipi sa iyopeiciyapi kta on wahi ce.
14Hehan Johannes waonspewicakiye cin en hipi qa heciyapi; Tokeca unkiye qa nakun Pharisee kin ijehan akiḣanunkic̣iyapi, tuka waonspewicayakiye cin akiḣanic̣iyapi śni.
15Unkan Jesus hewicakiya; Wakankiciyuza cincapi kin tohanyan tawicu ton kte cin om un kinhan, hehanyan token ecin iyokiśicapi kta he; tuka anpetu u kta tawicu ton kte cin ewicakiciyakupi kta, unkan hehan akiḣaniciyapi kta.
16Tuwedan śina teca onśpa wokoyake tanika en akihdag ton śni; kinhan onśpa teca qon he mnawahe kta qa sanpa tanka ḣdecahan aya ece.
17Nakun miniśa teca ojuha tanika en okaśtanpi śni ece; kinhan ojuha kin napopa, qa miniśa kin skepa, qa ojuha kin ihangyapi ece. Tuka miniśa teca ojuha teca en okaśtanpi ece, hecen napin tanyan yuhapi.
18Hena hecen ewicakiya icunhan, iho, wicaśta itancan wan en u qa canpeśka makehde inajin qa heciya; Micunkśi nakaha ṭa, tuka en yau qa nape on ayaputake cinhan kini kta.
19Unkan Jesus najin qa kici hda, nakun waonspewicakiye cin.
20Unkan iho, winoḣinca wan waniyetu ake nonpa wayazanka, we ece iheya, he idazatanhan en u qa taśina opapun kin yutan:
21Taśina kin hee kaeś mdutan kinhan amasni kta ce, cante mahen eye c̣a hecon.
22Tuka Jesus ihdamna, qa wanyake c̣ehan heya; Cunś, cante waśte wo; wacinyaye cin he asniniyan ce. Unkan wihiyayedan oape kin he en winoḣinca kin asni.
23Unkan Jesus wicaśta itancan qon ti kin en i, qa tona cotanka yajopi, oyate ceyapi ko wanwicayaka;
24Hehan hewicakiya; Ako iyaya po; wicinyanna kin ṭe śni, tuka iśtinma ce. Unkan iḣaḣapi.
25Tuka oyate tankan hdicuwicayapi, hehan ti mahen i, qa nape on yuza; unkan wicinyanna kin inajin.
26Unkan he makoce kin owancaya oyakapi.
27Unkan Jesus hetanhan iyoopte iyaya, hehan wicaśta nom iśtagongapi kin hena ihakam yapi, howayapi qa heyapi; Dawid Cinhintku onśiunkida miye.
28Unkan ti mahen iyaya, hehan wicaśta iśtagongapi kin en hipi: Unkan Jesus hewicakiya; Hecen ecamon kta owakihi wicayadapi he. Unkan, Han, Itancan, eyapi.
29Hehan iśta en wicayutan qa heya; Wacinyayapi kin iyecen ecaniconpi nunwe.
30Hecen iśta hdukawapi. Unkan Jesus waśagya wahokonwicakiye c̣a heya; Ito tuwedan sdonye kte śni
31Tuka tankan hdapi hehan makoce kin he owancaya nina oyakapi.
32Unkan hena iyayapi hehan iho, wicaśta wan ia okitpani, wakan śica yuhnaśkinyan, he en ahipi.
33Unkan wakan śice cin napeyapi hehan ia okitpani qon ia; unkan oyate kin inihanpi qa heyapi; Israel en tohinni decen wanyakapi śni tuka qon.
34Tuka Pharisee kin heyapi; Wakanśica itancan kin on taku wakan śica napewicaya ece.
35Unkan Jesus otonwe kin owasin, otonwe ciqadan ko iyaza un, omniciye tipi yuhapi kin ohnahna waonspekiye c̣a wokiconze wotanin waśte kin he oyaka ece; qa wayazankapi owasin, oyate kin en teḣiya unpi ko asniwicaya ece.
36Tuka wicota wanwicayaka hehan onśiwicakida; nina mdokiṭapi qa enanakiya iyayapi ece, taḣinca wanunyanpi tuwedan wicayuhe śni iyececa.
37Hehan waonspewicakiye cin hewicakiya; Awicakehan woksapi kin he tanka, tuka ḣtanipi kte cin hena tonana:
38Heon etanhan woksapi en Itancan kin iye tamaga kin en wicaśta ḣtanipi kte cin hena hiyuwicaye kta icekiya po.
Currently Selected:
Mattheos 9: DAKOTANT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Copyright 2015 American Bible Society. All Rights Reserved.