Mattheos 7
7
1Wayacopi śni po, hecen niyacopi kte śni.
2Woyaco tukte e on wadacopi hecinhan he on niś eya niyacopi kta; qa wiyutapi tukte e on widutapi eca hee on winiciyutapi ece e kta.
3Qa nisunka iśta kin en takuśni yanka e tokeca wandaka he; qa cankaga wan niiśta ohna yanke cin he wanyahdake śni.
4Qa iś token nisunka, Ito niiśta kin etanhan takuśni kin icicicu kta, eyakiye kta he; qa iho, cankaga wan niiśta ohna yanka ce.
5Wanaic̣iḣman, tokaheya cankaga iśta ohna niyanke cin he hduśdoka wo; qa hehan takuśni nisunka iśta ohna yanke cin he iyacu kta tanyan wandake kta.
6Taku tona wakan kin hena śunka wicaqupi śni po, qa inyan teḣika nitawapi kin kukuśe wicitokam eḣpeyapi śni po; okinni siha on amanipi kta, qa akeś hdicupi qa niyaḣdecapi kta.
7Da po, kinhan nic̣upi kta; ode po, kinhan iyeyayapi kta; en katoto po, kinhan niciyuḣdokapi kta.
8Tuwe da eca icu ece; qa tuwe ode eca iyeya ece; qa tuwe tiyopa katoto eca he kiciyuḣdokapi ece.
9Unkan enitanhanpi wicaśta wanji cinhintku aguyapi kida kinhan, inyan wanji qu kta he.
10Qa hogan kida kinhan wamduśka wan qu kta he.
11Heon etanhan niye niśicapi eśta, taku waśte nicinca wicayaqupi kta onnispepi ehantanhan, Niyatepi maḣpiya ekta un kin he, sam iyeya tona kidapi kin, taku waśteśte wicaqu ece e kta.
12Heon etanhan taku tona wicaśta ecaniconpi kta yacinpi kinhan, hena owasin ecawicakicon po; woope qa wicaśta wokcanpi kin iho hee.
13Tiyopa ciqadan kin he ohna ya po; Tiyopa kin tanka qa canku nakun tanka wicotakuniśni iyahde, qa ohna iyayapi kin wicota ḣinca.
14Tuka tiyopa kin ciqadan qa canku nakun ocistiyedan wiconi iyahde; qa wicaśta tonana iyeyapi ece.
15Wicaśta wokcan itonpiśni kin hena kowicakipa po; hena taḣinca wanunyanpi iyecen koyag en nihipi, tuka mahen śunktokeca wayapota ece kin hecapi.
16Waskuyeca tawapi kin on sdonwicayayapi kta. Wicaśta wapepeka etanhan hastanhanka yuśpipi he, qa toka hu kin etanhan suken waskuyeca icupi he.
17He iyecen can waśte owasin waskuyeca waśte icaḣya ece; tuka can śice cin waskuyeca śica aicaga ece.
18Can waśte kin he waskuyeca śica icahye kta ohihi śni; qa nakun can śice cin he waskuyeca waśte icaḣye kta ohihi śni.
19Can otoiyohi waskuyeca waśte aicage śni kin he kawankapi qa petan eḣpeyapi ece.
20Heon etanhan waskuyeca tawapi on sdonwicayayapi kta.
21Tona, Itancan, Itancan, emakiyapi kin owasin maḣpiya wokiconze kin en yapi kte śni; tuka tuwe Atewaya maḣpiya ekta un kin tawacin kin ecen econ kinhan hee en un kta.
22Anpetu kin he en wicota hemakiyapi kta; Itancan, Itancan, nicaje on wiunyukcanpi śni he; qa nicaje on taku wakan śica napewicunyanpi; qa nicaje on wicoḣan tanka ota econkupi ce.
23Tuka hehan hewicawakiye kta; Tohinni sdonciyapi śni, wicoḣan śica ecanonpi kin mitantanhan iyaya po.
24Heon etanhan tuwe mioie kin dena naḣon, qa ecen econ kinhan, he wicaśta ksapa e imdacin kta, he qe imnija wan akan ti kicaga.
25Unkan nina magaju qa minitan aya; nakun tateyanpa ḣinca, qa tipi kin he en iheya, tuka hinḣpaye śni; inyan akan kagapi nakaeś.
26Qa tuwe mioie kin dena naḣon, tuka ecen econ śni kinhan, he wicaśta witkotkoka iyececa, he wiyaka akan tipi kicaga.
27Unkan nina magaju qa mini tanka icaga, nakun tateyanpa ḣinca, qa tipi kin he en iheya; unkan hinḣpaya; qa ihangyapi kin he tanka.
28Unkan Jesus wicoie kin dena ihunnikiya, hehan wicota wahokonwicakiye cin on yuśinyayapi.
29Wanji wookihi yuhe cin iyecen wahokonwicakiya, qa wowapi kagapi econpi kin iyecece śni.
Currently Selected:
Mattheos 7: DAKOTANT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Copyright 2015 American Bible Society. All Rights Reserved.