मत्ती 8
8
कोढ़ इन रोगी इक चंगा माळोद
(मरकुस १:४०-४५; लूका ५:१२-१६)
1याग यीशु आ पहाळी मा टु ल्यालमा ईळदुन, रा ऊंद धोळ्द भीळ आऊन हिंद आगेत. 2अदिक नोळी, ऊंद कोढ़ इन रोगी मंळसा हात्ती बंदकु आऊक प्रणाम माळदुन अदिक अंदुन#८:२ नानी साफ माळ; हिंग मानसोर कि ईद बिमारी मंळसा अक न्यायविधी इन प्रती मैला माळोद., “हे प्रभु, अगर नी चाहास्या, रा नानी शुद्ध माळ सकत्या.”
3यीशु कय मुंद माळकु आऊक मुटदुन, अदिक अंदुन, “ना चाहसतीन, नी शुद्ध आगेग.” अदिक आव तुरन्त कोढ़ इन रोग देल शुद्ध आगेदुन. 4बाक यीशु आऊन से अंदुन, “नोळ, यारीकु हेळबाळेत, लेकीन होगकु तान तान इक याजक उक तोर्स अदिक मूसा अन आदेश इन अनुसार भेंट येर्स, ताकी लॉकुर साटी गवाही आगुल.”
रोमी सूबेदार उन दास उक चंगा माळोद
(लूका ७:१-१०)
5याग यीशु कफरनहूम नगर दा बंदुन रा ऊंद रोमी सिपाहीगोळ्द सुबेदार आऊन हात्ती बंदकु आऊन से विनती माळदुन, 6“हे प्रभु, नान दास उक लकवा होळ्द बुटाद अदिक आव हापाळ दुख दा आन.”
7आग यीशु सुबेदार से अंदुन, “ना बंदकु आऊक चंगा माळाईन.”
8सुबेदार उत्तर कोट्टुन, “हे प्रभु, ना ई लायक हैलेच कि नी नांद मान्ना ताका बंद्या, लेकीन सिर्फ आग्या कोटबुळ रा नान सेवक चंगा आगेदान. 9यतिकी ना भी जिम्मेदार मंळसा हुईन, अदिक सिपाही नान हात्ती आर. याग ना ऊंद से अनतीन, ‘होग!’ रा आव होगतान; अदिक दुसरा से अनतीन, ‘बर!’ रा आव बरतान; अदिक याग तान दास से अनतीन, ‘ईद माळ!’ रा आव माळतान.”
10ईद केळकु यीशु उक अचम्भा आत, अदिक जो आऊन हिंद बरोर आंदुर से अंदुन, “ना नीम से खरा माताळतीन कि ना इस्त्राएल दा भी हिंग मजबुत विश्वास नोळीदील. 11#लूका १३:२९अदिक ना नीम से अनतीन कि पूर्व अदिक पश्चिम टु हापाळ सा लॉकुर बंदार अदिक आंदुर भोज दा अब्राहम, इसहाक अदिक याकूब उन सांगुळ स्वर्ग इन राज्य दा कुरतार. 12#मत्ती २२:१३; २५:३०; लूका १३:२८लेकीन राज्य अन्द औलाद व्हार्या अंधार दा हाक्कु आदार: अल वोरलोद अदिक हल्लगोळ्द कच्चोद आदीत.” 13आग यीशु सुबेदार से अंदुन, “होग, ह्यांग नीन विश्वास आद, हांग अच नीन साटी आगुल.” अदिक आऊन दास अदा घळी दा चंगा आगेदुन.
यीशु हापाळ रोगीगोळी चंगा माळतान
(मरकुस १:२९-३४; लूका ४:३८-४१)
14यीशु याग पतरस उन मान्या बंदुन, रा आव आऊन आत्ता अक तेज मय देल बिदकु नोळदुन. 15यीशु आकिन कय मुटदुन अदिक आकिन मय ईळदोदव, अदिक आक यदकु आऊन स्यावा माळली कुरतुर.
16याग द्याव आत आग आंदुर आऊन हात्ती हापाळ सा लॉकुरी तंदुर यारदा दुष्टआत्मागोळ ईरव अदिक यीशु आ दुष्टआत्मागोळी तान वचन देल तेग्द बुट्टुन; अदिक सप्पा रोगीगोळी चंगा माळदुन. 17#यशायाह ५३:४यतिकी जो वचन यशायाह भविष्यवक्तागोळ द्वारा अंदकु आगीत अद पुरा आगुल: “यीशु खुद नाम कमजोरीगोळी हुळदुन अदिक नाम बिमारगोळी नेगुकु दुर माळदुन.”
यीशु उन चेला बनसोद किमत
(लूका ९:५७-६२)
18यीशु याग तान नाकु दी ऊंद धोळ्द भीळ नोळदुन रा चेलागोळी झील इन आप्पाटी होगोद आग्या कोट्टुन. 19आग ऊंद शास्त्री हात्ती बंदकु आऊन से अंदुन, “हे गुरु, नी यल होद्या, ना नीन हिंद होट्ट बराईन.”
20यीशु आऊन से अंदुन, “कोल्यागोळ गुफा अदिक आकाश इन पक्षीगोळ ग्वादा ईरताव; लेकीन मंळसा अन पार उन साटी ताल्ला होचकोमोद भी जागा हैलेच.”
21मात्त ऊंद चेला आऊन से अंदुन, “हे प्रभु, नानी पयले होगगोळ कि ना तान आप्प उक नळसाईन.”
22यीशु आऊन से अंदुन, “नी नान हिंद आगेग, अदिक सोद्द मंळसागोळी तान मुर्दा नळ्सगोळ.”
तुफान इक शांत माळोद
(मरकुस ४:३५-४१; लूका ८:२२-२५)
23याग यीशु ड्वांगा मा येरदुन, रा आऊन चेलागोळ आऊन हिंद आगेदुर. 24अदिक नोळी, अचानक झील दा ऊंद हिंग धोळ्द तुफान येळ्त कि ड्वांगा लयरगोळ से मुचली हत, लेकीन यीशु मिंगोन. 25आग चेलागोळ हात्ती बंदकु आऊक येब्सदुर अदिक अंदुर, “हे प्रभु, नामी ऊळ्स, नाव मुळ्केतेव.”
26यीशु आंदुर से अंदुन, “हे अविश्वासीगोळा, यती अंजेतीर?” आग आव यदकु आँधी अदिक नीर इक डटकार्सदुन, अदिक सप्पा शांत आगेत. 27अदिक आंदुर अचम्भा माळकु अनली कुरतुर, “ईव ह्यांग मंळसा हुन कि आँधी अदिक नीर भी ईऊन आग्या मान्सताव.”
दुष्टआत्मा-ग्रस्त मंळसागोळी चंगा माळोद
(मरकुस ५:१-२०; लूका ८:२६-३९)
28याग यीशु आप्पाटी गदरेनियों अन प्रदेश दा पोहचुसदुन, रा येढ्ढ मंळसागोळ यारदा दुष्टआत्मागोळ ईरव कब्रगोळ दा टु होटकु आऊक सिकदुर. आंदुर ईट भयानक ईरोर कि याऊ आ हादी देल होग ईला सकोन. 29आंदुर चिल्ळास्कु अंदुर, “हे परमेश्वर उन पारा, नाम्द नीन से येन क्याल्सा? येन नी समय से पयले नामी दुख कोळली इल बंद्या?”
30आंदुर से थ्वाळासा दुर मा हापाळ सा हंदीगोळ्द ऊंद झुण्ड आळोद. 31दुष्टआत्मागोळ आऊन से ईद अंदकु विनती माळदव, “अगर नीनी नामी तेगोद अच आद, रा आ हंदीगोळ्द झुण्ड दा कळुबुळ.”
32आव आ दुष्टआत्मागोळ से अंदुन, “होगी!” अदिक आ दुष्टआत्मागोळ होटकु हंदीगोळ दा होक्केदव अदिक नोळी, पुरा झुण्ड ऊतार मा टु झील इन नीर दा होगकु बित्त अदिक मुळ्ककु सोतोत.
33आ हंदीगोळी आळसावाळेर अल टु ओळदुर, अदिक नगर दा होगकु ई सप्पा मातगोळी अदिक यारदा दुष्टआत्मागोळ ईरव आंदुर्द सप्पा हाल केळ्सदुर. 34आग पुरा नगर इन लॉकुर यीशु से भेंट माळोर साटी होटकु बंदुर, अदिक आऊक नोळकु विनती माळदुर कि नाम क्षेत्र दा टु व्हार्या होटोग.
Currently Selected:
मत्ती 8: NTHaa20
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020