Halloo 18
18
Abrahami Bushoon Shiyemmo Tuno Gibenikkeyoo
1Ikke areddoon, aabee qellayooch Abrahami Mamirichi goree gaꞌooch beeti, bi duukkaanee gaaddaafooch koteꞌi bi beetaa, Doono Yeeri biich bekkehe. 2Abrahamiyoo kaama ciinniꞌi, keejje asheenaꞌo bi ciinooch neexee beetinaꞌon beeggiye. Boonoshin beeggiꞌi, bi duukkaanoochee boonoshi beetooch wocona hammiye; showooch guufeꞌi boonoshin diggiihe.
3Ishichiinoo iye: “Ta doonocho, ne aafoochaa gidoo daneto ta tunegaata, ‘Ne guuno taan beshe hammaahine’ iyaa neen qollehoye. 4Hini michi yiirooch kote kashebote. Giisheche aaco waataa ittoshi baatoon machebote. 5Ittoshi guuno ta waan waato ittoshine. Ebich ittoshin bi kupphiyemmoyich, giisheche maayoon ta deebaa mamote. Aroyee gubb hammemmo ittoshine” iye.
Boonoshiyoo “Gaawiye; ne gettetoommon tuniibe” iyeete.
6Ebich Abrahami afaafinoona Saari beeti duukkaanooch giyiye. Saarichoo “Eke kaateree gaawe qacini buddinoochee keejje qeelloon#18:6 Keejje qeello hiye shifay bedoone. kichi xiriꞌiree koshon kachiibe” iye.
7Aroochee Abrahami bi miimo beetooch wocona hammii, bariyee gubbenoon deebii bi gaddiretoyich immiye; biyoo bekkech kaatee bashiꞌi, kachii qanniihe. 8Abrahamiyoo gurimoonaa xalle ejjoonon, ebi qanniti meenonoo deebii iibbeenaꞌoyich giddiihe. Boonoshi maa beetaa, Abrahami are michi yiirooch boonoshi aafooch neexee beehe.
9Boonoshiyoo Abrahamin “Ne mechee Saari aayane?” ii echeheete.
Abrahamiyoo “Okk duukkaanee maaciye bi beeto” iye.
10Ebi iibbeenaꞌoochee ikkoo Abrahamich, “Waabeeti natooch ebi goora iberoon ne waan wotteree woyemmo taane; ne mechee Saariyoo anaami bushoon shiyemmine” iye.
Saariyoo biyee gubb beeti duukkaanee kellooch beechaa, ishi yibbaatoon ellaa beehan. 11Abrahaminaa Saarina geenaa baayetinaꞌone; maacheenaꞌoyich tuneebeeti doyoo bi waanee echee yagitone. 12Ebich Saari “Hini geenee baayeti ta, anaamona dano taan emirikkehe? Wotta ta doonoo oogeton geenetone” iyaa bi mulloona gabaꞌa miiccahan.
13Arooba Doono Yeeri Abrahamich ishichiye: “Saari ‘Geenaa baayeti ta, iberoon bushoon shiyehota?’ iyaa, amoyich miiccahane? 14Iberoon Doono Yeerin mawemmi mooyo beete? Waabeeti natooch ebi goora ne waan wotteree woyemmo taane; Saari anaami bushoon shiyemmine” iye.
15Saariyoo bi shattetoyich, “Miicaane taane” iyaa nookkahan.
Tunebaani aroo “Iberoon miicceti neene” iye.
Abrahami Sodoomich Doono Yeerin Qollo
16Ebiyee gubb, asheenaꞌo aroochee tiyii qaxiriyeete. Hammii, Sodoomi dugilla ciicheebeeti xaaꞌooch shaggiyeete. Abrahamiyoo boonoshin deenna tookkii hammitone. 17Hammii boonoshi beetaa, Doono Yeeri ishichiye: “Tuniiya ta iyaa beeton Abrahamich aachehota? 18Abrahami shiijjeroo iberoon arichetonaa giidechi aagetoona tunemmone; showee toommeexi aageteenaꞌo bulliyoo biinna diireyemminaꞌone. 19Kaamoonaa tate mooyonon tuniyoona ta gommon boonoshi quyemmoyich, bi bushiisheenaꞌonaa biyee gubbi shiijjereenaꞌona taach deꞌa ii beetinaꞌon bi tuniyemmoyich, biin kaacceto taane; bi bushiisheenaꞌo ebin boonoshi tuniigaata, biich ta getteti mooyo bullin tuniyemmo taane” iye.
20Doono Yeeriyoo Abrahamich ishichiye: “Sodoominaa Gomoorinochi toommooch cookeebeeti cookoo woddetone; boonoshi axaaxoo oogeton maggoone. 21Ebi boonoshi mooyo ta waayetoommon, iberoo bi tunoonaa tunee bi qayonon xiishoyich, boonoshi waan kindaaniye ta beeto” iye.
22Arooba gutte asheenaꞌo aroochee boonoshi aafoon Sodoom waan wochiꞌi qaxiriyeete. Tunetaa Abrahami Doono Yeeri aafooch neexeꞌi beehe. 23Abrahamiyoo giddeꞌi ishichiye: “Iberoon cadiqe ashoon axaaxechona tookki hidi aalliyenne? 24Aache cadiqe asheenaꞌo ebi katemee daggooch danegaatoche? Ebi katemooch beeti aache cadiqe asheenaꞌoyicha getiree are katemoon maaraanoon iberoon bullin hidi aalliyenne? 25Ebiyoommi gaboo ne waanee wohe! Cadiqe ashoon axaaxechona tookkii wuxoo, cadiqe ashoonaa axaaxechonochi toommooch ikkochii nalloo, ebiyoommi shuunoo ne waanee wohe! Showee toommooch beetinaꞌo bullichi Nallechi ne, dayinnetaalloon nallenne?” iye.
26Doono Yeeriyoo “Sodoom aache cadiqe asheenaꞌon ta danegaata, boonoshicha getiree arooch beetinaꞌo bullin maaremmo taane” iye.
27Abrahamiyoo wochiye; ishichiinoo iye: “Ta Doonocho, hini showoochee halleeti ta neenna tookkii yibbaateya aafoon ta kupphetoyich, taan maaribe. 28Diqqich aachoochee uuchoo shappigaatoche? Ebi shappiti uuche asheenaꞌochi naboona katemoo bullin hidi aalliyenne?” iye.
“Aroochee aabbaa uuche cadiqe ashoon ta danegaata, katemoon aalliyaache” iye.
29Wotta ishichiye: “Diqqich arooch aabboo baach danegaatoche?” iye.
Doono Yeeriyoo “Aabboyicha getiree, katemoon aalliyaachemmo taane” iye.
30Abrahamiyoo “Ta Doonocho, kaareyaahine. Wochinnoon getona. Diqqich shaashoo baach danegaatoche?” iye.
Doono Yeeriyoo “Arooch shaashoon ta danegaata, katemoon aalliyaachemmo taane” iye.
31Wochinnoon “Ta Doonocho, neenna tookkii yibbaateya aafoon ta kupphetoyich taan maaribe. Diqqich arooch hiyoo baach danegaatoche?” iye.
Doono Yeeriyoo “Hiyoyicha getiree, katemoon aalliyaachemmo taane” iye.
32Abrahamiyoo “Ta Doonocho, kaareyaahine. Ikke wottoon baach getona. Diqqich arooch aashiroo baach danegaatoche?” iye.
Biyoo “Aashiroyicha geti katemoon aalliyaachemmo taane” iye.
33Doono Yeeriyoo Abrahamina tookkii yibbaatoon bi ciichitoyee gubb, hammiye. Abrahamiyoo bi kexooch wottehe.
Currently Selected:
Halloo 18: KBRC
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
SIM International, 2020.