Lucuotuv 10
10
Piter Hne Kornelias
1Sisaria khy lieta Kornelias ama tapapaa pakha za aw te, “Italy Rieka Buv,” ama tapa Rom rieka tie zaa uvtuv riebyi ta a cuo. 2Ama ca a ingchungkhue tie yalya hneta biena luota a pakangpahaasapa hne Khazing a ciyzaapa, siypasa tie kha pahyasa pata pi yite Khazing'a luo thlaa a chuo pari pata a cuo. 3Ningkha, zuoluo caw siymaluo pathung hraw ta muocuo hmung te, capa chunglie ca avuoming pakha a vya ngie te, “Kornelias,” tapata a u pakha siephele khata a hmung. 4Avuoming ca a ciysapuo pata mangpasie te, “Khaapama, Abyipa,” a ta. Avuoming ta, “Na thlaachuona hne siypasa na pipa ca vuoruo luo kha kie te Khazing ta maw vyi. 5Ata hingta Joppa luo kha Piter ama tapa Simon va ku riypata cawsaa pathlie la, 6ama ca riyliy kielie a awpa, savang re a hriepa Simon ing lie khana a tlung,” a ta. 7Ama'a lie bie a ripa avuoming ama cakuo pahneta sii pahning hne, biena luota a pakangpahaasapa ama a mangchiytuv rieka pakha kha u yite, 8hmang a cuopa bangkhuo kha a chang khu taayita joppa luo kha a pathlie yi.
9A mawluopa zuoluo caw, vaa kupa tie khypuv luo ama va pha'a nang caw khata Piter ca ingthlue luo kha thlaa chuo riypata a kie. 10Piter ca a nang diy te sa a ning khing; sa ama tue nguoluopa khata muocuo a hmung. 11Vuoruo a pahaw te pang haata a tapa hmang suokha, a kiy kiy paliy ta alyi luo ama za pathlapa kha a hmung. 12A chunglie ca phyipaliypa saruopa a phangphang, alyi lie aa thiylepa saruopa a phangphang hne pavaa a phangphang ta ama aw. 13Ueryi suokha ta, “Thu tie, Piter, thie yi la ning tie,” a ta. 14Cuorasala Piter ta, “Ning'a va ang Abyipa, a pyalyipa hne a pathe lipa hmang ca khaahmuo ning buo va ang,” a ta. 15Ueryi ta a yihningnapa za chang pakhaa te, “Khazing ta a pathe pata a sapa ca nama ta a pyalyipa ne ta khu vaciy,” a ta. 16Cahaa cata yi thung a cuo khu taata capa hmang ca sungkha ta vuoruo luo ama lathaw pakhaa.
17Piter ca i hmungpa muocuo hing a siyluo khaapatama a cuo aa tapata a kharue a haasa ningta Kornelias ta a pathliepa cawsaa tie kha tlangkhy ama vya chiy. Simon ing kha hiehriy yite thlake a thaa lie amaa daa nguoluo. 18Vya u yite, “Piter ama tapa Simon kha hingpa lie hing a aw maw? ama ta. 19Piter ca muocuo a hmungpa kaw a pacuo nguoluo ning kha, Thlaapa ta, “Simon, cawsaa pathung#10:19 Hluo vie caa-uv suokha lieca pahning ta te caa-uv chekha lieca cazaa tapa ri vayi. na caa huv nguoluo yi, 20Thu la cung tie, a paluolue li pata ziy tie yi, kama ta i vya pathliepa tana ama cuo,” a ta. 21Cacuonakaw Piter ca cawsaa tie'a luo kha cung te, “Kama hingna nama huv nguoluopapaa ta a cuo ang; nama'a vaw hnuochuopa khaapatama a cuo?” a ta yi. 22Iema ta, “Riebyipa Kornelias ta malie a pathliepa tana ma cuo. Ama ca a dangsapa hne Khazing a ciyzaapa ta cuote, Judah ming bangkhuo ta ama pa-uvsathyipa ta a cuo. Na bie ripa thyi riypata Khazing avuoming pakha ta a ing luo naa vaw riypata ama kha bie a chang patana a cuo,” ama ta. 23Cacuonakawta Piter ta iema kha ku yite ing aa patlung sa yi.
A mawluopa ta a pachie te iema hneta a si; Joppa taata zangtuv#10:23 Gk Uvnu zaw chekha zaw ama si ra. 24A hezuoningpa ta Sisaria ama pha. Kornelias ca a tieriy hne a viesaa zaw kha ku yite ama kha ama za mangkhuo nguoluo. 25Peter ing luo a chiy pahne Kornelias ta a hladaw te a phyi thabaw lie vaa bu te aa bie. 26Piter ta ama kha pathu te, “A daa tie, Kama zaw cawsaa tana i cuo ra,” a ta. 27Bie a ripuo pata ing chung luo kha a ngie ca cawsaa hluvpuv amaa tupa kha hmung yite, 28“Judah ming pakha ca Jentail ming a viesaa riypa hne parie riypa hing phungbie ta a thlu tapa ca niema hrahring ta nama pachang; cuorasala ahungkhahmuo a pyalyipa hne a pathe lipa ta i hmung li riypata Khazing ta ina pahmung sa mangtli. 29Cacuonakawta ina vya paku sa tiy ung cata i li pata i vya ziy yi. Khaapanakawma ina vya paku sa ungciy tapa kha ata hing na chang tie ung,” a ta yi.
30Kornelias ta, “Ma hnang luo ata tiy siymaluo pathung hingta, i ing chunglie thlaa i chuo nguoluo pata sungkhapuv ta pang ruopa a buvpa cawsaa pakha i hmielie a vya daa te, 31‘Kornelias, Khazing ta na thlaachuona kha thyi te siypasa na byanapa zaw maw vyi. 32Cacuonakawta Joppa luo kha cawsaa pathlie la Piter ama tapa Simon kha va paku sa tie yi; ama ca riyliy kielie a awpa, savang re a hriepa Simon ing lie khana a aw aa,’ ina ta. 33Cacuonakawta nama ca a catli pata ca vya paku sa yi ang te, nama zaw ngie na chi cate naa vaw. Cacuonakawta ata hing kiema bangkhuo ca Khazing hmielie aw pate, Khazing ta ri riypata aca changpa bangkhuo naathlie riypata ma cuo tli,” tapata a palie.
Jentail Ming Ta Thuophaabie Ama Thyi
34Cakhutaata Piter ta thukhyi yite, “Khazing ta cawsaa pahlyipale vyi tapa kha i pachang, 35cuorasala khaapa mingphang ta a cuo zaw ama kha ciyzaa te aa dangpa hmang a tuepa bangkhuo ca Khazing ta a cuhluo yi. 36Cawsaa bangkhuo Abyipa ta a cuopa Zingsuv Khrih'a taata diena ca Khazing ta Israel ming'a luo a pi yi tapa kha nama pachang. 37Johan ta tiynawna kaw a ri khu taata Galilee taata pathu pata Judah pe bangkhuo capa thuohlaa aa zepa kha nama pachang. 38Khazing ta a aw puo nakawta tuokhaatama Nazareth khypa Zingsuv kha Thlaapa Pathe hne cahrana bya te, tuokhaapa hmang phapa kha tue tema setaa tuechiena rawlie a awpa bangkhuo kha a patluo sa yi tapa zaw nama pachang. 39Kiema ca Judah ruo chunglie hne Jerusalem lieta a tuepa bangkhuo kha a hmungtuv hne pachangtuv tana ma cuo. Ama kha vieluo cunglie pathlie yite ama thie. 40Cuorasala Khazing ta ningthung khu taata thiyna chung taa pathu pakhaa te 41cawsaa bangkhuo'a lie cuo li pata Khazing ta pachangkhyituv ta aa tlawpa kiema'a lie kha aa luo. Thiyna taata a thupakhaa khu taata ama hne ma ning ma dang pakhaw. 42Ama ta, cawsaa zaw kha thuophaabie chang riypa hne ama ca Khazing ta a hringpa hne a thiypa tie bie a rituv riypata a chipa kha pachangkhyituv cuo riypata malie a chang. 43Ama a zangpa bangkhuo a ming ta sue a ngiethena hmung riypa kaw kha profet bangkhuo ta ama za ri, a ta kha,” a ta yi.
Jentail Ming Ta Thlaapa Pathe Ama Hmung
44Piter ta capa bie a ri nguoluo ning ca bie a thyipa bangkhuo cunglie kha Thlaapa Pathe a za cung. 45Thlaapa Pathe lasaw ca Jentail ming cunglie zaw kha bya pata cuote, iema ta thyiliparyi kha cyi yite Khazing ama pathuosapa kha ama hmung tiyta, 46Piter hneta a vaw rapa vangdaw a tepa zangtuv tie ca ama nang dyi a uo. Cakhutaata Piter ta, 47“Ahungma kiema haata Thlaapa Pathe a hmung rapa hingpa cawsaa zaw hing tiy ta tiynawna ang riypa kha a thlu khu'a yi?” a ta. 48Cacuonakaw ta Zingsuv Khrih ming ta tiynawna pi riypata bie a pi yi. Cakhutaata Piter ca ning syi vie malie aw khyi caw thi la ta yite ama thlu.
Currently Selected:
Lucuotuv 10: LNT1
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
New Testament in Chin Lautu © Bible Society of Myanmar, 2015.