MATTHEW 7
7
Pi g am wo s‑koꞌokam has ha ahgad
An g neid g Luke 6:37, 41-42
1“Pi g am hedai has wo ahgad nat pi ab uhpam wo i e nodagi em‑wui. 2Mamt has i masma wo has ha ahgad, t ab wo i nod em‑wui g has ahgadag hab masma. Ab at wo i e nodagi em‑wui mamt has i masma ab wo neidad hema.
3“Pi g am wo si s‑nenꞌoidad g hema chuꞌijig. Tp hems baꞌich i geꞌej g hejel em‑chuꞌijig. Id at heg wo wa wepok mam g chum haꞌichu ab i s‑wuhshdamk wuhij ed mo eda baꞌich i geꞌe haꞌichu ab woꞌo em‑wuhi ed. 4-5Do iattogi mamtp hab wo chei mamt haꞌichu ab wo i wuhshad wuhij ed mo eda g baꞌich i geꞌe haꞌichu ab woꞌo em‑wuhi ed. Hemho wa amt wehpeg wo i apꞌech g pi e‑apꞌedag k haha wo e nako mamt wo i apꞌech g hema pi apꞌedag.
6“Pi g ab hu wo ha ahgid g Jiosh haꞌichu ahga hegam mo pi ab hu tatchua. Heg at wo wa wepok mamt g s‑ta keꞌidam gogogs ab wo ha mah g hekia s‑apꞌekam haꞌichu o g kokji ab wo ha mah g si s‑namkig babiuga. Gogogs at hi ab wabsh wo i nehni k wo s‑koꞌokam has wo em‑juh. T g kokji hi wabsh wo kehiwia g babiuga.
Mamt has masma wo bei haꞌichu
An g neid g Luke 11:9-13
7-8“Ab g wo ha tahnid haꞌichu k ab wo bebhed. Am g wo e gahgidad haꞌichu k wo cheh. Ab g wo shontpagad. T ab wo i e kuhpiꞌo g pualit em‑wehhejed. 9Ahpim oꞌog, namt hig wabsh g hodai wo mah g e‑alidag mat g simito wo em‑tai 10o wabsh g wamad wo mah mat g watopi hidod ab wo em‑tai? 11Chum ams d pi apꞌekam ch eda s‑mahch mamt s‑kehg haꞌichu wo ha mah g e‑aꞌaliga. Wahm hig g em‑ohg Jiosh at woho baꞌich i s‑kehg haꞌichu ab wo em‑mah mamt ab wo tahnid haꞌichu.
12“Am g hab wo ha juhkchid g hemajkam mam has i chum ha elid mat hab wo em‑juhkchid. Bamt masma wehs am hab wo juh mo haschu an oꞌohanas Jiosh heki hu oꞌohana ed.
Mash s‑hasig matt am wo i wahp Jiosh kihdag ed
An g neid g Luke 13:24
13-14“Am g wo i e dagitok Jiosh wui k ab wo s‑wohog elidad. Id at heg wo wa wepok mamt am i wahp al aj kihjeg t amjed k am aj wohg oidch hihim. Pi o muꞌijj hab masma hab e wua. Kumt hab waꞌi masma am wo bei g pi ha huhugedam doakag. (13) Pi o hasig mamt hab wabsh wo junihid g hejel e‑tatchui. Id at heg wo wa wepok mamt ab s‑tadani kihjeg t amjed i wahp k am s‑tadani wohg oidch hihim. Muꞌijj o hab masma hab e wua ch hab ab aihim g Jiawul kih.
Mamtsh has masma wo s‑mai mas hedai s‑wohom d s‑apꞌekam
An g neid g Luke 6:43-44
15“Muꞌi at an wo i wuwha g s‑chu iꞌattomkam k hab wo e aꞌagad mo d Jiosh haꞌichu i tashogiddam. Am g wo s‑ha nenꞌoidad mat pi am hu wo i em‑shul pi apꞌekam ch ed. T wo s‑em‑padchudam hab masma mat g shehꞌe wo s‑muꞌam g kahwal. 16Mt wo s‑mahchk mo pi d wohokam am neidch mo has masma. Nat hig wo e nako g hoꞌi shaꞌi mat wo bahidagt g uhdwis o g suhna? Pegih, t hab wa masma pi wo e nako hegam s‑chu iꞌattomkam mas wo em‑oidk hab wo e juh. 17Neh, heg at wo waꞌi s‑kehg bahidagt s‑kehg haꞌichu wuhshanig. 18T g pi kehg wuhshanig pi kehg wo bahidagt. 19Kumt wo shonch k gam hu wo mei. 20Neh, mt hab wa masma wo ha mai mas hu wa woho d Jiosh haꞌichu i tashogiddam mamt wo nei mas wa woho ab s‑wohog elid g Jiosh.
Matsh haꞌi hab wabsh wo chum e el mo ab si hiwig g Jesus
An g neid g Luke 13:25-27
21“Muꞌijj at hab wo chum ni‑aꞌagad mani d s‑apꞌekam ha‑kownalig ch wabshaba pi am hu hab wo junihid g ni‑ohg Jiosh tatchui. Kut g Jiosh pi am hu wo i ha wahpki e‑kihdag ed.
22“T ab wo i e ai g lodaita tash. T idam hab wo chum kaijjid ab ni‑wui, ‘S‑apꞌekam ni‑kownalig, m‑gewkdagkaj ach am ahgachug g Jiosh haꞌichu ahga ch gam hu i ha wuwhasid g jijawul ch am hab junihim g s‑hasig haꞌichu.’
23“Kunt hab wo chei ab ha wui, ‘Pi ani hekid shaꞌi s‑em‑mahch. Gam g hu wo hihim ab ni‑amjed ahpim mam hab junihim g pi apꞌekam.’ T hemho wa gam hu wo hihi.
Mattsh has masma s‑wihnam wo shondad g t‑doakag
An g neid g Luke 6:47-49
24“Ab g wo s‑wohog elidad g haꞌichu ni‑ahga. T hab wo s‑apꞌek g em‑doakag. Id at heg wo wa wepok matp hems hema s‑wihnam wo shondad g e‑kihta. 25T hab pi wo i gei mat hekid wo hewed k juh k wo s‑gewkam mel g shuhdagi. Pegih, mt hab wa masma s‑wihnam wo gegokkad mo ihda kih mamtp ab wo s‑ni‑wohog elidad.
26“T wabshaba pi wo apꞌek g em‑doakag mamtp pi ab hu wo wohog elidad g haꞌichu ni‑ahga. Heg at wo wa wepok matp hems hema pi wihnam wo shondad g e‑kihta. 27T wo si hewed k juh k s‑gewkam wo mel g shuhdagi. Kut g kihj wo i gehsh k am wabsh wo i e padch. Pegih, t hab wa masma wo i e padch g em‑doakag mo ihda kih mamtp pi ab hu wo ni‑wohog elidad.”
Jesus gewkdag
28Neh, tsh am i haꞌasa ha mashcha g Jesus. Tsh g hemajkam si has i el 29no pi s‑e mamachim ha mashcham. Sh eda hegam mo d chum chehanig ha mashchamdam pi hab masma s‑e mamachim ha mashcham.
Currently Selected:
MATTHEW 7: ood
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2010, Wycliffe Bible Translators, Inc. All rights reserved.