Pula 8
8
1Nikiɗi woyissa Musaa ne : « Woya Aaruna, a ɓay ndooɗi, a raɗisa ŋ kal ci, huluɓ ci na laah ci, mboɓ ci hay, ca riif kur ki. » 2Aaruna ɓayya ndooɗa, a raɗissaa ŋ ɗisik ca raak masuɓ ŋ Misra, mboɓ ca pulohha nga ca, ca riiffa kur ka. 3Heɗ haf caŋ Misra haɓiɗta mand ɗaa na in caŋ ɓa, ɓa nammba ɓek mboɓ laayiɗ ŋ kur ka.
4 Firawna ɓeeɗukka Musaa na Aaruna a woosa ɓa ne : « Kiimaat Nikiɗi, a saɓsoh ɓoo na mboɓ cii, mi na ɓooɓiŋ ngo. Ŋ hey faɗe Israayel ci ɓa kaɗ seeƴka wuu ce. » 5Musaa loffa ɗe ne : « Ee, a fu kilifaani, woya mbehi fu waaɗoha, ŋ hey ɗa kiimɗe fu na dag ciŋ ɗa na ɓooɓiŋ ɗa ne Nikiɗi ap mboɓ ci nik ŋ kahan fu ; ali mboɓ tasanɗi ŋ kur ki ɗal ŋ ɗooƴ kali. » 6Firawna woosa ɗe ne : « Tuma ineem kim. » Musaa woosa ɗe ne : « Ee, ŋ hey wa tume findi fu woyoha po fu inah ne ali in hendɗi na Nikiɗi, Koohiŋ ɓoo. 7Mboɓ ci hey saɓsukohe na ɗa na ɓi kahan fu na dag ciŋ ɗa na ɓooɓiŋ ɗa. Ali mboɓ tasanɗi nga ɗal ŋ kali. »
8Musaa na Aaruna pulohha ɗiskaŋ Firawna. Musaa kiimmba Nikiɗi ŋ ini kaɗ ŋ mboɓ ca a ruhsiɗ ŋ kur ka. 9Nikiɗi teyɗukka kiimaŋ Musaa, mboɓ ca kaannda ŋ ɗooƴ kahan ca, na kur ca na yohon ca. 10Ɓa nangɗohha ca juuk juuk. Kur ka jen oteeɗa ot. 11Findi Nikiɗi woyohee wa, Firawna hotta ne ngisoh raakiɗ ŋ kur ka, a ndengiɗta keeñiŋ ɗe. A sikɗukɗi Musaa na Aaruna.
Naamooni kaahayɗoh : ɓok ca
12Wa Firawna sang ɓa sikɗuk, Nikiɗi woosa Musaa ne : « Woya Aaruna, a raɗis ndooɗiŋ ɗe, a laɓa ŋ kehƴi, ɗuukriŋ merhey mi hey kurke, wa ɓoƴsuk ɓok ŋ ɗooƴ Misra jen. » 13Musaa na Aaruna haɓiɗta ineem findi Nikiɗi woyoha. Aaruna raɗissa ndooɗa, a laɓpaa ŋ kehƴi, ɗuukriŋ merhey miŋ kur ka jen kurukka, wa ɓoƴsukka ɓok. Ca riiffa kur ka, ca nikka ŋ ɓooɓa na ɗoopaat ca. 14Heɗ haf caŋ Misra jeemmba hayiɗ ɓok na in caŋ ɓa, waaye ɓa minɗaa. Ɓok ca taalndiɗta, ca nikka ŋ ɓooɓa na ɗoopaat ca. 15Heɗ haf ca woosa Firawna ne : « Yaahiŋ Kooh weɗ haɓiɗ inii. » Waaye, findi Nikiɗi woyohee wa, keeñiŋ Firawna rissa ndengiɗ, a sikɗukɗi Musaa na Aaruna.
Naamooni nikiisɗoh : caakoof ca
16Wa Firawna sang ɓa sikɗuk, Nikiɗi woosa Musaa ne : « Kim na ɓaaɓa teel ɗah, kurka fu kaɗ coha na Firawna ŋ wahtuuni a na kaɗohe kala, fu woo ɗe ne : “ Nikiɗi woo ne, fu faɗ cuuɓiŋ ɗe wa kaɗ ɗe ñaamka. 17Fu sang ɗah, marka ! A hey ɓeke caakoof laayoh na laayoh ŋ ɓooɓiŋ ɗa na dag ciŋ ɗa na ɗa. Ee di' ! Ca riif kahan ciŋ ɓi Misra, ca ul merhey miŋ kur ki. 18Mbaɗi a hey talsohe Gosen, wi cuuɓiŋ ɗe genoh, po ali caakoof reyanɗi nga. Teemb ndeem, fu hey inhe ne a yi Nikiɗi nik ŋ kur kii. 19A hey tose cuuɓiŋ ɗe ŋ in ci miskiɗ ci aa hee ruhsiɗe ŋ cuuɓiŋ ɗa te wa nikan kim. ” »
20Nikiɗi haɓɗohhaa ɗaa, caakoof laayiɗ tummba eel suusus yakak, ca yipukka ŋ kahan Firawna, na kahan caŋ dag caŋ ɗe na kur ka ; Misra yahrukohha. 21Firawna ɓeeɗukka Musaa na Aaruna a woosa ɓa ne : « Kaɗaat ɗu seeƴka wuu Koohiŋ ɗu, waaye wa nikaat ŋ ɗooƴ kur ki. » 22Musaa loffa ɗe ne : « Muk ! Ineem waas haa, wa in tiimbuuɗ nga ɓi Misra. Ɓa waaɗɗi seeƴuk ci ɓoo joy seeƴuk wuu Nikiɗi Koohiŋ ɓoo. Ɓoo tuma ŋ has ciŋ ɓa ɗah, ɓa tapanɗi ɓoo atoh po ɓoo kaan e ? 23Ɓoo joy kaɗ ini ree tiindu neeh kaahay ŋ bilaf fa, ɓoo seeƴuk nga wuu Nikiɗi, Koohiŋ ɓoo findi a woyoh ɓoo. » 24Firawna woosa ɓa ne : « Ee, ŋ hey ɗu faɗe ɗu kaɗ ŋ bilaf fa ɗu seeƴka wuu Nikiɗi Koohiŋ ɗu, waaye kinaat us lool te kiimɗaat to. » 25Musaa woosa ɗe ne : « Marka ! Ŋ pulee ndii ɗah, ŋ hey kiime Nikiɗi, kim a saɓsoh ɗu na caakoof ci, fu na dag ciŋ ɗa na ɓooɓiŋ ɗa. Waaye kina ɓoo ñaañohis, fu sangoh Israayel ci ne ɓa kaɗ seeƴka wuu Nikiɗi. »
26Musaa kurkohha ɗiskaŋ Firawna, a kiimmba Nikiɗi. 27Nikiɗi teyɗukka kiimaŋ ɗe, a saɓsohha Firawna na caakoof ca, a yi na dag caŋ ɗe na ɓooɓaŋ ɗe. Ali caakoof tasisɗi ŋ kur ka. 28Waaye Firawna taalndiɗta, a ndengɗissa keeñiŋ ɗe. A sannga faɗ Israayel ca ne ɓa coot.
Currently Selected:
Pula 8: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc