Pula 25
25
In ci Israayel ci eɗohan wuu Ɗiska Hooliɗa
1Nikiɗi woosa Musaa ne : 2« Woya Israayel ci ne, ɓa pulɗaat sarah, ɓa eɗ to. Ɓo' nu teyɗuka tum na keeñ soosiɗ ɗah, teyɗukɗaat to wiŋ ɗe.
3In cii ceɗ ɗu na hee rahse nga ɓa : urus, haalis na moos. 4Ɗu hey name rahas : ooy bulo, ooy ruumind eɗfiɗ na ruumind coy na leeŋ.
Ɗu hey rahse find pe', 5und kuy mbaal suupuuɗ ruumind, und inoh cookom#25:5 inoh cookom : a yi farañse na woye "dugong" ; a mand na piipi (ini farañse na woye "dauphin"), waaye a gaawɗi findiice. Ɓum na woyee ɗe "gillar". na ndooɗ kassiya.
6Ɗu hey rahse diwliin fuuɗoha laampa,
ɗu hey rahse eeñɗohaaci haɓɗohsan diwi na hoolɗohse hoolɗuuɗ ci wuu so,
ɗu hey rahse eeñɗoha wuu cuuraayi.
7Ɗu hey name rahas peme sooham na peme moɗsinoha efoodi na nafaani ŋ fikiiri#25:7 efoodi na nafaani : marka saar 28, aaya 6-30..
8Ɓa hey yo haɓɗiɗe ɗisik hooliɗ, ŋ gen ŋ harmban ɓa. 9Ɗu hey haɓɗe Genohaani, ɗu haɓiɗndoh in ci hun naa jen findi in ci ŋ teeɓan ɗa ndii jen.
Wahndeeni
10Ɗu haɓɗee Wahndeeni ɗah, ɓa ɓayaat hang kassiya, ɓa haɓiɗa naa. Hutiiniŋ wa nikan suung kanak na camban, angiini nik suung na camban, njooliini suung na camban.
11Fu ula na urus koceet ŋ ɗooƴi na finhoori. Fu haɓɗiɗa banda urus ŋ finhoori po wa wil. 12Fu hey wa haɓɗiɗe inaa nikiis haa kiñi, ca nikan urus, kot nu nga ɗah raak yino ; ɓak nu nga ɗah raak kiñi kanak. 13Fu hey wa haɓɗiɗe ndooɗ kassiya, fu ul ca na urus, 14fu taambiɗ ca ŋ ɗooƴ kiñiici, ca nik ambohaaciŋ wa, ne wahndeeni ɓaysee ɗah. 15Ndooɗ ceem risan ŋ ɗooƴ kiñiici, ca nihsassanɗi. 16Fu ɓekan in ci teeɓoh Ambtiɗohi maa hee ɗa eɗe ŋ Wahndeeni.
17Fu haɓɗohan kunohaaniŋ wa urus koceet, wa nik ɗiski na romkohse. Hutiiniŋ wa nikaat suung kanak na camban, angiini nik suung na camban. 18-19Na urseem, fu hey tiɓe po fu puliɗ nataal seruben ŋ ɓak nu nga ŋ ɓak ci kanak ciŋ angiiniŋ wa. 20Ca na hee hey yurhiɗkohe, ca hiir ŋ ɗiski na romkohse, ca raɗis paɓ ciŋ ca ŋ ɗafki, ca ɗipa.
21Fu hey ɓeke in ci maa hee ɗa eɗe, ci na teeɓohe Ambtiɗohi, ŋ ɗooƴ Wahndeeni. Ƴut ɗah, fu deg kunohaani, weɗ ɗiski na romkohse, ŋ ɗafki. 22Ŋ cohan na ɗa ndeem ne ŋ woo na ɗa, ŋ harmban seruben ci kanak ci ŋ ɗafuk Wahndeeni ɗaak in ci na teeɓohe Ambtiɗohi, ŋ eɗ ɗa nakoh ciŋ ngo jen wuu Israayel ci.
Taaɓli
23Fu hey ɓaye hang kassiya, fu haɓiɗ taaɓul, hutiiniŋ wa nikan suung kanak, angiini nik suung yino, njooliini nik suung na camban. 24Fu hey wa ule jen na urus koceet. Fu haɓɗiɗa banda urus po wa wil. 25Fu hey wa name haɓɗiɗ kaadar, angiiniŋ wa nikan santimeetar yasna-kaahay, fu haɓɗiɗa banda urus po wa wil.
26Fu hey haɓɗiɗe taaɓli inaa nikiis haa kiñi, ca nikan urus, fu tum ca ŋ koñ ciŋ wa nikiis ci, teemb ŋ kot ciŋ wa. 27Kiñiici na hee nike ŋ sero kaadari, ndooɗ ci na hee ɓayohse taaɓli taamban nga ca. 28Fu hey haɓɗe ndooɗ ceem, ca na hee nike ndooɗ kassiya, fu ul ca na urus, ceɗ na hee wa ɓayohse.
29Fu hey wa haɓɗiɗe ɓi palaat, ɓi kaas, ɓi meeme na ɓi koppa, ca jen ca na hee haɓɗohse urus koceet ; meemeeci na koppaaci ceɗ na hee tume anaah ci seeƴkohsan wuu so. 30Ŋ ɗafuk taaɓleem, fu na hee dege mbuuruuci wuu so nga, te ca genan degsee nga, ŋ fikiiso.
Degohaaniŋ laampaaci
31Fu hey ɓaye urus koceet, fu tiɓa po fu puliɗ degoha laampa na tasiŋ wa na faaniŋ wa na ɓak ci tas jen. Ca jen ceɗ ɓaahan ini ca tiɓohsan. 32Wa hey raake naak yasna-yino ŋ faaniŋ wa, kaahay ŋ ɓaki singi, kaahay ŋ ɓaki ñaahmi, ca nik sal kaahay. 33Naak ci yasna-yinooci, waa nu nga ɗah hey raake koppa kaahay findi amand na posohe, waa nu nga ɗah raak ɓi pos rangsukaaɗi na ɓi pos rangsukiɗ. 34Faani hey raake koppa nikiis findi amand na posohe, waa nu nga ɗah na pos ciŋ wa rangsukaaɗiici, na ci rangsukiɗ ci. 35Ooɓ sal nu nik ɗah, hey raake pos rangsukaaɗi yino ŋ faaniŋ degohaaniŋ laampaaci po sal ci kaahay ci jen raak. 36Pos ci rangsukaaɗiici na naak ci jen nikan urus koceet tiɓuuɗ, ca na ini tas ŋ degohaaniŋ laampaaci jen, ceɗ ɓaahan ini ca tiɓohu.
37Fu hey haɓɗe laampa yasna-kanak, ceɗ na hee nike ŋ ɗafki ne ca ñiinɗee fikiiriŋ wa. 38Fu hey wa haɓɗiɗe tanaaƴ na tumoha ƴuuƴ, fu na hee ca haɓɗohe urus koceet. 39Kilo urus koceet ndaŋkiyaah-kaahay (30) ceɗ na hee ɓayse, haɓɗoha degohaaniŋ laampaaci na in ci hun naa jen. 40Marka te fu haɓiɗa findi wa fu teeɓsee ŋ ɗafuk tangoori.
Currently Selected:
Pula 25: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc