Pula 23
23
In ci Kooh nakoh ŋ ngel
1Ali ɓo' nga ɗu kinaat pasaroh woo kerahne ; te ali ɓo' nga ɗu kinaat lang na ɓo' añaandiɗ a seede'e ini nikɗi keeh. 2Ali ɓo' nga ɗu kinaat taambiɗ mboolo po a tum in moɗaaɗi ; te yaa nu ɓeeɗku ŋ ngel nga ɗu ne a seede ɗah, a kinaat taambiɗ mboolndi po a kee ɗala waas. 3Ali ɓo' nga ɗu kinaat lang na ñakiɗ sagu ñaki a ñak ne a ngele ɗah.
4Ɓo' nga ɗu, sangiɗiŋ ɗe muuƴɗuk inoh wala mbaam, a kaɗ po a coh na inoh feem wala mbaameem ɗah, a ɓayɗan ɗe ɗe ɓayiɗ. 5Ɓo' nga ɗu raak mbaamiŋ sangiɗiŋ ɗe keeniɗ na sifiŋ ɗe ɗah, ali liiɓiŋ ɗa teyɗukɗi ne fu ɓaatɗoh ɗe sah, fu ambohan ɗe amboh, a tokis ɗe.
6Ali ɓo' kinaat eɗaaɗi ñakiɗi keeh kiŋ ɗe ne a ngele ɗah. 7Ɓo' nu nga ɗu ɗah, usaat ini nikɗi keeh te ali ɓo' nga ɗu kinaat ɓek kakaan kiŋ ɓoyi tumɗi wala ɓoyi yurah. Laam tooñoh mand ɗaa, ŋ faɗanɗi ɗe.
8Ɓo' nu kee atte'a nga ɗu ɗah, a kinaat teyɗuk onu in, laam aaf na fuulɗe fuuliɗ has ciŋ inhiɗ ci te wa na yahrohe yahroh atteeni ɓooɓi yurhiɗ ci na atte'e. 9Ali ɓo' nga ɗu kinaat torhiɗ jaambur. Ɗu inhiɗ findi wa mand, laam ɗu nikee jaambur ŋ Misra.
In ci Kooh nakoh ŋ iɗsiɗuk
10Ɓo' nu nga ɗu guuraat yohon ce kiis yasna-yino, 11kiis ka yasna-kanakɗohan, a faɗaata wa kiis, ñakiɗ ciŋ cuuɓi njirñiɗkoh ɓaɓ ci, ini tas nik wuu ɗoopaat ciŋ bilaf fi. Nguuk ciŋ reseñ ci na ciŋ oliiw ci namaat tumu ɗaa.
12Ɓo' nu nga ɗu ɗah, a pangkaat ini a joy panguk ŋ neeh ci yasna-yinooci ; waaye mbehi yasna-kanakɗoh, a faɗaata, inoh fiŋ ɗe na mbaamiŋ ɗe min iɗsiɗuk. Ñaamiŋ kahan ce na jaambri na pangke na ɗe nam iik.
13Ɗu hey taambɗe nakoh ci ŋ eɗ ɗu jen te kinaat moos kiim in ci ɓinooɓi amb ne ca kooh, tiik ciŋ ca sah kinaat kerhu ŋ nguɓ ciŋ ɗu.
In ci Kooh nakoh ŋ feet ci
14Ɗu hey feetke wuu so waas kaahay ŋ kiis ki. 15Ɗu hey feetke feetiŋ Mbuuruuci raakaaɗi lawiir ci. Ini ree neeh yasna-kanak, ɗu ñaman mbuuru raakaaɗi lawiir, findi ŋ woyohee ɗu wa, wa nikan ŋ jamanooni wa ambu, ŋ caɓniŋ mbong ci#23:15 caɓniŋ mbong ci : marka ini fiisu ŋ saar 12, aaya 2.. Laam ŋ caɓneem weɗ ɗu puloh Misra. Te ɗu hayee feetke ɗah, ali ɓo' kinaat hay ŋ fikiiso yaah ɓarang.
16Ɗu hey feetke feetiŋ Nguɗ ci koc, ɗu kom mbo ca. Ɗu hey name feetuk feetiŋ Nguɗ ci mirndoh, wa nikan ŋ reehɗohaaniŋ kiis ki ne ɗu toor in ci ɗu nguɗoh yohon ci po ƴut ɗah.
17Waas ci kaahay cii ŋ kiis ki, ƴaar ci jen hey haye wike haf ɓa nga so, mi yi Heɗ ɓa Nikiɗi.
18Ɗu seeƴkee ɓi ɗoopaat wuu so ɗah, ñif miŋ ca kinaat hun na in raakiɗ lawiir. Te kinaat faɗ faymiŋ ɗe wa neeh po kim na ɓaaɓa.
19Ɓo' nu nga ɗu ɗah, a komaat to ini a koc nguɗ ŋ yohon ciŋ ɗe ŋ kahan ndo mi yi Nikiɗi, Koohiŋ ɗu.
Ali ɓo' nga ɗu kinaat tikoh koteng miis mi kooɗohu ŋ ndaam ce. »
Kooh gapohiɗ ne a hey ɓende cuuɓiŋ ɗe
20Wa Nikiɗi ƴut woo nakoh cii, a degga nga ne : « Ŋ hey woose malaaka, a adug, a niiɗee ɗu ŋ waasi, po a ɓek ɗu ŋ ɗiska ŋ kooɗkiɗ ɗu. 21Wortukaat, kinaat ndengsiɗkoh na ɗe, kerhiɗaat ɗe ; ɗu ndengsiɗkoh na ɗe ɗah, a muñɗanɗi ɗu, laam tiikiŋ ngo wii nga ɗe. 22Ɗu kerhiɗ ɗe, ɗu tum in ci ŋ woo jen ɗah, ŋ hey sange ɓi sang ɗu, ŋ langanɗi na ɓi langɗi na ɗu.
23Malaakaaniŋ ngo hey ɗu adgiɗe, a ɓek ɗu ŋ kur kaŋ Amoor ca, Hit ca, Peris ca, Kanaan ca, Hiw ca na Yebuus ca te ŋ hey ɓa ɗumbe. 24Ɗu heyɗi ƴekɗe in ca ɓa amb ne ca kooh, ɗu heyɗi ca ñaamke, te ɗu heyɗi ca haɓɗiɗe in ci ɓa na haɓɗiɗee ca. Waaye ɗu na hee ca hey yahrohe jameet, ɗu pooksoh atoh ca tufkiɗuuɗ ca.
25Ɗu ñaamkan ndo mi yi Nikiɗi Koohiŋ ɗu te ŋ hey barke'ɗe kañam kiŋ ɗu na anaahiŋ ɗu, ŋ hey ɗu usɗe ŋ kosaay. 26Kur kiŋ ɗu raakanɗi ɓitiɓ ci na yahkiɗke rook wala ɓi minɗi raak kuɓu. Ŋ hey ɗu one kipes hutiɗ.
27Ɓa kerah ne ɗu ɓii hay ɗah, ŋ hey ɓeke tiit nga ɓa, ŋ ɓek jahaskoh ŋ cuuɓ ci gen ŋ kur ci ɗu aasohan jen, ɓi sang ɗu jen hey saandohe ŋ fikiiɗu. 28Ŋ hey tuuƴe caakoof ci, ca adug ɗu, ca aañ Hiw ca, Kanaan ca na Hit ca bala ɗu reyan ɗah.
29Ŋ aañanɗi ɓa ŋ kiis yino po kur ka kee nika hulang, ɗoopaat-nduuf ci kee laaya, wa baahuu nga ɗu. 30Ŋ hey ɓa aañe ƴin-ƴin, ɗu ɓaatke po mbaɗna ɗu minan ɓay kur ka.
31Ŋ hey ɗu teeɓe kikiƴ kaŋ kehƴa ŋ onan ɗu. Ini amboh Cookmaŋ-Hapeel-ca po cookmaŋ Mediterane. Na ini kooɗoh kehƴi hulangi po laɓpa ŋ kalaŋ Ewfaraat. Ŋ hey dege ɓooɓiŋ kur ceem ŋ yaah ciŋ ɗu, ɗu aañ ɓa. 32Ɗu heyɗi ambtiɗohe na ɓa, ɗu heyɗi name ambtiɗoh na in ca ɓa tum kooh. 33Ɓa heyɗi gene kur kiŋ ɗu po ɓa kee taha ɗu bakaaɗ nga so, ndaa ɗu hey ñaamke kooh caŋ ɓa te ineem na ɓekee ɗu. »
Currently Selected:
Pula 23: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc