Pula 11
11
Gapohiŋ naamooni mirndoh
1Ŋ ineem, Nikiɗi woosa Musaa ne : « Ŋ hey ruhsiɗisse naamo, naamooni mirndoh, ŋ Firawna na ɓi Misra, ƴut ɗah, a hey ɗu faɗe ɗu coot jameet ; a yi sah na hee ɗu aañoote ne ɗu coot. 2Ɗiski wa nik, woya Israayel ci ne ɓo' nu nga ɗah, ƴaar na ɓitiɓ, meeksaat gentohiŋ ɗe in haɓɗohuuɗ haalis mbaa urus. » 3Nikiɗi ɓekeen ŋ keeñ ciŋ ɓi Misra ini tah ɓa baahohha Israayel ci. Te Musaa sah nikee ɓo' kerhiɗuuɗ ŋ Misra, ŋ fiki dag caŋ Firawna na ɓi Misra jen.
4Musaa woosa Firawna ne : « Inii weɗ Nikiɗi woo : “ Ŋ ndengelnde wek, mi yi Nikiɗi, ŋ hey aase ŋ Misra jen, 5saaw ci ƴaar ci nik nga jen hey kaane, ciŋ ɗoopaat ci na ɓiŋ ɓooɓi. Ini amboh ciŋ ɗoopaat ci jen, yaŋ ñaama ɓitɓa ŋ oɗohaana po yiŋ Firawna yi ɓoof ŋ kur ki. 6Rooy keeh-keeh hey kerhasse ŋ Misra jen, rooy ci moosɗi kerhu nga, te mand ɗaa moosissanɗi kerhu nga. 7Waaye ɗiska Israayel ci gen, ɓuu sah hurnukanɗi ɓo' nga mbaa ɗoopaat. Wa teeɓ ɗu ne mi yi Nikiɗi ŋ raakiɗ talsoh ŋ harmban Misra na Israayel. ” »
8Ŋ ineem, Musaa taalndiɗta, a woosa ɓa ne : « Dag ciŋ ɗa ɓii jen hey ƴeke ŋ fikiiso, ɓa kiimee so ne ŋ coot na ɓooɓiŋ ngo, ŋ han coot. » A pulla kahan Firawna na ayruk miskiɗ.
9Nikiɗi woosa ɗe ne : « Firawna sikɗukanɗi ɗa ne ŋ min tum keemaan laayiɗ ŋ kur kiŋ ɗe. »
10Musaa na Aaruna tummba keemaan caam jen ŋ fiki Firawna. Waaye Nikiɗi ndengiɗta keeñiŋ Firawna po, a faɗɗi Israayel ca ne ɓa pul kur ce.
Currently Selected:
Pula 11: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc