Chɔɔn 21
21
Jusu wlǔh-i kòà mɛ̀sɔɔ̌n kɛ̍n
1Wǐh gbɔ̍ sì-aɛ, wɛ̀ Jusu wlǔh-i ɔ̍ kòà kɛ̍n dɛ dǒ pɛ̍nu̍ klaa nɛ-a dǒ Taɛbiwlia wlɔ̀ di̍i̍-ɛ wɔ̍i̍n. Kǎ ɛ̍ nu̍ ka nɛ-ɛ. 2Samo Pitɛ ke, Tɔmɔ u̍h-a dǎɛ-a Gbàju-ɛ ke, Natanio ɔ̀ sɔ-a dǒ Keina wlɔ̀ di̍i̍ dě Kaladii bloa̍ kɛ̍n-ɛ ke, Sɛɛbedii-a nynuu̍ sɔɔ̌n ke, kòà sɔɔ̌n duuh bo ùh gbǎ tàdùè. 3Wɛ̀ Samo Pitɛ la̍a̍ dě u̍h we̍, “Ǎn mu̍ sɔ̍ po̍ la̍ o.”
Iě u̍h la̍a̍, “À mu̍ ìn we̍ ji̍ ìn ke à iě mu̍.” Wɛ̀ u̍h mu̍ u̍h gbǎ dě blǎgbè di̍i̍. Jɛ u̍h po̍ sɔ̍ po̍-o maɔ̍ iě u̍h se̍ dɛ̍ wɛ-a chɛ̀ gbɛ̍n. 4Sɔ̀n-a gbà la̍ i̍ sǔh, wɛ̀ Jusu ji̍ ɔ̍ nyna i̍ dǒ gbuǔh kɛ̍n. Jɛ kòà laa̍ u̍h se̍ i̍h juo ka ɛ̍ iě-a Jusu nu̍-ɛ. 5Wɛ̀ ɔ̍ la̍a̍ dě u̍h we̍, “Jbɛɛ nyɔ̍, mɔ̀ gbɛ̍n dɛ̍ wɛ̀ ae?”
U̍h la̍a̍, “À-a se̍a dɛ̍wɛ-a chɛ̀ gbɛ̍n o.”
6Wɛ̀ ɔ̍ la̍a̍, “Mɔ̀ po̍ sɔ̍ dě blǎgbè-a di̍na̍ we̍, nɛ̀ mɔ̀-a mu̍ dɛ̍ jě.” Wɛ̀ u̍h po̍-e sɔ̍ laa̍, iě ɛ̍ jǐ pi̍npi̍n dǒ smìi̍-a sǔh we̍. Sɔ u̍h se̍ ɛ̍ niɔ̍ sà-a bɛ̌ɛ.
7Kòà ɔ̀ kɔn tìh Jusu kma-aɛ, iě ɔ̍ la̍a̍ dě Pitɛ we̍, “Joi bo wa.” Wɛ̀ Samo Pitɛ wɔ̌n i̍h ka ɛ̍ nu̍-a Joi-ɛ. Nɛ̀ ɔ̍ chɛn gbaǎn dǒ dbo̍ nu̍ la̍, iě ɔ̍ gbà ɔ̍ jliɛ̍. Tbìì, wɛ̀ ɔ̍ gbǎ niɔ̍. 8Nɛ̀ kòà duuh nɛ-a dě blǎgbè di̍i̍-ɛ u̍h-a ji̍ gbuǔh wlì, nɛ̀ kǎ u̍h-a chlì sɔ̍ ɛ̀ jǐ-a smìi̍ di̍i̍-ɛ. U̍h se̍ gbuǔh we̍ i̍ ti̍ɛ̍ɛn. Dǒ u̍h ke gbuǔh nynɛ̌ bɛ̌ɛ gbɛna-a kwela m̀m̌ nu̍-ɛ. 9U̍h jǎ-a gbuǔh-ɛ, dǒ u̍h jě-e kɔɔn-a nɛ̍. Nɛ̀ smìi̍ nɛ dě jlǐh, iě blèe̍ tè ɛ̍ pùn. 10Wɛ̀ Jusu la̍a̍, “Smìi̍ mɔ̀ gbɛ̍n-a tiɔ-ɛ, mɔ̀ ja i̍h-a diih.”
11Iě Samo Pitɛ gbǎ dě blǎgbè di̍i̍, wɛ̀ ɔ̍ klǎ sɔ̍ laa̍ i̍ ɔ̍ jǎ-ɛ ɛ̍ tlu̍h. Nɛ̀ smìi̍ klaaᵻ jǐ dě ɛ̍ di̍i̍, i̍h nu̍ kmɛ due kwela m̀m̌ jɔ̌ ta̍a̍n (153). Jɛ smìi̍ dɔu laa̍ ìh jǐ-a dě sɔ̍ laa̍ di̍i̍-ɛ, ɛ̍ se̍ chɛ̍n. 12Wɛ̀ Jusu la̍a̍, “Mɔ̀ ji̍ mɔ̀ iě gba̍i̍n ka̍n.” Jɛ u̍h-a nyɔ̍ se̍ ɔ̍ i̍ tèle-ɛ bɛ̌ɛ, “Àn nynɛ̌ ɛ?” Dɛ̍nu̍ɛ, u̍h juo i̍h ka ɛ̍ nu̍-a Joi-ɛ. 13Wɛ̀ Jusu dǔ blèe̍ laa̍, iě ɔ̍ gblè ɛ̍ u̍h jii̍. Kǎ ɔ̍ nu̍ smìi̍ ke.
14Jusu wlǔh-aeɛ, ɛ̀ la bo ɛ̀ nu̍ ɔ̍ kòà kɛ̍n wlǔh-iɛ gbɔ̍ᵻ ta̍a̍n naɛ.
Jusu tèle Samo Pitɛ i̍
15U̍h wɔ̀-a dɛ̍ di̍-ɛɛ, wɛ̀ Jusu la̍a̍ dě Samo Pitɛ we̍, “Chɔɔn-a jǔ Samo, ìn jbɛɛ m ɛ̍ sìì juh la ae?”
Ɔ̍ la̍a̍, “I̍i̍n, Joi, ìn juo i̍h ka ǐn jbɛɛ-a m̀-ɛ.”
Jusu la̍a̍, “Gbɛ̀n dǒ ǎn blawɛ̌ᵻ we̍ i̍ o.” 16Wɛ̀ Jusu tèle ɔ̍ i̍ dɛ, ɔ̍ la̍a̍, “Chɔɔn-a jǔ Samo, ìn jbɛɛ m ae?”
Ɔ̍ la̍a̍, “I̍i̍n, Joi, ìn juo i̍h ka ǐn jbɛɛ-a m̀-ɛ.”
Jusu la̍a̍, “Gbɛ̀n dǒ ǎn blawɛ̌ᵻ we̍ i̍ o.” 17Ɛ̀ po̍-a ta̍a̍n-ɛ, Jusu la̍a̍, “Chɔɔn-a jǔ Samo, ìn jbɛɛ m ae?”
Sɔ ɛ̍ po̍ Pitɛ-a wlùh seɔn, dɛ̍nu̍ɛ, Jusu nu̍ ɔ̍ i̍ tèle-ɛa gbɔ̍ᵻ ta̍a̍n pò ɔ̍ jbɛɛ ɔ̍-ɛ. Wɛ̀ Pitɛ la̍a̍ dě ɔ̍ we̍, “Joi, ìn juo dɛ̍ᵻ kli̍hgbɛ̍. Ìn juo i̍h ka ǐn jbɛɛ-a m̀-ɛ.”
Jusu la̍a̍ dě ɔ̍ we̍, “Gbɛ̀n dǒ ǎn blawɛ̌ᵻ we̍ i̍ o. 18Tìh-a taǐn ǎn sèàɛ̍ mɔ̀ wlùh, ti̍ ìn nu̍-a jǔgbèlà-ɛ, nɛ̀ àn tba̍ àn chɛ̀ dɛ̍ gbɔ̀. Wɛ̀ àn mu̍ tà àn pɔ̀n-a mu̍-ɛ i̍-ɛ. Jɛ pò ìn nɛ̍ wɛ̀-ɛ, nɛ̀ àn slo̍ la̍ sɔ̍n iě nyɔ̍ dɔɔ-a pa̍-ɛ ìn dɛ̍-ɛ. Wɛ̀ ɔ̍ gba̍ m̀ tà ìn se̍-a pɔ̀n ìè-a mu̍-ɛ.” ( 19Jusu-a bla̍ ɛ̀ la ɛ̍ iě ɛ̍ to ka Pitɛ-a mu̍-a mɛ̌-ɛ nu̍ wɛ̀ ɛ̍ iě-a Nyɔsoa-a nynɛ̌ i̍ bɛ̌-ɛɛ.) Wɛ̀ ɔ̍ la̍a̍ dě Pitɛ we̍, “Gbǎ dǒ ǐn de̍e̍.”
Jusu sèàɛ̍ dɛ̍ we̍ i̍ dě Pitɛ we̍
20Pitɛ fèàɛ̀-aɛ, wɛ̀ ɔ̍ jě kòà ɔ̀ kɔn tìh Jusu kma-aɛ, nɛ̀ ɔ̍ wɔ̀ dǒ u̍h de̍e̍. U̍h iě-a wìe̍dɛ di̍-ɛ, ɔ̍-ɔ laa̍ bo ɔ̀ ke Jusu kɔǎɛn i̍, iě ɔ̍ la̍a̍, “Joi, nyɔ̍ bo ɔ̀ mu̍ ìn kwlǎ sà ɛ?” 21Ti̍ Pitɛ jě-a ɔ̍-ɛ, wɛ̀ ɔ̍ la̍a̍ dě Jusu we̍, “Joi, jɔ̍gbau la nɔ̀ɔ̍, ka ɔ̍ tìh-a mu̍ nɛ ɛ?”
22Jusu la̍a̍, “Pò ǐn ja pɔ̀n ɔ̍ iě kmɔ̌ nɛ te̍e̍ wɛ̀ iě de̍ ji̍-ɛ, nɛ̀ ka àn jě ɛ̍ ɛ? Mɔ̀ nɔ̀ɔ̍, gbǎ dǒ ǐn de̍e̍ sǔh.”
23Sɔ ɛ̍ pɔ̀n sɛ̍ i̍ dě de̍di̍i̍ᵻ laa̍ nynɛ̌, u̍h la̍ nɛ̀ kòà laa̍ ɔ̍ se̍ mɛ̌ mu̍ dɛbo. Jusu se̍ la̍ ɔ̍ se̍ mɛ̌ mu̍, jɛ ɔ̍ la̍a̍, “Pò ǐn ja pɔ̀n ɔ̍ iě kmɔ̌ nɛ te̍e̍ wɛ̀ iě de̍ ji̍-ɛ, nɛ̀ ka àn jě ɛ̍ ɛ?”
24Jɛ kòà-a chɛ̀ laa̍ bo ɔ̀ nu̍ ìh la i̍h-a sàànsi̍i̍h, wɛ̀ ɔ̍ chlǐh i̍h dɛ. Iě à juo ɛ̍ dɛ̍ ɔ̍ sà-aɛ tìh-a taǐn bo.
Jusu nu̍ dɛ̍ᵻ dɔu diih
25Jusu nu̍ dɛ̍ᵻ dɔu diih. Pò i̍h kli̍hgbɛ̍ chlǐh-ɛ de-ɛ, ǐn juo ɛ̍-ɛ nɛ̀ i̍h-a chlǐh-dɛ̍ᵻ se̍ po̍ la̍ kɔn mu̍ da̍a kmɔ̌ la we̍ de.
Currently Selected:
Chɔɔn 21: KDNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Western Krahn published as KU̍O̍ DELEE © The Bible Society in Liberia, 1999.