Nu̍-dɛ̍ᵻ 8
8
1Sɔɔ bo ɔ̀ wɔ̌ɛn Slifɛn-a mɛ̌ɛ dɛ kɛ̍n i̍.
Sɔɔ jě-e chɔchi̍h klě
Sɔ dǒ weɛ̍ laa̍ di̍i̍-ɛ, nɛ̀ chɔchi̍h nɛ-a dǒ Juluslɛn-ɛ, ɛ̍ klě jě-ɛ sìì-o dɛ̍ i̍ wɛ̀. Jusu-a gba̍tòà kɔn tɛ̀ ǐn sà-o. Jɛ wlùh gbaɛ blě nyɔ̍ kli̍hgbɛ̍ juh sie-a dode̍-ɛ, u̍h gbà ja̍i̍. Duuh mu̍ Judia fɔɔ, iě duuh mu̍ Sɛmewlea. 2Nyɔsoa nyɔ̍ duuh bo ùh tè Slifɛn i̍, iě u̍h fìn ɔ̍ dɛ̍blɔ.
3Sɔ Sɔɔ tè chɔchi̍h jii̍ nyni-ɛ gbɔ̀ wɛ̀ kleǐn. Nɛ̀ ɔ̍ sà nynɔ̌gbaɔᵻ ke jɔ̍gbauᵻ gbòᵻ i̍, wɛ̀ ɔ̍ blě u̍h i̍ klǎ-a ɔ̍ po̍ u̍h kasoo.
Felɔ bla̍ pɔ̀n chɛ̀ dě Sɛmewlea
4Nyɔ̍ ùh gbà-a ja̍i̍-ɛ, ìh u̍h mu̍-a i̍-ɛ, nɛ̀ kǎ u̍h-a bla̍ Nyɔsoa-a tìh ke sǔh. 5Felɔ mu̍-a dě Sɛmewlea nyɔ̍-a tùgbàwlɔ̀ di̍i̍-ɛ, wɛ̀ ɔ̍ bla̍ Nyɔsoa-a Chèɛ̀ Tba̍ju-a tìh dě nyɔ̍ nɛ-a deě-ɛ we̍. 6Ti̍ nyɔ̍ tlùgbei̍ wɔ̌n-a Felɔ-a wlu̍ wɛ̀ u̍h jě-a jbaɛdih ìh poe-a dě ɔ̍ ja̍a̍-ɛ, sɔ dě ɔ̍ we̍ bo u̍h-a dounᵻ kli̍hgbɛ̍ nɛ wɛ̀ kleǐn. 7Nɛ̀ nyɔ̍ dɔu blě jeědih dǒ u̍h de̍e̍. Nɛ̀ i̍h-a wǐi i̍ wɛ̀ i̍h-a sɔ u̍h de̍e̍ i̍. Wɛ̀ klɔ-nyɔ̍ ke i̍ kɔ̌-nyɔ̍ sùɛ̀ pǔh. 8Sɔ ɛ̍ mɔna̍ nɛ-a dǒ tùgbàwlɔ̀ laa̍ di̍i̍-ɛ ɛ̍ sìì-o dɛ̍ i̍.
9Ɛ̍ ti̍ laa̍ nɛ̀ jɔ̍gbau due nɛ-a dǒ u̍h-a wlɔ̀-a chɛ̀ di̍i̍-ɛ, ɔ̍ nynɛ̌ bo Samo. Wòjù kaɛn ɔ̍ nu̍-a te̍e̍-ɛ, ɛ̍ wlǔh i̍ Sɛmewlea nyɔ̍ kli̍hgbɛ̍ de̍e̍. Ɛ̍ kɔn wɔ̍n bo ɔ̍ po̍ i̍, ɔ̍ la̍ ɔ̍ ku̍ wɔ̍n. 10Sɔ plǒai nyɔ̍ ke dɛ̍kɛ̍n gbǎ nyɔ̍ kli̍hgbɛ̍ dě ɔ̍ we̍ bo u̍h-a dounᵻ nɛ wɛ̀ sǔh. Wɛ̀ u̍h la̍a̍, “Nyɔsoa-a gbǐh ìh ku̍-a wɔ̍n à dǎ-aɛ, i̍h bo jɔ̍gbau la ɔ̍ blě.” 11Sɔ dǒ ɔ̍ de̍e̍ bo u̍h wɔ̀ wɛ̀ sǔh, dɛ̍nu̍ɛ, ɔ̍ wlè wòjù nu̍ gbai wɛ̀. Ɛ̍ kɔn ɛ̍ sàɛ̀-e u̍h-a wlùh i̍. 12Jɛ ti̍ Felɔ bla̍-a pɔ̀n chɛ̀ ɛ̀ kɔ̍-a dǒ Nyɔsoa-a kmɔ̌ wlu̍ i̍ kɔn-ɛ ke Jusu Klai pùn i̍-ɛ, iě u̍h po̍ ɔ̍ wlu̍ laa̍ tìh chɛ̀. Wɛ̀ nynɔ̌gbaɔᵻ ke jɔ̍gbauᵻ po̍ nǐ dlǔ. 13Wɛ̀ Samo-a chɛ̀ po̍ i̍h tìh chɛ̀ ke, iě ɔ̍ po̍ nǐ dlǔ. Wɛ̀ ɔ̍ gbǎ dǒ Felɔ de̍e̍, dɛ̍nu̍ɛ nɛ̀ nyɔ̍ wɔ̍n flɔn-ɛ dɛ̍ᵻ ke jbaɛdih ìh-a poe-a ɔ̍ tba̍-a jlǐhɛ̍-ɛ, i̍h wlǔh i̍ ɔ̍ de̍e̍ kaa̍.
14Jusu-a gba̍tòà nɛ-a dǒ Juluslɛn-ɛ, u̍h wɔ̌n-a pɔ̀n ka Sɛmewlea nyɔ̍ gbɛ̍n-a Nyɔsoa-a wlu̍ i̍-ɛ, wɛ̀ u̍h dbo̍ Pitɛ ke Chɔɔn dě u̍h we̍. 15U̍h nyni̍-aɛ, wɛ̀ u̍h ba̍le dǒ u̍h-a tàà u̍h iě Nyɔsoa-a Sùù jě. 16Dɛ̍nu̍ɛ, Nyɔsoa-a Sùù se̍a u̍h-a nyɔ̍-o-nyɔ̍ kɛ̍n sǐ. Jɛ dǒ Joi Jusu nɛ due-a nynɛ̌ kɛ̍n bo u̍h poe nǐ dlǔ wɛ̀ sǔh. 17Wɛ̀ Pitɛ ke Chɔɔn tè u̍h sɔ̍n dlǔ, iě u̍h dǔ Nyɔsoa-a Sùù jě-ɛ.
18Ka u̍h-a nyɔ̍ sɔ̍n dlǔ tè-ɛ bo ɛ̀ jě-ea nyɔ̍ Nyɔsoa-a Sùù-ɛ, ɛ̍ bo Samo jě, iě ɔ̍ nyǐ u̍h wlǐ. 19Ɔ̍ la̍a̍, “Gbǐh la mɔ̀ nyǐ i̍h m ke wɛ̀ pò ǐn tè nyɔ̍-o-nyɔ̍ sɔ̍n dlǔ-ɛ, ɔ̍ iě Nyɔsoa-a Sùù jě ke lě.”
20Wɛ̀ Pitɛ la̍a̍ dě ɔ̍ we̍, “Ka àn pɔ̀n-a ìè-a Nyɔsoa-a nyǐ-dɛ̍ wlǐ-i tɛ̀n-ɛ i̍-ɛ, ìn ke àn wlǐ-a chɛ̀ ke mɔ̀-a mu̍ fukǎ gbǎ. 21Ìn se̍ dɛ̍ kɔn nɔ̌ à dbo̍ la di̍i̍, iě mɔ̀ɔ̍ ìn se̍ nɔ̌ dɛ̍ jě-e mu̍ ke. Dɛ̍nu̍ɛ, pɔluh ìn blě-aɛ, ɛ̍ se̍ dě Nyɔsoa jlǐh-i nmɔ. 22Ɛ̍ tìh-ɛ, bǐi i̍ ìè àn kà kɔn gblɛ̍n la i̍ tǎli. Nɛ̀ ìn ba̍le Joi, pò ɛ̍ nɛ-ɛ ka̍-a, nɛ̀ ìh kaɛn la àn naɛ-a wlùh i̍-ɛ, nɛ̀ ɔ̍ mu̍ i̍h-a tìh i̍ tǎli. 23Dɛ̍nu̍ɛ, ǎn gbɛ̀n-a ìn ja̍-ɛ, wlɛ̀n plǔ bo ìn kɔn, iě ìn nu̍ gblɛ̍n sɔ̀ɛ̀n-a kèi̍.”
24Wɛ̀ Samo la̍a̍ dě Pitɛ ke Chɔɔn we̍, “Mɔ̀ dbǎkà, mɔ̀ iě Joi ba̍le dǒ ǎn tàà, wɛ̀ ìh la mɔ̀-a bla̍-aɛ, i̍h-a dɛ̍-ɛ jěe ǐn pùn nɛ.”
25U̍h wɔ̀-a tìh we̍ i̍ sèàɛ̍ ke Joi-a wlu̍ bla̍ dɛ nu̍-ɛ, wɛ̀ u̍h blě pɔ̀n chɛ̀-a tìh we̍i̍ bla̍-a Sɛmewlea nyɔ̍-a wlɔ̀ᵻ dɔu di̍i̍ i̍ u̍h-a mu̍ de̍ Juluslɛn.
Felɔ po̍ Itiopea nyɔ̍-a kwǐ klaa nǐ dlǔ
26Dǒ Joi-a ǐnchɔ̀ sèàɛ̍ Felɔ wlùh, ɛ̍ la̍a̍, “Sɔ bloɔ̍, pòɛ̍ɛ̍ kɛ̍n wìè ɛ̀ sɔ-a dǒ Juluslɛn ɛ̀ mu̍-a kwe̍na̍ we̍ dǒ Kesa wlɔ̀ di̍i̍-ɛ, ìè ɛ̍ gba̍.” 27Wɛ̀ ɔ̍ gba̍ wìè laa̍, dǒ ɔ̍ jɛɛ kɔlu̍-a poa-nyɔ̍ due kɛ̍n dǒ wìè-i. Kwǐ klaa bo dě Itiopea bloa̍ kɛ̍n. Nynɔ̌ ɔ̀ blě-a Itiopea nyɔ̍-a wlu̍ kwa̍-a, jɔ̍gbau laa̍ bo ɔ̀ nu̍ dǒ ɔ̍ kɔn-dɛ̍ᵻ we̍ i̍ gbɛ̀n nyɔ̍. Nɛ̀ ɔ̍ sɔ Nyɔsoa wɛɛ sà la̍ dě Juluslɛn. 28Nɛ̀ ɔ̍ tè i̍ dě ɔ̍ kɛ̍n naɛdɛ̍ di̍i̍ wɛ̀ ɔ̍ mu̍. Nɛ̀ kǎ ɔ̍ slè chlǐh-dɛ̍ ɛ̀ Nyɔsoa-a tu̍owli po̍ nyɔ̍ Asaia chlǐh-aɛ. 29Wɛ̀ Nyɔsoa-a Sùù la̍a̍ dě Felɔ we̍, “Mu̍ iě kɛ̍n naɛdɛ̍ laa̍ i̍ kɔǎɛn.” 30Wɛ̀ Felɔ gba̍ ɛ̍ ple̍-ɛ wlì, dǒ ɔ̍ wɔ̌n-ɛ jɔ̍gbau laa̍ ɔ̍ wlu̍ nɛ̀ ɔ̍ slè Nyɔsoa-a tu̍owli po̍ nyɔ̍ Asaia-a chlǐh-dɛ̍. Wɛ̀ Felɔ la̍a̍, “Dɛ̍ àn slè-aɛ, àn wɔ̌n ɛ̍-ɛ i̍ ae?”
31Iě ɔ̍ la̍a̍, “Ǐn se̍-a nyɔ̍ blě ɔ̍ iě-a ɛ̍ we̍ i̍ sèàɛ̍-ɛ, nɛ̀ ka ǎn mu̍ ɛ̍-ɛ i̍ wɔ̌n-ɛ nu̍ ɛ?” Wɛ̀ ɔ̍ dǎ Felɔ ɔ̍ iě ɔ̍ pùn tè la̍ ji̍ dě ɔ̍ we̍ kɛ̍n naɛdɛ̍ di̍i̍. 32Nyɔsoa-a wlu̍-a chɛ̀ ɔ̍ slè-aɛ, kǎ ɛ̍ nu̍ ka nɛ-ɛ.
“Blawɛ̌ ɛ̀ u̍h-a gba̍-a dbǎ la̍-aɛ, ɛ̍ bo ɔ̍ wɔ̀.
Blawɛ̌ jǔ ɛ̀ kɔn mǐ u̍h ja chɛ̍n-ɛ wɛ̀ ɛ̍-ɛ wlu-aɛ, ɛ̍ bo ɔ̍ wɔ̀.
Ɛ̍ kɔn ɔ̍ se̍ wɔ̍n-a fuɛn nu̍.
33U̍h bla̍-ɛ ɔ̍ plǔh, iě ɔ̍ se̍ we̍ tǐn nyɔ̍ kɔn.
Ɔ̍ se̍ wɔ̀ɔ̀ kɔn nɔ̌ kmɔ̌ we̍.
Dɛ̍nu̍ɛ, ɔ̍ wǐh nɛ-a da̍a kmɔ̌ la we̍-ɛ, i̍h chɛ̍n dlǔ i̍ wɛ̀.”
34Kwǐ laa̍ iě ɔ̍ tèle Felɔ i̍, ɔ̍ la̍a̍, “Dbǎkà, sèàɛ̍ ǐn wlùh, nyɔ̍ kɔn tìh bo tu̍owli po̍ nyɔ̍ la ɔ̍ sà-a nɔ̌ chlǐh-dɛ̍ la di̍i̍ ɛ? Ɔ̍ chɛ̀ bo ɔ̍ dǎ ɛɛ, àe̍e̍ nyɔ̍ dɔɔ bo ae?” 35Felɔ tè-a wlu-ɛ gbɔ̀-ɛ, dě Nyɔsoa-a wlu̍ laa̍ we̍ bo ɔ̍ dǔ-iɛ. Wɛ̀ ɔ̍ sèàɛ̍ kwǐ laa̍ wlùh dǒ pɔ̀n chɛ̀ ɛ̀ kɔ̍-a dǒ Jusu pùn i̍-ɛ we̍. 36U̍h klɛɛn-a dě wìè nya̍-a, wɛ̀ u̍h jɛɛ nǐ kɛ̍n. Iě kwǐ nyɔ̍ la̍a̍, “Ɛ̀ la nǐ bo wa. Ǐn se̍ nǐ dlǔ po̍ mu̍ da̍a duedɛ ae?” [ 37Wɛ̀ Felɔ la̍a̍ dě ɔ̍ we̍, “Pò ɛ̍ tù ìn po̍ ɛ̍ tìh chɛ̀ dǒ ìn pɔluh kɛ̍n-ɛ, nɛ̀ àn mu̍ nǐ dlǔ po̍ wa.”
Iě jɔ̍gbau la̍a̍, “Kǎ ɛ̍ nɛ, ǐn po̍ ɛ̍ tìh chɛ̀ ka Jusu Klai nu̍-a Nyɔsoa-a Jǔ-ɛ.”]
38Kwǐ laa̍ wɛ̀ ɔ̍ sèàɛ̍ ɔ̍ bli̍a nyɔ̍ wlùh ɔ̍ iě kɛ̍n naɛdɛ̍ laa̍ i̍ nyna-ɛ. Iě ɔ̍ ke Felɔ sǐ bloɔ̍, wɛ̀ u̍h mu̍ dě niɔ̍, iě Felɔ po̍ ɔ̍ nǐ dlǔ. 39U̍h sɔ-a dǒ niɔ̍-ɛ, wɛ̀ Joi Nyɔsoa-a Sùù gba̍ Felɔ. Sɔ jɔ̍gbau se̍ ɔ̍ jě dɛ. Jɛ mɔna̍ dɔu blě ɔ̍ nu̍-ɛ iě ɔ̍ mu̍ ɔ̍ blǐ. 40Felɔ iě-a ɔ̍ chɛ̀ jě-ɛ, nɛ̀ ɔ̍ nɛ dǒ Asotu wlɔ̀ di̍i̍ wɛ̀. Iě ɔ̍ na wlɔ̀ᵻ kli̍hgbɛ̍ we̍, wɛ̀ ɔ̍ bla̍ pɔ̀n chɛ̀-a tìh we̍i̍ te̍e̍ iě ɔ̍ nyni̍ dǒ Sɛsewlia wlɔ̀ di̍i̍.
Currently Selected:
Nu̍-dɛ̍ᵻ 8: KDNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Western Krahn published as KU̍O̍ DELEE © The Bible Society in Liberia, 1999.