Nu̍-dɛ̍ᵻ 5
5
Ɛlenaea ke Sofaia-a sɔ̀ìn
1Jɛ jɔ̍gbau dɔɔ ɔ̀ kɔn nynɛ̌ nu̍-a Ɛlenaea, ɔ̍ ke ɔ̍ nynɔ̌ Sofaia bo ùh ple̍ u̍h-a blǔh-a fɔ̌. 2Jɛ ɔ̍ si̍e̍ wlǐ diih ɔ̍ chɛ̀ de̍e̍, iě ɔ̍ dǔ jih sie-a doǒ-ɛ Jusu-a gba̍tòà we̍ ja-a. Ɔ̍ nynɔ̌ juo-o dɛ i̍. 3Wɛ̀ Pitɛ la̍a̍, “Ɛlenaea, dɛ̍nu̍ àn wɔ̌n iě Setɔn-a gbǎ dǒ ìn pɔluh kɛ̍n wɛ̀ àn tmɔ̌-ɛ Nyɔsoa-a Sùù si̍h wɔ̍i̍n iě àn si̍e̍ àn blǔh-a wlǐ diih dǒ àn chɛ̀ de̍e̍ ɛ? 4Ìè-a blǔh laa̍ ple̍-ɛ, nɛ̀ mɔ̀ kɔn ɛ̍. Wlǐ ɛ̍ jě-aɛ, mɔ̀ kɔn i̍h ke. Dɛ̍ bo ɛ̀ po̍ dɛ̍ kaɛn la dǒ ìn pɔluh kɛ̍n ɛ? Ìn se̍ nyi̍ɔ̍ si̍h wɔ̍i̍n tmɔ̌-ɛ, jɛ Nyɔsoa bo ìn tmɔ̌-ɛ si̍h wɔ̍i̍n o.” 5Ɛlenaea wɔ̌n-a wlu̍ la-a, ɔ̍ kà i̍ iě ɔ̍ mɛ̌. Nyɔ̍ kli̍hgbɛ̍ ùh wɔ̌n-a pɔ̀n la-a, u̍h gbǎ faɔn. 6Wɛ̀ nynuu̍gbèè ji̍ u̍h pìàɛ̍n ɔ̍ kǔ dɛ̍ dlǔ i̍, iě u̍h gba̍ ɔ̍ i̍ tè la̍.
7Ɛ̍ bɛ̌ɛ àba̍ ta̍a̍n nu̍-ɛ, wɛ̀ ɔ̍ nynɔ̌ pa̍ gbò. Jɛ ɔ̍ se̍ dɛ̍ nɛ-a ɔ̍ kɔan pùn-ɛ juo. 8Wɛ̀ Pitɛ la̍a̍, “Ìn ke àn kɔan ke wlǐ mɔ̀ jě-a dǒ mɔ̀-a blǔh mɔ̀ ple̍-a we̍-ɛ, kǎ i̍h tìè ka sǔh ae?”
Ɔ̍ la̍a̍, “I̍i̍n, kǎ i̍h tìè.”
9Wɛ̀ Pitɛ la̍a̍ dě ɔ̍ we̍, “Dɛ̍nu̍ ìn ke àn kɔan-a wlu̍-a nɛ due iě mɔ̀-a tù-o Joi-a Sùù-a jlu̍h duǐh ɛ? Gbɛ̀n-e, nynuu̍ ùh tè-a àn kɔan i̍-ɛ, u̍h nɛ dǒ gbò wɔ̍i̍n. U̍h-a mu̍ ìn gba̍ ke.” 10Dǒ tàdùè laa̍, nynɔ̌ kà i̍ dǒ ɔ̍ jǔ, iě ɔ̍ mɛ̌. Wɛ̀ nynuu̍gbèè laa̍ u̍h pa̍ gbò. U̍h gbɛ̀n-a nynɔ̌ ja̍-ɛ, nɛ̀ ɔ̍ mɛ̌ wɛ̀. Iě u̍h gba̍ ɔ̍, wɛ̀ u̍h tè ɔ̍ i̍ dǒ ɔ̍ kɔan pùn. 11Chɔchi̍h nyɔ̍ kli̍hgbɛ̍ ke nyɔ̍ ùh wɔ̌n-a pɔ̀n la-a, sɔ ɛ̍ po̍ u̍h faɔn kaa̍.
Gba̍tòà-a jbaɛdih flɔn-ɛ nyɔ̍ wɔ̍n
12Wɛ̀ Jusu-a gba̍tòà poe jbaɛdih dɔu ke nyɔ̍ wɔ̍n flɔn-ɛ dɛ̍ᵻ dě nyɔ̍ɔ nynɛ̌. Nɛ̀ dǒ Sɔlɔma-a Fùnǐ sɔ̀n bo u̍h-a gbèɛ̀ɛn chɛ̍chɛ̍. 13Sɔ nɛ̀ dɛ̍ nyɔ̍gbei-a nu̍-a u̍h ja̍ tè-ɛ, ɛ̍ sì-o dɛ̍ i̍. Jɛ nyɔ̍ dɔɔ se̍ u̍h nynɛ̌ gbǎ-a bɛ̌ɛ. 14Sɔ dɛ̍ nynɔ̌gbaɔᵻ ke jɔ̍gbauᵻ dɔu-a nu̍-a la̍ kɛ̍n i̍ gboǎɛ dě u̍h-a gbɔ̀ù di̍i̍ Joi wlùh gbaɛ tìh-ɛ, nɛ̀ ɛ̍ se̍ dɛ̍ka nɛ. 15Sɔ u̍h-a jbaɛdih nu̍ ɛ̍ nyɔ̍gbei-a gba̍ wɛ̌ᵻ nyɔ̍ dǒ wlɔ̀gbàɛ̀, iě u̍h-a peɛ̌ɛn u̍h i̍ dǒ klìɔ̀ᵻ ke slɛᵻ kɛ̍n. Wɛ̀ pò Pitɛ ja sì-ɛ, ɛ̍ tù ɔ̍ peɛ-a chɛ̀-ɛ, ɛ̍ iě u̍h-a duuh wlǎɛ. 16Wɛ̀ nyɔ̍ tlùgbei̍ sɔ wlɔ̀ᵻ nɛ-a Juluslɛn wlɔ̀ de̍e̍ i̍-ɛ di̍i̍, iě u̍h ja u̍h-a wɛ̌ᵻ nyɔ̍ ke jeědih-a de̍e̍ nɛ nyɔ̍. Wɛ̀ u̍h pǔh kli̍hgbɛ̍.
Sadiusii nyɔ̍ jě-e Jusu-a gba̍tòà klě
17Sɔ Nyɔsoa-a slaǎ sà nyɔ̍ klaa ke ɔ̍ nyɔ̍ nɛ-a dě Sadiusii nyɔ̍-a gbɔ̀ù di̍i̍-ɛ, wlɛ̀n jǐ dě u̍h di̍i̍ tliin. 18Iě u̍h gbɛ̍n Jusu-a gba̍tòà. Wɛ̀ u̍h po̍ u̍h dě mlɔ̌ kasoo di̍i̍. 19Jɛ Joi-a ǐnchɔ̀ ji̍-i maɔ̍, wɛ̀ ɛ̍ pɔ̀ni kasoo gbò wɔ̍i̍n iě ɛ̍ sǐ-i u̍h sɔ̀n. 20Ɛ̍ la̍a̍, “Mɔ̀ mu̍ mɔ̀ iě i̍ nyna dě Nyɔsoa-a slaǎ sà gbò sɔ̀n, mɔ̀ iě kmɔ̌ delee la ɛ̍ dɛ we̍i̍ bla̍ kli̍hgbɛ̍ dě nyɔ̍ɔ we̍.” 21Dɛ̍ ɛ̍ sà-aɛ bo u̍h nu̍. Sɔ̀n sɛ̀n-a, wɛ̀ u̍h pa̍ dě slaǎ sà gbò sɔ̀n u̍h-a po̍ nyɔ̍ nǎ.
Wɛ̀ slaǎ sà nyɔ̍ klaa ke ɔ̍-ɔ naɛ nyɔ̍ ji̍. Iě u̍h dǎ taɔ pa̍ nyɔ̍ ke Eslɔɛ-a nyɔ̍ klaaᵻ kli̍hgbɛ̍ iě u̍h gbèɛ̀ɛn. Wɛ̀ u̍h dbo̍ wlu̍ dě kasoo u̍h iě gba̍tòà laa̍ ja. 22Jɛ nyɔ̍ u̍h dbo̍-aɛ, u̍h mu̍-aɛ, u̍h se̍ u̍h dě kasoo jɛɛ. Wɛ̀ u̍h mu̍ de̍ iě u̍h po̍ kunǎ. 23U̍h la̍a̍, “À iě-a mu̍-ɛ, nɛ̀ kasoo gbò ka̍n wɔ̍i̍n gba̍i̍ngba̍i̍n, wɛ̀ ɛ̍ jlǐhɛ̍ we̍ tù nyɔ̍ nyna i̍ dǒ ɛ̍ wɔ̍i̍n. Jɛ à pɔ̀ni-a doǒ-ɛ, nɛ̀ nyɔ̍ se̍-e nɛ.” 24Ti̍ slaǎ sà gbò-a chape ke slaǎ sà nyɔ̍ klaaᵻ wɔ̌n-a u̍h-a kunǎ po̍ wlu̍-ɛ, sɔ ɛ̍ gbe-e dě u̍h di̍i̍ i̍. Iě u̍h-a pu̍e̍e wlùh i̍ pò ka ɛ̍ nu̍ nɛ-ɛ kɔ̌ɔ. 25Wɛ̀ nyɔ̍ ji̍, iě ɔ̍ la̍a̍, “Mɔ̀ gbɛ̀n-e, ùh mɔ̀ po̍-a kasoo-ɛ, u̍h bo ùh nɛ-a dě slaǎ sà gbò sɔ̀n de̍à ùh-a po̍-a nyɔ̍ nǎ.” 26Wɛ̀ chape ke ɔ̍ fledlǔ mu̍-e, iě u̍h ja u̍h. Jɛ u̍h se̍ u̍h-a klànklàn nu̍. Dɛ̍nu̍ɛ, u̍h-a ple̍ faɔn wɛ̀ nyɔ̍ɔ je̍e u̍h sɔɔ̌ᵻ i̍ tbaɛ.
27U̍h ja-a gba̍tòà laa̍-ɛ, wɛ̀ u̍h nyna-ɛ u̍h i̍ dǒ taɔ pa̍ nyɔ̍ jǔ. Iě slaǎ sà nyɔ̍ klaa tèle u̍h i̍. 28Ɔ̍ la̍a̍, “À po̍ mɔ̀ telě i̍ gbe̍i̍n kleǐn mɔ̀-ɔ je̍e nyɔ̍ nǎ po̍ dǒ jɔ̍gbau la ɔ̍ nynɛ̌ kɛ̍n. Jɛ Juluslɛn wlɔ̀-a chɛ̀ bo mɔ̀ wɔ̀-ɛ nǎ po̍-ɛ dlǔ wɛ̀. Wɛ̀ mɔ̀-a nu̍ ɛ̍ jǔ la ɔ̍ mɛ̌ɛ tìh iě dǒ à dlǔ i̍ tè.”
29Wɛ̀ Pitɛ bei sà u̍h-a wlu̍ pɔ̀n we̍, u̍h la̍a̍, “À kɔn à iě Nyɔsoa-a wlu̍ nu̍ ɛ̍ iě nyi̍ɔ̍ naɛ sìì. 30Jusu mɔ̀ pèle-a dǒ tu̍ wlì wɛ̀ ɔ̍ iě-a mɛ̌-ɛ, ɔ̍ bo à baaᵻá Nyɔsoa sà-e. 31Iě Nyɔsoa dǔ ɔ̍ ja̍i̍ dǒ ɔ̍ di̍na̍ we̍, ɔ̍ iě Dlǔtu ke nyɔ̍ Sèìe Nyɔ̍ nu̍. Wɛ̀ ɔ̍ iě Eslɔɛ nyɔ̍ flɔna̍ nyǐ u̍h iě i̍ bǐi wɛ̀ u̍h-a gblɛ̍n sɔ̀ɛ̀n-a tìh iě i̍ tǎli-ɛ. 32Àɔ̀ bo à nu̍ ìh la i̍h-a sàànsi̍i̍h, à ke Nyɔsoa-a Sùù ɛ̀ nu̍-a ɔ̍ nyǐ-dɛ̍ dǒ nyɔ̍ ɔ̀ nu̍-a ɔ̍ wlu̍ we̍-ɛ.”
33U̍h wɔ̌n-a wlu̍ la-ɛ, nɛ̀ u̍h sɔ̀n wɛ̀ dǒ ta̍i̍, iě u̍h-a pɔ̀n Pitɛ bei dbǎ-a i̍. 34Jɛ Fɛlesii jǔ due ɔ̍ nynɛ̌ bo Kamediɔ, ɔ̍ nu̍ taɔ-a nyɔ̍ due. Nyɔ̍ kli̍hgbɛ̍-a tè ɔ̍ ja̍. Ɔ̍ nu̍ telě nǎ poe nyɔ̍, iě ɔ̍ nyna i̍, ɔ̍ sèàɛ̍ nyɔ̍ wlùh u̍h iě nynuu̍ la dǒ sɔ̀n gba̍ wɛɛ. 35Wɛ̀ ɔ̍ la̍a̍, “Mɔ̀ɔ̍ Eslɔɛ nyɔ̍, mɔ̀ nu̍ nɛnɛ̌ dǒ dɛ̍ mɔ̀-a pɔ̀n-a nyɔ̍ la pùn nu̍-ɛ i̍-ɛ we̍ o. 36Ɛ̍ nu̍ ti̍ due wɛ̀ Tuda wlǔh kwlǎ ɔ̍ la̍ ɔ̍-ɔ dɛ̍-a nyɔ̍, iě ùh gbǎ-a dǒ ɔ̍ de̍e̍-ɛ, u̍h wɛ̀ nyɔ̍-a kmɛ nyìɛ̍ (400). Wɛ̀ ɔ̍ dbǎ-ɛ, wɛ̀ ɔ̍ de̍e̍ na nyɔ̍ kli̍hgbɛ̍ gbà ja̍i̍, iě ɔ̍ naɛ nynɛ̌ mɛ̌. 37Ɔ̍ dɛ sì-a i̍-ɛ, wɛ̀ Juda ɔ̀ sɔ-a dě Kaladii fɔɔ-ɛ wlǔh tà ke̍. Nɛ̀ ɛ̍ nu̍ nyɔ̍ slè ti̍, iě ɔ̍ chlì nyɔ̍ dɔu ke dǒ ɔ̍ chɛ̀ de̍e̍. Jɛ ɔ̍ dbǎ-ɛ ke, wɛ̀ ɔ̍ de̍e̍ na nyɔ̍ kli̍hgbɛ̍ gbà ja̍i̍. 38Nɛ̀ɛ̍ kaka la̍, ǎn sèàɛ̍ mɔ̀ wlùh mɔ̀ iě nyɔ̍ la sɔ̍n pùn sà. U̍h mu̍ u̍h-a dɛ̍. Dɛ̍nu̍ɛ, pò u̍h-a di̍i̍chì ke nu̍-dɛ̍ sɔ dě nyi̍ɔ̍ ja̍a̍-ɛ, nɛ̀ ɛ̍ mu̍ ja̍a̍i̍ gbǎ tiɔ. 39Jɛ pò ɛ̍ sɔ dě Nyɔsoa we̍-ɛ, nɛ̀ mɔ̀ se̍ nyɔ̍ la klà sà-a bɛ̌ɛ o. Mɔ̀ se̍ nɛnɛ̌ nu̍-ɛ, nɛ̀ mɔ̀-a fɔ̀n la̍ Nyɔsoa we̍ sǔh o.”
Sɔ u̍h wɔ̌n ɔ̍ wlu̍-u i̍ ke. 40Wɛ̀ u̍h dǎ Jusu-a gba̍tòà laa̍ dě de̍ gbò, iě u̍h bla̍ u̍h. U̍h la̍a̍, “Mɔ̀-ɔ wlu-i dǒ Jusu-a nynɛ̌ kɛ̍n dɛ de o.” Wɛ̀ u̍h dǔ u̍h sɔ̍n kɛ̍n sà-a. 41Ti̍ gba̍tòà-a sɔ-a dǒ taɔ laa̍ we̍-ɛ, nɛ̀ u̍h-a nu̍ mɔna̍ kaa̍, dɛ̍nu̍ɛ, Nyɔsoa slè-e u̍h nyɔ̍ chɛ̀ wɛ̀ u̍h iě mlɔ̌ wɔ̍n gbǎ dǒ Jusu-a nynɛ̌ kɛ̍n. 42Ka Jusu nu̍-a Nyɔsoa-a Chèɛ̀ Tba̍ju-ɛ, ka sɔ̀n-a sɛ̀n-a, kǎ u̍h-a mu̍ dě Nyɔsoa-a slaǎ sà gbò sɔ̀n ke gbòᵻ di̍i̍ i̍ iě u̍h-a poe ɛ̍ nyɔ̍ nǎ u̍h-a bla̍ ɛ̍ we̍i̍. U̍h-a wɔ̍n se̍ kǎ sèàn tàǎntàn.
Currently Selected:
Nu̍-dɛ̍ᵻ 5: KDNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Western Krahn published as KU̍O̍ DELEE © The Bible Society in Liberia, 1999.