Nu̍-dɛ̍ᵻ 4
4
Pitɛ ke Chɔɔn gba̍-ɛ dě taɔ jǔ
1Pitɛ ke Chɔɔn nɛ dǒ nyɔ̍ laa̍ we̍ wlu la̍ sǔh wɛ̀ Nyɔsoa-a slaǎ sà nyɔ̍ ke, slaǎ sà gbò-a chape ke Sadiusii nyɔ̍ ji̍ dǒ u̍h we̍. 2Sɔ ɛ̍ feǎn dǒ u̍h wlì. Dɛ̍nu̍ɛ, Pitɛ bei-a po̍ nyɔ̍gbei nǎ iě u̍h-a bla̍ tìh ka Jusu wlǔh-aeɛ, nɛ̀ mɛ̌-nyɔ̍-a mu̍ la̍-e wlǔh dode̍. 3Wɛ̀ u̍h gbɛ̍n Pitɛ bei, jɛ nɛ̀ wlù-a wɔ̀ la̍-ɛ. Ɛ̍ kɔn u̍h po̍ u̍h kasoo wɛ̀ sɔ̀n iě sɛ̀n. 4Jɛ nyɔ̍ dɔu ùh wɔ̌n-a wlu̍ tu̍ la-ɛ, u̍h po̍ ɛ̍ tìh chɛ̀. Pò ìn slè wlùh gbaɛ blě nyɔ̍-ɛ, u̍h bɛ̌ɛ wlǔ m̀m̌ (5,000) nu̍-ɛ.
5Sɔ̀n sɛ̀n-aɛ, wɛ̀ Juu nyɔ̍-a wlu̍ kwa̍ blě nyɔ̍ ke nyɔ̍ klaaᵻ ke telě nǎ poe nyɔ̍ gbèɛ̀ɛn dǒ Juluslɛn wlɔ̀ di̍i̍. 6Iě u̍h dǎ slaǎ sà nyɔ̍ klaa Anna ke Kaifa ke Chɔɔn ke Ɛlesana. Ɛ̍ ke slaǎ sà nyɔ̍ klaa-a chɛ̌ duuh ke. Iě u̍h gbèɛ̀ɛn. 7Wɛ̀ u̍h ja Pitɛ ke Chɔɔn dǒ u̍h jǔ, iě u̍h-a tèle u̍h i̍. U̍h la̍a̍, “Gbǐh jɛwe̍ kɔn di̍i̍ àe̍e̍ nyɔ̍ kɔn nynɛ̌ kɛ̍n bo mɔ̀-a nui ìh la ɛ?”
8Sɔ Nyɔsoa-a Sùù jǐi Pitɛ i̍, iě ɔ̍ la̍a̍ dě u̍h we̍, “Mɔ̀ɔ̍ ùh nu̍-a nyɔ̍-a wlu̍ kwa̍ blě nyɔ̍ ke u̍h-a nyɔ̍ klaaᵻɛ́, 9dɛ̍ chɛ̀ la ɛ̀ nui-a dǒ klɔ-nyɔ̍ la we̍ wɛ̀ ɔ̍ pǔh-a ka-aɛ, pò ɛ̍ tù ɛ̍ tìh mɔ̀ iě ka à-a chlɛ̌ sèàn-a, 10nɛ̀ mɔ̀ juo ɛ̍, nɛ̀ Eslɔɛ nyɔ̍ kli̍hgbɛ̍ juo ɛ̍ ke, ka Jusu Klai ɔ̀ sɔ-a dǒ Naaslɔɛ-ɛ, ɔ̀ mɔ̀ kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo Nyɔsoa sà-e. Dǒ ɔ̍ nynɛ̌ kɛ̍n bo jɔ̍gbau nyna-a i̍ da̍a mɔ̀ jǔ-ɛ ɔ̍ pǔh-i. 11Jusu la ɔ̍ kɔn tìh bo Nyɔsoa-a wlu̍ la̍a̍,
‘Sɔɔ̌ ɛ̀ mɔ̀ɔ̍ gbò po̍ nyɔ̍ tba̍-a chla de-ɛ,
ɛ̍ bo ɛ̀ bɔ̌ɛ-a ka gbò-a sìtù nu̍-ɛ wɛ̀.’
12Pǔh-ɛ se̍ dě nyɔ̍ dɔɔ ja̍a̍ nɛ. Nynɛ̌ dɛɛ se̍ nɔ̌ ja̍u̍n la sɔ̀n nɛ nyɔ̍ iě tù wɛ̀ à iě i̍ pǔh-i.”
13Pitɛ ke Chɔɔn se̍ chlǐh-dɛ̍ juo. U̍h nu̍ plǒai nyɔ̍ iě u̍h wɛ̀ faɔn. Ɛ̍ bo taɔ pa̍ nyɔ̍ laa̍ u̍h jě sɔ ɛ̍ wlǔh i̍ u̍h de̍e̍. Iě u̍h juo-o dɛ̍ i̍ ka u̍h ke Jusu-a nɛ̍aɛ-a we̍-ɛ. 14Jɛ jɔ̍gbau Pitɛ ke Chɔɔn pǔh-iaɛ, nɛ̀ ɔ̍ nyna u̍h pùn u̍h-a gba̍ jlǐhɛ̍ u̍h-a jě ɔ̍. Sɔ dɛ̍ u̍h iě-a bla̍-ɛ, ɛ̍ se̍ nɛ. 15Wɛ̀ u̍h sèàɛ̍ Pitɛ bei wlùh u̍h iě u̍h kɛ̍n wlǔh wɛɛ. Sɔ u̍h-a sǔh-a pu̍e̍e la̍ tìh sǔh. 16U̍h la̍a̍, “Ka à mu̍ nyɔ̍ la u̍h-a tìh nu̍ ɛ? Dɛ̍nu̍ɛ, jbaɛdih kaɛn la ɛ̀ jii-a dě u̍h ja̍a̍-ɛ, Juluslɛn nyɔ̍ kli̍hgbɛ̍ jě ɛ̍-ɛ, sɔ nɛ̀ à se̍ ɛ̍-ɛ tòlo-ɛ bɛ̌ɛ. 17Jɛ ka à iě-a nu̍ wɛ̀ ɛ̍-ɛ je̍e-a i̍ sɛ̍ dě nya̍ dě nyɔ̍ nynɛ̌-ɛ, mɔ̀ à tù u̍h slɛ̌n u̍h-u je̍e dě nyɔ̍-o-nyɔ̍ we̍ wlu dɛ dǒ Jusu-a nynɛ̌ kɛ̍n.”
18Wɛ̀ u̍h dǎ-ɛ u̍h de̍ iě u̍h tè u̍h telě i̍, u̍h-u je̍e wlu àe̍e̍ u̍h-u je̍e nǎ po̍ dɛ dǒ Jusu-a nynɛ̌ kɛ̍n. 19Jɛ Pitɛ ke Chɔɔn la̍a̍, “Pò ɛ̍ slɛ̌ i̍ dě Nyɔsoa jlǐh à iě mɔ̀ dɛ̍ɛ̍ jě ɛ̍ iě ɔ̍ sìì-ɛ, mɔ̀-a chɛ̀ iě ɛ̍-ɛ sèàɛ̍. 20Dɛ̍nu̍ɛ, dɛ̍ jɛ à wɔ̌n-a wɛ̀ à tba̍-a jlǐhɛ̍-ɛ, à se̍ ɛ̍-ɛ sà-a bɔ̌ mu̍ o.” 21Sɔ taɔ pa̍ nyɔ̍ po̍ u̍h faɔn di̍i̍ i̍ sǔh, wɛ̀ u̍h tǎli u̍h i̍. U̍h-u jě u̍h kàn gbɛ̍n ka̍. Dɛ̍nu̍ɛ, nɛ̀ nyɔ̍ kli̍hgbɛ̍-a po̍ Nyɔsoa tìhwe̍ dǒ ɛ̀ nɛ-aɛ we̍. 22Jɔ̍gbau ɔ̀ kɔn pùn jbaɛdih poe-a wɛ̀ ɔ̍ pǔh-aɛ, ɔ̍ sɔ̀nᵻ sì kwela nyìɛ̍ kɛ̍n.
Wlùh gbaɛ blě nyɔ̍ ba̍le Nyɔsoa
23U̍h sà-a u̍h sɔ̍n kɛ̍n wɛ̀-ɛ, wɛ̀ Pitɛ ke Chɔɔn mu̍ dě de̍ u̍h ba̍ᵻ we̍. Wɛ̀ dɛ̍ᵻ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ bla̍-a dě u̍h we̍-ɛ, iě u̍h po̍ i̍h-a kunǎ kli̍hgbɛ̍. 24Ti̍ u̍h wɔ̌n-a i̍h-ɛ, iě u̍h kli̍hgbɛ̍ ba̍le Nyɔsoa. U̍h la̍a̍, “Joi, mɔ̀ bo ɔ̀ nu̍ bloa̍ ke ja̍u̍n ke jbǒ, ɛ̍ ke dɛ̍ᵻ kli̍hgbɛ̍ nɛ-a dě i̍h di̍i̍-ɛ ke. 25Mɔ̀ bo ɔ̀ jii dě àn Sùù di̍i̍ wɛ̀ ìn wlu-i dě à baa Depe ja̍a̍ ɔ̀ nu̍-a àn pòi̍ju-ɛ, iě ɔ̍ la̍a̍,
‘Dɛ̍-ɛ tìh ùh se̍-a Juu nyɔ̍-a fɛ̍n jlu̍h,
iě u̍h-a sɔ̌ bu̍ɛ̍i̍ ɛ?
26Blǔh baaᵻ nɛ-a nɔ̌ bloɔ̍-ɛ, u̍h po̍ u̍h-a chɛ̀ gba̍a̍,
iě nyɔ̍-a wlu̍ kwa̍ blě nyɔ̍-a gbòe i̍,
u̍h iě Joi ke ɔ̍ Chèɛ̀ Tba̍ju bu̍hᵻ tbaɛ.’
27I̍i̍n, kǎ ɛ̍ nɛ, àn pòi̍ju Jusu ɔ̀ wɛ̀-a nɛi̍ iě ìn tba̍-a chèɛ̀-ɛ, Ɛlo ke, Pɔntiɔ Pale ke ɔ̍ bu̍hᵻ tbaɛ tìh bo u̍h tù wɛ̀ u̍h ke ùh se̍-a Juu nyɔ̍-ɛ ke Eslɔɛ nyɔ̍ gbòe i̍ da̍a tùgbàwlɔ̀ la di̍i̍. 28Dɛ̍ ìn po̍-a gbɔ̀ se̍e̍ dǒ àn gbǐh we̍ ɛ̀ iě-a nɛ-ɛ, ɛ̍ bo u̍h gbòe i̍ u̍h iě nu̍. 29Nɛ̀ɛ̍ Joi, kaka la̍ u̍h-a plǐn-ɛ bo ìè ja̍ gbɛ̀n wɛ̀ ìè àɔ̀ nu̍-a àn pòi̍nynuu̍-ɛ gbǐh nyǐ, à iě àn wlu̍ bla̍ gbài̍gbài̍. 30Nɛ̀ ìn to àn sɔ̍n ɛ̍ iě nyɔ̍ pǔh-i. Nɛ̀ ìn po̍ jbaɛdih ìè nyɔ̍ wɔ̍n flɔn-ɛ dɛ̍ᵻ nu̍ dǒ àn pòi̍ju Jusu-a nynɛ̌ kɛ̍n, ɔ̀ wɛ̀-a nɛi̍-ɛ.”
31U̍h iě-a ba̍le-ɛ wɔ̀-ɛ, tà u̍h nɛ-a wɛ̀ u̍h iě-a ba̍le-ɛ, sɔ dǒ sìka i̍ sǔh. Wɛ̀ Nyɔsoa-a Sùù jǐi u̍h kli̍hgbɛ̍ i̍, iě u̍h-a bla̍ Nyɔsoa-a wlu̍ gbài̍gbài̍.
Wlùh gbaɛ blě nyɔ̍-a dɛ̍ nɛ due
32Wlùh gbaɛ blě nyɔ̍ kli̍hgbɛ̍ u̍h blě-e wlùh iě u̍h-a pɔluh nɛ due. Dɛ̍-ɛ i̍ gblè nyɔ̍ se̍ dě u̍h nynɛ̌ nɛ. U̍h-a pu̍e̍e dɛ̍ᵻ kwa̍a̍ i̍ kleǐn. 33Sɔ Jusu-a gba̍tòà blě gbǐh ɛ̀ ku̍-a wɔ̍n-ɛ, iě u̍h-a sà Joi Jusu-a mɛ̌ wlǔh-e tìh i̍. Iě Nyɔsoa-a wɔ̍n ku̍ pɔ̀ìě nɛ u̍h kli̍hgbɛ̍ we̍. 34Sɔ nyɔ̍ dɛ̍-a tìh iě-a i̍ nu̍ dě u̍h nynɛ̌-ɛ, ɔ̍ se̍ nɛ. Nɛ̀ɛ̍, nyɔ̍ kli̍hgbɛ̍ ùh blě-a blǔh ke gbòᵻáɛ, u̍h-a ple̍ i̍h, iě u̍h-a ja i̍h-a wlǐ 35u̍h-a sà i̍h kwlǎ dě gba̍tòà we̍, wɛ̀ u̍h-a gblè i̍h. Dɛ̍ nɛ-a jɔ-a gba̍ ka̍-ɛ, nɛ̀ ɛ̍ bo ɔ̍ gba̍.
36Josɛ ɔ̀ sɔ-a Saiplɔ bloa̍ kɛ̍n-ɛ, kǎ ɔ̍ nu̍ ke. Gba̍tòà-a dǎɛ ɔ̍ Banaba. Ɛ̍ gbɔ̀ nu̍ wlùh fùka nyɔ̍. Liifaɛ jǔ bo. 37Ɔ̍ ple̍-a ɔ̍ blǔh-ɛ, wɛ̀ ɔ̍ ja ɛ̍ wlǐ laa̍ iě ɔ̍ sà-ɛ i̍h gba̍tòà kwlǎ.
Currently Selected:
Nu̍-dɛ̍ᵻ 4: KDNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
The New Testament in Western Krahn published as KU̍O̍ DELEE © The Bible Society in Liberia, 1999.