Luka 10
10
Jesụ ịkubatuma abafụ̄ndịgwa amalōngo mahāno na mabili
1Pānyụma pali sịsịsị UNTWA ābasalịle abafụ̄ndịgwa abāngi amalōngo mahāno na mabili (72) alinkubalongosyapo nkyenị mbubili mbubili ntwaja na mbujo mōsa mụno āsụmwịke umwene. 2Alinkubabūla alinkuti: Untōndolo go mwịngị lolị ababōmbị bo banāndi; lelo amụnsūmege UNTWA gwa ntōndolo ukuti abatumege ababōmbị bākubūngania ifya mụntōndolo gwake. 3Amụbūkege ngubatuma ukufwana tung'ōsị nkāti mfịnyamāna. 4Mụngakolelaga ikisaka kyandalama nakimo, pamo umfụko, pamo ifịlato, mụnjila mụngīmaga pakumponịa umụ̄ndu najumo. 5Nnyụ̄mba jōsa ịtolo iji mụkwakwịngilāngamo, mụkatalege ukujoba ilyakuti: Ulutēngāno lujēngemo nnyụ̄mba iji! 6Linga alịmo umụ̄ndu unnganalutēngāno ịkugona mụlamụla, uluponịo lwinụ lwa lutēngāno lwịsakujaga pamyake, linga mma po lwịsakubagomokelaga jujumwe. 7Mụkatūgalege nnyụ̄mba jilajila, mụkalyege nukunwa ifị linga bịkubapa, namanga ummbōmbị kummbagị̄le ukuja numfwalo; mụngaja kwembelaga nnyụ̄mba iji naiji. 8Lelo linga bịkubāmbilila nkāja kamo aka mụkwakwịngilāngamo, mụkalyege ifị̄ndu ifị linga bịkubategelekesya; 9mụkababūmbulusyege ababịne mụlamụla, mụkababūlege mụkātigi: Ikitāngālala kya Kyala kị̄sịle kili kifụkị nanụmwe. 10Lolị linga batịkubāmbilila nkāja aka mụkwakwịngilāngamo, mụkabūkege mmị̄pūlo gyake mụkātigi: 11Lōpe nulufụ̄mbi lwa nkāja kīnụ ulu lutūmīlị̄le mmalūndi, tụkubakụng'undilaga jujumwe; lolị lelo mụsịmanyege isyakuti ikitāngālala kya Kyala kisegelị̄le. 12Ngubabūla pị̄sịku lya bulōngị sịsakujaga kyajipo nisya Sotomụ kusya kāja kala.
Utwaja utu lukālimo ulwịtiko
(Mat. 11:20-24)
13Uligwakị gwe Kolasịnị! Uligwakị gwe Betịsaịta! Namanga linga īmbōmbo sya maka isị sịbōmbị̄gwe mmyako syabōmbị̄gwe mụ Tịlị na mụ Sịtonị, ngali bapīndwịke liịjolo, ngali bafwele ifịgụnila nukutūgala mụmfwandilo. 14Lolị pị̄sịku lya bulōngị sịsakujaga pākịpo isya Tịlị ni sya Sịtonị kusyinụ. 15Nanụngwe gwe Kapelịnaumụ, kulōnda ukwịjīmịka ukwakufịka kumwanya? Mma, kwịsịgwaga mpaka kubusyuka.
16Uju ịkubapilika umwe ịkumbilika une, uju ịkubasyokela umwe ịkusyokela une; uju ịkūsyōkela une ịkunsyokela uju ālindumịle une.
Ukugomoka kwa bafụ̄ndịgwa amalōngo mahāno na mabili na babili (72)
17Abafụ̄ndịgwa amalōngo mahāno na mabili nababili bāgomwịke nulusekelo, balinkujoba balinkuti: NTWA, syope ni mbepo īnyalị twasịlambikilaga mụngamụ jako! 18Alinkubāmbilila alinkuti: Nālimmbwene Setano bo ịkugwa ukufwana lumụlị lwa njasị ukufụma kumwanya. 19Kēta, mbapēle amaka ukukanya pamwanya panjoka napa bakālị̄sa, napamwanya pa maka gōsa ga nndufụ; nafịmo fịtịsakubafụlasyaga. 20Lolị mụngasekelaga nsyakuti mbepo īnyalị sịkulāmbaga kumyinụ; lolị mụsekelege linga mwagịle īngamụ syinụ sịsị̄mbị̄gwe kumwanya.
Jesụ ịkusekela
(Mat. 11:25-27; 13:16-17)
21Nkabalilo kalakala Jesụ alinkusekela mwa Mbepo Mwịkemo alinkuti: Ngugwa ulupị kumyako, Tāta, gwe NTWA gwa kumwanya napāsị, apa ubafịsịle sịsịsị abamahala nabamang'anyị, ubakị̄ngulị̄le abakeke, ena gwe Tāta, buno syo isị gwalịkyelịle ugwe ukusịbōmba. 22Utūndu tōsa mbēgị̄gwe une na Tāta; najumo akamanya ukuti umwana jwanị lolị mwene ju Gwịse, pamo ukuti Ugwịse jwanị lolị mwene ju Mwana, nujūngi gwesa uju Umwana ịganịle ukunkịngulila.
23Lelo Jesụ, alinkubasyụtụkila abafụ̄ndịgwa alinkujoba nabo kubutị̄tu alinkuti: Masāngalufụ fijo amāso aga gịkukēta isi mụkukēta umwe. 24Ngubabūla ukuti abakụ̄ngụlụka babịngị nabanyafyale bālōndaga nukusịkēta isị mụkusịkēta umwe, lolị balinkusịta nukusịbona, nukupilika isị mụkupilika lolị balinkusịta ukusịpilika.
Ikfiwanịkisyo kya Nsamalịja unnụnụ
25Ummanyandagilo jumo alinkwịsa kukunngela Jesụ. Alinkulālūsya alinkuti: Mmanyịsị, mbōmbe fịkị ukuti nịsembwagege ubūmị bwa bwịla? 26Jesụ ālyamwịle ātịle: Sịsị̄mbị̄gwe syafịkị mụndagilo? Kusyagamo sya fịkị bo kubala? 27Ālyamwịle ātịle: Unnganege UNTWA Kyala gwako nindụmbụla jako jōsa, numōjo gwako gōsa, namaka gāko gōsa, kangi na mahala gāko gōsa, jope numpalamanị gwako unnganege bo apa gwịganịle ugwe gwịmwene. 28Alinkummbūla alinkuti: Utalwịsye; bo ubōmbēge bunobuno po kwisakubwagaga ubūmị.
29Lolị umwene alinkulōnda ukwịnokesya, alinkunndālūsya Jesụ alinkuti: Kali umpalamanị gwangu jwanị? 30Jesụ ālyamwịle ātịle: Umụ̄ndu jumo ị̄kililaga ukufụma mụ Jelụsalemụ ukubūka mụ Jelịko alinkwaganịla ni mịnyāmbụta, gyo gilinkumfụ̄la imyenda gilinkunkoma gilinkunndeka bo asyele panāndi ukufwa gilinkubūka. 31Lelo kulusako umpụ̄tị ị̄kililaga mụnjila jilajila; lelo bo ammbwene umụ̄ndu jula alambalēle, alinkwenda nukusāsa ukukīnda. 32Bunobuno jope nu nnya Lebị bo afịkịle pabujo bulabula, ammbwene, alinkusāsa alinkunkīnda. 33Lolị Unsamalịja bo ịkwenda īnjila jake alinkufịka apa ālipo uju gyalinkomịle iminyāmbụta; lelo bo ammbwene kilinkummwaga ikisa mụ̄nda, 34alinkusegelela kumyake alinkumpịnya nimyenda mfịlōnda fyake bo ōnị̄lemo īnyēmba nubwalwa bwa māfị̄lu, alinkumpīmbila pambụ̄nda jake, alinkuntwala nnyụ̄mba ja bēndanjila, mo alinkwakundwakisya. 35Pị̄sịku lya kilābo kyake alinkusokola īndalama ịbili alinkunnị̄nga umwenenyụ̄mba ja bēndanjila, alinkuti: Undwakisyege umụ̄ndu uju; īndalama isị linga sịkīndịleko mbulwasị, nịsakuhombaga bo ngugomoka. 36Jesụ amalisị̄sye ubujobị ātịle: Mụnyịnogono syako kuti jo aliku mbāndu batatu bala uju ali mpalamanị gwa mụ̄ndu jula gyalinkomịle iminyāmbụta? 37Ummanyandagilo ālyamwịle ātịle: Jo uju ālimmbōmbị̄le ilị̄pyana. Jesụ ālyamwịle ātịle: Būkaga lelo bo ukatendekege bunobuno nanụngwe.
Jesụ ịkubūka kukubaponịa ba Malịta na Malịja
38Lelo bo Jesụ na bafụ̄ndịgwa bāke bịkwenda, alinkufịka nkāja kamo akanāndi aka ālimo unkị̄kulu jumo uju āli jo Malịta īngamụ, uju ālimmwambilị̄le Jesụ nnyụ̄mba jake. 39Ali nunnụgụna uju īngamụ jake ali jo Malịja, jo alinkutūgala mmalūndi mụ NTWA, alinkupilikisya isi āmanyịsyaga. 40Lolị Malịta ālị̄kolēnịe nimbōmbo nyịngị, alinkusegelela kwa Jesụ alinkuti: NTWA Utịkusịbona ukuti sịkaja nụnụ ukuti unnụgụna gwangu āndekelege īmbōmbo nịmwene? Ulīmmbūla āndūlege. 41Lolị UNTWA ālimmwamwịle ātịle: Malịta, Malịta, ukatēngāna kangi kwịkatasya nutūndu twịngị, 42lolị kịkulōndịgwa akāndu kamokēne. Malịja ị̄salị̄le akāndu kānalōlị, aka katịsakwegịgwamo sịku kumyake.
Currently Selected:
Luka 10: NYB96
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Nyakyusa Bible © Bible Society of Tanzania, 1996.