Марк 9
9
1 Исади абуруз мад лагьана:
– За квез рикӀивай лугьузва: инал акъвазнавайбурук ахьтинбур ква хьи, абуруз Аллагьди къудрат гваз ийидай Пачагьвал акун тавунмаз, гьич ажални аквадач.
Исадин къамат дегиш хьун
(МатӀай 17:1-13; ЛукӀа 9:28-36)
2Ругуд югъ алатайла, Петрудилай, Якьубалай ва Ягьядилай гъейри мад са касни галачиз, Иса кьакьан дагъдиз экъечӀна, гьана абурун вилик Адан къамат дегиш хьана. 3Адан пекер, жив хьиз, лацу хьана, рапрап гуз акъвазнавай. Ахьтин лацувал чилин винел садавайни арадал гъиз жедачир. 4Садлагьана тилмизриз Исадихъ галаз суьгьбетар ийизвай Ильясни Муса акуна.
5Гьа и арада Петруди Исадиз лагьана:
– Я Муаллим! Чун ина аваз хъсан хьана. Ша, чна инал пуд кума эцигин: сад – Ваз, сад – Мусадиз, садни – Ильясаз.
6Петрудизни амай тилмизриз лап гзаф кичӀе хьанвай, адаз лугьудай маса гаф жагъаначир.
7И чӀавуз абурун кьилел лацу цифеди хъен вегьена. Адан къеняй рахадай ван акъатна:
– Ам Зи рикӀ алай Хва я. Гьадан чӀалаз килиг!
8Садлагьана элкъвена кьуд патахъ килигайла, абуруз Исадилай гъейри мад касни акунач.
9Дагъдай эхвичӀзавайла, Исади илчийриз, чпиз акур аламатдикай та Инсандин Хцел кьейидалай кьулухъ чан хкведалди садазни талгьун кӀевелай тагькимарна. 10Абуру Адан Гаф кьилиз акъудна, амма «кьейидалай кьулухъ чан хкведалди» вуч лагьай чӀал я лугьуз, абур веревирдер ийиз амукьна.
11Абуру Адавай хабар кьуна:
– Вучиз тавратдарри Месигьдилай вилик Ильяс хтун лазим я лугьузва?
12– Гьахъ я, Ильяса Адалай вилик хтана, вири крар гуьнгуьна тун лазим я, – жаваб гана Ада. – АкӀ хьайила, бес вучиз пайгъамбаррин ктабра Инсандин Хци гзаф азаб-азиятар чӀугвада ва Ам инсанри виляй вегьида лагьана кхьенва? 13Амма За квез лугьун хьи, Ильясакай Каламда кхьенвайвал, ам хтанай. Инсанри адаз чпиз кӀандайвал авунай.
Жин квай жегьил сагъар хъувун
(МатӀай 17:14-19; ЛукӀа 9:37-42)
14Амай тилмизрин патав хтайла, Исадизни пуд тилмиздиз кӀватӀ хьанвай халкьдин арада абурухъ галаз гьуьжетарзавай тавратдарар акуна. 15Иса акунмазни халкь мягьтел хьана. Инсанри, Адаз салам гун патал, Адан патав зверзавай.
16Ада абурувай хабар кьуна:
– Куьне абурухъ галаз квекай гьуьжетарзава?
17– Муаллим, – лагьана сада халкьдин арадай. – За Ви патав зи хва гъанва. Лал жин акатна, адавай рахаз жезвач. 18Гьинал ам жинжи кьуна чилел гадрайтӀа, гьанал ам чӀур жезва: адан сивяй каф къвезва, сарари жакь-жакьзава, вични къах хьана амукьзава. За Ви тилмизривай адак квай жин хкудун тӀалабнай, амма абурулай а кар алакьначир.
19– Эй иман гвачир несил! – лагьана Исади абуруз. – Гьикьван гагьда Зун квехъ галамукьрай? Гьикьван чӀавалди За куьн эхрай? Гъваш ам Зи патав!
20Гада Исадин патав гъана. Иса акунмазни, жинжи гададик зурзун кутуна. Ам сивел каф акьалтна чилел ярх хьана ва ам къатадиз эгечӀна.
21– Ам икӀ мусалай ава? – хабар кьуна Исади адан бубадивай.
– Аял чӀавалай, – жаваб гана ада. – 22Гзаф гъилера зи велед тергиз кӀанз жинжи ам цӀузни вацӀуз вегьенай. Валай алакьдатӀа, чаз са чара ая. Ваз чи язух ша!
23– «Валай алакьдатӀа» вуч лагьай гаф я! – лагьана Исади. – Иман гвайдалай алакь тийидай кар авач.
24– Зун имандал ала! – гьарай акъатна гададин бубадай. – Зи иман бегьемди туштӀа, ам бегьем хъийиз куьмек ая!
25– Лал ва биши жин! – кӀевелай лагьана анал инсанар алтӀуш жез акур Исади. – За ваз адай экъечӀ лугьузва! Мад адак акат хъийимир.
26Жинжяй гьарай акъатна. Гада кӀевиз зурзурна, жин адай экъечӀна. Аял мейит хьиз ярх хьана. Анал алайбуруни ам кьена лугьузвай. 27Исади гъил кьуна гада къарагъарна.
28КӀвализ гьахьна, Исадихъ галаз кьилди амайла, тилмизри Адавай хабар кьуна:
– А кар чалай вучиз алакьначир?
29– А жин масакӀа ваъ, анжах дуьадалди хкудиз жедайди тир, – жаваб гана Исади.
Исади Вичин кьиникьикай кьвед лагьай гъилера лугьун
(МатӀай 17:22-23; ЛукӀа 9:43-45)
30Анай экъечӀна, абур Галилейдай яна физвай. Исадиз чеб анай физвайди садазни чир хьана кӀанзавачир, 31вучиз лагьайтӀа Ада Вичин тилмизар «Инсандин Хва инсанрин гъиле твада, Ам яна рекьида, амма пуд лагьай юкъуз Адал чан хкведа», – лугьуз гъавурда твазвай.
32И гафарин гъавурда гьатначтӀани, тилмизриз Адавай хабар кьазни кичӀезвай.
Вуж артух я?
(МатӀай 18:1-5; ЛукӀа 9:46-48)
33Абур Кефернагьумдиз атана кӀвале авайла, Исади абурувай хабар кьуна:
– Рекье куьне квекай гьуьжетарзавай?
34Абуру чуькьни авунач, вучиз лагьайтӀа абуру рекье, чпикай вуж сад лагьай чкадал алатӀа лугьуз, гьуьжетарзавай.
35Иса ацукьайла, Ада цӀикьвед тилмиз кӀватӀна.
– Низ сад лагьайди жез кӀанзаватӀа, гьам виридакай эхиримжиди ва амайбурун кьилел-кӀвачел элкъведайди хьухь, – лагьана абуруз Исади.
36Исади аял къачуна, ам абурун юкьвал акъвазарна, адан гардан кьуна, лагьана:
37– Ни Зи хатурдай ихьтин аялрикай сад жуванди яз кьабулайтӀа, гьада Зун кьабулзава. Зун кьабулзавайда са Зун ваъ, Зун Ракъурайдини кьабулзава.
Вуж ваз акси туштӀа, гьам ви пад жеда
(МатӀай 10:42; ЛукӀа 9:49-50)
38Инал Ягьяди лагьана:
– Я Муаллим! Чаз Ви ТӀварцӀелай инсанрикай жинерар хкудзавай са кас акунай, амма, ам чакай туширди хьуниз килигна, чна адаз а кар ийиз къадагъа авуна.
39– Адаз къадагъа ийимир, – лагьана Исади. – Зи ТӀварцӀелай аламатар авурдавай гуьгъуьниз закай пис рахаз жедач. 40ГьакӀ хьайила вуж чаз акси туштӀа, гьам чи патал ала.
41Куьн Месигьдихъ галайбур хьуниз килигна, Зи хатурдай ни квез са цӀиб яд гайитӀа, За квез рикӀивай лугьузва, гьадав вичин савкьватни агакьда.
Инсан рекьяй акъуддай затӀарикай
(МатӀай 5:13; 18:8-9; ЛукӀа 17:1-2)
42Зи имандал алай ихьтин адетдин гъвечӀи ксарикай сад ни рекьяй акъудиз хьайитӀа, ам гарданда регъуьн къван туна гьуьлуьз вегьейтӀа хъсан я. 43-44Ви са гъили вун гунагь ийидай йикъаз гъизватӀа, вуна ам атӀутӀ: кьве гъил кваз жегьеннемдин хкахь тийидай цӀуз аватдалди са гъил кваз даим ацӀай уьмуьрдиз гьахьун хъсан я.
45-46Ви са кӀвачи вун гунагь ийидай йикъаз гъизватӀа, вуна ам атӀутӀ: кьве кӀвач кваз жегьеннемдин цӀуз аватдалди са кӀвач кваз даим ацӀай уьмуьрдиз гьахьун хъсан я.
47Ви са вили вун гунагь ийидай йикъаз гъизватӀа, вуна ам акъудна гадара: кьве вил аваз цӀун гургур авай жегьеннемдиз аватдалди ваз са вил аваз Аллагьдин Пачагьлугъдиз гьахьун хъсан я. 48Жегьеннемда, лагьайтӀа, сурун квакни рекьидач, цӀайни хкахьдач.
49Къурбанд патал тукӀунвай гьайвандин як кьелелди михьдайвал, гьар са инсанни цӀалди михьда.
50Кьел хъсан затӀ я. Кьел шит хьайитӀа, адан тӀеам куьв эвез хъийида? Кьел жувак кваз хьана кӀанда. Куьне квехъ галаз ислягьвилелди уьмуьр твах.
Currently Selected:
Марк 9: ЛезПК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2010-2024