LUKA 4
4
Matimo gha Jesu
(Mat. 4.1-11; Mk. 1.12-13)
1Nao Jesu ukawuya kufuma Jordani wachulwa ni Roho Mweli, ukaghenjwa kireti ni Roho, matuku mirongo ina, 2ukitimwa ni Ibilisi. Matuku agho nderejieghe kilambo chingi anduangi; hata iji ghameria kukatia, ukasikira njala. 3Nao Ibilisi ukamzera, “Ngera koko Mwana wa Mlungu, kujizere iji igho jiwuye mkate.” 4Jesu ukamzera, “Yaandikilo ‘Mdamu ndechaakaia moyo kwa mkate ghoni anduangi.’”#Wuk. 8.3
5Nao Ibilisi ukamghenja andu kuko ighu, na shwa wori ukammbonyera mawuzuri ghose gha wurumwengunyi, ukamzera, 6“Nichakuneka nguma iri rose na wubaa ghwaro, angu nanekelo, nani nadamneka uo ose nimkundagha, 7ikakaia kwanitasa, ivi vose vichawuya vako.” 8Jesu ukamzera, “Yaandikilo, ‘Kuchamtasa Bwana Mlungu wako, sena kuchamdumikia uo moni uekeri.’”#Wuk. 6.13
9Nao Ibilisi ukamdwa hata Jerusalemu, ukammbika mdonyi ghwa Hekalu, ukamzera, “Ngera koko Mwana wa Mlungu, kukuchunuo kumoni andonyi, 10angu yaandikilo, ‘Uchawilaghira weke malaika wake wikulindie,#Zab. 91.11 11sena wichakuambaria mikonunyi kwawo, kusechekuwa kughu kwako ighonyi.’”#Zab. 91.12
12Jesu ukatumbulia, “Yaghorelo, ‘Kusakemtima Bwana Mlungu wako.’”#Wuk. 6.16 13Nao iji Ibilisi waghimeria matimo ghake ghose, ukamsigha Jesu kwa ngelo.
Jesu kuzoya wudumiki ghwake Galilaya
(Mat. 4.12-17; Mk. 1.14-15)
14Nao Jesu ukawuya Galilaya uko nandighi ra Roho Mweli, na sare yake ikaera mbai-mbai kose isangenyi. 15Nao ukafundisha andenyi ya sunagogi rawo ukikaswa ni wose.
Jesu kuleghwa aja Nazareti
(Mat. 13.53-58; Mk. 6.1-6)
16Nao ukacha Nazareti andu oreleleloghe, ukangia sunagoginyi ituku ja Sabato karakara na mzango ghwake. 17Ukawuka kimusi ushome, ukanekwa chuo cha mlodi Isaya, ukachikuchua ukawona andu kuandikilo,
18“Roho wa Bwana oko aighu kwapo,
angu orenishingieghe mavuda
niwichilie wakiwa Ilagho Jiboie.
Wanidumie niwighorie wafungwa malagho
gha kufungulwa kwawo,
na vitungure kupata kuwona kwawo,
kuwifungua awa wikorongwagha;#Isa. 61.1-2
19na kughutangaza mwaka ghwa Bwana ghurumirikie.”
20Nao ukachikucha chuo, ukammbunjira mdumiki; hata umeria kusea kidombo, wandu wose werekoghe andenyi ya sunagogi wikamkuya meso. 21Ukazoya kuwizera, “Idime maandiko agha ghapata kukatia madunyi konyu.” 22Na wose wikamghora nicha, wikishinika kwa wundu ghwa agho malagho gha mvono orekoghe ukighighora; wikaghamba, “Welee, uhu suo moni mwana wa Josefu?”
23Nao ukawizera, “Kwa loli mchaghutumia mfwano ughu aighu kwapo: ‘Mghanga, kukuboise kumoni, agho disikire wei kwaghibonyere Kafarnaumu, ghibonye aha isangenyi jako wori.’” 24Ukaghamba, “Namghoria loli, ndekuwadie mlodi ungi urumirikiagha isangenyi jake jeni.#Joh. 4.44 25Ela namghoria loli, korekoghe na waka wakiwa wengi Israeli, matuku gha Elija; iji mlungunyi korefungiloghe kusenyeshe vua miaka idadu na meri irandadu, na njala mbaa ikangia isanga jose.#1 Waz. 17.1 26Na Elija nderedumiloghe kwa ungi wawo, ela kwa muka umu mkiwa orekoghe Zarefathi isanga ja Sidoni.#1 Waz. 17.8-16 27Sena korekoghe na wandu wa sima wengi Israeli matuku gha mlodi Elisha, hata ndekuwadie ungi wawo oreelesheroghe, ela Naamani Msiria.”#2 Waz. 5.1-14 28Nao iji wasikira agho, wose werekoghe andenyi ya sunagogi wikajokwa ni machu. 29Wikawuka na kumfunya shighadi ya muzi, wikamghenja mghondinyi andu muzi ghwawo ghoreaghiloghe, na kumreda kichechemukonyi wipate kumchunua kijimijimi. 30Ela Jesu ukaida aghadi kwawo, ukaghenda chia yake.
Mundu uko na pepo izamie
(Mk. 1.21-28)
31Nao ukasea cha Kafarnaumu muzi ghwa Galilaya. Nao orekoghe ukiwifundisha ituku ja Sabato; 32wikashinulwa ni mafundisho ghake, angu orekoghe ukideda kwa nguma.#Mat. 7.28-29 33Nao ahoeni sunagoginyi, korekoghe na mundu uko na roho ya pepo ya makakala, nao ukakema na lwaka lubaa, 34“Aa! Kwakunde kudibonya wada oho Jesu wa Nazareti? Kwaacha kuditotesha? Ini nakuichi oho ko uja Mweli wa Mlungu.” 35Ela Jesu ukaikania ukaghamba, “Nyama kima kufume kwake!” Nao ija pepo imeria kumghusha aghadi kwawo, ikamfuma, isem'bonyere ilagho jingi. 36Wandu wose wikashinika na kuzerana, “Ni ilaghoki iji? Angu kwa nguma nandighi wadalaghira pepo ra makakala, naro radafuma?” 37Nao sare yake ikaera mbai-mbai kose isangenyi.
Jesu kuboisa wandu wengi
(Mat. 8.14-17; Mk. 1.29-34)
38Jesu ukawuka ukafuma sunagoginyi, ukangia nyumbenyi kwa Simoni. Nao Simoni mkekwake orekoghe na homa mbaa, wikamghoria Jesu. 39Ukacha ukakaia kaavui na wuli ghwake, ukaikania ija homa, nayo ikamsigha; ukawuka shwa wori ukawidumikia.
40Nao iji iruwa jerekoghe jikineng'ena, wose werekoghe na wakongo wengi wiko na makongo mazima mazima wikawireda kwake, nao ukawiwikiria mikonu wose ukawiboisa. 41Na pepo nyingi rikawifuma wandu wengi rikikema na kughamba, “Oho ko Mwana wa Kristo!” Ela ukarikania na kurighiria kudeda, angu reremmanyireghe uo kukaia Kristo.
Jesu kuchila andenyi ya Sunagogi
(Mk. 1.35-39)
42Nao iji ndoe yaela, ukafuma ukaghenda andu kusewadie wandu. Wandu wikamlola na kumchea, wikakunda kumghiria usakefuma kwawo. 43Ela ukawizera, “Yanifwana kuchila iji Ilagho Jiboie ja Wuzuri ghwa Mlungu kwa mizi mizima wori, angu kwa wundu ughu niko neredumiloghe.” 44Nao ukakaia ukichila sunagoginyi ra Judea.
Ekhethiweyo ngoku:
LUKA 4: TAITA
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
©Bible Society of Kenya, 1997
All rights reserved.