JOHANE 4
4
Jesu na muka wa Kisamaria
1Idana Mafarisayo weresikireghe angu Jesu orekoghe ukipata na kubaputiza wanughi wengi kuchumba Johane. 2(Elaima Jesu moni nderebaputizireghe mndungi, awo werebaputizereghe ni wanughi wake.) 3Niko iji Bwana wamanya agho, ukafuma Judea na kuwuya sena Galilaya; 4na aho erekoghe suti uidirie Samaria.
5Nao ukavika Saika muzi ghumu ghwa Samaria, kaavui na ija mbuwa Jakobo oremnekieghe mwana wake Josefu.#Kuz. 33.19; Jos. 24.32 6Wokoni aho korekoghe na kisima cha Jakobo. Niko Jesu, angu wasilwa kwa wundu ghwa charo chake, ukasea kidombo kaavui na icho kisima; erekoghe ngera sa saa ya karandadu.
7Nao ukacha muka wa Kisamaria kudaya machi. Jesu ukamzera, “Nineke machi ninyo.” 8Angu wanughi wake wereghendieghe mzinyi kughua vindo.
9Uja muka ukamzera, “Yakaia wada oho Myahudi kunilomba machi ini Msamaria?” (angu Wayahudi ndewikaiagha na wungara ghungi na Wasamaria anduangi.)#Ezr. 4.1-5; Neh. 4.1-2 10Jesu ukamtumbulia, “Na ngera kodemanya inosi ja Mlungu, na nani uhu ukuzeragha, ‘Nineke machi ninyo,’ kumangu kwamlomba uo ukakuneka machi ghiko moyo.” 11Muka ukamzera, “Bwana, oho ndekuwadie kindo chedaya machi, na kisima cheko ndenyi, kwaghipatira hao agho machi ghiko moyo? 12Kwani oho koko m'baa kumchumba aba odu Jakobo? Uo oredinekieghe ichi kisima, nao moni orenyueghe machi gha kisima ichi andwamweri na wana wake, na mfugho rake wori?” 13Jesu ukatumbulia, “Uo ose unywagha machi agha uchaoma sena, 14ela uo uchaanywa machi nichaamneka ini, ndechaaoma jingi; angu machi agho nichaamneka, ghichawuya andenyi kwake ndoria ya machi ghivumbulukagha irangi ja kala na kala.” 15Muka ukamzera, “Bwana, nineke machi agho niseome sena, hata nisewuye aha kudaya machi.” 16Jesu ukamzera, “Ghenda kummbange mmigho mchanye aha.” 17Nao uja muka ukamzera, “Ini siwadie mndwawomi anduangi.” Jesu ukamzera, “Kwaghora loli angu ndekuwadie mndwawomi. 18Angu korekoghe na womi wasanu, na hata uhu mkwanye agha matuku si mmigho ungi. Aho kwaghora loli.” 19Uja muka ukamzera, “Bwana, nawona angu oho ko mlodi. 20Weke aba wedu werekoghe wikitasira aighu ya ughu mghondi, nenyo mwadaghamba wei Jerusalemu niko andu kufwane kotasira Mlungu.”
21Jesu ukamzera, “Muka, nirumirie; ngelo iacha wandu wisechaamtasa uja Aba aighu ya mghondi ughu, hata andenyi ya Jerusalemu wori. 22Inyo Wasamaria mwadatasa uo msemmanyagha, ela isi damwichi uo dimtasagha, angu kukia kwafuma kwa Wayahudi. 23Ela ngelo iacha, hata idana eko aeni, watasi wa loli wichamtasa uja Aba loli, kwa ndighi ra Roho; angu Aba wadawilola wandu wifwane huwo wipate kumtasa. 24Mlungu ni Roho, na watasi wa loli wichadimishwa kumtasa loli ni Roho wake.” 25Uja muka ukamzera, “Namanya angu Masiha uacha, (uo uwangwagha Kristo) nao kasikira wacha, uchadiwonyera maza rose.” 26Jesu ukamzera, “Ini nidedanyagha na oho, Nuo moni.”
27Niko aho wanughi wake wikacha, nawo wikashinika iji wammbona ukidedanya na muka. Ela ndekuwadie ungi wawo oredimieghe kumkotia, “Kwakundaki?” angu “Kwaki kudedanyagha na muka?”
28Nao uja muka ukasigha mtungi ghwake, ukawuya mzinyi na kuwighoria wandu, 29“Choonyi mmbone mundu wanighoria maza rose nereribonyereghe! Kewada uhu nuo moni Kristo-o anguwada?” 30Wandu wikafuma mzinyi wikamghendia Jesu.
31Ngelo iyo cheni wanughi wake wikamlomba wikighamba, “Mwalimu, jaa vindo.” 32Ela Jesu ukawizera, “Ini neko na vindo veja inyo mseviichi.” 33Niko wanughi wikakotiana weni na weni, “Kewada mndungi wamredia vindo?” 34Jesu ukawizera, “Vindo vapo ni kubonya lukundo lwa uo orenidumieghe na kuimeria kazi yake. 35Inyo mwaghambagha, ‘Yaasighwa meri ina mvono ghuche.’ Ela ini namzera, zighanenyi mbuwa seji viro vakaia tayari kukuwidwa. 36Uo ukuwidagha wadalipwa ifungu jake, nao wadakuwida viro kwa wundu ghwa irangi ja kala na kala; huwo uo uwagha, na uo ukuwidagha, wiaboilwa chia imweri. 37Niko huwo agho ghighorelo ni gha loli: ‘Umu wadawa na mzima wadakuwida.’ 38Ini namduma mkuwide mvono kwa mbuwa msereridumikieghe. Wazima werebonyereghe kazi, na inyo mwangia kwa kazi rawo.”
39Nao Wasamaria wengi wa muzi ghuja wikarumiria kwa wundu ghwa wushuhuda ghwa uja muka, wei, “Wanighoria maza rose nereribonyereghe.” 40Wasamaria wikamghendia Jesu, wikamlomba ukaie kwawo; na Jesu ukakaia kwawo matuku awi. 41Wazima wengi wikarumiria kwa wundu ghwa ilagho jake. 42Wikamzera uja muka, “Idana isi darumiria, si kwa wundu ghwa malagho ghako tu, ela angu damsikira isi diweni, nesi damanya loli uhu ni Mkiri wa wurumwengu.”
Jesu kuboisa mwana wa m'baa umu
43Nao nyuma ya matuku awi, Jesu ukafuma aho ukaghenda Galilaya; 44angu uo moni oreghorieghe, “Mlodi ndenekwagha ishima andenyi ya isanga jake anduangi.”#Mat. 13.57; Mk. 6.4; Lk. 4.24 45Hata iji wameria kuvika Galilaya, wandu wa aja wikamkaribisha, angu iji werejokieghe Jerusalemu kwa Ndima ya Pasaka, wereriwonieghe maza rose oreribonyereghe aho.#Joh. 2.23
46Jesu ukawuya sena Kana muzi ghwa Galilaya andu oreghalusireghe machi ghikawuya divei, na aho korekoghe na m'baa umu, mwana wake orekoghe mkongo aja Kafarnaumu.#Joh. 2.1-11 47Nao iji wasikira angu Jesu wameria kucha Galilaya kufuma Judea, ukamghendia ukimlomba angu usee Kafarnaumu um'boise mwana wake uko kaavui na kufwa. 48Jesu ukamzera, “Msaawona weke mwakilimbiti na mashiniko ndemdimagha kurumiria anduangi.” 49Uja m'baa ukamzera, “Bwana, dighende mwanwapo usechefwa.”
50Jesu ukamzera, “Ghenda, mwanwako uchakaia moyo.” Nao uja m'baa ukajirumiria ilagho jija jereghoreloghe ni Jesu ukaghenda chia yake. 51Hata iji orekoghe chienyi ukighala, ukakwana na wadumiki wake, wikamghoria angu mwanwake oko moyo. 52Niko ukawikotia ngera ni ngelo iao uzoe kuboa; nawo wikamtumbulia, “Ighuo saa mfungade niko homa imsighie.” 53Nao uja ndee mwana ukakumbuka angu ni ngelo ija cheni Jesu oremzerieghe, “Mwana wako uchakaia moyo.” Nao ukarumiria na nyumba yake yose. 54Uhu orekoghe mwakilimbiti wa kawi orebonyeroghe ni Jesu nyuma ya kucha Galilaya kufuma Judea.
Currently Selected:
JOHANE 4: TAITA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
©Bible Society of Kenya, 1997
All rights reserved.