Luglaa 21
21
Aizik lulaa wia
1Denii Kɔraawiizi jaa kissi Saara, gunla uŋ ŋɔ nua la. 2U kpogli hia, di lul biibaal tɛɛ Abraham, haali uŋ zɛŋŋɛ gba. A guŋ faa ɛɛwɔɔ saŋa la himmaa Kɔraawiizi n ŋɔ nua la.#Hib 11:11 3Denii Abraham faa dau u bie hiŋ sɔŋ, Aizik, 4di teŋ u hɛŋ u hɔpizaa ŋmantannaazi hɔl, gunla Kɔraawiizi n ŋɔwɛɛ la.#Lug 17:12 5Abraham faa di binni kalfaa ka ba lul Aizik.
6Denii Saara ŋɔ, “Kɔraawiizi tɛmbuu mamaa. Banla maa n niŋ nuu lugɔ n lul biere gba daŋ mam ani bɔsɔna. 7Anɛɛ n niŋ faa ŋɔ Abraham be lugɔ n daŋ ŋmɛnɛ wer lul bie, ú ɔzinnɛi? Ka n jaa lul biere di tɛɛ n jaari, haali uŋ zɛŋŋɛ naa maa.”
Haga ni Ismɛl duŋŋaa wia
8A bie wa helle, ba teŋuu il. A hɔl hiŋ, Abraham gil ba daali diuzenaa di di.
9A hɔl bɛl, Saara na lugɔ Ismɛl, Ijip hinuu Haga biibaal, u ni Abraham n lullɛ la ra ɛɛ Aizik chɛɛtɛ, 10u ŋɔ Abraham be, “Duŋŋi yoŋhaaŋ la ni u biibaal maa. Màá sɛɛ u biibaal naa ni n biibaal Aizik kpau di i kapɛttɛ.”
11Uŋ ŋɔ gunla, a tir Abraham werge maa, dikuu Ismɛl ge n ɛɛ u biibaal wia. 12Ka Kɔraawiizi faa ŋɔ u be, “Gilɛɛ gil i yoŋhaaŋ ni u biibaal la wia tirii. Nuu gunla Saara n ŋɔwɛɛ la, di ɛɛ guŋ, dikuubɛɛwiai, Aizik benii í ga na biizi ni naanna. 13Ama, n daŋ gil i yoŋhaaŋ biibaal naanna ge wazi werge, di su hɛrzeŋ bɛl, dikuu u gba n ɛɛ i biibaal wia.”#Lug 17:20; 25:12-18
14Denii hɔɔŋ wa pizɛɛ chɔɔzimpikke ni, Abraham ɛɛ ba ŋmɛnɛɛ volaa sirya, di nyiŋŋi diwee, di ɛɛ nii du hur tɛɛ u haaŋ Haga, bá kpa ra la. Haga faa kpogli u biibaal la di ra juuri bolzeŋ Bɛɛsiba Hɛribɔduma biini, waa zum bɔr la maa unna la.
15Ba niinyɔɔlii la n wa tunnɛ, u gil a biibaal daapuza bɛl bɔsɔŋ, 16ka ge vol la see tama di ga so, ka ŋɔ u biini, “Màá wer di ra binnuu ka ú siu.” Uŋ wa ŋɔ guŋ tuŋ, u faa jaa ra wii, di ra sigzi.
17Denii Kɔraawiizi nuu a bie wiraa. U mɛlika yir Haga lii chiŋ, di pɛɛzuu, “Haga, bɛɛ ra tɔɔriinɛi? Gilɛɛ ra ɔm! Kɔraawiizi nuu i biibaal wiraare bɔr la uŋ chɔɔwɛ la. 18Izi la ga kpau, di fɔrguu, dikuubɛɛwiai, n daŋ tɛu naanna werge, di gil bá ɛɛ hɛrzeŋ hina.”
19Kɔraawiizi jaa pilli Haga siwee, u na kɔlɔŋ bɛl. Denii u dɔɔ nii su u hur tɛɛ a bie u nyɔɔ.
20Kɔraawiizi faa du a bie benii Paran Hɛribɔduma, di ra hiinuu. U du de di wa zum hoo tai werge maa di ra kpaani. 21U maa ge faa nyiŋŋi Ijip hina biihaaŋ bɛl tɛu.
Abraham ni Abimɛlɛk nuukpaŋ ɛɛi wia
22A guŋ saŋa hiŋ, Koori Abimɛlɛk ni u laallɔɔra nabɔma Fikɔl faa ba wa na Abraham. Abimɛlɛk ŋɔ, “Wibii maa, Kɔraawiizi ɔɔ hiiniibuu i wiɛɛlaa maa biini. 23Awia, hɛɛhzi Kɔraawiizi sɔŋ biini lugɔ hàá kaa dariŋ gɛɛ n biizi gɛɛ n naanna gba. I zummɔ lugɔ n ɛɛibuu nɛnnɛ. Awia, ge hɛɛhzi lugɔ i daŋ ɛɛ n ni hɛri naa hiŋ soge u biini naa nɛra nɛnnɛ.”
24Denii Abraham ŋɔ, “N hɛɛhzi gunnɛ.”
25Ka Abraham faa nuumi di du Koori Abimɛlɛk, dikuu kɔlɔŋ bɛl u balaa n foozee u balaa be wia. 26Koori Abimɛlɛk ŋɔ, “Màá nuuwɛ di hiŋ ŋɔwɛɛ naa lɛi. Maa zum nɛr la ge n ɛɛ guŋ. Ka bɛɛ n baani haa guŋ ŋɔwɛɛ saŋa maanɛi?” 27Denii Abraham faa jaa lauri nauna ni peeza tɛɛ Koori Abimɛlɛk, ba ɛɛ ba nuukpaŋ la. 28Ka Abraham kaa lizi pelorni aniidaanɛɛ lii u peeza biini chiŋŋi a bɛŋ. 29Koori Abimɛlɛk pɛɛzuu, “Ka pelorni aniidaanɛɛ naa hiŋ lizɛɛ chiŋŋi a bɛŋ naa zɛɛrɛ ɛrɛɛ?”
30Abraham ŋɔ, “Minuu lizaa di kaa ra tɛi, guŋ bagli lugɔ minuu ki kɔlɔŋ naa.” 31Awia, ba ra yir de bolzeŋ Bɛɛsiba,#21:31 Bɛɛsiba zɛɛrɛ Hɛɛhzaa Kɔlɔŋ gɛɛ Aniidaanɛɛ Kɔlɔŋ. dikuubɛɛwiai, denii ba hɛɛhzi, di ŋɔ nua tɛɛ dɔŋa.
32Baŋ wa ɛɛ a nuukpaŋ tuŋ, Koori Abimɛlɛk ni u laallɔɔra nabɔma Fikɔl jaa bir kaali Filisti hɛri. 33Denii Abraham faa chɔɔzi daa bɛl banna yir tamaris,#21:33 Hibru hina n na ɔm tamaris daa. U dɔɔ bɔsɔnnɛ nɛnnɛ di ɛɛ daazeŋ la. bolzeŋ Bɛɛsiba, di ra jaami Kɔraawiizi la n du de saŋa maa la. 34Awia, u faa so Filisti hɛri la di birgi werge maa.
Currently Selected:
Luglaa 21: vag
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.