Luglaa 11
11
Babilɔn diijaŋ werge wia
1Saŋa la durnya newea maanii faa ra mɔɔ mɔɔkpaŋ. 2Baŋ faa izee di ra la wiifurii barii, ba ga na lɛl Babilɔn hɛri, di so de.
3Ba ŋɔ dɔŋa be, “Ií ba, ya mɔnni birkissizi di ɔɔzaa nɛnnɛ.” Ba kpa a birkissizi di ra ma, di kpa kotaal ge di ra fargi a baana. 4Denii ba ŋɔ, “Ií gil ya ma bolzeŋ, di ma a diijaŋ bɛl, ú la chiŋ di ga chug baama, ú ra bagli sɔŋ la yaa n dɔɔwɛ! Gunnɛ niŋ gil ya dɔɔ nuukpaŋ, di gilɛɛ kaa wàá yaari durnya biini maa.”
5Ka banna ma a bolzeŋ ani diijaŋ la n niŋ ga chug baama la, Kɔraawiizi tuu ba ú wa na. 6Denii Kɔraawiizi ŋɔ, “Na, di ba daŋ wer dɔɔ nuukpaŋ di ɛɛ keŋ, dikuu banna mɔɔ mɔɔkpaŋ wia, i zum gunla ban niŋ wa ɛɛ kɛrɛ bɛlaa? Ba wàá ka wer ɛɛ wiimaa huhzi. 7Awia, gil ya tuu di ga gil ba ra mɔɔ mɔɔdumazi. Di guŋ wa ɛɛwɔ, ba wàá kaa ra nuu dɔŋa be, bá nuukpaŋ la chɔgi.”
8Gunnɛ Kɔraawiizi ɛɛ, di gil ba yaari hɛri maa, ba bolzeŋ la mai chɔgi. 9Guŋ wiarɛ ba faa ra yir a bolzeŋ Babilɔn, dikuubɛɛwiai, denii Kɔraawiizi gil ba ra mɔɔ mɔɔdumazi, di yaari hɛri maa la.
Sɛm saŋa di ga hel Abram saŋa wia
10Sɛm naannaa keŋ.
Sɛm n wa di binni kalfa saŋaa u lul Aafagzad. Binni anɛɛ n wa bɛrɛɛ saŋa la nii n chɔgi durnya maa labuu guŋ faa ɛɛ.#Luuk 3:35-36 11Uŋ wa lul Aafagzad la, u faa haa di binni kalfaanuere, ka kaa lul biikpila di jaa.
12Aafagzad n wa di binni tokko ni kpɔrgɔ ni anue, u lul Sɛla. 13Uŋ wa luluu la, u kaa di binni kalfaanaazu ni ahoro di jaa, ka kaa lul biikpila a saŋa.
14Sɛla ge n wa di binni tokko ni kpɔrgɔ, u ge lul Ɛba. 15U ge n wa luluu, u kaa di binni kalfaanaazu ni ahoro di jaa, ka faa kaa lul bikpila maa ge jaa.
16Ɛba ge n wa di binni tokko ni kpɔrgɔ ni anaazu, u lul u biibaal Pɛlɛg. 17Uŋ wa luluu, u kaa di binni kalfaanaazu ni tokko ni kpɔrgɔ jaa, ka kaa lul biikpila.
18Saŋa la Pɛlɛg ge n wa di binni tokko ni kpɔrgɔ la, u ge lul Riu. 19Uŋ wa luluu la, u kaa di binni kalfaanɛɛ ni kabɛl jaa, ka ge faa kaa lul biikpila.
20Saŋa la Riu ge n wa di binni tokko ni kpɔrgɔ ni anɛɛ, u lul Sɛrug. 21Un luluu la, u kaa di binni kalfaanɛɛ ni aniidaanɛɛ jaa, ka kaa lul biikpila.
22Saŋa la Sɛrug ge n wa di binni tokko ni kpɔrgɔ, u lul u biibaal Nahɔ. 23Uŋ wa lul Nahɔ la, u kaa di binni kalfaanɛɛ jaa, ka kaa lul biikpila ge jaa.
24Saŋa la Nahɔ ge n wa di binni tokko ni kabɛl, u lul u biibaal Tɛra. 25Uŋ wa luluu la, u kaa di binni kalfa ni fidikabɛl jaa, ka kaa lul biikpila a saŋa di jaa.
26Saŋa la Tɛra n wa di binni tokkoahoro ni fi, u lul Abram, Nahɔ ani Haran.
Tɛra naanna wia
27Tɛra naanna wiarɛ keŋ.
Tɛra biibaalaa faa Abram, Nahɔ ani Haran. Haran ge faa izi di lul Lɔt. 28Ka Haran faa siu bol la banna yir Ur n du Babilɔn hɛri, bɔr la baŋ luluu la. 29Denii Abram faa kpa u haaŋ Sarai, u niwee Nahɔ ge kpa Milka. A Milka ni Iska maa faa ɛɛ ba niwee Haran biihaanaa. 30Sarai la faa waa lul.#11:30 Haaŋ la n waa luluu ba ra yir hahbara.
31Denii Tɛra faa izi di lau u biibaal Abram ni u biibaal haaŋ Sarai ani u naana Lɔt lii Ur n du Babilɔn hɛri, di ra la Keenan hɛri. Ka baŋ ga hel boljiga bɛl banna yir Haran, ba so de.
32Tɛra faa di binni kalfaanɛɛ ni anuere, ka siu, di u haa soga a boljiga hiŋ.
Currently Selected:
Luglaa 11: vag
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.