約翰 5
5
在畢士大水池邊醫病
1這事以後，堵好係猶太人个一個節期，耶穌就上耶路撒冷去。 2在耶路撒冷，有一口水池在羊門个附近，希伯來話安到畢士大，滣頭有五隻廊仔 #5:2 「有一口水池在羊門个附近…滣頭有五隻廊仔」抑係譯做「有一個地方在羊池个附近…這地方周圍有五隻廊仔。」。 3在廊仔底背有一群病人睡在該位，有瞙目个、跛腳个、發癱風个。#5:3 有兜古卷加第 4 節：「佢等在該位等水池个水挺動；因為隔一站時間，主个天使會下來摝水，水挺動个時，最先落去水池个病人，無論發麼介病，攏總會得到醫好。」 5在該位有一個人已經發病三十八年久。 6耶穌看到佢睡在該位，知佢發病盡多年，就問佢講：「你愛得到醫好麼？」
7該病人回答講：「先生，水挺動个時節無人幫助𠊎，將𠊎放落水池去；等𠊎想愛落去，別人已經先落去。」
8耶穌㧯佢講：「䟘起來，將若草蓆拿起來行！」 9該人个病即時好了，佢將厥草蓆拿起來，行等走。
該日堵好係安息日， 10所以猶太人个領袖對該得到醫好个人講：「今晡日係安息日，你拿等草蓆係違背法律个。」
11佢講：「該醫好𠊎个人吩咐𠊎講：『將若草蓆拿起來行！』」
12佢等問講：「該吩咐你將草蓆拿起來行个係麼人？」
13總係該得到醫好个人毋知耶穌係麼人；因為該地方人盡多，耶穌又已經閃開。
14事後，耶穌在聖殿肚尋到佢，㧯佢講：「你已經完全好了，毋好再犯罪，免得惹到還較大个災禍。」
15該人離開耶穌以後，去㧯猶太人个領袖講，醫好佢个係耶穌。 16所以猶太人个領袖開始迫害耶穌，因為佢在安息日醫病。 17耶穌對佢等講：「吾爸一直工作，𠊎也照樣工作。」
18這個話更加使猶太人个領袖決心愛殺害佢；因為佢毋單淨破壞安息日个誡命，又講上帝係佢自家个阿爸，將自家看做㧯上帝平等。
孻仔个權柄
19接等，耶穌對佢等講：「𠊎實在㧯你等講，孻仔靠自家不能做麼介；佢看阿爸做麼介，正能做麼介。阿爸所做个，孻仔也做。 20阿爸惜孻仔，將自家所做个指示孻仔。佢愛將比這還較大个事指示孻仔，俾你等感覺希奇。 21阿爸樣般使死人復活，賜生命給佢等；共樣，孻仔也愛照自家个意思賜生命給人。 22阿爸自家毋審判人；佢將審判个權柄交給孻仔， 23為到愛使人攏總尊敬孻仔，像尊敬阿爸一樣。毋尊敬孻仔个，就係毋尊敬差佢來个阿爸。
24「𠊎實在㧯你等講，聽𠊎个話、又信該『差𠊎來个』，就有永遠个生命。佢毋會受定罪，係已經出死入生了。 25𠊎實在㧯你等講，時間會到了，這下就係，死人會聽到上帝孻仔个聲；該兜聽從个，會得到生命。 26像阿爸本身係生命个源頭，佢也使孻仔成做生命个源頭。 27佢又將審判个權柄賜給孻仔，因為佢就係人子。 28你等毋好為到這個來希奇；因為時間會到，所有在墳墓底背个人攏總會聽到佢个聲音， 29也會對墳墓底背出來：行善个，會復活來得到生命；作惡个，會復活來受定罪。
為耶穌做見證
30「𠊎靠自家不能做麼介；𠊎照上帝个旨意來審判；𠊎个審判也係公當个，因為𠊎毋係追求自家所愛个，只有行『差𠊎來个』个旨意。
31「假使𠊎為自家做證，𠊎个話就毋罅使人相信。 32總係，有另外一個也為𠊎做證个，𠊎知佢為𠊎所做个見證係真實个。 33你等識派人去見約翰，佢就為真理來做證。 34其實，𠊎並無需要人个見證；𠊎講起這個事，係愛使你等得救。 35約翰可比一盞𤏸等又照明个燈，你等願意暫時享受佢个光明。 36總係𠊎有比約翰還較有力个證據，就係𠊎所做个工作，係吾爸交給𠊎愛完成个。這兜工作可以證明阿爸有差派𠊎。 37差派𠊎來个阿爸也為𠊎做證。你等從來毋識聽過佢个聲，毋識見過佢个形像， 38也無將佢个話放在心中，因為你等毋信佢所差來个。 39你等研究聖經，認為在該底背可以尋到永遠个生命；其實聖經个話就係為𠊎做見證个！ 40總係，你等還毋肯就近𠊎來得到生命。
41「𠊎毋係追求人个稱讚。 42總係，𠊎對你等盡了解，你等並毋係正經敬愛上帝 #5:42 「你等並毋係正經敬愛上帝」抑係譯做「你等个心中並無上帝个愛。」。 43𠊎奉吾爸个名來，你等毋接納𠊎；若有人奉自家个名來，你等反轉接納佢。 44你等盡愛彼此接受讚美，總係毋求對獨一無二个上帝該位來个稱讚；恁樣，你等樣會信𠊎呢？ 45毋好認為𠊎會在吾爸个面前告你等；愛告你等个就係你等所仰望个摩西。 46假使你等真實相信摩西，你等就會信𠊎，因為佢个書有記載𠊎个事。 47你等既然毋信佢所寫个，樣會信𠊎个話呢？」
Currently Selected:
約翰 5: THV12Hdb
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2012
All rights reserved
© 台灣聖經公會版權所有 2012