Lúkà 8
8
Ɔnɔbɛ̃̀ɛ̃ kã̀ŋa gbo wà tɛ̀ náànyì-Yèésù
1Náànyì-bɛ́ɛ̀#ɛ́, Yèésù náa wà rɛ̃̀ gbà ńǹlú lákṹ òŋu ńǹtá-oko ŋa, tsí náa wà dzíkɔ̀-Ɔ̀ɖáyé fúnɛ, tsí wà dzíkɔ̀ ɖíɖɔ̃̀ ti nára-kíbí Ɔ̀ɖáyé nákó wáa dzoyè gbo gbà#á fú ɔ̀nyà ŋa. Ɔmatsɛ́‐ɛ̀ máàméèdzì ŋa#á gbo wà báa si. 2Tsí ɔnɔbɛ̃̀ɛ̃ kã̀ŋa gbo yèé ó bɔ, tsí lé edzò† sɛ̃̀ náànyì-ìkùbɔ̀ ŋa gbo#ɛ́, àŋa gbo, à wà tɛ̀ náànyì‐ɛ̀. Náàŋírĩ-ŋa#á, ɔ̀kã̀ dzɛ́ Màríyà† ti ìlú-Màɖàlá. Edzò méedze ní ó lé sɛ̃̀ náànyì‐ɛ̀#ɛ́. 3À náa kpe ɔ̀kã̀ gbo ní Dzɔ̀wánà. Ɔkɔ‐ɛ̀ dzɛ́ ègbènáànyì-ólú Èróɖì†, tsí à náa kpèé ní Súsà. Ɔ̀kã̀ gbo dzɛ́ Sùsánà, tsí ɔnɔbɛ̃̀ɛ̃ kpíkpɔ̀ òmírɛ̃̀ kã̀ŋa gbo wà báa, tsí àŋa gbo, à náa wà mɔ́wɔ́ gbè fú Yèésù òŋu ɔmatsɛ́‐ɛ̀ ŋa. Iŋɛ́-ire tàŋa ká-ŋa ní à náa kɛ́, tsí wà ń mɔ́wɔ́ gbè fú ŋa#á.
Yèésù mú àtsòko-kã̀, tsí ń kpòwe fú ɔ̀nyà ŋa
(Màtéwò 13:1-5; Mákò 4:1-9)
4Tsí ó ɖi nɔ́dzɔ́-kã̀, tsí ɔ̀nyà ŋa tsɛ́ kì, tsí wáa kpìɖé ńɖi-Yèésù. Ɔ̀nyà ŋa ti ńǹlú ŋa wérí wérí kpó, tsí wá ni. Kíbí à wá bɛ́ɛ̀ kpó#ɛ́, Yèésù ǹɖe, tsí wà kpòwe-kã̀ fú ŋa ní: 5Àtsòko-kã̀ ǹɖe, tsí lɔ nóko kó lɔ káà gbɛ̃ dzídzɛ. Kíbí ó tó#ɛ́, ó wà nyàá kã́ wérí nóko#ɛ́. Kíbí ó wà nyàá kã́ bɛ́ɛ̀#ɛ́, ɔma kã̀ŋa káà dzì nódzú-ɔ̀nà, tsí ɔ̀nyà ŋa rɛ̃̀ ńǹtá‐ɛ̀, tsí ɛyɛ ŋa se ŋá dzɛ kpó. Ńbɛ̀ɛ́, nyɛ̀ŋɛ̀ ŋa kò nyáa wù ró. 6Tsí ɔma kã̀ŋa gbo káà dzì ńǹtá-òkúta, tsí à wù. Kíbí à wù tã́#á, à kú, iŋɛ́ yèé tse#ɛ́, tútù kò wà bɛ̀ fú ŋa. 7Ɔma kã̀ŋa gbo káà dzì náàŋírĩ-agúgú ŋa, tsí àŋa méèdzì méèdzì#ɛ́ kpó, à dzɔ́ wù, tsí agúgú ŋa#á fà mú ŋa, tsí kpa ŋá. 8Tsí ɔma kã̀ŋa gbo káà dzì ńlɛ̀-ire, tsí à wù, tsí ɖonùgbó, tsí òkpì kã̀kã̀ so ɔma ɔgɔ́ɔrú.
Tsí Yèésù tɔ́ wí ró ní: Ɛnɛ yèé nɛ́ etí-ìgbɔ̃́ɔ̃̀rã̀ kó máa ń tsoɖi.
Kí tse tsí Yèésù kpòwe ŋa, tsí wà ń wíìnyɛ̀ fú ɔ̀nyà ŋa?
(Màtéwò 13:10-17; Mákò 4:10-12)
9Tsí ɔmatsɛ́‐ɛ̀ ŋa wà bèrèé ní: Òkpì-òwe#ɛ́ fáà?
10Tsí ó wà fɔ̀ fú ŋa ní: Ɔ̀ɖáyé tsí ɔ̀nà fú ŋa ní ká gbɔ́ afɔ̀-inɔ́ yèé ŋa wà#á ti nára-kíbí nákó dzoyè gbà#á. Ó ɖi, ɛnɛ-àtíbɔ̀ ŋa#á, ó wà wíìnyɛ̀ fú ŋa nóòwe nóòwe, àtsùgbée “ká wà wòrã náàrìmáa rí iŋɛ́-kã̀, tsí ká wà gbɔ̃́ɔ̃̀rã̀ náàrìmáa gbɔ́ òkpì-afɔ̀-kã̀ ni.”#8:10 Ìwé-Yèsáyà 6:9 (Ésaïe 6:9)
Yèésù wà nya òkpì-òwe yèé ó kpa ti nára-àtsòko-kã̀#á
(Màtéwò 13:18-23; Mákò 4:13-20)
11Báàyí#ɛ́, òkpì-òwe#ɛ́ gìɖì ní dzɛ́ ní: Dzídzɛ yèé àtsòko#ɛ́ káà gbɛ̃̀#ɛ́, òŋu ní dzɛ́ afɔ̀-Ɔ̀ɖáyé#ɛ́. 12Ɛnɛ yèé ŋa dzɛ́ odzú-ɔ̀nà ńbí ɔma dzídzɛ kã̀ŋa káà dzì#ɛ́ ní dzɛ́ ɛnɛ yèé ŋa wà gbɔ́ afɔ̀-Ɔ̀ɖáyé, tsí múu si néwo, tsí Ètsù† wáa tó, tsí wáa nyàá ǹɖe néwo-ŋa ní ká máa gbàá gbɔ́#ɛ́. Iŋɛ́ yèé tse#ɛ́, bí à gbàá gbɔ́, Ɔ̀ɖáyé nákó gbà ŋá là.
13Tsí ńlɛ̀-òkúta yèé ɔma dzídzɛ ìrɔ́ kã̀ŋa gbo káà dzì#ɛ́, òŋu ní dzɛ́ ɛnɛ yèé ŋa gbɔ́ afɔ̀-Ɔ̀ɖáyé, tsí gbàá òŋu ayè títɛ́#ɛ́. Ó ɖi, à kò tse tsí kó ta ogùgù múlɛ̀ rere. Ɛnɛ nyɛ̀ŋɛ̀ ŋa#á, à nɛ́ àkaralé si ńǹtá-Ɔ̀ɖáyé fú ìwèrè-kã̀ gé, tsí kíbí àɖã́wò wáa wá ńǹtá-ŋa#á, à kò nyáa gbódzú, à tòkpì náànyì. 14Tsí ɔma dzídzɛ yèé ŋa gbo dzì nágúgú#ɛ́, àŋa gbo ní dzɛ́ ɛnɛ yèé ŋa gbɔ́ afɔ̀-Ɔ̀ɖáyé, tsí ìsérè-iŋɛ́-ayé ŋa lárè ŋá, tsí à náa dzáfɔ̀-owó òŋu ɖíɖɔ̃̀-ayé#ɛ́ lárè#ɛ́. À wà kíbí ɔma dzídzɛ yèé wù, tsí agúgú ŋa fà múu, tsí kpaá, tsí ɔma‐ɛ̀ kà gbó láyé#ɛ́ ni. 15Tsí ɔma dzídzɛ yèé ŋa káà dzì ńlɛ̀-ire#ɛ́ ní dzɛ́ ɛnɛ yèé ŋa nɛ́ ìlò-ire, tsí inɔ́-ŋa má, tsí à gbɔ́ afɔ̀-Ɔ̀ɖáyé, tsí gbàá, tsí múu si ńǹsérè, tsí wà ń tsitsɛ́ tse#ɛ́. À wà kíbí ɔma dzídzɛ bɛ́, tsí à wù, tsí so rere, iŋɛ́ yèé tse#ɛ́, à wà tsikpá.
È tsɔ́ éwo-ara-ŋɛ́ nɛ́ɛ̀kɔ́ yèé è wà gbà#á
(Mákò 4:21-25)
16Yèésù wà wí fú ŋa ró ní: À kà tɔ́ kanɖé gú, tsí mú iŋɛ́ ɖée má nàmí, tsí ká ń bɔ̀ nábɛ́-àgbà. Kà kàa bɛ́ɛ̀, à náa ń gú ńǹtá-kpènkpéle, tsí ɔ̀nyà ɔ̀kã̀lɔ́ɔ̀kã̀ yèé wɔlé#ɛ́ kó nyáa rírã ni. 17Bɛ́ɛ̀ ké ní, iŋɛ́ ɔ̀kã̀lɔ́ɔ̀kã̀ yèé wà ńǹɖúkù si báàyí#ɛ́, à nákó wáa nyàá fùɖá si ńgbaŋgba#á. Tsí iŋɛ́ ɔ̀kã̀lɔ́ɔ̀kã̀ gbo yèé wà nóòkùkù si báàyí#ɛ́, à nákó múu si ńmímá, tsí ɔ̀nyà ŋa nákó màá á. 18Ńbɛ̀ɛ́, è tsɔ́ éwo-ara-ŋɛ́ ti nára-ɛ̀kɔ́ yèé è wà gbà#á. Ó ɖi, ɛnɛ yèé nɛ́#ɛ́, à nákó fúu máa, tsí ɛnɛ yèé kò nɛ́#ɛ́, oɖé tsígíɖí yèé gìɖì ó nɛ́#ɛ́, à nákó gbàá nɔ́wɔ́‐ɛ̀.
Ìnà-Yèésù òŋu ìnàbí-Yèésù ŋa wà wòó
(Màtéwò 12:46-50; Mákò 3:31-35)
19Náànyì-bɛ́ɛ̀#ɛ́, ìnà-Yèésù òŋu ìnàbí‐ɛ̀ ŋa wà wo ká ríi. Ó ɖi kíbí à wáa tó#ɛ́, à kò rí ìɖì, tsí ká lɔ ńɖɔ̀‐ɛ̀, iŋɛ́ yèé tse#ɛ́, ɔ̀nyà ŋa kpɔ̀ tó bɛ́ɛ̀. 20Tsí à wà dzɛ́ fúu ní: Ìná‐ɛ̀ òŋu ìnàbí‐ɛ̀ ŋa wáa ɖóro si nóòɖe, tsí wà wo ní àŋa kó ríi.
21Tsí ó wà dzɔ́ŋù fú àŋa kpó ní: Ìnà-òŋu òŋu ìnàbí-òŋu ŋa ní dzɛ́ ɛnɛ yèé wà gbɔ́ afɔ̀-Ɔ̀ɖáyé, tsí wà ń tsitsɛ́ tse#ɛ́.
Yèésù ɖá awu lákṹ-kã̀ ɖóro
(Màtéwò 8:23-27; Mákò 4:35-41)
22Tsí ó ɖi nɔ́dzɔ́-kã̀ ró, tsí Yèésù òŋu ɔmatsɛ́‐ɛ̀ ŋa ǹɖe, tsí wɔ̀ nɔ́kɔ̃̀-odzómi, tsí ó wà wí fú ŋa ní: Àŋa kó kadzá lɔ náàtàkè-èkéèdzì-oɖò tsítsédzú tɛ̀ŋgɛ̀lɛ̀ɛ̀#ɛ́. Tsí à lɔ.
23Kíbí à tu ɔkɔ̃̀-odzómi#ɛ́ làkóò#ɛ́, Yèésù sũ̀ nɔ́kɔ̃̀#ɛ́, tsí orũ ráa lɔ. Tsí awu lákṹ-kã̀ kpé tsítse ńǹtá-omi#ɛ́ gbòkã́, tsí omi#ɛ́ kpé kpíkpa, tsí wà ɖà nɔ́kɔ̃̀#ɛ́, tsí wà kɔ̃́ɔ̃ bàa, tsí à bòkó tsɛ̀rá. 24Tsí ɔmatsɛ́‐ɛ̀ ŋa sɔ́ tìmá‐ɛ̀, tsí wà dzíi, tsí wà ɖúgbe fúu ní: Akɔ́nɛ, Akɔ́nɛ! Àŋa bòkó tsɛ̀rá.
Tsí ó dzí, tsí ǹɖe, tsí gbãdzú fefe bá awu#ɛ́ òŋu omi#ɛ́ ní: È tsikó! È ɖá ɖóro!
Tsí awu#ɛ́ gbo, omi#ɛ́ gbo, à ɖá ɖóro kpó gbòkã́, tsí ìɖì kíìɖì kpa kpó tíyɛ̃ tíyɛ̃ tíyɛ̃.
25Tsí ó wà bèrè ŋá ní: Kí tse tsí à kò nɛ́ àkaralé si ńǹtá-òŋu ná?
Ó ɖi, iŋɛ́ yèé à rí ŋa#á, ó mù ŋá, tsí odzo kpé ŋa tsítse, tsí à wà bere ara-ŋa ní: Bí ɛnɛ yèé wà fáà ńnɛ̀ɛ́, tsí ó wà kã́rũ awu òŋu omi gìɖì gbo, tsí à wà mú éwo dzó fúu ná?
Edzò ŋa wà ɖɔ́kpɔ fú ɔ̀nyà-kã̀, tsí Yèésù lé edzò ŋa#á sɛ̃̀ náànyì‐ɛ̀
(Màtéwò 8:28-34; Mákò 5:1-20)
26Náànyì-bɛ́ɛ̀#ɛ́, à dzì nɔ́ɔ̀nà, tsí lɔ káà tó náàtàkè-èkéèdzì-oɖò#ɛ́. À tó ńlɛ̀-ɛnɛ-Gèrásà ŋa nɔ́ɔ̀gãgã-erè-Gàlìlé. 27Kíbí à tó#ɛ́, títí Yèésù kó tì si ńlɛ̀#ɛ́, ɔ̀nyà-kã̀ wáa kpàɖé‐ɛ̀. Ɛnɛ nyɛ̀ŋɛ̀#ɛ́ dzɛ́ ɔma-ìlú bɛ̀ ni, tsí edzò† ŋa wà ɖɔ́kpɔ fúu. Tsí ìwɔ̀ra nàmí ògóɖó gìɖì kã ara‐ɛ̀ báàyí, ó ti dzɛ̃̀. Náa wà rɛ̃̀ néèwò néèwò gé ni. Kà sũ̀ ńlé gbo ró. Néèkpò ŋa gé ní náa wà gbé#ɛ́.
28Tsí kíbí ó rí Yèésù#ɛ́, ó ɖúgbe gbòkã́, tsí káà kálɛ̀ nábɛ́‐ɛ̀, tsí wà wí fúu nóŋù líle ní: Yèésù, Ɔma bíbí-Ɔ̀ɖáyé Oléwo, kí ò wà wò fú mi ni? Ǹ tsìkálɛ̀ fɛ́ɛ, máa mú mi réré ɖé!
29Iŋɛ́ yèé tse tsí ó wí bɛ́ɛ̀#ɛ́, Yèésù hɔ̃́rɔ̃́ fú edzò#ɛ́ ní kó sɛ̃̀ náànyì‐ɛ̀. Edzò#ɛ́ náa wà múu gírí kpeékpeé gé ni. Àtsùgbée kó máa fùɖá lɔ#ɛ́, à náa mú wɔ̀rɔ̀-irɛ̃, tsí ń ɖe ɛsɛ̀‐ɛ̀ òŋu ɔwɔ́‐ɛ̀ ŋa. Tsí kíbí à náa ɖèé bɛ́ɛ̀ gìɖì gbo#ɛ́, náa dzáa, tsí edzò#ɛ́ náa télèé fùɖá ńǹlú#ɛ́ lɔ ńkóko.
30Ńbɛ̀ɛ́, Yèésù bèrèé ní: Bí à náa kpèé fáà? Tsí ó dzɔ́ŋù ní: Kpíkpɔ̀ Gbɛ̃̀ɛ̃̀.
Ìɖéǹɖè#ɛ́, edzò ŋa#á kpɔ̀, tsí wà ɖɔ́kpɔ fúu. 31Tsí à wà tsìkálɛ̀ fú Yèésù ní: Kó máa mú àŋa sɔ ńfò lákṹ yèé kò nɛ́ ìkpàkũ#ɛ́ ɖé.
32Náàsòkò nyɛ̀ŋɛ̀#ɛ́, ɔ̀hà ŋa kɔ̃́ ara-òkè-kã̀ si bɛ̀, tsí wà dzɛ. Tsí edzò ŋa#á tsìkálɛ̀ fú Yèésù ní: Kó fú àŋa nɔ́ɔ̀nà, tsí àŋa kó wɔ̀ ńǹtá-ɔ̀hà nyɛ̀ŋɛ̀ ŋa.
Tsí Yèésù dzɛ́. 33Gbòkã́ gé#ɛ́, edzò ŋa#á sɛ̃̀ náànyì-idza#á, tsí à sá wɔ̀ ńǹtá-ɔ̀hà ŋa#á. Tsí ɔ̀hà ŋa#á yáré kpìrìkpìrì ti ńǹtá-òkè yèé à wà si#ɛ́, tsí wáa lɔ káà bɔ́ sɔ nóɖò, tsí à kí ńnɛ̀ kpó. 34Tsí kíbí aró-ɔ̀hà ŋa#á rí iŋɛ́ yèé tse#ɛ́, à sá lɔ ńlé, tsí fɔ iŋɛ́ yèé à rí ŋa#á fú ɔ̀nyà ŋa náàŋírĩ-ìlú#ɛ́. À túùnkã́-afɔ̀#ɛ́ lɔ ńǹlú tsɛ́kɛ́tsɛ́kɛ́ yèé wà ńǹyabɛ̀ ŋa#á gbo. 35Tsí ɔ̀nyà ŋa fùɖá, tsí yáré lɔ ní àŋa kó lɔ káà rí iŋɛ́ yèé tse#ɛ́. Tsí kíbí à tó ńɖi-Yèésù#ɛ́, à rí ɛnɛ yèé edzò ŋa sɛ̃̀ náànyì‐ɛ̀#ɛ́, tsí ó dzokó si nábɛ́-Yèésù. Ìwɔ̀ra ŋa ti wà nára‐ɛ̀ si, tsí kò wà sṹrṹ ró. Kíbí à ríi bɛ́ɛ̀#ɛ́, ó nódzo fú ŋa. 36Tsí ɛnɛ yèé ŋa rí kíbí iŋɛ́ ŋa#á lɔ gbà#á, à kpɛ̀rɔ́ ti nára-kíbí Yèésù lé edzò ŋa sɛ̃̀ náànyì-ɛnɛ nyɛ̀ŋɛ̀#ɛ́ fú ɛnɛ yèé wá kã́ã̀nyì ŋa#á.
37Tsí ìlú#ɛ́ kpó wà fɔ̀ fú Yèésù ní: Kó ǹɖe ńɖi-àŋa.
Iŋɛ́ yèé tse#ɛ́, ó nódzo fú ŋa tó bɛ́ɛ̀.
Tsí Yèésù káà wɔ̀ nɔ́kɔ̃̀-odzómi#ɛ́ dzokó, tsí wà wo kó sɛ̃̀ bɔ̀ lɔ ńGàlìlé. 38Tsí ɛnɛ yèé edzò ŋa sɛ̃̀ náànyì‐ɛ̀#ɛ́ wà tsìkálɛ̀ fúu ní: Òŋu kó lɔ báa.
Tsí Yèésù kɔ̀, 39tsí wà wí fúu ní: Kó sɛ̃̀ lɔ ńlé‐ɛ̀, tsí kó lɔ káà wí fú ɔ̀nyà ŋa ní Ɔ̀ɖáyé tse iŋɛ́ lákṹ-kã̀ fú òŋu. Kó fɔ̀ɔ́ kpó fú ŋa.
Tsí kíbí ó sɛ̃̀ lɔ#ɛ́, ó káà fɔ iŋɛ́ lákṹ yèé ŋa Yèésù tse fúu kpó#ɛ́.
Yèésù bɔ ɔnɔbɛ̃̀ɛ̃-kã̀, tsí dzí ɔma-onùgbó-ɔma-Ìyúɖà ŋa-kã̀ gbo ti náàŋírĩ-òkú ŋa wá náyé
(Màtéwò 9:18-26; Mákò 5:21-43)
40Ńbɛ̀ɛ́, Yèésù sɛ̃̀ bɔ̀ ti náàtàkè-oɖò#ɛ́ wáa lɔ ńGàlìlé. Kíbí ó tó#ɛ́, ɔ̀nyà ŋa gbàá òŋu ayè títɛ́, iŋɛ́ yèé tse#ɛ́, à ɖóro si kpó, tsí wà wo bíbɔ̀wá‐ɛ̀. 41Ńǹwèrè nyɛ̀ŋɛ̀#ɛ́, onùgbó-ilé-ìkpàɖé-ɔma-Ìyúɖà ŋa†-kã̀ wà bɛ̀, tsí dzɛ́ Yàwìró. Tsí òŋu gbo wáa tó, tsí kálɛ̀ nábɛ́-Yèésù, tsí tsìkálɛ̀ fúu ní kó wá ńlé-òŋu, 42tsí kó wáa gba ɔma-òŋu fú òŋu ɖé. Ɔma ɔnɔbɛ̃̀ɛ̃#ɛ́ ɔ̀kã̀ntso gé ní wà fúu#ɛ́, tsí ó nɛ́ kíbí ɔɖɔ̃́ máàméèdzì bɛ́ɛ̀. Tsí ó wà rɔ̃̀, tsí bòkó kú.
Tsí Yèésù ǹɖe, tsí dzì nɔ́ɔ̀nà-ilé‐ɛ̀ làkóò. Tsí ìlú#ɛ́ kpó tɛ̀ náànyì‐ɛ̀, tsí à rĩĩ́ si kpó kpã̀nyìì.
43Tsí ɔnɔbɛ̃̀ɛ̃-kã̀ gbo wà náàŋírĩ-ŋa bɛ̀, tsí àmbara wà ɖà nára‐ɛ̀ ɔɖɔ̃́ máàméèdzì‐ɛ̀ ńnɛ̀ɛ́, tsí kò wà ɖáàtí fúu láyé. Ó lɔ ńɖi-abɔnɛ ŋa títí ó ná owó‐ɛ̀ gbo kpó, tsí abɔnɛ-kã̀ kpókpó kò nyáa bɔɔ́. 44Kíbí ó rí Yèésù#ɛ́, ó tìmá‐ɛ̀ ńǹkpàɖànyì‐ɛ̀, tsí mɔ́wɔ́ kã etí-àwù‐ɛ̀. Ńǹɖì-bɛ̀ gbòkã́#á, àmbara#á ɖá ɖóro.
45Tsí Yèésù wà bèrè ní: Nɛ̀ɛ́ dzɛ́ ɛnɛ yèé mɔ́wɔ́ kã òŋu#ɛ́?
Tsí ɛnɛ kṹnukṹ wà fɔ̀ ní: Kò tsi òŋu ni, kò tsi òŋu ni.
Tsí Sìmɔ́nì Òkúta tsí arũ, tsí wà fɔ̀ fúu ní: Ɔ̀gá, ɛnɛ yèé ŋa sú wérí‐ɛ̀ si, tsí rĩĩ́ si kpã̀nyìì si tó bɛ́ɛ̀#ɛ́ ni. 46Tsí Yèésù ní: Ɔ̀nyà-kã̀ mɔ́wɔ́ kã òŋu náa, iŋɛ́ yèé tse#ɛ́, òŋu mà ní ikpá-kã̀ fùɖá nára-òŋu.
47Tsí ɔnɔbɛ̃̀ɛ̃#ɛ́ rí ní òŋu kàkó nyáa mú ara-òŋu ɖúkù ró, tsí ó nya ara‐ɛ̀ fùɖá náàŋírĩ-ɔ̀nyà ŋa ńwádzú-Yèésù. Ó wà ŋá kpó, tsí ó káà kálɛ̀ nábɛ́-Yèésù. Tsí nódzú-ɔ̀nyà ŋa kpó#ɛ́, ó fɔ iŋɛ́ yèé tse tsí ó mɔ́wɔ́ kã̀ã́#á, òŋu kíbí àrɔ̃̀#ɛ́ tùú gbo gbòkã́#á.
48Tsí Yèésù fɔ̀ fúu ní: Ɔma, àtsùgbée kíbí ó nɛ́ àkaralé si ńǹtá-òŋu#ɛ́ ní Ɔ̀ɖáyé bɔɔ́#ɛ́. Ó ɖi, kó tó ńlé ire fòò.
49Ńǹwèrè yèé Yèésù wà wíìnyɛ̀#ɛ́, ɔ̀nyà-kã̀ ti ńlé-onùgbó-ilé-ìkpàɖé-ɔma-Ìyúɖà ŋa#á, tsí wáa wí fú onùgbó#ɛ́ ní: Ɔma‐ɛ̀ ti kú ná. Ó ɖi, kó máa ɖɔ́kpɔ fú Akɔ́nɛ ró.
50Tsí kíbí afɔ̀#ɛ́ dzì nétí-Yèésù#ɛ́, ó wí fú Yàwìró ní: Ɛ̀ɖɔ̃̀ kó máa ɖáa. Kó nɛ́ àkaralé si ńǹtá-òŋu gé, tsí ɔma‐ɛ̀ nákó gbé náàyɛ̀.
51Tsí à sɛ̃̀ dzì nɔ́ɔ̀nà. Tsí kíbí à lɔ káà tó ńlé-Yàwìró#ɛ́, Yèésù kò dzɛ́ ní ɔ̀nyà-kã̀ kó wɔlé#ɛ́ lɔ bá òŋu náànyì-Sìmɔ́nì Òkúta òŋu Yòhánà† òŋu Yàkúbù má nára-boba-maɖé#ɛ́ òŋu ìnà‐ɛ̀ gbo.
52Tsí ɛnɛ-àtíbɔ̀ yèé wà bɛ̀ si ŋa#á, à wà rã́ã̀bo, tsí wà sɔkṹ kpó wòò. Tsí Yèésù wà rɔ́ fú ŋa ní: Ká mí ɔkṹ. Maɖé#ɛ́ kò kú, ó wà sɔ̃rũ ni.
53Kíbí ó wí bɛ́ɛ̀#ɛ́, à dzì náàrĩ́ fúu, iŋɛ́ yèé tse#ɛ́, à mà ní maɖé#ɛ́ ti kú. 54Tsí kíbí à wɔlé#ɛ́ lɔ#ɛ́, ó dzi ɔwɔ́‐ɛ̀ banɛ́, tsí ó fɔ̀ ní: Ɔma, ǹɖe dza!
55Gbòkã́#á, ó gbɔ́ ti ayé, tsí ǹɖe. Tsí Yèésù wí fú ŋa ní: Ká wo dzídzɛ fúu, tsí kó dzɛ.
56Ńbɛ̀ɛ́, ó mu boba‐ɛ̀ òŋu ìná‐ɛ̀. Tsí ó fɔ̀ fú ŋa ní: Tsɛ́m! Ká máa fɔ̀ɔ́ fú ɔ̀nyà-kã̀ oo.
Currently Selected:
Lúkà 8: ngl
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.