Lin 6
6
Punou Mo-on Tan Ndramat
1Ndramat hohor hala pule-en lokpoi ndre mandra-an, pe hotou nedu’ su pihin. 2Su nedun Petngendrei kamal#6.2 nedun Petngendrei kamal o engel tan Petngendrei. se heltuwe su kompihin odo lokpoi ti rahye su lakopwi, ile pe su hasa pe hasuwon su se ile reh ta su. 3Ile pe Lapan ipe ihpah, “Yu we kundretawe sa ndramat hondroto pe hondroto ndresale pwi. Su we hamat. Ile pe idu mahkele pe ile, eri su we hondroto kindritapelwen krismas puken sangat-pe-rungeh (120) pwi.”
4Idu mundrun eti pe ise omur, eri lau se ti mandra-a’ sa pe elwe-e’ sa hodo lokpoi. Su lau eriy, eri yayan nedu’ su pedih odo lokpoi ndre hasuwon su nedun Petngendrei kamal. Su lapan pahun pe ranga’ su inehnding ndre pihe.
5Lapan indroni punuwon ndramat odo lokpoi ile mo-on lakopwi. Punou mo-on eri immin pala’ su sei ihpa ke sei. 6Ile pe Iy isamat ihpa, “Yu uhnan su pe uduwe su hodo lokpoi ti ile sa? 7Kile Yu kundretawe su pwi, eri lehpe huyen. Konan. Yu we kuhnan sa ndramat ndre sulo-on ndre Yu uduwei ti we hamat. Ka-an pe nenka-an ndre sulo-on ti we honum yi.” 8Odoke Noah eri Lapan irih tadan.
Noah
9Kuti pohtidi-iy tan Noah.
Noah kopwi ti ndramat huyen pe lila-an huyen ile madan Lapan idu kalmene-en erti. Iy intawonon Lapan iyin munen. 10Iy nedun ndre tulmuu kamal: Siem, Jafet pe Ham.
11Odoke sa ndramat ndre sulo-on ti punuwo’ sa indremimel ile madan Lapan pwi. Hompo ke loroh pe horroh ke ndramat odo lok ndre sulo-on. 12Lapan indre-et ile lokpoi ndre mandra-an, pe indrendroni hemir ndramat huye’ su hondruto hepe pwi. Ndramat ndre sulo-on ti hompo ke to-ir.
13Lapan ipe ile tan Noah ihpah, “Yu undretawe tawene ihpa ndre ndramat we honum ndresale odo lokpoi, odosa lokpoi ti indritah odo punou mo-on. 14Opondrih kei huyen pe ohtong sih ndrolim. Ahnan rum ki-in lon pe ewepisi kolta kile ndruwen pe lon. 15Mandra-an tan ndrol tadam eri kihpa ndre kurti: elwe-en tadan eri mita sangat-pe-tulngeh (130), murun tadan eri mita rungeh-pe-ruweh (22), pe pule-en idu lon ile eleng eri mita sungoh-pe-toloh (13). 16Otmon mbrungyen ndrol. Kidu mbrungiy pe kise ngerin ndrol eri eduwe lengan ihpa ndre sentimita hangoh-pe-limweh (45) pe ahnan reu ki-in eriy. Ou ohtong eri ndruhun mandro o dek eri kihndre toloh, sih kise poi, sih kise ndrokoron, pe sih kise eleng. Pe eduwe pohngkiu kise padan.
17“Yu we kuhnan nor pe uluw kideh pe kisulmwe-en lokpoi pe sane ndre sulo-on we hamat. 18Odoke Yu we kuhnan poromis handrai kile tadam yi. Ala lon ndrol ndrodan mbrulum, nedum su kamal pe mbrulu’ su. 19-20Ka-an pe nenka-an handrai pe handrai, homou kamal pe homou ndrukwil we hasa hun ou. Ou okuni su hala lon ndrol, kile we hendrimat pwi. 21Pe okun song handrai pe handrai, ana’ oduu ndramat, pe ana’ su ka-an pe nenka-an yi.”
22Noah ihnan sane ndre sulo-on ihpa ndre Lapan ipe ile tadan.
Currently Selected:
Lin 6: KTM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2011, Wycliffe Bible Translators, Inc. All rights reserved.