YAPHANG 3
3
Borok kók khna ya wngmani
1 #
Phu 12.9; 20.2. Tabuk Subraiyung Kaitor aswk mal-mata snammarokni bere chibuk wng kha bandi kwrwng kuk. Bo bwrwino hai hwnwi sa kha, “Kaitor da norokno, ‘o tháiblwngni buphangrokni bwtháirokno norok ta chá di’ hwnwi hwn?”
2Hakhe a bwrwi chibukno hai hwnwi sa kha, “Chwng o tháiblwngni bebak buphangrokni bwtháirokno cháui mano; 3phiya ba Kaitor hai hwnwi sa kha, ‘tháiblwng kwcharo tongma a buphangni bwtháino le ta chá di tabo ta tang di, hakhe nwng thwinai.’ ”
4Phiya a chibuk bwrwino hai hwnwi sa kha, “Nwng thwi glak: 5tamni hwn ba, Kaitor si-o nwng o buphangni bwtháino chá khe nini mokol kiyoknai tei nwng Kaitor hai#3.5: Kaitor: Eba mwtairok. wngnai tei bubo kaham bubo hamya#3.5: bubo kaham bubo hamya: Tamo saui manma; eba bebakno saui manma. saui mannai.”
6A bwrwi a buphangno naithok nuk kha tei bini bwthái chá khe bwswk thokno tei siyan gwnang wng khe bwswk hamno hwnwi uansuk kha, hakhe bo aboni bwthái khagwi chá kha tei bwsainobo kisa chá di hwnwi rw khe bwsaibo abono chá kha. 7Aphuru khe khoroknwini mokol’-no kiyok kha, hakhe bórok sak lánga hwnwi saui man lai kha; hakhe bórok khwichang bwláirokno subui sakno ból lai kha.
8A sarigo bórok Subraiyung Kaitorno tháiblwngo sarik sal kwchang dodo-o himgurungwi tongmani sari khna kha tei a chwla bai bihik tháiblwngni buphangrokni kotono khe Subraiyung Kaitor bai nukjakna kiri-lachiui huijak lai kha. 9Tamo khe Subraiyung Kaitor a chwlano ringwi hai hwnwi sẃng kha, “Nwng buro wng kha?”
10Bo hai hwnwi sa kha, “Tháiblwngo ang nini khorang khna kha, ang nwng bai nukjakna kiriui lachiui ma huijak kha, tamni hwn ba ang sak lánga.”
11Bo hai hwnwi sa kha, “Nono sak lánga hwnwi sabo sa lang ba? Ang nono ta chá di hwnwi samani o buphangni bwtháino da chá lang tamo?”
12A chwla hai hwnwi sa kha, “Ang bai tong di hwnwi nwng ano rwmani a bwrwi se ano a bwtháino rw-o, hakhe ang ma chá kha.”
13 #
2Ko 11.3; 1Ti 2.14. Aphuru khe Subraiyung Kaitor a bwrwino hai hwnwi hwn kha, “Nwng tamo khlai kha?”
A bwrwi hai hwnwi sa kha, “Chibuk se ano belok khe ang ma chá kha.”
Kaitor majra sakhlaimani
14Hakhe Subraiyung Kaitor chibukno hai hwnwi sa kha, “Nwng omo hai samung khlaimani bagwi nokni tei bolongni mal-matarokni slái’-bo nwng swraimung nang thung; tabukni simi nwng khaklap bai ma mal sinai; nwng thwi yasak’-no hadlwi ma chánai. 15#Phu 12.17.Ang, nwng bai bwrwino kena wng rwnai, nini bosong bai bini bosongbo kena wng lainai; bo nini bokhorok swbainai tei nwng khe bini yakorai-o suknai.”
16Bo bwrwino hai hwnwi sa kha, “Nwng bwsa ogo tẃi phuru ang nini ok samano báng rwnai; nwng ok saui sak ma kengnai, hai twtwi phano nwng nwsaino khatungnai tei bo nono yago tonnai.”
17Hakhe bo Adamno hai hwnwi sa kha, “Nwng nihikni kók khna kha tei ang nono ‘ta chá di’ hwnmani buphangni bwtháino chá kha, nini bagwi o ha swraimung nang kha; kwthang tong lang sak’-no nwng kolomtwi klaiwi tangwi ma chá sinai; 18#Hib 6.8.o ha-o jabrarok tei busurok bacha sinai; tei nwng hapharni dalo-samprarok ma chá sinai. 19Nono takmani a ha-o kiphilwi tháng ya sak nwng khorokni kolomtwi yakungo khiklaiwi tangwi ma chá sinai; nini o hani mang, ha-ono kiphilwi ma tháng sinai.”
20Adam#3.20: Adam: Hibru kógo khe omo Borokni bosong hwnma se. bihikno Ebi#3.20: Ebi: O mung Hibru kókthái bai khe Kwthang hwnma se oro khe omo borokrokno hwnma-o naharjak kha. hwnwi mung phar kha, tamni hwn ba bo’-no bebak borokni bosongrokni buma. 21Hakhe Subraiyung Kaitor Adam bai bihikni bagwi bukurni kanmung snamwi kan rwui rw kha.
Adam bai Ebi Tháiblwngni rwkhlaijakmani
22 #
Phu 22.14. Hakhe Subraiyung Kaitor hai hwnwi sa kha, “Nai di tabuk bórok chwng hai’-no wng kha, kaham hamya#3.22. Bubo kaham tei bubo hamya saui manmani: Eba bebakno saui manmani. saui man kha, tabuk bo yak phologwi langma buphangni bwtháino khagwi chá khe mol brúm’-no kwthang tong phlainai” 23aboni bagwi Subraiyung Kaitor bono Eden tháiblwngni phataro khe bono takma a ha-o hukba khlaina bagwi rwui rohor kha. 24Bo borokno rwkhlaiwi rohor kha; hakhe Eden tháiblwngni salka bwkhak Cherubno tei bebak bwkhak’-no kitingwi hórjlai gwnang sengno ton kha. Langma rwnai buphangni samo thángwi man ya tẃi khe mwrwkna bagwi se abórokno tono.
Currently Selected:
YAPHANG 3: KOKBSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.