Mathae 5
5
Bhạganko reaṅ
(Luk 6:20-23)
1Jisu do ạḍi utạr hoṛe ńelketʼko khan buruteye decʼena. Are duṛupʼen khan acʼren celako hõ uni ṭhenko hecʼ sorena. 2Unre uni do celako nonka menkate cetʼakoe ehopʼena:
3“Monre reṅgejokʼkogeko bhạgana,
ente serma raj do onkoakʼkangea.
4Dukokʼkogeko bhạgana,
ente onko do jiwi raṛecʼko ńama.
5Mạhirkogeko bhạgana,
ente dhạrti do onkogeko ạidạrijoṅa.
6Mon ar ontorte Isorakʼ sanaleka calakʼkogeko bhạgana,
ente onkoakʼ monejoṅakʼ do purạukʼtakoa.
7Mãyãkʼkogeko bhạgana,
ente onko do mãyãko ńama.
8Okoeakʼ ontor khạṭigetako onkogeko bhạgana,
ente onko do Isorko ńelea.
9Sulukokʼkogeko bhạgana,
ente onko do Isorren hoponko ńumogokʼa.
10Dhorom iạte santao ar khed ocokʼkogeko bhạgana;
ente serma raj do onkoakʼkangea.
11“Bhạgangeape iń iạte hoṛko opoman arko santao lepere ar ạuṛiakʼte sanam lekan bạṛicʼakʼ reaṅko roṛlepere. 12Ape do rạskạ ar hulạsokʼpe, ente sermare ape lạgitʼ maraṅ kuṛại menakʼa. Ente ape laha okoe nạbikoko tahẽkan onko hõ nonkageko santaoletʼkoa.
Celako do buluṅ ar marsal leka
(Mark 9:50; Luk 14:34-35)
13“Ape do dhạrti reakʼ buluṅ kanape, menkhan buluṅ sabakʼlen khan cekate rahamokʼa? Ona do ar okaṭakʼ kạmirege baṅ lagaokʼa. Eken bahrete giḍikakʼ ar hoṛko lebetʼakʼ lek hoyokʼa.
14“Ape do dhạrti reakʼ marsal kanape. Buru coṭ reakʼ nagraha do oho danaṅ daṛelena. 15Okoe hõ diuhe jeretʼkate khạclạkʼte do bako hạrupʼ esetʼkakʼa, bickom bạti dohowakʼ cetanregeko dohoea. Onate oṛakʼren sanam hoṛge marsalko ńama. 16Onkage apeakʼ marsal do hoṛko samaṅre jolokʼtapema, jemon apeakʼ bhage kạmi ńelte aperen sermaren Babako sarhaoe.
Moseakʼ ạn-ạriko reaṅ sikhạuna
17“Noa do alope hudisa, Moseakʼ ạn-ạri ar nạbikoakʼ olakʼko bạtil lạgitʼ iń hecʼakana. Iń do bạtil lạgitʼ do baṅ, bickom purạu lạgitʼgeń hecʼakana. 18Sạrigeń metapekana, serma ar dhạrti ạuri cabakʼ hạbicʼ, ạn-ạri reakʼ sanamakʼ kathako ạuri purạukʼ hạbicʼ ona ạn-ạri reakʼ mitʼ akhor se ṭuḍạkʼ hõ oho meṭaolena. 19Onate jãhãege noa kạṭicʼ utạrakʼ hukumko modre mitʼ goṭecʼe rạpud ar onkage hoṛkoe cetʼako, uni do serma rajre huḍiń utạricʼe ńumogokʼa. Menkhan jãhãege onakoe senakʼ are cetʼako uni do serma rajre maraṅe ńum ocokʼa. 20Ińiń metapekana, apeakʼ dhorom do Phạrusiko ar sostor baḍaeko khon baṅ soroslentape khan ape do serma rajre ohogepe bolo daṛelena.
Edre babotre sikhạuna
21“Ańjom akadape, sedaeren hoṛko ṭhen noa katha roṛlena, ‘Alom khũna’ ar okoeye khũna uni do bicạrre dạyike hoyokʼa.” 22Menkhan ińiń metapekana, okoe acʼren boeha cetanreye edrekʼ, uni do bicạrre dạyike hoyokʼa. Ar okoe acʼren boehae metae, ‘Eya orlo’ uni do maraṅ bạisire dạyike hoyokʼa. Okoe acʼ boehae metae, ‘Eya dundhạ’ uni do norok seṅgelre khadle ocokʼ leke hoyokʼa.
23“Onate Isor samaṅre amakʼ samaṅokʼakʼem samaṅre, am upạrte amren boehawakʼ jãhãnakʼ menakʼtaea mentem disạle khan, 24amakʼ ona dan do pinḍ samaṅre bạgi oṭowakʼme. Ar senkate amren boeham tulucʼ solho maṛaṅokʼme ar inạ tayom do hecʼkate amakʼ dan samaṅme.
25“Jãhãe am birudreye mamblae khan adalotte ạuri calakʼrege uni sãote samka sạṭikʼme. Ar baṅkhan uni do hạkim ṭhene soprotmea, ar hạkim do pulis ṭhen, ar pulis do hajotreye bhoraomea. 26Sạrigeń metam kana, kạuḍi kạuḍi ạurim hala cabae hạbicʼ onḍe khon okalekate hõ ohogem oḍok daṛelena.
Laṭghaṭ reaṅ sikhạuna
(Mathae 19:9; Mark 10:11,12; Luk 16:18)
27“Ańjomakadape roṛlena mente, ‘alom laṭghaṭa.’ 28Menkhan ińiń metapekana, jãhãe hoṛ bạṛicʼ sanate maejiue beṅgetʼae uni do unrege acʼakʼ ontorre uni tulucʼe laṭghaṭeda.”
29Amakʼ jojom mẽtʼe kại ocome khan ona do hoṭor oḍokkakʼme. Amakʼ goṭa hoṛmo norokre khadlekʼ khon ona mitʼ hạṭiń bạṛicʼ ocoakʼge am lạgitʼ bhagea. 30Amakʼ jojom tiye kại ocome khan ona do samakʼ giḍikakʼme. Amakʼ goṭa hoṛmo norok seṅgelre khadlekʼ khon hoṛmo reakʼ mitʼ hạṭiń nosṭo ocoakʼge am lạgitʼ bogea.
31“Arhõ roṛ akana, “Jãhãe hoṛ bạhuttetʼe bạgiye khan uni do bapag dolele emaema.” 32Menkhan ińiń metapekana, jãhãe hoṛ laṭghaṭ chaḍa eṭakʼ karonte bạhuttetʼe bạgiye uni doe loṭghuṭi ocoyea, ar jãhãege uni bạgi ocoyicʼ maejiue baplaye, uni hõe loṭghuṭiya.
Kiriạkʼ reaṅ sikhạuna
33“Arhõpe ańjomakada, ạgil hapṛamko ṭhen roṛlena, ‘eṛe eṛe alom kiriạkʼa, bickom amakʼ sanam kiriạwakʼko Probhu purạuaeme.’ 34Menkhan ińiń metapekana, alotetʼgepe kiriạkʼa. Serma ńutumte hõ alo, ente ona do Isorakʼ siṅghạson kana. 35Dhạrti ńutumte hõ alo ente ona do uniakʼ jaṅga lebedokʼ jaega kana. Jerusalem ńutumte hõ alo, ente ona do maraṅ rajakʼ nagraha kana. 36Amakʼ bohokʼte hõ alo, ente ona reakʼ mitʼṭen upʼ hõ bam ponḍ daṛeakʼa se bam hende daṛeakʼa. 37Ape do, ‘Hẽ khan hẽ,’ ar ‘Baṅ khan baṅpe,’ Ar noa khon bạ̃ṛtiakʼ okaṭakʼkan, ona do Soetan ṭhen khonge hijukʼa.
Hala hạlikʼ reaṅ sikhạuna
(Luk 6:29-30)
38“Ańjomakadape roṛlena mente, ‘Mẽtʼ hala hạli mẽtʼ ar ḍaṭa hala hạli ḍaṭa.’ 39Menkhan ińiń metapekana, jãhãe ape tulucʼ bạṛicʼko beohar khan onko birudre cetʼhõ alope cekaea; bickom jãhãe jojom johae thapame khan uni do eṭakʼ joha hõ thapa ocoaeme. 40Jãhãe amakʼ aṅgrop hatao lạgitʼe lạlis khan uni do oyonakʼ hõ idiocoaeme. 41Jãhãe acʼakʼ bojha mitʼ mail iditae lạgitʼe sapʼlem khan uni tulucʼ bar mail calakʼme. 42Koyetʼmekạnicʼ do emaeme, ar okoe am ṭhen pańcae khojkan uni hõ alom dea giḍikaea.
Bạiriko dulạṛko reaṅ sikhạuna
(Luk 6:27,28,32-36)
43“Ańjomakadape, roṛlena mente, ‘Am aḍepaseren hoṛem dulạṛea ar amren bạiri dom kurudaea.’ 44Menkhan ińiń metapekana, aperen bạiriko dulạṛkope. Ar okoe apeko santaoetʼpe onko do koeakope. 45Jemon hoṛko ńelpe ape do sạrige serma Babaren hoponko kanape mente. Uni do jotoko cetanre acʼren siń candoe rakapʼ ocoyedea ar dhoromko ar bedhoromkoe dakʼako kana. 46Okoe apeko dulạṛetʼpe eken onkogepe dulạṛetʼko khan enḍekhan cetʼ kuṛại menakʼtapea? Mạsul uṭhạuko hõ cetʼ bako onkayeda? 47Eken apekoren hoṛgepe joharakokan khan enḍekhan eṭakʼko khon bạ̃ṛti do cetʼpe cekayeda? Boṅgan hoṛ jạtrenko hõ cetʼ bako onkayeda? 48Onate aperen sermaren Baba cetʼlekae khạṭige, onkage ape hõ khạṭiko hoyokʼpe.
Currently Selected:
Mathae 5: SCLNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Santali Common Language New Testament © Bangladesh Bible Society, 2012.