Markás 4
4
Tohm chandhagay mesál
(Mattá 13:1–17; Luká 8:4–10)
1Issáyá mazangwarmay kerrá padá mardománi tálim dayag bendát kort. Áiay chapp o chágerdá haminchok mardom mocch but ke á bójigéá swár but o nesht. Bójig ápá at o sajjahén mardom gwarmay lambá óshtátagatant. 2Gorhá Issáyá mardom gón darwar#4:2 Darwar, bezán matth, mesál, paym, dhawl. o mesálán báz tálim dátant. Gwashti: 3“Gósh dárét. Dehkáné tohmay chandhagá shot. 4Tohmáni chandhagay wahdá kammé tohm ráhay sará retk, báli morg átkant o chet o wártantesh. 5Kammé tohm dhal o dhókáni tahá retk ke ódá hák kamm at. Zutt rostant, chéá ke hák tanakk at. 6Bale cha róchay trondén garmiá gimmort#4:6 Gimmorag, bezán hoshk tarrag, napasgir bayag. o hoshk butant, chéá ke áyáni risshag o wandhál,#4:6 Wandhál, bezán hondhál, risshag o rótag. johl nashotagatant. 7Kammé tohm cherekk o dhangaráni tahá retk, cherekkán rodagá naeshtant o é tohm bar o samará sar nabutant. 8É dega tohm sharrén zeminá retkant. É rost o mazan butant o jáhé si sari#4:8 Si sari, bezán si barábar, si randá, si haminchok., jáhé shast sari o jáhé sad sari hóshag o baresh dát.” 9Padá gwashti: “Harkasá pa eshkonagá gósh per, beshkont.”
10Wahdé mardom shotant o Issá gón dwázdahén kásed o é dega hamráhán pasht kapt, áyán cha Issáyá jost kort ke é mesáláni máná ché ent. 11Issáyá passaw dát: “Hodáay bádsháhiay ráz shomárá bakshag butag, bale á ke mani ráhay randgiriá nakanant, é chizz pa áyán hoshkén darwar o mesál ant, 12tánke:
Á bechárant bale magendant,
beshkonant bale sarpad mabant.
Agan sarpad buténant,
dém pa man átkagatant o bakshag butagatant.”
Tohm chandhagay mesálay maksad
(Mattá 13:18–23; Luká 8:11–15)
13Padá gwashti: “Agan shomá é mesálá sarpada nabét, gorhá á dega mesálán chón sarpada bét? 14Dehkán hamá ent ke Hodáay habará keshit. 15Lahtén mardom ráhay sará retkagén tohmay dhawlá ent. Hodáay habar ke ódá keshaga bit, hamá damáná Shaytána kayt o keshtagén habará cha esháni delá dara kant o bárt. 16Á tohm ke dhal o dhókáni tahá retkant, hamá mardománi mesál ent ke Hodáay habará gósha dárant o hamá damáná pa gal o shádeha mannanti, 17bale pa é sawabá ke risshag o wandhálesh najatag, Hodáay habar áyáni delá tán dérá namánit. Wahdé Hodáay habaray sawabá sakki o sóriána kapant yá ázáré rasitesh, hamá damáná cha ráhá thagalant o kapant. 18Á tohm ke cherekk o dhangaráni tahá retkant, hamá mardom ant ke Hodáay habará gósha dárant 19bale donyái parésháni o mál o zarray delkasshi o préb o á dega chizzáni lóth o wáhag áyán rada dayant o naylant ke Hodáay habar besabzit o bar o samar bedant. 20Bale á tohm ke sharrén zeminá retkant, hamá mardom ant ke Hodáay habará eshkonant o mannant, bar o samara dayant, lahtén si sari, lahtén shast sari o lahtén sad sari.”
Cherágay mesál
(Luká 8:16–18)
21Issáyá mesál dayáná gwasht: “Kay rókén cherágá kárit o kásagay yá tahtay chérá chéra dant? Cherágá cherágdánay sará éra nakanant? 22Hecch choshén chérén chizzé nést ke záher mabit o hecch choshén rázé nést ke áshkár mabit. 23Harkasá pa eshkonagá gósh per, beshkont.”
24Padá gwashti: “Delgósh kanét ke shomá ché eshkonét. Gón har kayl o paymánahéá ke dayét, gón hamá kaylá shomárá dayaga bit o shomárá angat géshtera rasit. 25Kaséá ke chizzé hast, áiá géshter dayaga bit o kaséá ke nést, cha áiá hamá ham pach geraga bit ke hastenti.”
Tohmé ke rodit o sabza bit
26Issáyá gwasht: “Hodáay bádsháhi, anchosh ent ke mardomé dhagárá tohm bekeshit. 27É mardom shap o rócha wapsit o páda kayt o tohm anchosha rodit o sabza bit ke keshók wata nazánt chón rost. 28Dhagár watáwat keshtagén tohmá pa bar o samara rasénit, pésará ták, padá hóshag o randá hóshagay tahá dán mána bit. 29Wahdé keshára rasit, á dásá chéra dant o ronti, chéá ke rón o móshay wahd átkag.”
Kasterén tohmay mesál
(Mattá 13:31–32; Luká 13:18–19)
30Padá Issáyá gwasht: “Má ché begwashén ke Hodáay bádsháhi ché chizzéay dhawlá ent? Chónén darwaré byárén o chónén mesálé pésh bekanén? 31Hodáay bádsháhi, thélkáhay tohmay dhawlá ent. É donyáyá, tohmáni tahá kaster kasterén ent, 32bale wahdé zeminá keshaga bit, rodit o cha á dega sabzagán#4:32 Sabzag, bezán káh. borztera bit o sháh o lambi anchó mazana bant ke báli morg áyáni sáhegá kodóha#4:32 Kodóh, bezán kodám, báli morgay lóg. bandant.”
33Issáyá Hodáay habar é paymén bázén darwar o mesáléay tahá gón áyán darshána kortant#4:33 Darshán kanag, bezán gwashag, záher kanag, darangáz kanag. ke á sarpad but bekanant. 34Darwar o mesálán abéd hecch habaria nakort, bale wahdé gón wati moridán tahná but, sajjahén mesáli pa áyán máná kortant.
Tuppánay érmósh#4:35 Érmósh, bezán árám, hámósh. kanag
(Mattá 8:23–27; Luká 8:22–25)
35Hamá róchá, bégáh ke but, Issáyá gón moridán gwasht: “Byáét, gwarmay á dastá rawén.” 36Áyán mardom roksat kortant, bójigá swár butant o Issáesh zort o shotant. Dega lahtén bójig ham áyáni hamráh at. 37Dér nagwast ke mazanén syahgwátéá sar kort o mastén chawl o mawján bójig cha ápá porr kort. 38Issáyá, sarjáhé saray chérá at o bójigay poshti némagá wáb at. Moridán cha wábá pád kort o gwashtesh: “Oo ostád! Má meragá én o taw hecch may hayálá naay?” 39Issá pád átk, gwáti hakkal dát o gón gwarmá gwashti: “Érmósh bay! Bass kan!” Gwát kapt o chawl o mawj árám geptant. 40Padá gón wati moridán gwashti: “Shomá chéá torsagá ét? Angat báwara nakanét?” 41Moridán sakk torset o watmánwatá gwashtesh: “É chónén mardomé ke gwát o áp ham eshiay hokmá mannant?”
Currently Selected:
Markás 4: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.