Markás 11
11
Urshalimá Issáyá wasshátka kanant
(Mattá 21:1–11; Luká 19:28–40; Yuhanná 12:12–19)
1Wahdé Urshalimay nazzikká, Zaytunay Kóhá Bayt-Páji o Bayt-Anyáay métagán rasetant, gorhá Issáyá do morid rawán dát o 2gwashti: “Démi métagá berawét. Anchó ke ódá rasét, hari korragé gendét ke bastag. Á korragá angat hechkas swár nabutag. Áiá bójét o edá byárét. 3Agan kaséá jost kort ke shomá ché kanagá ét, begwashét ke wájahá é korrag pakár ent o damáná peria tarrénit.” 4Gorhá doén morid shotant o distesh ke korragé dhanná, damká#11:4 Damk, bezán kuchah, galli. darwázagay dapá bastag. Bótkesh. 5Cha ódá óshtátagén mardomán lahténá jost kort: “Shomá ché kanagá ét? Chéá é korragá bójét?” 6Anchosh ke Issáyá sój dátagatant, áyán hamá paymá gwasht. Gorhá baragá eshtesh. 7Moridán korrag Issáay kerrá áwort o wati shál o kabáhesh haray poshtá ér kortant o Issá swár but. 8Bázénéá Issáay ráhay sará wati shál o kabáh chérgéján kortant. Dega bázénéá cha dhagárán maccháni pissh o tak#11:8 Tak, bezán macchay tarrén lotth ke pissh per enti. borret o ráhay sará ér kort. 9Rombá, Issáay démay o poshtay mardom, kukkár kanáná gwashagá atant:
“Hushiáná,#11:9 Hushiáná, bezán “márá annun berakkén”.
mobárak ent hamá ke Hodáwanday námá kayt!#11:9 Zabur 118:26.
10Mobárak bát may bonpirok Dáuday padá áyókén bádsháhi.
Hushiáná, borzén arshá!”
11Gorhá Issá Urshalimá átk o mazanén parasteshgáhá shot. Ódá, áiá kash o gwaray har chizz cháret. Bale béwahd at, paméshká gón wati dwázdahén kásedán Bayt-Anyáyá shot.
Issá o enjiray drachk
(Mattá 21:18–19)
12Domi róchá, wahdé Issá o áiay morid cha Bayt-Anyáyá dar kaptant, ráhá Issá gozhnag but. 13Cha durá enjiray drachké disti ke táki per at. Drachkay nazzikká shot ke begendit bárén bar ent yá na. Bale wahdé raset, abéd cha táká dega hecchi nadist, chéá ke enjiray baray mósom naat.#11:13 Enjiray bémósomén baré ham hast ke áiá sohayliga gwashant o garibén mardom géshter áiá warant. Edá, pa Issáay mannagá Urshalimay tayár nabayag, bébarén enjiray drachkay tábiré. Urshalim ham, é enjiray drachkay dhawlá, sál 70 miládiá tabáh kanag but. 14Gorhá gón drachká gwashti: “Cha ed o rand, hechkas cha taw baré mawarát.” É habar moridán eshkot.
Cha mazanén parasteshgáhá sawdágeráni dar kanag
(Mattá 21:12–17; Luká 19:45–48; Yuhanná 2:13–22)
15Anchó ke Urshalimá sar butant, Issá mazanén parasteshgáhá shot o cha ódá sawdáger o geráki#11:15 Gerák, bezán hamá ke chizzé bahá gipt. gallént#11:15 Gallénag, bezán táchénag, dar kanag, dur ráh dayag. o dar kortant. Sarrápáni#11:15 Sarráp, bezán hamá mardom ke zarr bahá zurit o zarr bahá kant. thébal#11:15 Thébal, bezán méz, mazanén chárpádag. o kapót bahá kanókáni korsii chappi kortant. 16Mazanén parasteshgáhá, tájeri málay barag o áragá ham naeshtant. 17Mardomi tálim dátant o gwashti: “Hodáay Ketábá nebeshtah ent: Mani lóg sajjahén kawmáni dwá kanagay jágah gwashaga bit,#11:17 Eshayá Nabiay Ketáb 56:7. bale shomá dhongáni panáhgáhé kortag.” 18Wahdé Sharyatay zánóger o mazanén dini péshwáyán é habar eshkot, pa áiay koshagá ráhéay dar géjagá laggetant. Bale torsetesh, chéá ke sajjahén mardom cha Issáay tálimán hayrán o habakkah atant. 19Bégáh ke but, Issá o áiay morid cha shahrá dar kaptant.
Enjiray drachkay hoshk bayag
(Mattá 21:20–22)
20Domi sohbá, ráhá hamá enjiray drachkesh dist ke nun cha boná hoshk butagat. 21Petros, Issáay habaray yátá kapt o gwashti: “Oo ostád! Bechár, é drachk ke taw baddwá kort, gimmortag.” 22Issáyá gwasht: “Hodáay sará báwar kanét. 23Shomárá rásténa gwashán, agan kaséá imán bebit o gón é kóhá begwashit ke watá cha edá chest kan o daryáyá dawr day o wati gwashtagén habaray sará delá shakk mabit o báwar bekant, anchosha bit. 24Paméshká shomárá gwashán, harché ke wati dwáyáni tahá lóthét, báwar kanét ke shomárá rasetag o shomárá dayaga bit. 25Har wahdá ke pa dwáyá óshtét, agan shomárá gón yakkéá gelagé hast, wati dwáay tahá áiá bebakshét, tánke shomay ásmáni Pet ham shomay radkárián bebakshit. 26Bale agan shomá mabakshét, shomay ásmáni Pet ham shomay radkáriána nabakshit.”#11:26 Lahtén daznebeshtá, band 26 nést.
Issáay ehtiár
(Mattá 21:23–27; Luká 20:1–8)
27Issá o áiay morid, padá Urshalimá átkant. Wahdé Issá mazanén parasteshgáhá gám janagá at, mazanén dini péshwá, Sharyatay zánóger o kawmay kamásh áiay kerrá átkant. 28Jostesh kort: “Taw gón kojám hakk o ehtiárá é kárána kanay? Kayá tará é káráni kanagay ehtiár dátag?” 29Issáyá gwasht: “Maná ham cha shomá josté hast. Mani passawá bedayét gorhá man shomárá gwashán ke gón kojám hakk o ehtiárá é kárána kanán. 30Yahyáyá pákshódi dayagay ehtiár cha ásmáná rasetagat yá cha ensánay némagá? Passaw bedayét!” 31Áyán watmánwatá shawr o saláh kort o gwashtesh: “Agan begwashén cha ásmáná, gorhá gwashit: ‘Shomá chéá áiay sará imán nayáwort?’ 32Agan begwashén cha ensánay némagá...” Padá wati habaresh band kort chéá ke áyán cha mardomána torset parchá ke mardománi delá Yahyá pa rásti nabié at. 33Paméshká passawesh dát: “Má nazánén.” Issáyá gwasht: “Gorhá man ham shomárá nagwashán ke gón kojám hakk o ehtiárá é kárána kanán.”
Currently Selected:
Markás 11: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.