Markás 1
1
Pákshódi dayókén Yahyáay kolaw
(Mattá 3:1–12; Luká 3:1–18; Yuhanná 1:19–28)
1Issá Masih, Hodáay Chokkay wasshén mestágay#1:1 Mestág, bezán wasshén hál, bashárat. bongéj#1:1 Bongéj, bezán bendát, shoru..
2Anchosh ke Eshayá Nabiay Ketábá nebeshtah ent:
Bechár, man wati kásedá cha taw pésar ráha dayán
ke tai ráhá tachk o hamwára kant.
3 Gyábáná kasé gwánka jant: # 1:3 Gwánk janag, bezán tawár kanag, lótháénag.
“Hodáwanday ráhá tayár bekanét,
Hodáwanday keshkán rást o tachk bekanét.” # 1:3 Band 2–3, bechár Maláki Nabiay Ketáb 3:1; Eshayá Nabiay Ketáb 40:3.
4Pákshódi#1:4 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. dayókén Yahyá gyábáná átk o gwánki jat: “Tawbah bekanét o pákshódi bekanét ke shomay gonáh bakshag bebant.” 5Cha Yahudiahay damagay sajjahén métag o kallagán o cha Urshalimay shahrá mardom áiay kerrá átkant, wati gonáháni pashómániesh záhera kort o Yahyáyá Ordonay kawrá á pákshódia dátant. 6Yahyáyá cha oshteray mudán gwaptagén póshák gwará at o póstén kamarbandé lánká bastagati. Áiá, madag o gyábáni bénaga#1:6 Bénag, bezán shahd, asal. wárt. 7Yahyáyá jára jat o gwasht: “Cha man o rand, mardé kayt ke cha man zórmandter ent o man é káray láhek ham naán ke sréná dotal bekanán o áiay kawshbandán#1:7 Kawshband, bezán swásband, swásay band. bebóján. 8Man shomárá gón ápá pákshódia dayán, bale á shomárá gón Hodáay Pákén Ruhá#1:8 Hodáay Pákén Ruh, bezán Ruholkodos. pákshódia dant.”
Issáay pákshódi o chakkás
(Mattá 3:13—4:11; Luká 3:21–22; 4:1–13)
9Á róchán, Issá cha Jalilay damagay shahr Náserahá átk o Ordonay kawrá Yahyáyá á pákshódi dát. 10Anchosh ke Issá cha ápá dar áyagá at, disti ke ásmánay dap pach but o Pákén Ruh kapótéay dróshomá#1:10 Dróshom, bezán shekl, surat. ér átk o mani sará nesht. 11Cha ásmáná é tawár átk: “Taw mani dóstigén Bacch ay o man cha taw sakk wassh o razá án.”
12Hamá wahdá Pákén Ruhá Issá gyábáná rawán dát. 13Issá, tán chell róchá gyábáná mant o Shaytáná á chakkáset#1:13 Chakkásag, bezán ázmáesh kanag, emtehán gerag.. Issá ódá jangali jánwaráni nyámá#1:13 Nyámá, bezán myáná, darnyámá, tahá, tóká. at o préshtagán áiay hayáldária kort.
Chár máhigiray lótháénag
(Mattá 4:12–22; Luká 4:14–15; 5:1–11)
14Yahyáay dazgir bayagá rand, Issá Jalilá shot o Hodáay wasshén mestágay jári jat o 15gwashti: “Wahd átkag o rasetag. Hodáay bádsháhi átkag o sar butag. Cha wati gonáhán pashomán bebét o tawbah bekanét o Hodáay wasshén mestágay sará imán byárét.”
16Issá, Jalilay Mazangwarmay#1:16 Mazangwarm, bezán daryáchah. lambá#1:16 Lamb, bezán dámon, kerr. rawagá at ke do máhigiri dist, Shamun o áiay brát Andriás ke pa máhigiriá wati dám o máhórán gwarmá dawr dayagá atant. 17Issáyá gón áyán gwasht: “Byáét, mani randgiriá bekanét. Man shomárá anchosha kanán ke máhig geragay badalá, mardománi delán shekára kanét.”#1:17 Delay shekár kanagay maksad mardomán Hodáay ráhá árag ent. 18Áyán hamá damáná wati dám yalah dátant o áiay hamráh butant. 19Issá ke kammé démá shot Zebdiay chokk Ákub o áiay brát Yuhannái distant ke bójigá#1:19 Bójig, bezán lánch, kashti. neshtagatant o wati máhórán sráchag#1:19 Sráchag, bezán dertagén chizzéay dóchag o addh kanag. o sharr kanagá atant. 20Anchosh ke Issáyá á distant, gwánki jatant. Áyán wati pet Zebdi gón kárendahán#1:20 Kárendah, bezán kárdár, nawkar. bójigá yalah dát o Issáay hamráh butant.
Ganókéay jennay kasshag
(Luká 4:31–37)
21Issá o áiay morid Kaparnáhumay shahrá shotant. Shabbatay róchá#1:21 Shabbatay róch, hamá Shambeh ent, bezán Yahudiáni kár nakanagay róch. Issá kanisahá#1:21 Kanisah, bezán Yahudiáni parasteshgáh. shot o mardomi tálim dátant. 22Mardom cha áiay dars o tálimán hayrán o habakkah atant, chéá ke áiá Sharyatay zánógeráni#1:22 Sharyatay zánóger, bezán dini álem o Mussáay Sharyatay zántkár. paymá tálim nadát, gón wák#1:22 Wák, bezán zór, tákat. o ehtiáré#1:22 Ehtiár, bezán masteri, kodrat, zór. tálimi dát. 23Hamé wahdá, kanisahay tahá mardéá kukkár kort. É mardá jenné per at. Gwashti: 24“Oo Issá Náseri! Tará gón má che kár ent? Átkagay ke márá gár o bégwáh bekanay? Mana zánán taw kay ay, taw Hodáay gechén kortagén hamá Pákén ay.” 25Issáyá jenn hakkal dát o gwasht: “Chopp kan o é mardá yalah day.” 26Jenná á mard sakk zhámbalént#1:26 Zhámbalénag, bezán chizzéay gerag o pa trondi sorénag o larzénag. o kukkár kanáná cha áiá dar átk. 27Sajjahén mardomán pa hayráni watmánwatá gwasht: “É chónén habaré? Nókén tálimé. É mard pa wák o ehtiáré jennán ham hokma dant o jenn eshiay habará gerant.” 28Dér nagwast ke Jalilay sajjahén kerr o gwarán, Issáyá nám dar áwort.
Nádráháni drahbakshi
(Mattá 8:14–17; Luká 4:38–41)
29Issá, wahdé cha kanisahá dar kapt, Ákub o Yuhannáay hamráhiá Shamun o Andriásay lógá shot. 30Ódá, Shamunay wassig tapig at o nepáday sará waptagat. Anchosh ke Issá áyáni lógá potert, nádráhay hálesh dát. 31Issá nazzikká shot, áiay dasti gept o pádi kort. Tapá yalah dát. Á pád átk o áyáni hezmat kanagá lagget.
32Magrebtahárá mardomán wati sajjahén nádráh o jenni ganók Issáay kerrá áwortant. 33Shahray sajjahén mardom, lógay dapá mocch butant. 34Issáyá bázéné ke dhawl dhawlén nádráhián geptagatant, dráh kort o bázén jenné kassheti, bale áiá jenn pa habará naeshtant, chéá ke jennána zánt ke á kay ent.
Enjilay wasshén mestágay jár
(Luká 4:42–44)
35Sabáhá máhallah ke angat tahár at, Issá pád átk, cha lógá dar kapt, gestá#1:35 Gestá, bezán yakk kerr, dur. o panáhén jágahéá shot o dwái kort. 36Shamun o áiay sangat Issáay shóházá dar kaptant. 37Wahdé Issáesh dist, gón áiá gwashtesh: “Sajjahén mardom tará shóház kanagá ant.” 38Issáyá gwasht: “Byáét dega jágahéá rawén, kerr o gwaray métag o bázárán tánke man ódá ham wasshén mestágay járá bejanán, chéá ke man pa hamé kárá átkagán.” 39Gorhá, sajjahén Jalilá tarr o tábi kort, kanisaháni tahá wasshén mestágay jári jat o jenniáni jenni ham kasshetant.
Garray nádráhéay drahbakshi
(Mattá 8:1–4; Luká 5:12–16)
40Yakk mardéá garr#1:40 Asligén Yunáni zobánay labz pa sohrbádá, bezán jozámá, o pa garr o bag o dega tahr tahrén pósti nádráhián kár bandag butag. at. Issáay kerrá átk, kóndhán kapt, dazbandi kort o gwashti: “Agan taw belóthay, maná dráh o palgár#1:40 Palgár, bezán sáp o sallah, bepóleng. korta kanay.” 41Issáyá áiay sará bazzag but, dasti shahárt o á marday badani dast per mosht o gwashti: “Mana lóthán. Dráh o palgár bay!” 42Hamá damáná á mard cha garrá dráh but. 43Roksat kanagay wahdá, Issáyá kaddhan#1:43 Kaddhan, bezán mohrén tákid, hokm. kort o gwasht: 44“Bechár, hechkasá cha é habar o hálá sahig makan, bale beraw, watá dini péshwáyá pésh bedár o pa wati páki o palgáriá hamá korbánigá hayrát kan ke Mussáay Sharyatá nebisag butag, tánke pa áyán sháhedié bebit.” 45Bale á mard ke cha ódá dar átk, habará lagget o wati kessahi sheng o tálána kort. É sawabá, nun Issáyá natwánt hecch shahrá watá záher bekant, dhanná dur o gestáén jágahána dáshti, bale angat mardom cha har némagá áiay kerrá átkant.
Currently Selected:
Markás 1: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.