Mattá 27
27
Issá Rumiáni dastá dayaga bit
(Markás 15:1; Luká 23:1–2; Yuhanná 18:28–32)
1Sabáhá máhallah, sajjahén mazanén dini péshwá o kawmay kamáshán shawr yakk kort ke Issáyá koshén. 2Issáesh bast, kasshán kort o Rumi wáli Pilátusay dastá dát.
Yahudáay watkoshi
(Kásedáni Kár 1:18–19)
3Wahdé Issáay geráénók Yahudáyá dist ke pa Issáyá markay sezáesh bast, pashómán but o sién nograhén korshi bort o mazanén dini péshwá o kawmay kamásháná per tarréntant. 4Gwashti: “Mayárig án ke man bégonáhén mardomé dróhet.” Bale áyán passaw dát: “Márá che kár ent? Taw bezán o tai kár.” 5Gorhá Yahudáyá hamá zarr mazanén parasteshgáhá chagal dátant o shot o watá dratk o koshti. 6Mazanén dini péshwáyán zarr zortant o gwashtesh: “É palitén#27:6 Asligén Yunáni nebeshtánka gwashit: “hónigén zarr”. zarr ant, parasteshgáhay hazánagá esháni ér kanag rawá naent.” 7Paméshká shawr o saláhá rand, cha á zarrán kuzagaray#27:7 Kuzagar, bezán hamá mardom ke komb o kunzag addha kant. dhagáresh bahá zort ke pa darámadán kabrestáné bekananti. 8Tán róche maróchi á dhagáray nám “hónay dhagár” ent. 9É paymá Eremyá nabiay kortagén é habar rást o sarjam but: Man sién nograhén korsh zortant. Bani Esráilay chokkán á marday kimat haminchok bastagat. 10Man cha é zarrán kuzagaray dhagár bahá zort, anchosh ke Hodáwandá maná parmán dátagat.#27:10 Zakaryá Nabiay Ketáb 11:12 o rand, Eremyá Nabiay Ketáb 32:6 o rand.
Issá Pilátusay démá
(Markás 15:2–5; Luká 23:3–5; Yuhanná 18:33–38)
11Nun Issá wáliay démá óshtárénag but o wáliá cha áiá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.” 12Mazanén dini péshwá o kawmay kamásh Issáyá bohtám janagá atant, bale áiá hecch passaw nadát. 13Pilátusá gwasht: “Taw naeshkonagá ay ke é mardom tai helápá chinchok sháhedi dayagá ant?” 14Bale Issáyá áyáni yakk bohtáméay passaw ham nadát o wáli sakk hayrán but.
15Wáliá har sál aiday wahdá, cha Yahudi bandigán yakké, hamá ke mardomán lóthetagat, ázáta kort. 16Á wahdá yakk bandigé zendáná at ke námi Issá Barabbás at o pa wati badén kárán námkapt at. 17Wahdé mardom mocch butant, Pilátusá cha áyán jost kort: “Shomá ché gwashét, man kayá ázát bekanán, Issá Barabbásá yá é Issáyá ke Masih ham gwashanti?” 18Pilátusá zánt ke áyán Issá Masih pa hasadd mani dastá dátag, paméshká é josti kort.
19Wahdé Pilátus hakdiwáná neshtagat, áiay janá é kolaw ráh dát: “Gón é bégonáh o nékén mardá hecch makan, chéá ke man dóshi eshiay bárawá wábé distag o hamá ent paréshán án.” 20Bale mazanén dini péshwá o kawmay kamáshán mocch butagén mardom mannéntant ke Barabbásay ázáti o Issáay marká belóthét. 21Wáliá jost kort: “Ché lóthét, cha é doénán kojámiá pa shomá ázát bekanán?” Áyán gwasht: “Barabbásá.” 22Pilátusá cha áyán jost kort: “Gorhá gón Issáyá ke Masih ham gwashanti, ché bekanán?” Áyán pa hamtawári gwasht: “Salibi kassh!” 23Pilátusá jost kort: “Chéá bárén? Mayári ché ent?” Bale áyán géshter kukkár kort o gwashtesh: “Salibi kassh!”
24Wahdé Pilátusá dist ke hecch káré korta nakant o mardom shóresh kanagá ant, gorhá áiá áp zort, mocchiay démá wati dast shoshtant o gwashti: “Man cha é marday hóná bémayár án, shomá bezánét o shomay kár.” 25Sajjahén mardomán gwasht: “Eshiay hón mayg o may chokkáni gardená ent.” 26Gorhá Pilátusá pa áyánigi Barabbás ázát kort o Issá shallák o hayzarán janáént o dáti ke salib kasshag bebit.
Sepáhig Issáyá kalág bandag
(Markás 15:16–20; Yuhanná 19:2–3)
27Wáliay sepáhigán Issá wáliay kalátá bort o sajjahén lashkaresh áiay chapp o chágerdá mocch kort. 28Áyán Issáay gwaray god kasshetant o sohrchakén kabáhé gwará dát, 29cha dhangar o konthagán tájé addhesh kort o áiay sará dát, latthé rástén dastá dátesh o pa kalág o rishkand áiay démá kóndhán kaptant o gwashtesh: “Salám o drót, oo Yahudiáni bádsháh!” 30Áiay sará tokkesh jat o hamá latthesh zort o áiay sará jat. 31Wahdé kalág bandagesh halás kort, gwaray kabáhesh kasshet o áiay jenday godesh padá gwará dátant. Randá dém pa salib kasshagá bortesh.
Issáyá saliba kasshant
(Markás 15:21–32; Luká 23:26–43; Yuhanná 19:17–27)
32Wahdé rawagá laggetant, Shamun námén mardé distesh ke Keriniay shahray mardomé at. Sepáhigán á pa bigár gept ke Issáay salibá baddhá bekant. 33Wahdé “Joljotá” bezán hamá “Kámpól” námén jágahá rasetant 34ódá Issáesh zahrag mán kortagén sharáb dát, bale áiá chashagá rand nawártant. 35Salib kasshagá rand, pa láthari o korakasshi#27:35 Láthari o korakasshi, bezán chek o posht, tar o hoshk. áiay pocch o póshákesh watmánwatá bahr kortant. 36Randá hamódá neshtant o áiay negahpániesh kort. 37Issáay sarborá, mayárnámagé#27:37 Mayárnámag, bezán nebeshtah kortagén mayár. dratkesh ke áiay sará nebeshtagat: “É Issá ent, Yahudiáni bádsháh.”
38Issáay hamráhiá do dhongesh ham salib kasshet, yakké rástén o domi chappén kashá. 39Hamá mardom ke cha ódá gwazagá atant, áiárá dozmánesh dát o wati saresh chandhéntant. 40Gwashtesh: “Taw ke gwashtag ke man mazanén parasteshgáhá karóján o say róchay tahá padá bandáni, nun wati jendá rakkén. Agan taw Hodáay Chokk ay, cha salibá ér á.” 41Hamé dhawlá mazanén dini péshwá o Sharyatay zánóger o kawmay kamásh ham áiá kalág bandagá atant. Gwashagá atant: 42“Á dega mardomi rakkéntant, bale watá rakkénta nakant. É wa Esráilay bádsháh ent, agan nun cha salibá ér bekapit, má áiay sará báwara kanén. 43Hodáay sará óst o ométi bastag. Agan Hodá áiá rakkénaga lóthit, nun berakkéniti, chéá ke gwashtagati: ‘Man Hodáay Chokk án.’” 44Hamé paymá Issáay hamráhiá salib kasshetagén dhong ham áiá bad o rad gwashagá atant.
Issáay mark
(Markás 15:33–41; Luká 23:44–49; Yuhanná 19:28–30)
45Némróchá beger tán bégáhay sayá,#27:45 Asligén Yunáni nebeshtánka gwashit: “shashomi sáhatá beger tán nohomi sáhatá”. sajjahén molká taháriá mán shánt. 46Bégáhay sáhat sayá,#27:46 Asligén Yunáni nebeshtánka gwashit: “nohomi sáhatá”. Issáyá kukkár kort: “Eli, Eli, lemá sabaktani?” Bezán: Oo mani Hodá, oo mani Hodá! Taw chéá maná yalah dát?#27:46 Zabur 22:1. 47Wahdé ódá óshtátagén lahtén mardomá eshkot, gwashtesh: “Elyásá tawár kanagá ent.” 48Cha áyán yakké tacháná shot, espanjé#27:48 Espanj, bezán pozzh, pokki. zorti o tropshén sharábá missénti, dáréay sará bast o pa chussagá Issáay némagá shahárti. 49Bale é dega mardomán gwasht: “Sabr kan, chárén bárén Elyás eshiay rakkénagá kayt yá na?” 50Issáyá domi bará peryáté jat o sáhi dát. 51Hamá wahdá mazanén parasteshgáhay pardah sará beger tán boná dert o do ném but, zemin larzet o kóh tal geptant, 52kabráni dap pach but o bázén pák o pahrézkárén mardomé ke mortagat, padá zendag but. 53Issáay zendag bayag o jáh janagá rand, á cha wati kabrán dar átkant, Pákén Shahrá, bezán Urshalimá shotant o bázénéá distant. 54Hamá pawji apsar o áiay hamráhén sepáhig ke Issáay páneg atant, wahdé zeminchandh o é dega chizzesh distant, deltrakk butant o gwashtesh: “Béshakk é mard Hodáay Chokk at.”
55Bázén janéné ke cha Jalilá Issáay hamráh at o áiay hayáldáriesh kortagat, dur óshtátag o cháragá atant. 56Esháni tahá yakké Maryam Magdalini at, yakké Ákub o Issopay mát Maryam at o yakké Zebdiay chokkáni mát at.
Issáay kabr o kapan
(Markás 15:42–47; Luká 23:50–56; Yuhanná 19:38–42)
57Shap ke but, Arimátiáay shahray Issop námén sér o hazgárén mardé átk ke Issáay moridé at. 58Pilátusay kerrá shot o Issáay jónay baragay ejázati lóthet. Pilátusá parmán dát ke jóná áiá bedayét. 59Issopá jón zort o sapáén lilomén#27:59 Lilom, goday tahré ke Engréziá “linen” gwashaga bit. godéá patát o 60hamá nókén kabray tahá ér kort ke kóhéay tahá pa wat jatagati. Mazanén dhóké léthi dát o kabray dapá dáti o shot. 61Maryam Magdalini o á dega Maryam hamódá neshtagatant o démesh gón kabrá at.
Kabray negahpáni
62Domi róchá, bezán Shambehá,#27:62 Asligén Yunáni nebeshtánka gwashit: “Shabbatay tayáriay róchá rand”. mazanén dini péshwá o Parisi yakjáh but o Pilátusay kerrá shotant. 63Gwashtesh: “Wájah! Márá yát ent ke é drógbandá wati zendá gwashtagat ke say róchá rand man padá zendaga bán o jáha janán. 64Paméshká parmán beday ke tán say róchá kabray sará negahpáni kanag bebit, chó mabit ke áiay morid byáyant o jóná bedozzant o gón mardomán begwashant ke á cha mordagán padá zendag butag o é goddhi repk o honar cha pésarigéná ganter bebit.” 65Pilátusá darráént: “Lahtén sepáhig bezurét, berawét o hamá paymá ke gón shomá buta kant, kabray negahpániá bekanét.” 66Gorhá shotant o kabray dapay mazanén dhókesh mohr jat o mómband kort o sepáhigesh páneg kortant.
Currently Selected:
Mattá 27: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.