Luká 9
9
Dwázdahén kásedáni ehtiár
(Mattá 10:5–15; Markás 6:7–13)
1Issáyá dwázdahén kásed lótháéntant, áyáná sajjahén jennáni kasshag o nájórhiáni dráh kanagay wák o ehtiári dát o 2pa Hodáay bádsháhiay jár janag o nádráháni drah kanagá ráhi dátant. 3Gwashti: “Pa wati sapará hecch chizz mazurét gón, na asáé, na lót#9:3 Lót sapari péleké ke chizzi mána kanant o kópagái kanant. o turagé#9:3 Turag, bezán pélek, lót, pélag., na nán o tóshag, na zarr o na géshén jámagé. 4Wahdé lógéá rawét, tán shahray yalah dayagá hamá lógá bemánét. 5Agan mardom shomárá wasshátka nakanant, cha áyáni shahrá dar áét o dar áyagay wahdá wati pádáni danz o hákán hamódá bechandhét tánke áyáni helápá sháhedi bebit ke shomá Hodáay kolaw pa áyán sar kortag.” 6Gorhá Issáay morid dar kapt o métag pa métag har jáh, wasshén mestágesh pa mardomána rasént o nádráhén mardomesh dráha kortant.
Hirudisay parésháni
(Mattá 14:1–12; Markás 6:14–29)
7Wahdé Jalilay hákem Hirudis é sajjahén habar o hálán sahig but, paréshán o takánsar#9:7 Takánsar, bezán kasé ke pegri gerept o janjálá kaptag, sarbatag, sargardán. but, chéá ke lahtén mardom Issáay bárawá gwashagá at ke Yahyá ent ke padá cha mordagán zendag butag. 8Dega lahtén gwashagá at ke Elyás nabi záher butag, o dega lahtén gwashagá at ke cha péshi zamánagay paygambarán yakké ke padá zendag butag. 9Gorhá Hirudisá gwasht: “Yahyáay sar wa man borretag, nun é kay ent ke áiay bárawá man é dhawlén hál eshkonagá án?” Á pa Issáay gendagá hodónák#9:9 Hodónák, bezán wáhagdár, armáni, lóthók, delmánag. at.
Panch hazár mardomá warák dayag
(Mattá 14:13–21; Markás 6:30–44; Yuhanná 6:1–14)
10Wahdé Issáay kásed cha wati sapará per tarret o átkant, wati kortagén káráni hálesh Issáyá sar kort. Gorhá Issáyá á gón wat hamráh kortant o Bayt-Saydá námén shahréá shot tánke á cha mardomán dur o gestá bebant. 11Bale wahdé mardom sahig butant, áiay hamráh butant. Issáyá á wasshátk kortant, Hodáay bádsháhiay bárawá sar o sój dátant o nádráhén mardomi ham wassh o dráh kortant.
12Rónenday wahdá dwázdahén kásed átkant o gwashtesh: “Nun é mardomán ráh day ke é kash o gwaray métag o bázárán berawant o pa wat warag o wapsagay band o bast bekanant, chéá ke má edá gyábánéá én.” 13Bale Issáyá gwasht: “Shomá wat eshán warák bedayét.” Áyán passaw dát: “May kerrá panch nagan o do máhigá abéd dega hecch nést. Taw ché gwashay, má berawén o pa é sajjahén mardomán warák begerén?” 14Cha á mardomán kesás panch hazár mardén atant. Issáyá gón moridán gwasht: “Mardomán panjáh panjáhay thóliá benádénét.” 15Moridán anchosh kort o sajjahén nádéntant.
16Issáyá panchén nagan o doén máhig zortant o ásmánay némagá cháret, Hodáay shogri gept o padá nagan o máhigi chondh chondh kort o moridáni dastá dátant ke mardománi sará bahresh kanét. 17Sajjahénán sérá wárt o angat cha sar átkagén chondhán dwázdah sapt#9:17 Sapt, bezán sabad, mazanén challi, sáchi. porr but.
Petrosay gwáhi
(Mattá 16:13–28; Markás 8:27–33)
18Yakk róché Issá tahnáiá dwá kanagá at o bass morid gón áiá gón atant. Cha moridán josti kort: “Mardom mani bárawá ché gwashant, man kay án?” 19Áyán passaw dát: “Lahténa gwashit taw pákshódi dayókén Yahyá ay o lahténa gwashit taw Elyás nabi ay. Dega lahténa gwashit ke taw cha pésarigén zamánagay á dega nabián yakké ay o padá zendag butagay.” 20Áiá jost kort: “Shomá wat mani bárawá ché gwashét, man kay án?” Petrosá passaw dát: “Taw Hodáay ráh dátagén hamá Masih ay.”
Wati markay bárawá Issáay awali péshgói
21Bale Issáyá á hokm dátant ke “É habará gón hechkasá magwashét.” 22Gwashti: “Ensánay Chokk báyad ent bázén sakki o sórié#9:22 Sakki o sóri, bezán janáli, taklip. besaggit#9:22 Saggag, bezán bardásht kanag.. Kawmay kamásh, mazanén dini péshwá o Sharyatay zánóger allamá áiá namannant o kóshárénant o sayomi róchá á padá zendaga bit.”
Issáay randgiri
(Mattá 10:38–39; 16:28; Markás 8:34—9:1)
23Issáyá sajjahén mardom gwashtant: “Agan kasé lóthit mani randgiriá bekant, wati delay lóth o wáhagán#9:23 Wáhag, bezán lóth, talab. bekoshit o har róch wati jenday salibá baddhá bekant#9:23 Salib baddhá kanagay maksad Issáay wáhagáni purah kanag ent. o mani randgiriá bekant. 24Chéá ke harkas ke wati sáhay rakkénagay johdá kant, gária dant o harkas ke mani háterá wati sáhá nadra kant, rakkéniti. 25Agan yakkéá sajjahén donyá berasit bale wati sáhá gár bedant, gorhá áiá che páedaga rasit? 26Agan kasé cha man o mani habarán sharmendag bebit, gorhá Ensánay Chokk ham á wahdi ke gón watig o ásmáni Petayg o pákén préshtagáni shán o shawkatá é jaháná padá kayt, cha áiá sharmendaga bit. 27Bale man shomárá rásténa gwashán, edá lahtén mardom óshtátag ke tánke Hodáay bádsháhiá magendant, é namerant.”
Issáay dém o dróshomay drapshnáki
(Mattá 17:1–9; Markás 9:2–9)
28Cha é habarán kesás hasht róchá rand Issáyá Petros o Yuhanná o Ákub hamráh kortant o pa dwáyá kóhéay sará shot. 29Wahdé Issá dwá kanagá at, áiay démay rang badal but o posháki sakk espét but o drapshagá#9:29 Drapshag, bezán shahm janag, jalashkag. laggetant. 30Yakk anágat do mardom záher but o gón Issáyá habar kanagá laggetant. Yakké Mussá at o domi Elyás. 31Á doén gón shán o shawkaté záher butant o Issáay markay bárawá habaresh kort ke allamá Urshalimá bayagi at.
32Petros o áiay hamráh Yuhanná o Ákub kóchandhagá atant, bale wahdé sharriay sará ágah butant, Issáay shán o shawkatesh dist o gón áiá doén oshtátagén mardomesh ham distant. 33Wahdé á doén Issáyá roksat kanag o rawagá atant, Petrosá gwasht: “Wájah! May edá bayag sakk sharr ent, bell ke má say sáheg o kápára#9:33 Kápár, kápar, kapar. bandén, yakké pa taw, yakké pa Mussáyá o yakké pa Elyásá.” Petrosá wat nazánt ke ché gwashagá ent.
34Petros angat habará at ke jambaré#9:34 Jambar, bezán abr. átk o áyáni sará sáhél but. Wahdé jambar áyáni sará sáhél but, moridán torset. 35Cha jambará tawáré átk: “É mani Bacch ent ke man gechén kortag, eshiay habarán gósh bedárét.” 36Tawáray eshkonagá rand moridán Issá éwaká dist. Áyán é sargwast wati delá dásht o á wahdá wati distagénesh gón hechkasá nagwasht.
Jenni bachakkéay drahbakshi
(Mattá 17:14–18; Markás 9:14–27)
37Domi róchá wahdé Issá o sayén morid cha kóhá ér átkant, mardománi mazanén mocchié átk o gón Issáyá dochár kapt. 38Cha mocchiay nyámá mardéá kukkár kort o gwasht: “Oo ostád! Gón taw dazbandia kanán, mani bachakká bechár, mani yakkén chokk ent. 39Jenné anágat mani chokká gipt o zhámbalénit#9:39 Zhámbalénag, bezán chizzéay gerag o pa trondi sorénag o larzénag. o hamá damáná chokk ják o kukkára kant o gajj o kapa bit. Áiá sakk kamm yalaha dant o áiá némjána kant. 40Man gón tai moridán dazbandi kort ke é jenná bekasshét, bale áyán kasshet nakort.” 41Issáyá gwasht: “Oo bébáwar o gomráhén nasl o padréch! Man tán kadéná gón shomá bemánán o shomárá besaggán? Chokká edá byár.” 42Wahdé chokk pédák at, jenná zhámbalént o dhagárá jat. Issáyá jenn hakkal dát, chokk dráh kort o petay dastá dát. 43Sajjahén mardomán Hodáay shán dist o hayrán o habakkah butant.
Issáay markay domi péshgói
(Mattá 17:22–23; Markás 9:30–32)
Wahdé sajjahén mardom cha Issáay mójezahán hayrán atant, áiá gón wati moridán gwasht: 44“Mani é habarán pa sharri delgósh kanét, Ensánay Chokk mardománi dastá dayaga bit.” 45Bale morid áiay é habará sarpad nabutant, chéá ke pa áyán ramz o rázé at. Cha Issáyá jost kanagesh ham torset.
Mazani
(Mattá 18:1–5; Markás 9:33–37)
46Issáay morid watmánwatá é gappay sará dapjáká laggetant ke may tahá masterén mardom kay ent? 47Issáyá áyáni delay habar zánt o yakk kasánén chokké wati kashá óshtárént o 48gón moridán gwashti: “Harkas ke pa mani námá é kasánén chokká wasshátka kant o sharapa dant, bezán á maná sharapa dant. Harkas ke maná sharapa dant, áiá ham sharapa dant ke maná ráhi dátag, chéá ke shomay master hamá ent ke watá cha sajjahénán kastera zánt.”
Á ke shomay heláp naent, shomay némagá ent
(Markás 9:38–40)
49Yuhannáyá gón Issáyá gwasht: “Wájah! Má yakk mardé dist ke tai námay sará mardománi jennán kasshagá at, bale má naesht, chéá ke á cha má naat.” 50Issáyá gwasht: “Na, é kárá makanét, chéá ke agan kasé shomay heláp naent shomay némagá ent.”
Sámeriáni namannag
51Wahdé Issáay chest bayag o ásmáná rawagay wahd nazzikk but, gón deljamén shawré dém pa Urshalimá ráh gept. 52Bale cha wat pésar lahtén kásedi ráh dát. Á shotant o Sámeriáni métagéá rasetant tánke cha áiay áyagá pésar pa áiá tayári bekanant. 53Bale óday mardomán Issá wasshátk nakort chéá ke á Urshalimá rawagá at.#9:53 Urshalim, Yahudiáni pákén shahr at, bale Sámerián Urshalim pákén shahré namannet. 54Wahdé Issáay morid Ákub o Yuhanná cha é hálá sahig butant, gwashtesh: “Oo Hodáwand! Taw razá dayay má cha Hodáyá belóthén ke cha ásmáná ásé ráh bedant o eshán hák o por bekant?” 55Bale Issáyá chakk tarrént o hakkal dátant.#9:55 Lahtén daznebeshtá átkag: Issáyá gésh kort: “Shomá nazánét gón kojám ruhá hamgranch ét. Chéá ke Ensánay Chokk pa mardománi gár o gomsár kanagá nayátkag, pa áyáni rakkénagá átkag.” 56Randá gón wati moridán, dega métagéá shot.
Kay Issáay morid buta kant?
(Mattá 8:19–22)
57Issá o áiay morid ráhá rawagá atant. Mardéá gwasht: “Har jáh ke taw raway, man tai randgiriá kanán.” 58Issáyá gwasht: “Róbáhán hóndh hast o báli morgán kodóh#9:58 Kodóh, bezán kodám, báli morgay lóg., bale Ensánay Chokká pa saray ér kanagá hecch jágah nést.”
59Issáyá gón dega mardéá gwasht: “Byá, mani randgiriá bekan.” Bale áiá passaw dát: “Oo wájah! Maná ejázat beday ke pésará berawán o wati petá kabr o kapan bekanán.” 60Issáyá gwasht: “Bell ke mordag wati mordagán wat kabr o kapana kanant, taw beraw o Hodáay bádsháhiay wasshén mestágá pa mardomán sar kan.”
61Degaréá gwasht: “Oo wájah! Man tai randgiriá kanán, bale maná bell ke pésará wati lógay mardomán roksat bekanán.” 62Issáyá áiay passawá gwasht: “Á kas ke nangár kanagay wahdá poshtá chárit, Hodáay bádsháhiay hezmatkáriay láhek naent.”
Currently Selected:
Luká 9: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.