Luká 3
3
Pákshódi dayókén Yahyáay kolaw
(Mattá 3:1–12; Markás 1:1–8; Yuhanná 1:19–28)
1Rumay bádsháh, Tiberius Kaysaray bádsháhiay pánzdahomi sál at. Hamá róchán Pontius Pilátus Yahudiahay wáli at o Hirudis Jalilay hákem at. Hirudisay brát Pilipos Eturiahay o Tráhunitisay hákem at o Lisániás Ábiliniay hákem at. 2Hanná o Kayápá á wahday masterén dini péshwá atant. Hamá róchán Hodáay kolaw gyábáná Zakaryáay bacch Yahyáay sará átk. 3Yahyá Ordonay kawray kerr o gwaray har jágahá shot o Hodáay kolawi pa mardomán sara kort o gwashti: “Tawbah bekanét o pákshódi#3:3 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. bekanét ke shomay gonáh bakshag bebant.” 4Anchó ke Eshayá Nabiay Ketábá nebeshtah ent:
Gyábáná, kasé gwánka jant: # 3:4 Gwánk janag, bezán tawár kanag, lótháénag.
“Hodáwanday ráhá tayár bekanét,
Hodáwanday keshkán rást o tachk bekanét.
5 Sajjahén darag # 3:5 Darag, bezán wádi, gwatr. porr kanaga bant o
sajjahén kóh o jomp jahl áraga bant.
Chapp o chóthén ráh tachk kanaga bant o
sajjahén sarkap o érkap hamwár o hamlasun kanaga bant.
6 Jahánay sajjahén mardom Hodáay dátagén nejátá gendant.” # 3:6 Eshayá Nabiay Ketáb 40:3–5; 52:10.
7Wahdé mardom pa pákshódi kanagá dar átkant, Yahyáyá gón áyán gwasht: “Oo syahmárzádagán! Kayá shomárá habardár kortag o gwashtag ke cha áyókén kahr o gazabá tatka kanét? 8Anchén kár bekanét ke cha áyán záher bebit ke shomá tawbah kortag. Wati delá é hayálá ham mayárét ke Ebráhém may pet ent. Man shomárá gwashán ke Hodá cha é sengán ham pa Ebráhémá chokk o awlád pédá korta kant. 9Nun tapar tayár ent ke drachkán cha boná begoddhit#3:9 Goddhag, bezán sendag, borrag, dur kanag. o har drachké ke sharrén bara nayárit, goddhag o ásá dawr dayaga bit.” 10Mardomán jost kort: “Gorhá má ché bekanén?” 11Áiá passaw dát: “Agan kaséá do jámag hast, yakkéá hamá kasá bedant ke áiá nést o agan kaséay kerrá ward o warák hast, áyán ham bahr bekant.”
12Songi#3:12 Song, bezán máliát, thayks. o máliátgir ham pa pákshódiá Yahyáay kerrá átkant. Jostesh kort: “Oo ostád! Má ché bekanén?” 13Áiá gwasht: “Cha gisshéntagén máliátá géshter magerét.” 14Sepáhigán#3:14 Sepahig, bezán pawji, arteshi, lashkari. ham cha áiá jost gept: “Má ché bekanén?” Passawi dát: “Pa zór cha kaséá zarr magerét o kaséay sará drógén tohmat majanét. Wati mozzay sará gozarán bekanét.”
15Mardom Hodáay wádah dátagén rakkénókay entezár o wadárá atant, paméshká hayálesha kort ke balkén Yahyá hamá Masih ent. 16Bale Yahyáyá á sajjahénáni passawá gwasht: “Man shomárá tahná gón ápá pákshódia dayán, bale yakk anchén kasé áyagi ent ke á cha man zórmandter ent o man áiay kawshbandáni#3:16 Kawshband, bezán swásband, swásay band. bójagay láhek ham naán. Á shomárá gón Pákén Ruh o ásá pákshódia dant. 17Áiá cha pog o palárán#3:17 Pog o palár, bezán dánay póst o hoshk butagén káh o sabzag. dánay jetá kanag o gisshénagá, hanshóné#3:17 Hanshón, bezán dáré ke pa dán o pogáni jetá kanagá kármarza bit. dastá ent. Wati jóháná#3:17 Jóhán, bezán kesháráni moshag o dánáni mocch kanagay jágah. moshit o dánán ambárá éra kant, bale pog o palárán anchosha sóchit ke ásesh hechbara namerit.” 18Yahyáyá, mardom dega bázén sar o sója kortant o wasshén mestágay jára jat.
19Bale wahdé Yahyáyá Jalilay hákem Hirudis wati brátay pésarigén jan Hirudiaháay sawabá#3:19 Hirudisá gón wati brátay pésarigén janá sur kortagat. Sharyatá jáez naent ke kasé gón wati zendagén brátay janá sáng o sur bekant (bechár Láwián 18:16). o Hirudisay dega sajjahén radkáriáni sawabá malámat kort, 20Hirudisá dega gandagén káré ham kort, bezán Yahyái gept o bandig kanáént.
Issáay pákshódi
(Mattá 3:13–17; Markás 1:9–11)
21Sajjahénán ke pákshódi kort, Issáyá ham pákshódi kort. Wahdé Issá dwá kanagá at, hamá wahdá ásmánay dap pach but o 22Pákén Ruh kapótéay dróshomá#3:22 Dróshom, bezán shekl, surat. áiay sará ér átk. Cha ásmáná tawáré átk: “Taw mani dóstigén Bacch ay, man cha taw sakk wassh o razá án.”
Issáay béh o bonyád
(Mattá 1:1–17)
23Issáay omr kamm o gésh si sál at ke mardománi nyámá wati kári bongéj#3:23 Bongéj, bezán bendát, shoru. kort. Mardománi hayál at ke Issá Issopay chokk ent. Issop Háliay chokk ent o cha Háliá rand: 24Mattát, Mattáte Láwi, Láwie Malki, Malkie Yanná, Yannáe Issop, 25Issope Mattátiá, Mattátiáe Ámus, Ámuse Náhum, Náhume Hasli, Haslie Najjáy, 26Najjáye Mahat, Mahate Mattátiá, Mattátiáe Shemi, Shemie Yósék, Yóséke Yódá, 27Yódáe Yuhanán, Yuhanáne Risá, Risáe Zerubábel, Zerubábele Shyáltél, Shyáltéle Niri, 28Nirie Malki, Malkie Addi, Addie Kusám, Kusáme Elmadám, Elmadáme Ér, 29Ére Yushá, Yusháe Elyázar, Elyázare Yurim, Yurime Mattát, Mattáte Láwi, 30Láwie Shamun, Shamune Yahudá, Yahudáe Issop, Issope Yónám, Yónáme Elyákim, 31Elyákime Maliá, Maliáe Menná, Mennáe Mattátá, Mattátáe Nátán, Nátáne Dáud, 32Dáude Yassi, Yassie Óbayd, Óbayde Buáz, Buáze Salmun, Salmune Nahshun, 33Nahshune Aminádáb, Aminádábe Admin, Admine Arni, Arnie Hesrun, Hesrune Páres, Párese Yahudá, 34Yahudáe Ákub, Ákube Esák, Esáke Ebráhém, Ebráhéme Térá, Téráe Náhór, 35Náhóre Soruj, Soruje Rau, Raue Pálaj, Pálaje Ábér, Ábére Shálah, 36Shálahe Kaynán, Kaynáne Arpakshád, Arpaksháde Sám, Sáme Nuh, Nuhe Lamék, 37Laméke Metushálah, Metushálahe Hanuk, Hanuke Yáred, Yárede Mahalálél, Mahaláléle Kenán, 38Kenáne Énósh, Énóshe Sayt, Sayte Ádam, o Ádam cha Hodáay némagá ent.
Currently Selected:
Luká 3: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.