Litoonl 4
4
Baah nan jin Piita nin Jɔnn tibɔr man
1Piita nin Jɔnn kaah la nan si ki pag tenn bininfobin ni, le biminmanib nin ban guu iwonjiɛn niin a ninkpelu nin Sadusi yaab dan bi ban. 2Bi ŋuui nan fii itoon ni bu le takpem baah wɔɔn bininfobin ke, Yisa nan fii nkumin ni. 3Le bi nan choo bi, naah nan ye kujɔɔg n bu le bi nan kɔɔn bi kuloondiigin ke ni wonn wee. 4Amaa le bininfob takpem ban gbir Piita a bɔr nmɔn nan ŋa yada, le biwonjiɛm a kanl nan fii ke turiŋmu paam.
5Naah nan won kutaag, le Juu yaab a yudam nin bininkpeeb nin ban wɔɔnn Uwonbɔr a siim nan lagin tab Jerusalam. 6Ban nan lagin nmɔn yaan biminmanib a ninkpelu Anasi nan be niin, nin Kayafasi, nin Jɔnn nin Alɛgzanda nin kumanug a yudaau nmɔn a niin yaab bibam. 7Le ki che bi ta Piita nin Jɔnn dan bi ban, le bi baan bi ibinbaan ke, “Npɔɔn mi la ba bee ŋma a yinl wee ni ta fiin kiwɔbim nan naa?”
8Le Piita gbee nin Kasi a Naaŋ le ki bei bi ke: “Nim Juu yaab a yudam nin bininkpeeb! 9Ni ye ni yin ti dinan ki nan ji ti tibɔr ki jiin litoonl ŋanl lan wee ti tun sei kiwɔbig nan, ki baan ti taah ŋa man wee u nan kan kutebug ke, 10ni ŋan nin nim Iziral yaab biɛn mu biɛ ke: Yisa Masiya wan ye Nazarif a ninfou win a yinl bu, le uja wan si ni numin nan kan kutebug. Yisa nmɔn le ni nan che bi kpaa u lidapunpunl bu-n, amaa le Uwonbɔr fiin u nkumin. 11#Ilan 118:22 U ma le Uwonbɔr a gbɔŋ pag u bu ke,
‘Kudaag#4:11Juu yaab nan jɔɔ litangbagtakpenl lan ŋmag kudiig a maam le, man le Bikɔɔm mu jɔɔ kijaantelig kan ŋmag kudiig a yɔgiri nin limɔɔpinl. kan wee nim bitanmaab yiin,
ki ma nan yin ye kijaantelig ŋaŋ.’
12Nŋmarim kaa be u ba ban ni, le liyinl liba le kaa be dulinya nan yaan wee Uwonbɔr ta sei bininfob ke bin yin ki kan nŋmarimi, see Yisa a binba.”
13Biyudam nmɔn kaah nan kan Piita nin Jɔnn kaah jɔɔ sufu pɔɔril man nmɔn, ki biɛ ke bi ye bininfob ban kaa jon ntinnim nbamɔmi, ni nan gar bi le, le bi biɛ ke bijab nan nyi be nin Yisa u. 14Amaa baah nan kan uja wan kan kutebugin si Piita nin Jɔnn ban nin, le baa ji kan bimɔb ban li pag ki bii bi. 15Le bi nan che bi nyan Juu yaab a yudam#4:15 Juu yaab a yudam ban wee bi ji yi bi ke Sanhidirin. a laguŋ a diig nmɔn yaan, amaa le bi paar ki gbeer tab. 16Le ki baan tab ke, “Ti yin ŋa bijab nmɔn nii? Bininfob ban biɛn be Jerusalam nan pii nyi ligaril a toon yan wee bi tun, mambu ni che taa ji li fir niɛ bi. 17Amaa taah li ŋa man wee tibɔr nan laa mɔɔn ki foo bininfob biɛn ye nan le, ni che ti kpaan bi, wee bi laa ji yi Yisa a yinl ki tenn bininfobi.”
18Mambu le bi yin bi kɔɔ ndiin le ki bei bi ke, bi li nyi bin ta Yisa a yinl ki pag bee ki wɔɔn uba. 19Amaa le Piita nin Jɔnn jiin bi ke, “Ni ŋan nin Uwonbɔr ban nin ti chee ni mɔb bee Uwonbɔr aa, ni jiin sei ni bau. 20Nan bu-n tim kaa li fir jiɛn ki laa pag nan wee ti kan ki gbir n bu.”
21Baah nan kɔɔn bi bijawaam takpem a bɔɔn, le bi jaa bi ke bi li chaau, baa nan kan nsan man bu wee bi li nɔɔ ki dar bi tuli yi, nan bu-n bininfobin biɛn nan pagir Uwonbɔr le, ligaril a toon lan tun nin bu. 22Uja wan nan kan ligaril a tebug nmɔn nan por jon ibin pinau.
Biwonjiɛmin kaah miɛ Uwonbɔr ki ban sufu pɔɔril man
23Baah jaa Piita nin Jɔnn ni, le bi jir kun bitab ban, ki tan bei bi kumanug a yudam nin bininkpeebin kaah bei bi man. 24Bi mu kaah gbir man nin, le bi biɛn lagin ki miɛ Uwonbɔr nin nmɔpɔɔn ki ke, “Npɔɔn takpen daan, fin le naan paab nin tum, nin imɔg nin nan biɛn be i yaan. 25A nan che A Kasi a Naaŋin gbeen ti yaaja Defid, wan ye A toon tun win le u pag ke,
‘Ba ŋa wee ibol nan pel nin iŋuu,
le bininfob lolig ilol yan kaa ŋan naa?
26 #
Ilan 2:1-2
Le dulinya nan a bɔrtiib ŋa bi sili
le biyudam lagin tab
ke bin kɔnn Uwonbɔr nin U ninfo gannkaau Masiya.’
27“Ni ye ibamɔn le ke Herɔd, nin Pontiɛ Palati, nin ban kaa ye Juu yaab nin Iziral yaab sin nan lagin kitiŋ nan yaan le, ki lol ilol ke bin ku A kasi a yomu Yisa, wan wee A gann wee u ye A Masiya nan. 28Le bi tun nan wee A pii nan tiɛr A bamin nin A pɔɔmin ke ni na li ŋaan. 29Daandaan nan, Uyudaan lig baah fann ti man wee ki ter tim ban ye A toon tun nan wee ti fir pag A bɔr nmɔn nin lipoobil. 30Tann A nɔɔ paan bininfob bu ki che bin kan kutebug, tun ligaril a siɛra nin lijinjeel a toon, A kasi a toon tun Yisa a yinlin a pɔɔn n bu.”
31Baah miɛ Uwonbɔr ki diɛ nan, le baah be kudiig kan a poolin nin degin. Le Kasi a Naaŋ gbeen bi biɛn nan, le bi pag Uwonbɔr a bɔr nin lipoobil.
Biwonjiɛm kaah por bi wan yɔɔr ki sei tab man
32Biwonjiɛmin biɛn nan jɔɔ sufu uba nin potiɛl liba le. Bi ni uba kaa nan ŋmag waah jɔɔ nan ke ni ye u binba yaali, amaa bi nan por baah jɔɔ nan nmɔn tenn tab le. 33Iyaayoo nmɔn le itoon nmɔn nan jin Uyudaan Yisa a kum a fiim a siɛra, nin npɔɔn takpen le Uwonbɔr a nyunyunbasanl takpem nan be bi biɛn bu. 34Uba kaa nan be niin ki ye fala daan ni, nan bu-n, ban jɔɔ bi tɔɔl tɔɔl a paan nin bi niin ti kɔɔr le, ki gaa iligi ki ta dan, 35ki nan sei itoon nin, le bin por ki sei uninfo biɛn nin waah kpaan un gaa man.
36Uja uba nan be niin le u yinl ye Josef, u nan ye Liifai yaab a bol a ninfou le, wan wee bi ma u Saipuru a tiŋin nan, itoon nin yi u ke Banabasi (ni taai ye pɔɔninba daan a bija), 37le u nan kɔɔr u paam ki gaa mi ligi ki ta dan ki nan sei itoon nin.
Currently Selected:
Litoonl 4: KUGL
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Komba New Testament © Bible Society of Ghana, 2014.