Apa 21
21
Poloʼa Yulusalemu taonifiʼmo uʼniya gemae
1Lagaemo apataleta sipifiʼmo uta haita maiteta aniʼmo lakaeta Kosi ani agoʼnanenafiʼmo uta avaʼyi huteta egamo ataleta Losi ani agoʼnanenafiʼmo uta avaʼyi huteta ataleta Patala ani agoʼnanenafiʼmo uta avaʼyi huteta sipifatiʼmo uta lamita maiʼnone. 2Alu sipimo Finisiya kotegamo ugefeʼmo huʼnigetaeʼmo ani sipifiʼmo uta haita maiteta aniʼmo lakaeta neʼutaeʼmo 3mago ani agoʼnanenamo agiʼamo Saipalasi koʼmo hoga haopalega haneʼnigeta ageteta aeta agaseta Siliya kotegamo Taiya taonifiʼmo sipifi haneʼniya kagemi yaʼmo aliʼa malegefe huʼnaya taonifiʼmo uta avaʼyi huteta uta lamiʼnone. 4#Ap 20:23Lamiteta Ala kava neʼmo geʼamo neʼafiya vayaʼaifeʼmo kahauya huta apaketetaeʼmo apakaeʼeʼmo magoke salemo lokaeta maiʼnone. Goti Aunemeʼamoʼmo hapa paiʼnigeʼa Polofeʼmo huʼapaeʼmo, Yulusalemu taonifiʼmo uka ohaiyo, huʼa ha paiʼnae. 5Apakaeʼeʼmo lokaeta maiʼnona afinaʼmo ago hano huʼnigeta apataleta uʼnone. Apakaemo muki ve aʼneʼe mafaʼneʼapiʼe lagaeʼeʼmo taonifatiʼmo ataleta magokepi lokaeta uta ani agiʼnaleʼmo laleʼyamo faiʼneta nunumuʼmo hutetaeʼmo 6#Ap 20:36maitaleyo, huta huʼnonageʼapaeʼmo, He, utaleyo, huʼa huʼnageta apataleta sipifiʼmo uta haita maiʼnonageʼapaeʼmo noʼapilegamo aiʼa atagi neʼa uʼnae.
7Taiya taonifatiʼmo ataleta aniʼmo lakaeta Tolemesi taonifiʼmo uta avaʼyi huteta uta lamita konagatimogifeʼmo ge apamamaeteta apakaeʼeʼmo magoke afinaʼmo lokaeta maiʼnone. 8#Ap 6:5; 8:40Egamo Poloʼa avagi huʼnona vayaʼmo apakaemo apataleta Sisaliya taonifiʼmo uta avaʼyi huteta Filipiʼa umenitata huno alagepa faigoko gemo aeno hakalo huno hapa nepaiya vekamo nopiʼmo uta haita agaeʼeʼmo lokaeta maiʼnone. Filipiʼa seveniʼa vayaʼmo Yulusalemu taonifiʼmo lekana paiʼa apateʼnaya vayapati vekamo maiʼniye. 9#Ap 2:17Loleʼe loleʼe aʼmafaʼne anagaʼamo vele oʼmaiʼnaya aʼmafaʼnemogi Gotitegati gemo aliniʼeʼa aeʼa hakalo huʼa hapa nepaiya aʼmafaʼnemo maiʼnae. 10#Ap 11:28Magoʼe afinaʼmo maiʼnonagenoʼaeʼmo mago vekamo agiʼamo Agamasiʼa Gotitegati gemo alinineno aeno hakalo huno hapa nepaiya vekamo Yutiya kotegatiʼmo lagaetegamo eno avaʼyi huʼniye. 11#Yo 21:18; Ap 20:23; 21:33Agaemo Polo mapaluʼmo alino agaiʼa aiyalateʼe ayatalateʼeʼmo ki maleʼnenoʼaeʼmo, Goti Aunemeʼamoʼmo ina ge hunoʼaeʼmo, ani kava huʼa Yulusalemu taonifiʼmo maiʼnaya Yu vayaʼmogimo mani mapaluʼmo afoʼamoʼmo nofi kiʼa ateteʼapaeʼmo alu nofi vayaʼmo avaleʼa apamigae, huno huʼniye, huno laha paiʼniye. 12#Mt 16:22Ani gemo afitetaeʼmo lagaeʼe magokepi lokaeʼa maiʼnaya vayaʼeʼmo Polofeʼmo hao ke hetaeʼmo, Yulusalemu taonifiʼmo uka ohaiyo, huta ha paiʼnone. 13#Ap 20:24Poloʼa getileʼmo aeno atagaina huno laha painoʼaeʼmo, na agufa kavaʼmo higetapaeʼmo nagaefeʼmo aviʼyaʼmo hutetapa naipamoʼmo kana hisiya yaʼmo alita neʼnamiye. Yulusalemu taonifiʼmo nofi kiʼa natesayafekeʼmo alo huʼna oʼmaiʼnofa Ala kava neʼmo Yesu agiʼalefeʼmo falisuvafeʼmo alo huʼna maiʼnove, huno laha paiʼniye. 14Lagaemo Polo aipa agesamo oʼaliʼnonaʼmofeʼmo hutaeʼmo, Ala kava neʼmoʼa hu maleʼniya kavaʼmo afaʼa afole aino, huta huʼnone.
15Magoʼe afinaʼmo maiʼnetaeʼmo kagemi yatimo alita alo huta aliteta Yulusalemu taonifiʼmo uta haisunafeʼmo uʼnone. 16Mago Sisaliya vayaʼmo geʼamo neʼafiya vayaʼmogimo lagaemo lavaleliʼuʼa Nesoni nopiʼmo maigae, huteʼa noʼafiʼmo lateʼnae. Nesoniʼa Saipalasi kotega vekamo akeyaʼvilagamo agesamo afino fatago huʼniya vekamo maiʼniye.
Poloʼa Yemisitegamo uʼniya gemae
17Lagaemo Yulusalemu taonifiʼmo uta avaʼyi huʼnonageʼapaeʼmo konagatimogimo apamogaga aiteʼa aliʼa falu fala huʼa lateʼnae. 18#Ap 15:2,13; Ga 1:19Egaʼamo Poloʼe lagaeʼeʼmo Yemisitegamo uʼnonageʼapaeʼmo Yemisiʼe vayatama vayaʼeʼmo maiʼnae. 19#Ap 15:12Poloʼa ge apamamaeteno Gotiʼa ha maeʼnigeno alagepa aliʼyaʼmo aliʼnigenoʼaeʼmo alu nofi vayaʼaitegamo afole aiʼniya kavafeʼmo ava gemo huno hapa paiʼniye. 20#Ap 15:1,5Ani gemo afiteʼapaeʼmo mukiʼamogi Goti agiʼaleʼmo aliʼa asaga huʼa ateʼnae. Apakaemo Polofeʼmo, konagatimogae, huʼa, asole Yu vayaʼmogimo apakesamo afiʼa fatago huteʼapaeʼmo keʼaepa gemo apayamukiki huʼa akame nehae. 21#Ap 16:3; Ga 2:3Mago vayaʼmogi kava gemo huʼapaeʼmo, Poloʼa alu kotega maiʼnaya Yu vayaʼaifeʼmo hunoʼaeʼmo, Mosese keʼaepa gemo ataleyo. Mafaʼnetapimo apakufamo lagautapa apatetetapa Yu vayaʼai kavaʼmo osiyo, huno hapa nepaiye, huʼa hapa paiʼnageʼa afiʼnae. 22Poloʼa ago eno avaʼyi huʼniye, huʼa hisageʼa afigayaʼmofeʼmo lagaemo haiya kava hugune. 23Kaha paisuna gemo akame huvo. Loleʼe loleʼe vayaʼmogimo Gotifeʼmo, ani kavaʼmo hugune, huʼa lokiya gemo ago hu maleʼnaya vayaʼmo manileʼmo maiʼnae. 24#Nap 6:1-20; Ap 18:18Kagaemo apakaeʼeʼmo magokepi lokaeka uka haika kagae kagufaʼe apakae apakufaʼeʼmo Goti aulagaleʼmo alita alagepa huta lapatesayafeʼmo mono nopiʼmo uka haiyo. Hapa maeka miya faika apato. Kavaʼapimo hano hisigeʼapaeʼmo apayokaʼmo lagauʼa apategae. Ani kavaʼmo hisanageʼa ageteʼapaeʼmo, Polofeʼmo aigofe ava gemo huʼnae. Poloʼa alagepa kavaʼmo huno Mosese keʼaepa gemo akame nehiye, huʼa hugae. 25#Ap 15:29Kagaemo ani kavaʼmo huganaʼmonanafa alu nofi vayaʼmogimo apakesamo afiʼa fatago huʼnaya vayaʼaitegamo lagaemo avoʼmo kaeta ataleʼnonageno uʼniye. Ani gemo lagaemo avoʼmo kaetetaeʼmo, Gemo hutaeʼmo neʼyaʼmo aigofe Gotiʼapimogi neʼapamiya neʼyaʼmo oʼneyo. Muki yaʼmo kolaʼamo oʼneyo. Lugoʼafiʼmo nofi aesageno falisiya afumoʼa agufafatiʼmo kolaʼamo lakiʼa oʼataleʼnisaya afumo oʼneyo. Kumai kavaʼmo osiyo, huta avoʼmo kaeta ataleʼnone, huʼa ha paiʼnae. 26#1 Ko 9:20Ani gemo huʼnayaʼmofeʼmo Poloʼa egaʼamo apavalelinuno mono kavaʼmo huno agaiʼa agufaʼe apakae apakufaʼeʼmo alino alagepa huno apateʼniye. Agaemo ani Yu vayaʼai mono kavaʼmo huteno Yu vayaʼai alopa mono nopiʼmo uno haino mono huʼa neʼapataya vayaʼaifeʼmo, seveniʼa afinaʼmo utesigeno alita alagepa huta nelatona kavaʼmo hano hugiye. Alo hutapa maiʼnetapa hano hisigetapaeʼmo ofalinimo amitapa lateyo, huno hapa paiʼniye.
Poloʼa kalavusi huʼa ateʼnaya gemae
27 #
2 Ti 1:5
Seveniʼa afinaʼmo hano hisiyafeʼmo huʼnigeʼapaeʼmo mago Esiya kotega Yu vayaʼmogi ageʼnayana Poloʼa alopa mono nopiʼmo uno haino maiʼnigeʼa ageʼnae. Apakaemo muki vayaʼmo aliʼa he tiʼa apateteʼa uʼa Poloʼmo atafauteʼa, 28#Iyi 44:7; Ap 6:13Isaleli vayaʼmogitapae, huʼa, Laha maeyo. Ani vekamoʼmo Yu vayaʼmogitaeʼmo hosu lava gemo huge Mosese keʼaepa geʼaeʼmo hosu gemo haneʼniye, huno huge mani alopa mono nofeʼmo hosu ge huge huno muki kotegamo alino apaya neʼmale. Agaemo hemenimo mago alu nofi vayaʼmo apavalelineno lagae laote mono notimo alino hosu huno ateʼniye, huʼa hapa paiʼnae. 29#Ap 20:4; 2 Ti 4:20Ani vayaʼmogimo Efasasi taonifi vekamo Tilofimasiʼe Poloʼeʼmo taonifiʼmo maiʼnaʼageʼana anaketeʼanaeʼmo alopa mono nopiʼmo avalelino eʼniye, huʼa apakesa afiʼnayaʼmofeʼmo ani gemo huʼnae. 30Muki Yulusalemu taonifiʼmo maiʼnaya vayaʼmogimo lusi kava huʼa apano aeteʼapaeʼmo nagu nagu huʼa uʼa aliʼa anupa huteʼa alopa mono nopiʼmo uʼa haiʼa Poloʼa atafauʼa heʼa avayu huliʼa kumatega uʼa lamiʼnae. Kumatega heʼa avayu huliʼa nelamigeʼapaeʼmo malage huʼa alopa mono nopi kitamo kiʼnae. 31Apano aeʼnaya vayaʼmogimo huʼapaeʼmo, faligiye, huʼa huteʼa neʼamagigenoʼaeʼmo mago vekamoʼmo Lomu ati vayaʼaiteʼmo yagaino neʼapateya vekalegamo uno ha painoʼaeʼmo, Muki Yulusalemu vayaʼmogi apano neʼae, huno ha paiʼnigenoʼaeʼmo 32malage huno ati vayaʼe ati vayaʼaiteʼmo yagaiʼa neʼapataya vayaʼeʼmo apavalelino nagu nagu huno uno lamiʼniye. Ani amagiʼnaya vayaʼmogimo agaeʼe ati vayaʼaʼeʼmo apaketeʼapaeʼmo Poloʼa magoʼe huʼa oʼamagiʼa afaʼa ateʼnae. 33#Ap 20:23Ati vayaʼaiteʼmo hogote vekamo yagaino neʼapateya vekamoʼmo Polo haopaleʼmo uno maiʼnenoʼaeʼmo, Lole seli nofitalatetiʼmo kitapa ateyo, huno hapa paiʼniye. Agaemo ani vayaʼaifeʼmo hunoʼaeʼmo, Ina laʼmo maiʼnenoʼaeʼmo na agufa kava huʼniye, huno apafi geʼniye. 34Mago vayaʼamogimo alopa gefatiʼmo mago alu gemo huge mago vayaʼamogimo alopa gefatiʼmo alu gemo huge huʼnae. Asole gemo huteʼa kalekale huʼnageno hogote vekamo yagaino neʼapateya vekamoʼmo afole aiʼniya kavaʼmo aepaʼamo alagepa huno oʼafiʼniyaʼmofeʼmo ati vayaʼaifeʼmo hunoʼaeʼmo, Avalelitutapa lagae yafa nopiʼmo ateyo, huno hapa paiʼniye. 35Avaleliʼa yafa noʼmo hakayaleʼmo uʼa avaʼyi nehageʼapaeʼmo ani vayaʼmogimo lusi kava huʼa apayamukiki huʼa eʼnayaʼmofeʼmo ati vayaʼmogi Poloʼmo avale aliʼa asagauliʼa uʼa haiʼnae. 36#Lu 23:18; Ap 22:22Apakame huʼa neʼeʼapaeʼmo lokiya gefatiʼmo huʼapaeʼmo, amagigeno falino, huʼa huʼnae.
Poloʼa agaiʼamo ge huno ha maeno hapa paiʼniya gemae
37Ati vayaʼmogi Poloʼa yafa nopiʼmo avaleliʼa uʼa haigefeʼmo nehagenoʼaeʼmo Poloʼa hogote vekamo yagaino neʼapateya vekaeʼmo hunoʼaeʼmo, Mago gemo afaʼa kaha paisufiye, huno afi geʼnigenoʼaeʼmo, Galiki gefatiʼmo nehapiye. 38#Ap 5:36-37Nagaemo kagaefeʼmo nagesa afiʼnaeʼmo, Isipi vekamo saufamo egatomo gamani vayaʼmo hapafaitalegaune, huno huteno fo tauseniʼa vayaʼmogimo vayaʼmo neʼapaiya naipemo aliʼnaya vayaʼmo apavalelino kaʼme kotega uʼniya vekae, huʼna nagesamo afiʼnove, huno ha paiʼnigenoʼaeʼmo 39Poloʼa hunoʼaeʼmo, Nagaemo Yu vekamo Tasasi taonimo Silisiya kotegamo hogote taonifi vekamo maiʼnove. Kahao ke hove. Vayaʼaifeʼmo geʼnimo hapa paigesuve, huno ha paiʼnigenoʼaeʼmo, 40hogote vekamo yagaino neʼapateya vekamoʼmo hunoʼaeʼmo, he, huno ha paiʼnigeno Poloʼa hakayaletiʼmo he tino ayaʼmo ataleʼnigeʼapaeʼmo magoʼe huʼa ge osuʼnagenoʼaeʼmo Yu gefatiʼmo hapa paiʼniye.
Ekhethiweyo ngoku:
Apa 21: kyg2013
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.