Apa 20
20
Poloʼa halate Masetoniya kotegaʼe Galesiya kotegaʼeʼmo umenitata huʼniya gemae
1Apano aeʼa hano hutageno Poloʼa Ala kava neʼmo geʼamo neʼafiya vayaʼaifeʼmo ge huʼnigeʼa eʼnageno apanu kino alino falu fala huno apatetenoʼaeʼmo, maitaleyo, huno hapa paiteno apataleno Masetoniya kotegamo uʼniye. 2Ani kotega umenitata huno apakesa afiʼa fatago huʼnaya vayaʼmo alu ge alu geletiʼmo alino lokiya vaino apatemale apatemale huno umenitata huʼniye. Umenitata hutenoʼaeʼmo Galesiya kotegamo uno avaʼyi huteno 3loleʼe magoʼe kaimo maiʼniye. Agaemo Siliya kotegamo sipifiʼmo ugefeʼmo alo huno maiʼnigeʼapaeʼmo Yu vayaʼmogimo amagigune, huʼa vegemo huʼnayaʼmofeʼmo Masetoniya kotegamo uʼna aeʼna agaseʼna aiʼna atagineʼna egauve, huno agesa afiʼniye. 4#Ap 19:29; 21:29; Ef 6:21Agaegi Meliya kotega vekamo Sopataʼagi lole Tesalonaika vekalaʼmo Alitakasiʼagi Sekatasiʼagi mago Nemi taonifi vekamo Gaiyasiʼagi Timotiʼagi lole Esiya vekalaʼmo Tikikasiʼagi Tilofimasiʼagi huʼa Esiya kotegamo uʼnae. 5Ani vayaʼmo hogoteʼa uʼa Toloʼasi taonifiʼmo lagava maiʼnae. Hopa afinaʼmo ko nosiya peleti mayamo neʼnaya afinaʼmo ago hano huʼnigeta 6lagaemo Filipai taonifatiʼmo sipifiʼmo uta haita faefuʼa felugaʼe haniʼilagaʼeʼmo lakaeta uta lagava maiʼnaya vayaʼeʼmo fotu huteta Toloʼasi taonifiʼmo seveniʼa afinaʼmo maiʼnone.
Poloʼa Toloʼasi taonifiʼmo utenoʼaeʼmo alagi ataleno uʼniya gemae
7 #
Ap 2:42,46 Geʼamo neʼafiya vayaʼmogimo hogote salefiʼmo Yesu kaveʼmo nesayafeʼmo aliʼa anupa huʼa maiʼnagenoʼaeʼmo Poloʼa egamo apataleno visiyafeʼmo alo huno maiʼnenoʼaeʼmo Goti geʼamo aeno hakalo huno hapa paime hapa paime neʼvigeno haniʼilaga folaguʼmo huʼniye. 8Aliʼa anupa huʼa maiʼnaya noʼmo anaga agotofule nopiʼmo asole lamu kaniʼmoʼa aeno ha leʼniye. 9Mago neya vekamo agiʼamo Yutikasiʼa yasi kate yofo yosaleʼmo maiʼnigeno Poloʼa ge hume hume neʼvigenoʼaeʼmo au maiʼmai huno maiyatega anaga agotofule nopatiʼmo mopafiʼmo asagauno aiʼnigeʼa mopafatiʼmo avaleʼa aliʼa asagauʼnayana ago alagi faliʼniye. 10#1 Kin 17:21Poloʼa uno lamino haifiʼyaleʼmo havaeʼneno anu kitenoʼaeʼmo, atete olapaino. Afaʼa maiʼniye, huno hapa paiʼniye. 11Hapa paiʼnigeʼa Yesu kaveʼmo magokepi lokaeʼa maiʼneʼa neteʼapaeʼmo afa neʼyaʼmo neteʼa Poloʼa asole gemo hapa paime hapa paime neʼvigeno ko netigenoʼaeʼmo apataleno uʼniye. 12Neya vekamo avaleli uʼa noʼafiʼmo ateʼa maiʼneʼapaeʼmo apaipamoʼmo hapageʼniye.
Toloʼasi taonifatiʼmo ataleno Mailitasi taonifiʼmo uʼniya gemae
13Poloʼa hunoʼaeʼmo, Nagaemo mopafiʼmo uguvanagi lapakaemo sipimo alitapa viyo. Asosi taonifiʼmo uta fotu hugune, huno laha paiʼnigeta sipifiʼmo uta hogoteʼnone. 14Asosi taonifiʼmo Poloʼeʼmo uta fotu huteta sipifiʼmo avalelita Mitilini taonifiʼmo uʼnone. 15Egamo Mitilini taonifatiʼmo ataleta Kaiyasi ani agoʼnanena koteʼmo eta avaʼyi huteta alita ataleta olagaʼamo Samosi ani agoʼnanenafiʼmo eta avaʼyi huteta alita ataleta ema olagaʼamo Mailitasi taonifiʼmo eta avaʼyi huʼnone. 16#2 Ti 1:15Poloʼa hunoʼaeʼmo, Efasasi taonimo aeta agaseta Yulusalemu taonifi Petikosi afinaʼmo uta avaʼyi hisunafeʼmo malage huta ugune, huno agesamo afiʼniye. Yu vayaʼai hopa afinaʼmo agiʼamo Petikosi afinane.
Poloʼa Efasasi siosi vayaʼaiteʼmo yagaiʼa neʼapataya vayatama vayaʼaifeʼmo Goti geʼamo hapa paiteno apataleno uʼniya gemae
17 #
Ap 18:21
Poloʼa Mailitasi taonifatiʼmo mago gemo huno atalegeno Efasasi taonifiʼmo uʼniye. Agaemo Efasasi siosi vayaʼaiteʼmo yagaiʼa neʼapataya vayatama vayaʼaifeʼmo, nagaetegamo eyo, huno ge huʼniye. 18#Ap 18:19; 19:10Eʼa maiʼnagenoʼaeʼmo Poloʼa hunoʼaeʼmo, Nagaemo lapakaeʼeʼmo maiʼneʼnaeʼmo na agufa kavaʼmo huʼna maiʼnofi ago nageʼnae. Lapakaemo Esiya kotegatiʼmo eʼna avaʼyi huʼnova afinatetiʼmo muki afinaʼmo lapakaeʼeʼmo maiʼnogetapaeʼmo nageʼnae. 19#Ap 20:3Yu vayaʼmogi nagaefeʼmo muki afinaʼae afinaʼaeʼmo vegemo huʼa maiʼnageʼnaeʼmo lusi kava huʼna kana alige aviʼyaʼmo huge huʼna maiʼneʼnaeʼmo muki afinaʼmo ina agufa vekamo maiʼnove, huʼna nagiʼnileʼmo aliʼna afepi ateteʼna Ala kava neʼmo aliʼyaʼamo aliʼnogetapa nageʼnae. 20Nagaemo muki geʼamoʼmo lapa maesiya agufa gemo lapa paisuvafeʼmo maiʼna halove huteʼna mago gemo fala okiʼnovaʼmonanafa alita anupa hutapa maiʼnayategaʼe notapifi notapifiʼeʼmo ago aliʼna lapaya maleʼnove. 21Nagaemo Yu nofi vayaʼe Galiki nofi vayaʼefeʼmo ago afiʼnova geletiʼmo huʼnaeʼmo, Gotitefeʼmo lapaipamo alita afe lege Ala kava netimo Yesu Kalaisifekeʼmo lapakesamo afita fatago huge hiyo, huʼna hapa paiʼnove. 22#Ap 19:21Hemenimo Goti Aunemeʼamoʼmo Yulusalemu taonifiʼmo visuva kavaʼmoʼa kalavusi huno nateʼniyanageno nagufaleʼmo na agufa kavaʼmo afole aisifi huʼna oʼageʼnovanageʼna afaʼa uguve. 23#Ap 9:16; 21:4,11Oʼageʼnovaʼmonanafa alu taonifiʼe alu taonifiʼeʼmo maiʼnaya vayaʼmogi Goti Aunemeʼaletiʼmo huʼapaeʼmo, kalavusi huʼa katesageka lusi kava huka hanageke yaʼmo aligane, huʼa naha paite naha paite huʼnayaʼmonanafa 24#Ap 21:13; 2 Ti 4:7falisuva kavaʼmo ina agufa kavaʼmogeʼna nagesa oʼafiʼnove. Gotiʼa fiku hapa maeno neʼapamiya gemo Ala kava neʼmo Yesufeʼmo alagepa faigoko geʼamo aeʼna hakalo huʼna hapa paisuva aliʼyaʼamo namiʼniye. Nagaemo ofaliʼna afaʼa maisuvafeʼmo ataleʼna maiʼna halove huʼna maiguve, huʼna nagesa noʼafufa namiʼniya aliʼyaʼnimo aliʼna hano huʼna atesuvafeʼmo nagu nagu huʼna uʼna atupaleʼmo avaʼyi huteʼna namogaga aiguve, huʼna nagesamo neʼafuve. 25Nagaemo lapakaetegamo umenitata huʼna Goti kegiʼyafiʼmo neʼmaiya vayaʼaiteʼmo yagaino neʼapateya kavafeʼmo aeʼna hakalo huʼna lapa paiʼnove. Hemenimo ago afiʼnovana halate magoʼe hutapa naugosamo oʼnagegae. 26-27#Ap 18:6Nagaemo muki gemo Gotiʼa akeyaʼvilaga apakaetefeʼmo huguve, huno huʼniya gemo lapa paisuvafeʼmo ataleʼna maiʼna halove osuʼna aeʼna hakalo huʼna lapa paiʼnovaʼmofeʼmo lapakaemo afela hesayaʼmoʼmo lapakaetetiʼmo nagaemo vaiʼmo oʼaligufa lapakaitapigeʼmo vaiʼmo aligae, huʼna huteʼnaeʼmo, ehetapiye, huʼna lapa nepauve. 28#1 Ti 4:16; 1 Pi 5:2-4Goti Aunemeʼamoʼmo sipisipi vayaʼaiteʼmo yagaitapa apatesaya vayatama vayane, huno lekana paino lapateʼniyanagi lapakaitapileʼmo alagepa hutapa yagaiʼnetapa mukiʼamo magoke anaga vayaʼmo sipisipi vayaʼaiteʼmo alagepa hutapa yagaitapa apateyo. Gotiʼa agaiʼa siosi vayaʼamo kolaʼaletiʼmo miya faino neʼapateya sipisipi vayaʼamo maiʼnayanagi alagepa huta yagaitapa apateyo. 29#Mt 7:15; Yo 10:12Ago afiʼnovana lapataleʼna visugeʼapaeʼmo vayaʼmo nehapaya afela kalamogimo lapakaetegamo eʼa magoke anaga sipisipi vayaʼamo lahapaesayafeʼmo maiʼa halove osuʼa muki afinaʼmo lapaegae. 30#1 Yo 2:19Mago vayaʼmo lapakaepatiʼmo he tiʼa apakame hisayafeʼmo aigofe gemo huteʼa apakesamo faiteʼa apayate aligae. 31#Mk 13:37; Ap 19:8,10; 1 Te 2:11Ani kavaʼmo hugayaʼmofeʼmo alagepa hutapa yagaiʼnetapa huʼnova geeʼmo lapakesamo afiyo. Loleʼe magoʼe kafugafiʼmo felugaʼe haniʼilagaʼeʼmo naulagafatiʼmo naunumo uno nelamigeʼnaeʼmo mukiʼamogitapaeʼmo, ehetapiye, huʼna lapa paime lapa paime eʼnove. 32#Ap 26:18Konagaʼnimogitapae, huʼna, hemenimo nagaemo Gotiʼa yagaino lapatesiyafeʼmo ayapiʼmo lapateʼnove. Gotiʼa fiku hapa maeno neʼapamiya geʼaletiʼmo afaʼa alino lokiya vaino lapateteno hetamatapimo lapamiteno apaote vayaʼaʼeʼmo magokepi alino lokaeno lapategaiye. 33#1 Sam 12:3; 1 Ko 9:11-12Nagaemo vayaʼai monimofi kagemi yaʼapimofi kukena yaʼapimofi huʼna alisuvafeʼmo nahaʼye osuʼnove. 34#Ap 18:3; 1 Te 2:9He, ago nageʼnageʼna nayatetiʼmo aliʼyaʼmo aliteʼna nagaeʼe lokaeʼa aliʼyaʼmo aliʼnaya vayaʼeʼmo neʼyatiʼe kukenatiʼeʼmo miya faiʼnogetapa ago ageʼnae. 35#Mt 10:8Ani kava nehuʼnaeʼmo apayamufa ohaneʼniya vayaʼmo hapa maegaune, huʼna aliʼna lapave liʼnove. Ala kava neʼmo Yesuʼa hunoʼaeʼmo, Fiku hapa maeʼa neʼapamiya vayaʼmogimo apamiʼnageʼa neʼaliya vayaʼmo aeʼa apakaseʼa aulena vayaʼmo maiʼnae, huno huʼniya geʼaeʼmo alagepa hutapa lapakesa afitapa ho hiyo, huno hapa paiʼniye. 36#Ap 21:5Ani gemo hapa paitenoʼaeʼmo apakaeʼeʼmo magokepi aleʼyamo faino maiʼnenoʼaeʼmo nunumuʼmo huʼniye. 37Apaulagafatiʼmo apaunumo uno nelamigeʼapaeʼmo Poloʼmo anu kiʼa haeʼa neʼnae. 38#Ap 20:25Poloʼa hunoʼaeʼmo, halate naugosamo oʼnagegae, huno hapa paiʼniyaʼmofeʼmo lusi kava huno apainaga faiʼnigeno apaipamoʼmo kana huʼnigeʼapaeʼmo agaeʼeʼmo sipimo nehaneya yategamo magokepi lokaeʼa uʼnae.
Ekhethiweyo ngoku:
Apa 20: kyg2013
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.