Apa 13
13
Atiyoki kotega siosi vayaʼmogi Manamasiʼe Soloʼeʼmo aliʼa anateʼnaʼageʼana uʼnaʼa gemae
1 #
Ap 11:27
Atiyoki kotega siosileʼmo mago Gotitegati gemo alini eʼa aeʼa hakalo huʼa hapa nepaiya vayaʼe aliʼa apaya neʼmalaya vayaʼeʼmo maiʼnae. Ani vayaʼai apakiʼapimo Manamasiʼagi anupa vekae huʼa agi neʼaya vekamo Simiyoniʼagi Sailini kotega vekamo Lusiʼagi Maneyeniʼagi Soloʼagi huʼa maiʼnae. Maneyeni afaluʼamoʼmo Helotiʼa vayaʼaleʼmo yagaino neʼapateya vekamae. 2#Ap 9:15Ani vayaʼmogimo Ala kava nefeʼmo mono huge neʼyaʼmo mosige huʼa maiʼnagenoʼaeʼmo Goti Aunemeʼamo aote Aunemeʼamoʼmo hapa painoʼaeʼmo, Nagaemo Manamasiʼe Soloʼeʼmo aliʼyaʼnimo alisaʼafeʼmo keya aeʼna ge huʼnovanagi alitana anaote anategeʼanao, huno hapa paiʼniye. 3#Ap 6:6Ani gemo afiteʼapaeʼmo neʼyaʼmo oʼneʼa mosiʼa maiʼneʼa apayaʼmo anakufaleʼmo maleʼneʼa nunumuʼmo huteʼa aliʼa anaoteʼmo anateʼnageʼana uʼnaʼae.
Saipalasi kotegamo uʼana maiʼnaʼa gemae
4 #
Ap 15:39
Goti Aunemeʼamoʼmo Manamasiʼe Soloʼeʼmo alino anateʼnigeʼana uʼana lamiʼana Selusiya taonifiʼmo uʼana avaʼyi huteʼana sipifiʼmo uʼana haiteʼana aniʼmo lakaeʼana Saipalasi ani agoʼnanenafiʼmo uʼnaʼae. 5#Ap 12:12; 13:13Salamisi taonifiʼmo uʼana avaʼyi huteʼanaeʼmo muki Yu vayaʼai mono noʼafiʼeʼmo uʼeʼa huʼana Goti geʼamo aeʼana hakalo huʼana hapa paiʼnaʼae. Yoni Makiʼa hana maeno aliʼyaʼmo alisiyafeʼmo magokepi lokaeʼa maiʼnae. 6Apakaemo magayaga faliga ani haigifiʼmo haneʼniya taonimo aliʼa ataleʼa mugagaya ani agoʼnanenamo ani haigifiʼmo haneʼniya taonifiʼmo Pefosi kotegamo uʼa maiʼnae. Mago vekamo agiʼamo Ma Yesuʼa ani taonifiʼmo maiʼnigeʼa ageʼnae. Agaemo hosu apaune vayaʼai himamuʼapiletiʼmo noʼagaya aeto agufa aune kavaʼmo nehiya vekamo Yu nofi vekamo maiʼnenoʼaeʼmo, Gotitegati gemo aliniʼneʼna aeʼna hakalo huʼna hapa nepauva vekamo maiʼnove, huno hapa paiʼniyaʼmonanafa aigofe vekamo maiʼniye. 7Ani vekamo ani agoʼnanenafiʼmo haneʼniya koteʼmo yagaino neʼapateya vekamo agiʼamo Sesiʼasi Polasiʼa ao vekamo maiʼniye. Sesiʼasi Polasiʼa alagepa huno agesa afiʼniya vekamae. Agaemo Goti geʼamo afisiyafeʼmo Manamasiʼe Soloʼefeʼmo ge huʼnigeʼana eʼnaʼae. 8#2 Ti 3:8Eʼana maiʼnaʼagenoʼaeʼmo hosu apaune vayaʼai himamuʼapiletiʼmo noʼagaya aeto agufa aune kavaʼmo nehiya vekamo agiʼamo Galiki gefatiʼmo Elimasiʼa yagaino neʼapateya vekamoʼmo agesa afino fatago osisiyafeʼmo alino afepi anateʼniye. 9Ani kavaʼmo huʼniyaʼmofeʼmo Goti Aunemeʼamoʼmo Soloʼa alu agiʼamo Polo aipafiʼmo uno haino havai teʼnigenoʼaeʼmo aulu haeno agetenoʼaeʼmo, 10Satani mafaʼneyo, huno, Kagaemo alagepa kavaʼmo kameʼamo maiʼnane. Aigofe kavakamoʼe hosu kavakamoʼeʼmo kagae kaipafiʼmo havai teʼniye. Ala kava neʼmo fatago kavaʼamo alika kayagi kayaga huka neʼatane. 11#Ap 9:8Ala kava neʼmoʼa hemenimo kamagisigeno kaulagalaʼmo ali hisigeka mago afinaʼmo ha le yaʼmo oʼageka afaʼa maigane, huno ha nepaigenoʼaeʼmo aulagalaʼmo ago ali huʼnigeno hiyakana huno hani yaʼmoʼa aulagalapiʼmo aino ati kaeʼniye. Agaemo uno mago vekaeʼmo ge hisigeno ayate alinino visiyafeʼmo kahauya hisiyafeʼmo uʼniye. 12Yagaino neʼapateya vekamoʼmo ani kavaʼmo agetenoʼaeʼmo agesamo afino fatago huʼniye. Agaemo Ala kava neʼmo geʼamo afitenoʼaeʼmo hau aiʼniye.
Manamasiʼe Soloʼeʼmo Atiyoki taonifiʼmo Pisitiya kotegamo uʼnaʼa gemae
13 #
Ap 13:5; 15:38 Poloʼe avagi huʼnaʼa vekalaʼeʼmo Pefosi kotegatiʼmo ataleʼa sipifiʼmo uʼa Pega taonifiʼmo Pamifiliya kotegamo uʼa avaʼyi huteʼa Yoni Makiʼa anataleno atagi neno Yulusalemu taonifiʼmo uʼniye. 14Pega taonifiʼmo atale uʼana Atiyoki kotega taonimo Pisitiya kotegamo uʼana avaʼyi huteʼana Sapati afinaʼmo Yu vayaʼai mono nopiʼmo uʼana haiʼnaʼae. 15#Ap 15:21Mago vayaʼmogimo Goti Mukufatiʼmo Mosese keʼaepa gemo lekana paiteʼa Gotitegati gemo alini eʼa aeʼa hakalo huʼa hapa nepaiya vayaʼmogimo avoʼmo kae maleʼnaya geʼeʼmo lekana paiʼnae. Lekana paiʼa hano huteʼapaeʼmo monoteʼmo neʼyagaiya vayaʼmogimo mago vekamo aliʼa ateʼnageno anakaetegamo enoʼaeʼmo, Konagalane, huno, Mago geletiʼmo alitana he titana latesaʼageta akame hisuna agufa gemo haneʼnisiyaʼmoʼmo laha paiʼao, huno hana paiʼnigeno 16#Ap 12:17Poloʼa he tino ayaʼmo ataleteno aepa faino hapa painoʼaeʼmo, Isaleli vayaʼnimogitapaʼe alu nofi vayaʼmo Gotifeʼmo mono nehaya vayaʼmogitapaʼeʼmo geʼnimo afiyo. 17#Hat 1:7; 6:6; 12:51Isaleli vayaʼai Gotiʼapimoʼmo laginago vayaʼmo lekana paino apateteno Isipi kotega nata neʼuʼa maiʼnaya afinaʼmo asole vayaʼmo alino afole aino apateʼniye. Gotiʼa himamu lokiyaʼaletiʼmo Isipi kotegatiʼmo apavalelino eʼniye. 18#Hat 16:35; Nap 14:34; Loa 1:31Apakaemo fotiʼa kafugamo kaʼme kotega maiʼneʼapaeʼmo hosu kavaʼmo huʼnayaʼmonanafa oʼapataleno hapa maeʼniye. 19#Loa 7:1; Yas 14:1Gotiʼa hapa maeʼnigeʼapaeʼmo seveniʼa nofi vayaʼmogi Kenani kotega vayaʼmo hapafaiʼa hapaetaleʼa apakae mopamo aliʼnae. 20#Yag 2:16; 1 Sam 3:20Agaemo agoti gemo neʼafiya vayaʼmo apavaleno apamiʼnigeʼapaeʼmo fo hataleti fifitiʼa kafugamo yagaiʼa apateme apateme neʼagenoʼaeʼmo Samiyoʼmo Gotitegati gemo alinineno aeno hakalo huno hapa nepaiya vekamo afole aiʼniye. 21#1 Sam 8:5,19; 10:20-24Henagaʼamo apakaemo Gotifeʼmo huʼapaeʼmo, mago kini vekamoʼmo yagaino latesiyafeʼmo avaleka lamiyo, huʼa ge huʼnageno Gotiʼa yagaino apatesiya kini vekamo agiʼamo Soloʼa Kisi mafaʼnemo Menisameni nofi vayapati vekamo avaleno apamiʼnigeno fotiʼa kafugamo yagaino apateʼniye. 22#1 Sam 13:14; 16:13; Sam 89:20Gotiʼa Soloʼmo ha faino ataleteno Neviniʼa yagaino apatesiyafeʼmo alino he tino ateʼniye. Gotiʼa Nevinifeʼmo ava gemo hunoʼaeʼmo, Nagaemo Neviniʼa Yesi mafaʼneʼaeʼmo nahau nayamopafiʼmo nahauʼniyanageno muki nahauʼniya kavaʼmo hugiye, huno huʼniye, huno huʼniye. 23#2 Sam 7:12-16; Aiy 11:1Gotiʼa hogoteno hunoʼaeʼmo, Nevini aginago vayapatiʼmo lapa maesiya vekamo aliʼna afole aiʼna ategauve, huno huʼniya gelefeʼmo akame huno Yesuʼa Nevini aginagomo Isaleli vayaʼai apakufamo alino katino apatesiya vekamo alino afole aino ateʼniye. 24#Mt 3:1-2Yesuʼa aliʼyaʼamo aepa faino oʼaliʼnigenoʼaeʼmo Yoniʼa muki Isaleli vayaʼaifeʼmo hunoʼaeʼmo, lapaipamo alita afe letetapa aniʼmo faleyo, huno aeno hakalo huno hapa paino maiʼniye. 25#Yo 1:20,27Yoniʼa aliʼyaʼamo alagi hogoʼamo hano hugefeʼmo huʼnigenoʼaeʼmo, Nagaefeʼmo ina laʼnae, hutapa lapakesa neʼafiye. Lapakaemo agava maiʼnaya vekamo oʼmaiʼnove. Afiyo, huno, nagae nakameʼmo huno egaiye. Nagaemo ina agufa vekamo maiʼnovanageʼna suʼmo nofiʼamo hakalu hesuva agufa kava huʼna oʼmaiʼnove, huno hapa paiʼniye. 26#Ap 13:16Konagaʼnimogitapae, huno, Emalehamu aginago vayaʼe alu nofi vayaʼmogitapa Gotifeʼmo mono nehaya vayaʼmogitapaʼeʼmo afiyo. Gotiʼa ani alagepa geʼamo vayaʼai apakufamo alino katino apatesiya gemo ago alino ateʼnigeno lapakaetegamo eʼniye. 27#Yo 16:3; Ap 3:17Yulusalemu taonifiʼmo maiʼnaya vayaʼe yagaiʼa neʼapataya vayaʼapimogiʼeʼmo Kalaisi vekamo maiʼniye, huʼa oʼageʼa Gotitegati gemo alini eʼa aeʼa hakalo huʼa hapa nepaiya vayaʼmogi avoʼmo kae maleʼnaya gemo muki sapati afinaʼmo lekana nepaiya gemo aepaʼamo oʼafiʼnayaʼmofeʼmo amagiyo, huʼa huʼnaya geletiʼmo hogoteʼa ago avoʼmo kae maleʼnaya gemo aliʼa afole aiʼa ateʼnae. 28#Mt 27:22-23Apakaemo amagisageno falisiya agufa hosu kavaʼamo oʼageʼnayaʼmonanafa Pailatifeʼmo huʼapaeʼmo, amagiyo, amagiyo, huʼa huʼnae. 29#Mt 27:59-60Goti Mukufiʼmo Yesufeʼmo ava gemo huʼapaeʼmo, Ani kavaʼmo afole aigiye, huʼa huʼnaya agufa kavaʼmo agaetegamo huteʼapaeʼmo nilimo aiʼa akaiʼa alini uʼa kiʼa ateʼnayaʼmonanafa 30#Ap 2:24Gotiʼa ago alino he tino ateʼniye. 31#Ap 1:3,8Agaemo Galeliya kotegati eʼa Yulusalemu taonifiʼmo lokaeʼa eʼnaya vayaʼai apaulagaleʼmo muki afinapatiʼmo alu afinaʼae alu afinaʼaeʼmo afole aite afole aite huʼnigeʼa ageʼnae. Ani vayaʼmogimo ageʼnaya kavafeʼmo ava gemo huʼa aeʼa hakalo huʼa hapa nepaiya vayaʼmo maiʼnae. 32-33#Sam 2:7; Ap 13:23Laʼagaemo alagepa faigoko gemo lapa paitaʼaeʼmo, Gotiʼa laginago vayaʼaifeʼmo polomasi gemo hapa paiʼniya gemo Yesuʼmo ago alino he tino ateʼniya kavatetiʼmo alino afole aino ateʼniye. Ani kavafeʼmo Goti mukufiʼmo napa tu Samu gemoʼa hunoʼaeʼmo,
Hemeni afinaʼmo aliʼna kateʼnogeka mafaʼneʼnimo maiʼnane, huno huʼniye,
huno Samu mukufiʼmo avoʼmo kae maleʼniye. 34#Aiy 55:3Gotiʼa Yesu agufamo okasalisiyafeʼmo alino he tino ateʼniya kavafeʼmo hunoʼaeʼmo,
Afaʼa lapa maeteʼna aote yaʼmo hanege hanege huno hanesiya yaʼmo lapamiguve. Nevinifeʼmo kamiguve, huʼna ha paiʼnova yaʼmo lapamiguve, huno huʼniye,
huno avoʼmo kae maleʼniye. 35#Sam 16:10; Ap 2:27Neviniʼa magoʼe gemo Goti Mukufiʼmo avoʼmo kae maleʼniya gemoʼa hunoʼaeʼmo,
Aliʼyakamo neʼaliya vekamo aote vekamo oʼataleka ha maesanageno agufamo okasaligiye,
huno huʼniye. 36#Ap 2:29Neviniʼa Goti geʼamo akame huteno ma mopafiʼmo agaeʼeʼmo lokaeʼa maiʼnaya vayaʼmo hapa maeteno au kaleʼnigeʼa aginago vayaʼeʼmo kiʼa ateʼnageno agufaʼamo ago kasaliʼniye. 37Nevini agufaʼamo ago kasaliʼniyaʼmonanafa Gotiʼa alino he tino ateʼniya vekamo agufaʼamo okasaliʼniye. 38-39#Lo 10:4; Ap 10:43Konagaʼnimogitapae, huno, Gotiʼa alino he tino ateʼniyaʼmofeʼmo ani vekamo agiʼaletiʼmo hosu kavatapimo afaʼa alino atalegaiye, huʼna aeʼna hakalo huʼna lapa nepauve. Gotiʼa Mosese keʼaepa gemo akame nehaya kavatetiʼmo hosu kavatapimo afaʼa alino ataleteno naulagaleʼmo fatago vayaʼmo maiʼnae, huno osugiye. Osugiyaʼmonanafa Gotiʼa ani vekaeʼmo apakesamo afiʼa fatago nehaya vayaʼaifekeʼmo, muki hosu kavatapimo aliʼna ataleʼnogetapa naulagaleʼmo fatago vayaʼmo maiʼnae, huno hapa nepaiye. 40#Ham 1:5Ani gemo lapa nepauvaʼmofeʼmo Gotitegati gemo alini eʼa aeʼa hakalo huʼa hapa nepaiya vayaʼmogi Goti Mukufiʼmo avoʼmo kae maleʼnaya agufa kavaʼmo lapakufaleʼmo afole oʼaisiyafeʼmo ehetapiye. 41Ani gemo avoʼmo kae maleʼniya gemoʼa hunoʼaeʼmo,
Geʼnieʼmo huta faipa hutapa neʼataya vayaʼmogitapamo afiyo, huno, Nagaemo lapaulagaleʼmo nehuva kavafeʼmo ava gemo huʼa aliʼa lapaya neʼmalagetapaeʼmo lapakesamo afita fatago nosayaʼmofeʼmo lapau aitetapa faliyo, huno huʼniye,
huno avoʼmo kae maleʼniye, huno hapa paiʼniye. 42Yu vayaʼmo mono nopatiʼmo ataleʼa uʼa nelamigeʼapaeʼmo alu nofi vayaʼmogimo huʼapaeʼmo, Mago anaga Sapatifiʼmo etana ani gemo magoʼe hutana laha paiʼao, huʼa hana paiʼnaʼae. 43#Ap 11:23; 14:22Aliʼa anupa huʼa maiʼnaya vayaʼmogimo afiʼnayana ani gemo aino atagu faeʼnigeʼa afiteʼa asole Yu vayaʼe alu nofi vayaʼmogi Yu mono gemo neʼafiya vayaʼmogiʼeʼmo Poloʼe Manamasiʼeʼmo anakame huʼnageʼanaeʼmo, Gotiʼa fikumo hapa maeno neʼapamiya kavafeʼmo ava gemo oʼataletapa atafauta alagi hutapa maime maime viyo, huʼana hapa paiʼnaʼageʼapaeʼmo, ani kavaʼmo hugune, huʼa apakesamo afiʼnae. 44Mago anaga sapatifiʼmo ani taonifiʼmo aise vayaʼatomo afaʼa maiʼnayaʼmonanafa asole vayaʼmogimo Ala kava neʼmo geʼamo afisayafeʼmo eʼnae. 45#Ap 14:2Asole vayaʼmo eʼa maiʼnageʼa Yu vayaʼmogi apaketeʼapaeʼmo apaipa kafamo hanaeʼnageʼa Polo geʼamo amagiʼa ataleteʼa Polofeʼmo huʼa faipa huʼa ateʼnayaʼmonanafa 46#Lu 7:30; Ap 3:26; 18:6Poloʼe Manamasiʼeʼmo koli osuʼana lokiya gefatiʼmo hapa paiʼanaeʼmo, laʼagaemo Goti geʼamo hogotetaʼa lapa paisuʼa kavaʼmo haneʼniyaʼmonanafa Goti gelefeʼmo lapakameʼyamo amitetapaeʼmo ani kavaʼmo hutapa lapakaitapimo agoti hutapa lapatetetapaeʼmo, maige maige huta maisuna yaʼmo alisuna agufa kava huta oʼmaiʼnone, hutapa nehayaʼmofeʼmo lapataletutaʼa alu nofi vayaʼaifeʼmo hapa paiguʼae. 47#Aiy 49:6Ala kava neʼmoʼa Mukuʼafiʼmo haneʼniya geʼaletiʼmo hunoʼaeʼmo, alu nofi vayaʼaitegamo utapa hapa paiyo, huno laha paiʼniye. Ani gemoʼa hunoʼaeʼmo,
Nagaemo ma mopafi muki haopalegamo maiʼnaya vayaʼai apakufamo alino katino apatesiyafeʼmo alu nofi vayaʼai ha le yaʼapigana huka maigane, huʼna aliʼna kateʼnove,
huno huʼniye. 48#Ap 11:18Alu nofi vayaʼmogimo ani gemo afiteʼa apamogaga aiteʼapaeʼmo, ani gemo Goti geʼamo alagepa gemo haneʼniye, huʼa huteʼa Ala kava neʼmo agiʼaleʼmo aliʼa asaga huʼa ateʼnae. Gotiʼa na magi vayaʼmo alagepa huʼa maige maige huʼa maisayafeʼmo lekana paino apateʼnisifigeʼa ani vayaʼmo apakesamo afiʼa fatago huʼnae. 49Ala kava neʼmo geʼamo ani haopalegamo aino atagu faenuneno huʼniyaʼmonanafa 50#Ap 17:4,12Yu vayaʼmo ala apaki vayaʼe mono nehaya aʼnemo apaki haneʼniya aʼnemogiʼeʼmo apakesa faiʼapaeʼmo, anamagigune, huʼa huteʼa aliʼa hana faitalaʼageʼana uʼnaʼae. 51#Mt 10:14; Ap 18:6Apa vekalaʼmoganimo apakaetegamo aune kavaʼmo huʼanaeʼmo mumusopamo anaiya agusalegatiʼmo aliʼana kalo paetaleʼana ataleʼana Aikoniyamu taonifiʼmo uʼnaʼae. 52Uʼnaʼageʼapaeʼmo Goti geʼamo neʼafiya vayaʼmogimo lusi kava huʼa apamogaga aiʼnagenoʼaeʼmo Goti Aunemeʼamoʼmo apaipafiʼmo haino havai teʼniye.
Currently Selected:
Apa 13: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.