Apa 12
12
Helotiʼmo Yemisiʼa kamitimo amagiteno Pitaʼa kalavusi huno ateʼniya gemae
1Ani afinaʼmo alaʼapimo yagaino neʼapateya kini vekamo Helotiʼa siosi vayaʼmo lusi kava hanageke yaʼmo apamiʼniye. 2Agaemo ati vekaeʼmo hunoʼaeʼmo, Uka Yoni aganaʼamo Yemisiʼmo lugoʼamo heka hatagauvo, huno ha paiʼnigeno uno naipeletiʼmo lugoʼamo heno hatagauʼnigeno faliʼniye. 3#Ap 4:3Yu vayaʼmogimo ani kavafeʼmo amuse huʼa ateʼnageno Helotiʼa afitenoʼaeʼmo Yu vayaʼai hopa afinaʼmo ko nosiya peleti mayamo neʼnaya afinaʼmo Pitaʼmo atafauno kalavusi huno ateʼniye. 4Kalavusi huno ateʼnigeʼapaeʼmo loleʼe loleʼe ati vayaʼmogi yagaiʼa ateʼa maigeʼa utesageʼapaeʼmo halate loleʼe loleʼe ati vayaʼmogi yagaiʼa ateteʼa hisayafeʼmo sigisitiniʼa ati vayaʼmo avaleno apamiʼnigeʼa yagaiʼa ateʼa maiʼnae. Helotiʼa agesa afinoʼaeʼmo, Pasova hopa afinaʼmo hano hutesigeʼnaeʼmo muki vayaʼai apaulagaleʼmo Pitaʼa avaleliʼneʼna ategauve, huno agesa afiʼniye. 5#Ye 5:16Pitaʼa kalavusifiʼmo maiʼnigeʼa ati vayaʼmogimo yagaiʼa ateʼa maiʼnageʼapaeʼmo muki siosi vayaʼmogimo Gotiʼa ha maesiyafeʼmo lusi kava huʼa nunumuʼmo huʼa ateʼnae.
Enisole vekamoʼmo Pitaʼmo kalavusi nopatiʼmo avalelino uʼniya gemae
6 #
Ap 5:23
Helotiʼa hunoʼaeʼmo, Egamo Pitaʼmo avaleliʼneʼna muki vayaʼai apaulagaleʼmo agoti huʼna ategauve, huno agesa afiʼniya haniʼilagamo Pitaʼa ati vekalaʼmo maitaʼageno folagapiʼmo havaeʼniye. Lole seli nofitalatetiʼmo ayatalateʼmo kiʼa ateʼnageʼana lole ati vekalaʼmoganimo kipateʼmo yagaiʼana ateʼana maiʼnaʼae. 7Ala kava neʼmo enisole vekaʼamo afole aiʼnigenoʼaeʼmo maiʼniya kalavusi nopiʼmo aeno ha leʼniye. Enisole vekamoʼmo Pita haopaleʼmo amagino hauneno atetenoʼaeʼmo, Malage huka he tiyo, huno ha paiteno aupatiʼmo alino he tino ateʼnigenoʼaeʼmo lole seli nofitalaʼmo ayapatiʼmo aino hatu maeno asagauno aiʼniye. 8Enisole vekamoʼmo hunoʼaeʼmo, Mapalukamo alika aeteka sukamo alika vaiyo, huno ha paiʼnigeno ani kavaʼmo huʼnigenoʼaeʼmo, Alapaʼage siotikamo alika vaiteka nakame huka emikeno, huno ha paiʼnigeno 9Pitaʼa akame huno kalavusi nopatiʼmo uno lamiʼniye. Pitaʼa hunoʼaeʼmo, Afaʼa neʼofi alagamuna neʼagofi, huno agesa afiʼniye. 10#Ap 5:19Anakaemo ati vayaʼmo yagaiʼa maiʼnaya vayaʼmo uʼana aeʼana apakaseʼana uʼana magoʼe ati vayaʼmo yagaiʼa maiʼnaya vayaʼmo aeʼana apakaseʼana taonifilagamo neʼvaya kate aeni kegiʼya hiʼyanaleʼmo uʼana avaʼyi nehaʼagenoʼaeʼmo aeni kitamo agaiʼamo aino yakiʼnigeʼana malaga uʼana lamiʼnaʼae. Anakaemo kateʼmo neʼuʼanaeʼmo enisole vekamo malage huno ago ataleno uʼniye.
11Ataleno uʼnigenoʼaeʼmo Pitaʼa agesamo aino halo aiʼnigenoʼaeʼmo, Alagi ago afole aiʼniye. Ala kava neʼmoʼa enisole vekaʼamo alino ateʼnigeno emineno Heloti ayapatiʼe Yu vayaʼmogimo ani kavaʼmo hugune, huʼa huʼnaya kavapatiʼeʼmo nagufamo ago alino katino nateʼniye, huno agesamo afiʼniye. 12#Ap 12:25; 15:37Ani kavafeʼmo agesa afitenoʼaeʼmo Yoni Maki itaʼamoʼmo Maliya notegamo uʼniye. Asole vayaʼmo ani nopiʼmo aliʼa anupa huʼa maiʼneʼapaeʼmo nunumuʼmo huʼa maiʼnae. 13Pitaʼa uno kegiʼya kitaleʼmo hakalu hakalu huno amagiʼnigenoʼaeʼmo aliʼyaʼmo neʼaliya aʼmafaʼnemo agiʼamo Lotaʼa afiteno emineʼniye. 14Emineno Pitaʼa agemo aiʼnigeno afitenoʼaeʼmo, Pitaʼa ago eno maiʼniye, huno huteno lusi kava huno amogaga aitenoʼaeʼmo kitamo oʼyakino aino atagi neno nagu nagu huno haino, Pitaʼa kegiʼya kipateʼmo ago eno maiʼniye, huno hapa paiʼniye. 15#Ap 26:24; Mt 18:10Hapa paiʼnigeʼapaeʼmo, Negi gemo nehane, huʼa huʼnagenoʼaeʼmo, Haʼao, alagi lama gemo nehuve, huno magoʼe magoʼe huno huʼnigeʼapaeʼmo Pita enisoleʼamo eno maiʼnegaiye, huʼa huʼnae.
16Pitaʼa magoʼe huno hakalu hakalu huno kitaleʼmo amagino maiʼnigeʼa afiteʼa uʼa lamiʼa kitamo yakiʼa Pitaʼmo ageteʼapaeʼmo lusi kava huʼa hapau aiʼnae. 17#Ap 13:16; 19:33; 21:40Pitaʼa ayatetiʼmo hunoʼaeʼmo, ge osiyo, huno hapa paitenoʼaeʼmo Ala kava neʼmoʼa kalavusi nopatiʼmo avalelino eʼniya kavafeʼmo ava gemo huno hapa paitenoʼaeʼmo, Utapa ani gemo Yemisiʼe muki konagatimogiʼefeʼmo hapa paiyo, huno hapa paiteno apataleno alu kotegamo uʼniye.
18 #
Ap 5:22-24
Kotilamiyapiʼmo ati vayaʼmogimo agayana Pitaʼa oʼmaiʼnigeʼa ageteʼapaeʼmo uʼeʼa huʼa lusi kava huʼa kahauya huʼnae. 19Helotiʼa hunoʼaeʼmo, kahauya hutapa ageyo, huno hapa paiʼnigeʼapaeʼmo uʼeʼa huʼa lusi kava huʼa kahauya huʼnayaʼmonanafa oʼageʼnae. Agaemo Pitateʼmo yagaiʼa maiʼnaya ati vayaʼaifeʼmo ge huno apafi genoʼaeʼmo, apamagigeʼa faliyo, huno hapa paiʼniye. Agaemo apatalenuno Yutiya kotegatiʼmo uno lamino Sisaliya taonifiʼmo maiʼniye.
Helotiʼa ago faliʼniya gemae
20 #
1 Kin 5:11; Iyi 27:17 Helotiʼa mago afinaʼmo Taiya taonifi vayaʼe Saitoni taonifi vayaʼeʼmo aipamo leno apateʼniye. Apakaemo Helotiʼa yagaino neʼapateya kotegatiʼmo uʼa neʼyaʼmo miya failiʼa eʼnayaʼmofeʼmo aipamoʼmo falu hisiyafeʼmo magoke apaipa apakesa aliteʼa Helotitegamo eʼnae. Eʼapaeʼmo hogoteʼa Milasitasiʼa Heloti noʼaleʼmo neʼyagaiya vekaeʼmo ha paiʼnageno apao vekamo hamaleʼniye.
21Mago lekana pai maleʼniya afinaʼmo Helotiʼa yagaino neʼapateya kukenaʼamo alino vaiteno yagaino neʼapateya siyateʼmo uno haino maiʼnenoʼaeʼmo asole gemo hapa paiʼniye. 22Hapa paiʼnigeʼa afiteʼapaeʼmo, vaehae, huʼa, vayalafaʼmoʼa laha nopaifa mago gotitimokeʼmo ani gemo laha nepaiye, huʼa alopa gefatiʼmo huʼnae. 23#Nen 5:20Nehagenoʼaeʼmo Ala kava neʼmo enisole vekaʼamo emineno Helotiʼmo amagiʼnigeno hagifamoʼmo agufafiʼmo neʼnigeno faliʼniye. Agaemo Goti agiʼaleʼmo alino asaga huno oʼateʼniyaʼmofeʼmo amagiʼnigeno faliʼniye. 24#Aiy 55:11; Ap 6:7; 19:20Inagi Goti geʼamo magoʼe magoʼe huno aino atagu faenuneno huʼnigeno magoʼe huno afole aiʼniye.
25 #
Ap 11:29-30; 12:12; 15:37 Manamasiʼe Soloʼeʼmo aliʼyaʼanimo aliʼana hano huteʼanaeʼmo Yulusalemu taonifatiʼmo ataleʼana Yoni Makiʼa avaleliʼana atagi neʼana eʼnaʼae.
Currently Selected:
Apa 12: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.