APUNG ANYIM 2
2
1Nungli maou, goh, naiuso nungko noitsün apem shankhem. 2Chinyatnyi nouko nai Goa nou Apaüh shantaiu nou apem chhisiya khem, naiuso Apaüh shankü shitsün chhisiya ainou chinyatnyi nouko shio-alou. 3Nungtiphe Goa nou chinyatnyi nou ouk kiu, naiuso nungh mothikü losiokiu. Tiautenai nungh ajekhaiu ko Goa nou apa chhi shankü shitsün chikü ainou chhikhemkü noiküla.
4Tilai Apaou Goa nou goum naiuso aün shan, 5goh nai paisam aosam titso tsünoiküla, naiuso ti chihle khiamle mosungh, tiautenai apaüh ah ou nou mohongkü noiküla, naiuso goh nou tü chhiao sau tsünoiküla. 6Naiuso goh kheiai nou ah paithsao nou sungh küta goh apemai khiamle nou haolutkiu.
7Naiuso Apaou Goa nou goum ainou pujah nou khaiunia shan, naiuso aa isa nou apa ngankhan nai sathiokiu, naiuso khaiunia nou aa onthso noitsün tsak iula.
Eden Aimong
8Naiuso Apaou Goa nou Eden nai aimong tsak shan, küta meshenüh shantsün khaiunia nungko taiukiu. 9Naiuso goh nai Apaou Goa nou aluao meitsün naiuso eheao thaiutha paisam amei apem samsan-i, aa paidong lüko aimong awem nai naiuso amei si tsümei chikü ngetsün pai apaüh nungko samsan-i.
10Eden nai aimong nou tü khiam thsaluttao haiu tsak chetsan, naiuso Eden tsai ai nungh khiam haiu püle ao janpek. 11Ayating haiu nian nou Pishon, nung haiu nou chaiou lakkeng noitsün Habila goh lemjeikü noin. 12(Naiuso nung goh nai chaiou lakkeng naiuso angan nyamtsün naiuso lung apiamai nouso epji.) 13Haiu nime nou nian Gihon, nungh haiu nou Kus goh lemkü noin. 14Haiu süme nou Tigris haiu noin, nungh haiu nou Asiria goh ajepek dongai tsanglükhunji; naiuso haiu püle nian nou Eufrates haiu noin.
15Naiuso Apaou Goa nou khaiunia nou nialokü shiküta, Eden Aimong nai chhi chhiau naiuso jimao taiukiu. 16Apaou Goa nou khaiunia nou tü ngiokhem kiukü ngioji, “aimong nai noitsün pai pungkü da eiusantsün pai-eiu ni heau shio-e; 17lüko amei si tsümei ngeloau kiutsün pai ainou eiu ni lahe; tiautenai ti ajekhaiu ko ni nung he-e, nungnyilu ni atsüoting ean-e.”
18Naiuso Apaou Goa nou ngiom, “Khaiunia thaiutha pemsa kih au tsümei, Ngo apa thaiutha hau ahachutsün waokü tsak shan-e.” 19Nungtiphe Apaou Goa nou goh ainou pujah loukü goumchi thainian chikü naiuso ajeikeitsün waio nouso chikü shanküta apaüh tilüsong nian niankiu-e ta khaiunia dongai nialoukü shin, naiuso khaiunia nou aa thainian pungkü ti nian jonkiu nungli nianao iula. 20Nungtiphe khaiunia nou waio nouso chikü naiuso thainian nouso chikü nian niankiu, lüko nungso tsaktso apa hachuau waokü tsünoiküla.
21Nungaih Apaou Goa nou khaiunia nou niongao thatü chiikü ngao-i kü apa saila-i, küta apaüh khaiunia ainou ou tsak losankü nungh athang nou lophangkü wan. 22Apaou Goa nou khaiunia ainou losantsün ou nou Menyiu tsak shan, küta apa dongai nialoukü shin.
23Nungaih khaiunia nou ngiom,
“Aphiteng nai nungko ngüli nou tsak noin-
Jü ou ainou losantsün ou,
naiuso jünyih ainou losantsün nyih.
Apa nian ‘Menyiu’ ta noi-e,
tiautenai apato melo ainou losankü shan.”
24Nung shioko melo nou meshen po naiuso meshen nyiu wankü, meshen tsammongnyiu ko jeiaikü noiji, naiuso ngüso nyih tsak hau iulakü noiji.
25Nungaih melo si menyiu ngüne tsosa noiküla, lüko ngüso amiam tsünoi.
Currently Selected:
APUNG ANYIM 2: KHIABSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.