If you have would like a copy of this version please contact info@davaraudiobibles.org

Text: Gowli New Testament, CC-BY-SA-4.0, The Love Fellowship. -- Audio: Gowli New Testament Audio Bible, CC-BY-SA-4.0, Davar Partners International, The Love Fellowship, 2023

Gowli New Testament

Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.

येने लिंजेन पिलातुस नी सिपाईकु के हुकूम जीके कि यीशु के साईय्याकेच एठा डीचके बल्खा मुंडाए। सिपाईकुनी जानोम गा मुकूट गुंडीटे दियागा कापरा लिंजेन डोके एठा डीचके येंगान रेंग्गो गा कपळे उरिके, एठा दिया मेरान हेन डो दियागा मजाक उळातिंजटे मंडी लज्जे, “हे यहूदी कुरकू गा राजा, नमस्कार!” एठा डीचके थापळा मुंडाके। मेटे पिलातुस नी डाबोलटे बल्लान ओटजे डो कुरकू टे मंडीके, “डोगे, इंज डीचके आपेगा मेरान डाबोलटे बाल्लन सेगेच्बा मेना, ताकी आपे चिनाया कि इंज दिजेन चोचकाभी गलत बान डूगु।”

मेटे यीशु जानोम गा मुकूट एठा येंगान रेंग्गो गा कपळे उरिके बल्लान सालेनेच एठा पिलातुस नी दिकुटे मंडीके, “इनी कोरो के डोगेच।” मेटे मुख्यायाजककु एठा मंदिर गा राखवाली मिंकुनी डीचके डोकेनेच मेटे चिल्लातिंजटे मंडीके, “डीचके क्रूस लिंजेन पेळेजेच क्रूस लिंजेन!” पिलातुस नी दिकुटे मंडीके, “आपेका डीचके साटे क्रूस लिंजेन पेळेजेच। चोयाकी इंज दियेन अदा गलत बान डूगु।” यहूदी अगुवाकु नी डीचके जवाब जीके, “आलेगा मूसा गा नियम होय एठा डी नियम गा रोंगो देटेन गुजू गा लायको होय। चोयाकी डीचनी हेज खुदके ‘परमेश्वर गा कोण’ घाल्के।” जब पिलातुस नी इनी बातो आजुम्के मेटे भेबाव का हिगराएन। डाबोलटे किल्ला तलान ओले एठा यीशु टे कोम्बाराके, “आम तुंगा गा होय?” पेनो यीशु नी डीचके चोचकाभी जवाब बान जिडुका। पिलातुस नी दियाटे मंडीके, “इंजाटे चोया बान मंडी? चोच आम बान हाडाई कि आमके आरा गा हाक इंजेन होय एठा आमके क्रूस लिंजेन पेपेळेच गा भी हाक इंजेन होय।” यीशु नी जवाब जीके, “अगर आमके परमेश्वर गा कोनेटे हाक बान जिऊवा, मेटे अमा इंजा लिंजेन चोचका हाक बान थंदळवा। इनिघल्जी जो कोरोनी इंज्के अमा टीन उठाकेमी होय, दियागा पापो येठाभी होय।” इनी वोजीटे पिलातुस नी डीचके आरा चाहताके, पेनो यहूदी अगुवाकु नी चिल्ला-चिल्लातिंजटे मंडीके, “अगर आम डीचके आरागेच्बा मेटे आम रोमी सम्राट गा सोपती बाऊ। जो जेकाभी राजा गा दवा दडावा होय, देटेन रोमी सम्राट कैसर गा दुश्मान होय।” इनी बातो आजुमटे पिलातुस यीशु के बल्लान सालेनेच एठा देटेन न्याय गा सिंघासन सुबांके, जो कि घोटा गा म्या चबूतरा जीमू गा म्या जगान डा। (डीके इब्रानी भाषा गेन गब्बता मंडीवा होय।) येटेन फसह गा तिवार हफ्ता गा तैयारी दिन डा एठा डया गा टेमो डा: मेटे डीचनी यहूदी अगुवाकु टे मंडीके, “डोगे, इनिज्का होय आपेगा राजा!” पेनो दिकु चिल्लातिंजटे मंडी लज्जे, “डीचके घोजेज, डीचके घोजेज! डीचके क्रूस लिंजेन पेळेजेच।” पिलातुस नी दिकुटे मंडीके, “चोच इंज आपेगा राजा के क्रूस लिंजेन पेळेजेच?” मुख्यायाजक कुनी जवाब जीके, “रोमी सम्राट कैसर के आराटे आलेगा तुनिका राजा बाऊ होय।” मेटे पिलातुस नी यीशु के क्रूस लिंजेन पेपेळेज घल्जी दिकु हवाले जीकेनेच, दिकु डीचके देटे टे सैय्येनेच।

सिपाईकुनी यीशु लिंजेन ध्यान डोके। दिकुनी डीचके हेजा क्रूस ठुल्के एठा डीचके यरूशलेम शहर टे बल्लान, डोबळे गा जगा जीमू गा जगान साईय्येनेच डीके इब्रानी भाषा गेन गुलगुता मंडीवा होय। देटेन दिकुनी डीचके एठा दियागा सेंग्गोन एठा बरी कुरकींजके क्रूस लिंजेन पेळेच्केकू, म्याखोम के दियागा जेवना कोनेन एठा दूसराके दियागा डाखोरया कोनेन एठा तलान यीशु के। पिलातुस नी म्या आनोवा पत्र ओलटे क्रूस लिंजेन येंडाके एठा डेन इनी ओलके डा, “यीशु नासरी यहूदी कुरकू गा राजा।” इनी आनोवा पत्र घोनेच यहूदी कुरकू नी पळातिंज्के चोयाकी डी जगा देटेन यीशु क्रूस लिंजेन पेळेच्केनेच डा यरूशलेम शहर गा मेरान डा एठा पत्र इब्रानी भाषा गेन, लतीनी एठा यूनानी भाषानौर गेन ओलके मेना डा। मेटे यहूदी कुरकू गा मुख्यायाजक कुनी पिलातुस टे मंडीके, “‘यहूदी कुरकू गा राजा’ बाकी ओल पेनो इनी ओले कि ‘डीचनी मंडीके, इंज यहूदी कुरकू गा राजा मेना।’” पिलातुस नी जवाब जीके, “इंज्नी जो ओलके, देटेन ओल्के, जैसा होय बिल्कुल डेनेगोका थंदळवा।” जब सिपाई यीशु के क्रूस लिंजेन पेळेच्केनेच, मेटे दियागा कपळेनौर साटे उफुन भागो आरुके एठा उफुन भी सिपाईकुनी म्या-म्या हिसा साईय्ये, पेनो कुर्ता सुके बाऊ डा बनकी माठा टे ईटा टाएन गुटूके कपळे गा म्याका तुकळा टे आरुके डा। इनिघल्जी सिपाईकुनी इनिज दियाटे मंडीके, “आले इनिके बान चिराडूका, पेनो एने लिंजेन चिठ्ठी येंडाके कि देटेन जेगा डाऊवा।” येटेन इनिघल्जी डाएन कि पवित्र ग्रंथ गेन जो ओलके होय डी पुरायु होना, “दिकुनी इंजा कपळे इकुका खातिंजे एठा इंजा कपळे घल्जी चिठ्ठी येंडाके।”

इनिघल्जी सिपाईकुनी एनेगोका डाके, पेनो यीशु गा क्रूस गा मेरान दियागा आंटे एठा दियागा आंटे गा बोकाजाई टे, क्लोपास गा जापाएटे मरियम एठा मरियम मगदेला गाँव टेंगेनके डा। यीशु नी हेजा आंटे एठा डी चेलाकूके दिकुटे प्यार दोडो डा मेरान टेंगेन धोटे हेजा आंटे टे मंडीके, “हे आंटे, डोगे येटेन अमा कोण होय।” मेटे डी चेला टे मंडीके, “डोगे, येटेन अमा आंटे होय।” एठा डीका टेमो टे डी चेलानी, यीशु गा आंटे के हेजा सगाकु मेरान साईय्येनेच।


एनेगा बादोन यीशु नी इनी चिनाटे कि, नका सेबाईका पुराएन होय, पवित्र ग्रंथ ओल्के मिनी बातो पुराऊ गा घल्जी मंडीके, “इंजेन डा तटाम मेना।” देटेन म्या कटीच डा टे भेट्टीमिनी बर्तन डोके डा, इनिघल्जी जेकानी कटीच डा टे ओलाके फोसेट के जोफे गा लाकळी लिंजेन धोटे दियागा चभू मेरान जेगाके। जब यीशु नी देटेन कटीच डा जल्वे मेटे मंडीके, “पूरा डाएन” एठा कपार इटान टे गोएन।

नका येटेन तैयारी दिन डा एठा दूसरा दिन परमेश्वर गा चोखरा दिन एठा फसह गा तिवार बाएरा भी डा। येटेन यहूदी अगुवाकु गा घल्जी कास दिन डा, एठा दिकु बान चाहता डा कि इनी दिन गा दौरान गोएन कोम्बोर क्रूस लिंजेन थंदळजू। इनिघल्जी पिलातुस टे मंडीके कि डी कोरोकु गा टांगळा टुक्काकी ताकी दिकु जल्दीका घोयु एठा गोएन कोम्बोरके इटान साली होना। इनिघल्जी सिपाईकुनी यीशु गा सेंग्गोन क्रूस लिंजेन पेळेचकेनेच म्या कोरो गा पेला टांगळा टुक्काके दूसरा गा भी टुक्काके। पेनो जब यीशु गा मेरान हेन डो डोके कि देटेन गोएन होय, मेटे दियागा टांगळा बान टुक्काडुका। पेनो सिपाईकु तलाटे म्याखोम नी बरसी टे दियागा सिपळी पोपाके एठा देटे तुरुटो पचना एठा डा ओटके। जो कोरोनी इनी सेबाई डोके डीचनी गवाही जीके होय। एठा दियागा गवाही सच्चो होय। एठा देटेन मालूम होय कि देटेन सच्चो मंडीवा होय। ताकी आपे भी यीशु लिंजेन विश्वास डाएका लक्कू। इनी बातो इनिघल्जी डाएन ताकी पवित्र ग्रंथ गेन जो ओल्के होय डी सच्चो डायु, “दियागा तुनिका हाडे टुक्काए बाने।” डाबोलटे म्या एठा पवित्र ग्रंथ जगान लिंजेन इनी ओल्के होय, “डीके दिकुनी पोपाके होय, डे लिंजेन नजर डोएबा।”

इनी बातो गा बादोन अरिमतियाह गाँव टे यूसुफ नी जो यीशु गा चेलाकू डा (पेनो यहूदी अगुवाकु गा हिगरा टे इनी बातो के उखु डोए डा), पिलातुस टे विनंती डावे, कि इंज यीशु गा गोएन कोम्बोर साईय्यावा एठा पिलातुस नी दियागा विनंती आजुम्के एठा देटेन हेंडो दियागा गोएन कोम्बोर साईय्ये। नीकुदेमुस भी जो पेला यीशु गा मेरान रातो ओले डा त्यातीस किलो ग्राम अंदजो सुकींज चीजो एठा सिंबिल सुकींज मिनी चीजो साले। यहूदी कुरकू गगाळातिंज गा रितो रोंगो, दिकुनी नेरोम कपळे गा लम्बा चद्दारेन सुकींज चीजो सेंग्गोन यीशु गा कोम्बोर उगुरके। डी जगा गा मेरान म्या बगीचा डा, देटेन यीशु के क्रूस लिंजेन पेळेच्केनेच डा। डी बगिचान म्या उनाई कब्र डा, डीके पेला चोलाकाभी कामय गेन बान येंडाडुका। इनिघल्जी यीशु गा गोएन कोम्बोर डीका कब्र गा गुफा गेन डोकेनेच चोयाकी देटेन मेरान डा एठा देटेन यहूदी कुरकू के घल्जी परमेश्वर गा चोखरा दिन गा तैयारी गा दिन डा।

Phulaphula i यूहन्ना 19