Text: © The Bible Society of Zambia, 2003 Audio: ℗ 2012 Hosanna

Lunda - 2003 Edition (Drama - NT)

The Holy Bible in Lunda Ndembu © United Bible Societies, 2003. 

Wena mafuku owu, ifuku dimu wadiŋi nakutaŋisha antu muTembeli nikushimuna nsaŋu yayiwahi, kudi yena hikukwinza akulumpi jawatupristu niansoneki niakulumpi.
Hiyakumwila nawu, Tuleji, eyi welaŋa yumiyi nawantanyi? Indi nakwinki wantiwu hinyi?
Hakuyakula nindi, Ninami nawa nukuyihula kadizu kamu, munleji.
Chijimikilu chaYowanu chakwiwulu, tahindi chakudi antu?
Wena hiyakudihujola nawu, Neyi tukwila netu chakwiwulu, yena wukwila nindi, Mwalekelelidi kumukuhwelela?
Neyi tukwila netu chakudi antu, akutwasola malola kudi antu ejima; muloŋa wena etejaŋa nawu Yowanu wadiŋi kaprofwetu.
Dichi hiyakwakula nawu, Kwiji; hituneluki kuchafuminuku.
Yesu hakuyila nindi, Hela ami hinukuyileja wanta wunelaŋa nachu yumiyuku.


Hakutachika kuyitila antu chishimu chakwila nindi, Muntu wumu wadimini itempa danyivinyu; hakudishila akwakudima, hakuya kwituŋa dacheŋi haleheli chacheni.
Hachilaaka chanyikabu hakutemeshela akwakudima nduŋu wumu, kulonda amwinki nyikabu yamwitempa. Ilaŋa akwakudima hiyakumweta, hiyakumufuntisha makasakasa.
Hakutemeshaku ninduŋu mukwawu; niyena nawa hiyakumweta, hiyakumukoŋa chatama, amufuntisha nimakasakasa.
Hakutemeshaku wamuchisatu; niyena nawa hiyakumukatisha, amunata nikumpata.
Mwiniitempa danyivinyu nindi, Nukwila ŋahi? Nukutemesha mwanami nakeŋa nankashi, wamba kela akamwakama yena.
Ilaŋa akwakudima chanamumonuwu, hiyakutiyaŋana nawu, Iwu diyi nswana; tumujahenu, kulonda wuswana wikali wetwetu.
Hiyakumwidisha mwitempodu, hiyakumujaha. Dichi mwiniitempa wakayila ŋahi?
Wakenza nakujilumuna awa akwakudima, odu itempa wakenka antu acheŋi. Chanachitiyuwu, hiyakwila nawu, Chinjila!
Ilaŋa yena hakuyitala nindi, Idi izu danasonekuwu dakwila nawu,
Ilola dalekeli antuŋi,
Dodinekali dasweja kwoloka nankashi dakwiwombu,
daya mudihi?
Antu ejima akuholokela helolodu, akukotoka kotu kotu; hakwila muntu akaholokelawu kudi ilolodu, akamufukumuna neyi lunkuŋu.
Yena mpinji oyu ansoneki niakulumpi jawatupristu akeŋeli nawu amukwati, ilaŋa hiyakutiya woma wawantu; muloŋa wena elukili nawu, Chishimu ichi natili etu.


Hiyakumweba, hiyakutemeshaku akwakumwendesha adimbeni kumwekana neyi antu aloŋa, kulonda amukwati namazu akuhoshayi, amoni jakumulubula kuŋovu nikuwanta wanyuuli.
Hiyakumwihula nawu, Eyi Nkuluŋaŋa, tuneluki netu eyi wahoshaŋa nikutaŋisha mwaloŋa, hiwatiyaŋa muntu womaku, wataŋishaŋa njila yaNzambi muwalala.
Chaloŋa etu kusonka kudi Kesari, tahindi nehi?
Ilaŋa yena wamweni makasu awu,
hakuyila nindi, Nlejenu idali. Dikweti chifwikija chanyi, ninsona yanyi? Nawu, YaKesari.
Kuchinka yena nindi, Dichi mwinkenu Kesari yuma yaKesari; mwinkenu Nzambi yuma yaNzambi.
Chanahoshiyi mazu owu kumesu awantu, hiyamweni hakumushintakeshelaku; akuminini dakuhayama mwakwiliyi, amwena ninzo-o.


Kudi yena hikukwinza aSadusi amakwawu, elaŋa nawu afu hiyasaŋukaŋaku.
Hiyakumwihula nawu, Eyi Nkuluŋaŋa, Mosi watusonekeleli nindi, neyi muntu wukweti manakwindi ofwa chakadi kumushiya iŋodindi namwana, manakwindi akatambuli mumbanda, akamuvweli manakwindi mwana.
Dichi kwadiŋi amayala atanu nayedi ivumu dawu dimu. Watachi wasumbwili mumbanda, wafwili chakadi anyana;
niwamuchiyedi, niwamuchisatu chochu.
Wejima wawu atanu nayedi chochu nawa, afwili, kushiya anyana nehi.
Nkumininaku mumbanda niyena ofwa nikufwa.
Dichi hamba kasaŋukawu afu, mumbanda wakela iŋodawumwodihi? Muloŋa ejima wawu atanu nayedi amusumbwili.
Yesu hakuyila nindi, Antu anyakiyi asumbulaŋa, asumbukaŋa;
ilaŋa antu anafuukuluwu nawu anateli kushika kunyakoyu, nikukusaŋuka mudi afu, hiyakasumbula hela kusumbukaku.
Muloŋa hela kufwa, hiyakatwesha kufwa cheŋuku; anesekani nawaŋelu, hiyanyana kaNzambi anasaŋuki dehi.
Hakwila nsaŋu yakusaŋuka, hela Mosi wayilejeli, oku kwasonekawu nsaŋu yachiputa, hateneniyi MWANTA nindi,
Ami Yami Nzambi yaAbarahama,
Nzambi yaIsaka,
Nzambi yaYakoba.
Yena hiNzambi yawafuku, hiNzambi yawamomi; muloŋa ejima amuhandilaŋa yena.
Ansoneki amakwawu hiyakwakula nawu, Eyi Nkuluŋaŋa, wunahoshi chachiwahi.
Muloŋa atiyili woma wakumwihula cheŋi chuma chikwawu.


Hakuyila nindi, Chelaŋawu nawu Kristu himwana kaDavidi, chaya mudihi?
Muloŋa Davidi yomweni namuteni mumukanda waMasamu nindi,
MWANTA wamwilili Mwanta wami nindi,
Shakamaku kuchikasa chami chachidiilu,
Nichinamba kayila ayilumbu jeyi hiyadi itanda dakunyendu yeyi.
Davidi wamutenaŋa nindi Mwanta; wukwikala mwanindi ŋahi?
Hakuyila atumbanji twindi, iku antu ejima adi nakumutiya,
nindi, Babelenu ansoneki, atiyaŋa kuwaha kuvwalavwala mahina akuluka, akeŋa kuyimwosha kuwulandilu, akeŋa matanda alema mumashikola, akeŋa kushakama halema kuyawija;
hiyakulombela lombelele-e kulombela kwakudimbana nachu, iku adi nakudya maheta awambanda amfwila. Diwu amba kamona kubabesha kwasweja.

Phulaphula i Luka 20