Juan 1

Dios këkar kë patsaman Jesucristo shamunqan

1Imapis manaraq kaptinmi Diospa Palabranqa këkarqanna.

Teyta Dioswanmi pëqa këkarqan.

Pëqa kikin Diosmi.

2Qallananpitam Teyta Dioswan këkarqan.

3Pëwanmi llapan imëkatapis Teyta Dios kamarqan.

Kë patsachö këkaqkunaqa llapanpis pë kamashqanmi këkan.#Gén. 1.1-3; Sal. 33.6; Prov. 8.22-31; Col. 1.15-17; Heb. 1.2; 1Juan 1.1; Apoc. 19.13.

4Pëchömi wiñë kawëqa këkan.

Tsë kawëqa nunakunapaq aktsim.

5Tsë aktsiqa tutapëchöpis alläpam aktsin.

Y tutapëpis tsë aktsitaqa manam upita puëdintsu.

6Juk nunam karqan Juan shutiyuq.#Mat. 3.1; Mar. 1.4; Luc. 3.1-2. Pëtam Teyta Dios kacharqan 7willakuptin llapan nunakunapis tsë aktsiman creyiyänanpaq. 8Juanqa manam tsë aktsitsu karqan, sinöqa tsë aktsipaq willakuqllam.

9Rasunpa kaq aktsiqa llapan nunakunatam aktsin.

Pëqa kë patsamanmi shamurqan.

10Kë patsachö këkaptinpis y kë patsata kamashqa këkaptinpis nunakuna manam pëta reqiyarqantsu.

11Kuyashqan nunakunaman shamuptinpis manam chaskiyarqantsu.

12Pëman markäkur chaskikuqkunataqa wamrankuna kayänanpaqmi Teyta Dios chaskin.

13Manam mamäninpita yurikuyashqanpitatsu

ni nunapa tsurin kayashqanpitatsu Teyta Diospa wamran këkäyan,

sinöqa Teyta Diospita yurishqa karmi.

14Diospa Palabran kë patsaman shamurmi nunanö yurirqan.

Noqakunawanmi kë patsachö purirqan.

Teyta Diospa jukllëlla Tsurin kaptinmi puëdiq këninta rikäyarqä.

Ankupäkuq y rasun kaqllata parlaqmi karqan.

15Pëpaqmi Juan kënö willakurqan: <<Tsë nunapaqmi noqa kënö nirqä: Qepäta shamuq kaqqa noqapita mas puëdiqmi. Pëqa manaraq yuriptïmi këkarqanna>>.

16Pëqa alläpa kuyakuq karmi llapantsikta imëpis ankupämantsik.

17Leyninkunatam Moiséstawan willakatsirqan.

Ankupäkïninta y rasunpa kaq willakïnintaqa Jesucristuwanmi käyitsimarquntsik.

18Manam pipis Teyta Diosta imëpis rikashqatsu.

Japallan Tsurinmi, Dios kar y Teyta Dioswan juknölla kar, Teyta Diospaq musyatsimarquntsik.#Mat. 11.27; Luc. 10.22; 1Juan 1.2.

Bautizakuq Juan willakunqan

Mateo 3.1-12; Marcos 1.2-8; Lucas 3.15-17

19Juan pï kanqantapis tapuyämunanpaqmi sacerdötikunatawan levitakunata Jerusalén autoridäkuna kachayarqan. Tapuyaptinnam Juan kënö nirqan: 20<<Rasun kaqtam niyaq: Noqa manam Cristutsu kä>>.

21Tsëmi yapë tapuyarqan: <<Tsëpinqa ¿pitaq kanki? ¿Profëta Elíasku?>>#Mal. 4.5.

Juannam nirqan: <<Manam Elíastsu kä>>.

<<Tsëpinqa ¿shamunanpaq kaq profëtaku kanki?>>#Deut. 18.15, 18.

Niptinmi nirqan: <<Manam tsë profëtapistsu kä>>.

22Tsëmi kënö niyarqan: <<Tsëpinqa ¿pitaq kanki? Kachamaqnïkunata willayänäpaq pï kashqëkitapis willayämë>>.

23Juannam nirqan: <<Profëta Isaías qellqashqanchömi nikan: <Juk nunam chusyaq jirkachö qaparipa kënö willakun: <<Teyta Dios shamunanpaq wiksu nänita derechayë>> nishpa>. Tsë willakuq nuna noqam kä>>.#Isa. 40.3.

24Kachayashqan fariseukunam 25Juanta niyarqan: <<Cristupis ni Elíaspis ni shamunanpaq kaq profëtapis mana këkarqa ¿imanirtaq nunakunata bautizanki?>>

26Juannam nirqan: <<Noqaqa yakullawanmi bautizä. Tsënö kaptinpis noqantsikchönam mana reqiyashqëki nunapis këkan. 27Pëqa [noqapita mas unëpita karpis] qepätaran shamunqa. Noqaqa llanqi watunta paskanällapaqpis manam sirwïtsu>>.

28Juanta tsënö tapuyarqan Jordán mayu tsimpan Betaniachö nunakunata bautizëkaptinmi.

Jesús shamïkaqta Bautizakuq Juan rikanqan

29Tsëpita waräninnam Jesús shamïkaqta rikärir Juan kënö nirqan: <<¡Këmi Teyta Diospa Achkasnin! Pëmi nunakunata jutsankunapita perdonanqa. 30Tsë nunapaqmi noqa kënö nirqä: <Qepäta shamuq kaqqa noqapita mas puëdiqmi. Pëqa manaraq yuriptïmi këkarqanna>. 31Noqapis manam musyarqätsu Teyta Dios pëta kachamushqanta. Imanö kaptinpis Israel nunakuna pëta reqiyänanpaqmi nunakunata bautizëkä>>.

32Juan jina kënömi nirqan: <<Noqam rikarqä imëka urpënö Espíritu Santu ciëlupita pëman urämuqta. 33Manaraq tsëta rikar manam musyarqätsu Teyta Dios kachamushqan kashqanta. Imanö kaptinpis yakuwan bautizanäpaq kachamarmi Teyta Dios kënö nimarqan: <Mëqan nunapa jananmanpis Espíritu Santu urpënö urämuqta rikarmi musyanki Espíritu Santuwanna pëqa bautizananpaq kashqanta>. 34Tsë nimashqannöllam tsë nunapa jananman Espíritu Santu urpënö urëkamuqta rikarqü. Tsëmi willayaq Teyta Diospa Tsurin pë kashqanta>>.

Punta kaq discïpulunkunata Jesús akranqan

35Tsëpita waränin junaqnam ishkë discïpulunkunawan Juan këkarqan. 36Tsënam Jesús pasëkaqta rikar kënö nirqan: <<¡Rikäyë! ¡Teyta Dios kachamushqan Achkasmi pasëkan!>>

37Tsënö niptinnam Juanpa ishkë discïpulunkuna Jesúspa qepanta ewkuyarqan. 38Tumëkurnam Jesús rikarqan qepanta pëkuna ëwëkäyaqta. Tsënam nirqan: <<¿Pitataq ashikäyanki?>>

Pëkunanam niyarqan: <<Rabí, ¿mëchötaq posadakïkanki?>>

(Rabíqa yachatsikuq ninanmi.)

39Jesúsnam nirqan: <<Aku, reqitsiyashqëki>>.

Tsënö nir pusharmi mëchö posadakushqantapis reqitsirqan. Tardina kaptinnam tsë ishkë discïpulukuna tsëllachö Jesúswan quedakuyarqan.

40Tsë ishkë discïpulunkunapitam juknin karqan Simón Pedrupa wawqin Andrés. Pëmi Juan nishqanta wiyëkur Jesúspa qepanta ewkurqan. 41Tsëpitanam Andrés ëwarqan wawqin Simón kaqman. Chärirnam kënö willarqan: <<¡Mesíaswanmi tinkuyarqü!>>

(Mesíasqa Teyta Dios kachamushqan Cristo ninanmi.)

42Tsëpitanam Jesús kaqman pusharqan. Chäriptinnam Simónta rikëkur Jesús kënö nirqan: <<Qamqa Jonáspa tsurin Simónmi kanki. Kananpitaqa Cefasnam shutiki kanqa>>.

(Cefasqa Pedro ninanmi.#1.42 Cefaspis Pedrupis rumi ninanllam.)

Felipita y Natanaelta Jesús qayanqan

43Tsëpita waränin junaq Galileapa ëwëkashqanchönam Felipiwan tinkurir Jesús kënö nirqan: <<Aku ewkushun>>.

44Felipiqa karqan Betsaida markapitam. Andréswan Pedrupis tsë markallapitam kayarqan. 45Tsëmi Natanaelman ëwëkur Felipe kënö nirqan: <<¡Moisés y wakin profëtakunapis Cristo shamunanpaq qellqayashqannöllam shamushqa! ¡Pëwanmi tinkuyarqü! ¡Pëqa Josépa tsurin Jesúsmi y Nazaret markapitam!>>

46Natanaelnam kënö nirqan: <<Nazaretpita ¿pillaqa alli nuna kanmantsuraq?>>

Felipinam nirqan: <<Aku rikänëkipaq ëwashun>>.

47Natanael yëkïkaqta rikëkurnam Jesús nirqan: <<Kë nunaqa rasunpa Israel nunam. Pëqa ulikïta manam yachantsu>>.

48Tsënö nïkuptinnam Natanael kënö tapurqan: <<¿Imanöpataq reqimarqunki?>>

Jesúsnam nirqan: <<Felipe manaraq qayashuptikim hïgus monti chakinchö arwäkïkaqta rikarquq>>.#1.48 Tsënö niptinmi Natanael käyirqan Jesús pëta rikashqan milagru kashqanta.

49Tsënö nïkuptinmi Natanael kënö nirqan: <<¡Teyta Diospa Tsurinmi qamqa kanki, rabí!#Mat. 16.16. ¡Israel nunakunapa reyninmi këkanki!>>

50Jesúsnam nirqan: <<¿<Hïgus monti chakinchö arwäkïkaqtam rikarquq> niptiqraqku tsënö nimanki? Tsëpita mas espantakïpaq kaqkunataran rikanki>>.

51Tsëpitanam Jesús kënö nirqan: <<Rasunpam rasunpam niyaq: [Kananpitam] ciëlu kichakaptin Teyta Diospa angelninkuna Nunapa Tsurinman urëkämuqta y kutikaqta rikäyanki>>.#Gén. 28.12.

Поточний вибір:

Juan 1: qwhB

Позначайте

Поділитись

Копіювати