Tito 1
1
Shvwé kà
1Polo ngà nø, Gvray vshuq nv̀ng Yesu Kristu dvzv́r ǿngàe. Gvrayí rvhiqshaqrì àngmaq kv́mnøt shvdøng shvngv́ngalv́m dvpvt gø, Gvray dang nøtlø̀mlv́m rvt dìnglòng sv̀ng cíngrál sháò høq shvngøtlv́m dvpvt gø dvzv́rshaq ǿngàe. 2Dìnglù:ngí nø dvciqlvpat gø̀nshaq lúnlv́m vlǿmrà sv̀ng shø:lòe. Yalòng dvciqlvpat gø̀nshaq nø kadvgvp gø màyà Pè Gvrayí muqlàng rvgaq mvmá:nò vzv̀ng kèní dv́n yà:ngà.#1:2 2Tm. 1:9 lv̀ngpvng pǿnkà sv̀ng èyà:ngò. 3Akvt À:ngí gvn yà:ngà rvtø̀ vhøm ráì kvt wa, nøngmaqí dvsha:ngì lòng taqkèní, Dvbùshv̀ngkà yalòng dvtan daqà. Nøngmaq Chv́ng Kàngpè Gvray dvkv́mkà taqkèní, mòngkà dvshvnglv́m nø ngà sv̀ng tèleng yv̀ngà. #Eps. 1:9-10; 1Tm. 1:1,11 4Kv́mnøt tiqdø mvngú we taq ngàcè jǿngkvp èí pè Tito nà sv̀ng shvrikàru vrongvtnòe. Vpè Gvray nv̀ng nøngmaq Chv́ng Kàngpè Kristu Yesu yv́ngkèní jejú nv̀ng mòngzø̀l lòng leq lú:nò.#1Tm. 1:2
Kreti yv́ng Titoí wá rà we bv̀nlì
5Nà sv̀ng ngàí dvkv́m dø, shini wá rà rì sv̀ng nàí dvcøp mvdónga taqsórí, wamà vrv̀m taq shvngø̀mré roqshúrì zv́nglv́m, ngàí nà sv̀ng Kreti tìshvlòng taq v́l dvzv́r rángà. 6Shvngø̀mré roqshú nø, shvràlv́m màvl we, àng chø̀mmè tiqgǿ wa vdá we vsv̀ng í ràe. Àngcèrì gø vdè nøt cv́nshì nø̀ kà mvta rvt, vsà:ngí shø̀nkéò we í mvdaq. Kv́m vsv̀ng í ràe. #1Tm. 3:2-4 7Shvngø̀mré roqshú nø, Gvray chø̀m taq øpgømshú wáshì we í rvtnø̀, shvràlv́m màvl we vsv̀ng í ràe. Vrá, vdè nøt wa cv́nshì we, nøt tø̀ we, nø̀ wú we, mvhø̀ mvhut wa we, màdvrá we gv̀msùng map we vsv̀ng í mvdaq. #2Tm. 2:24; 1Pt. 5:2 8Lè nø, zaqlè vto we, shvla lòng sv̀ng shóngshì we, vdu vbóng dø dvdvm rǿ:nò we, døngman we, laqyà shànshér we, vdè sv̀ng øp dv́ngshì we vsv̀ng í ràe. 9Vrá, àng kaq shvngøtshaq dø, kv́mv́m daq we mòngkà sv̀ng døngdøng wa mvnvtshì vsv̀ng í ràe. Wekvt dìng we shvngøtkàí dvshat dvzi:tnò nø̀ vtúshúrì kaq àngmaqí vléòrì sv̀ng dvtú lún lú:ngòe. #1Tm. 1:10; 2Tm. 4:3; Tit. 2:1
10Kadø íe wani vtù we vsv̀ng mvme vle. Àngmaq nø mvtú màdá kà hú we nv̀ng yùm weí dv̀nzø̀nge. Mvdø̀ng nø rvmøl vtóng cà:nò we Yuda kv́m vsv̀ngrì taq luqe. 11Àngmaq nònggøp sv̀ng shø ràe. Pàwá wani àngmaq nø màdvrá we gv̀msùng sv̀ng map nø̀, shvngøt màdurì shvngø:tnò weí rvp køpkøp shvtì:nòe. 12Kreti vsvngrì kèní kàdvtutshú tiqpèí ni “Kreti vsv̀ng shvngbe nø vyá wèzè, sv̀ng vzø̀m, vzing bø̀dè, v́mlv́m mvlárì íe,” wa vl yà:ngà. 13Shvksekà yalòng nø dìng we íe. Wedø í rvt àngmaq nø dìng we shvngøtkà sv̀ng kv́mlv́m dvpvt herher wa ènga:nò. #2Tm. 4:2 14Vrá, Yuda vsà:ngí má:nò we mvshǿlrì sv̀ng gø, dìnglòng kèní rv́lshìá:mì rìò dvkv́mkà sv̀ng gø nøt mvwáshìlv́m rvt àngmaq sv̀ng dèká:mò. 15Mv́ngshèrrì dvpvt nø, pv̀n vrv̀m mv́ngshèr we íe. Íwe, mvmv́ng mvshèrrì nv̀ng mvkv́mrì dvpvt nø, mv́ngshèr we tiqpv̀n gø màvl. Pàwá wani àngmaq shánøt nv̀ng rvwvnnøt nø mvmv́ng mvshèr. #Mat. 15:11 16Àngmaqí, “Gvray kaq sháìe,” wa nìgø, wàò we bv̀nlìrì taqkèní Àng sv̀ng màchà:ngò. Àngmaq nø nǿmtuqtuq í nø̀ kà mvta vsv̀ng íe. Bv̀nlì shvlá tiqpv̀n gø wá mvsháò. #2Tm. 3:5
Поточний вибір:
Tito 1: GSM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Rvcv́ngcè Kàru Gomidi Kristu Shvngø̀mré. All Rights Reserved.