Yohan 21
21
Yesu dvtánshì we
1Wemèpvng Yesu nø Tiberia Tìnúngmè shvnvng coqcv́nrì sv̀ng vrá tiqkvt dvtánshìe. Dvtánshì lòng nø yadø íe. 2Simon Piter, Didimu tǿò pè Toma, Galili móng Kana rvwápè Nataniel, Zebedi àngcè pèní nv̀ng Àng coqcv́n dvgá vnípè gø tiqdø vle. #Yoh. 1:45 3Simon Piterí àngmaq sv̀ng, “Ngà nø nga gøpkengvme,” a:lòe. Àngmaqí, “Nøngmaq lvngà gø nà nv̀ng dìlv́m íe,” a:lòe. Àngmaq búng nø kùngshí vdòng zv́ngshìá:mì. Íwe, weyaq taq àngmaqí tiqgo gø gøp mvlú:nò. 4Gá daqì dvgvp, Yesu nø vdàm pa yv́ng ripme. Íwe coqcv́nrìí Yesu í we màmvshá:lò. #Luk. 24:16; Yoh. 20:14 5Wekvt Yesuí, “Rv̀mnvngrìé, nga tvp mèlúnnø̀ng má?” wa rø:tnòe. Àngmaqí, “Mvlú:ni,” wa vtá:nòe. 6À:ngí, “Kùngshí vbàngpa sv̀ng shǿmgún dègupnø̀ng, wekvt nga èlún daqnø̀nge,” a:lòe. Àngmaqí shǿmgún dvgup bǿà nìnø, shv́l mvdá:ngò høq nga gvzà lún bǿà. #Luk. 5:4-7 7Wekvt Yesu shóngshì we coqcv́npèí Piter sv̀ng, “Kàngpè íe!” a:lòe. Simon Piterí, Kàngpè í we tá bǿà kvt, belaq chutshì dá:rì rvt, mvdv̀m bèlaqí dvchvtshì nø̀, tìnúngmè sv̀ng dvgupshìá:mì. #Yoh. 13:23 8Coqcv́n wápèla nø, nga dv̀n í we shǿmgún shà:lò sórí, kùngshícè taq rvpshìa:tnì. Kadø íe wani àngmaq nø tìrìn kèní gvzà màsar, tvné vní yá rvdùng dv́ngte wa íe. 9Vdàm sv̀ng àngmaq tuq lú:ngì kvt, weyv́ngø zidòng nv̀ng shø̀l svmi taq nga dvgángshaq vl da we àngmaqí yà:ngòe. 10Yesuí àngmaq sv̀ng, “Akvt ègøp bǿshà ngarì taqkèní tiqgola èlùvtnø̀ng,” a:lòe. 11Wekvt Simon Piter nø kùngshí sv̀ng zv́ngshiá:mì nø, ngakàng 153 go dv̀n vdeq we shǿmgún lòng vdàm kaq shv̀la:tnà. Nga wedv́ngte luq nìgø, shǿmgún dùng nø mvdíng. 12Yesuí, “Sháng v́mpà èv́m ránø̀ng,” a:lòe. Coqcv́nrìí Àng nø Kàngpè í we sháò rvtnø̀, tiqgǿí gø, “Nà nø kagǿ èíe?” wa røt mvka:mò. 13Yesu dìa:tnì nø zidòng lùò dá:ngí àngmaq sv̀ng zíòe. Wedø tiqdvchá, nga gø zíòe. #Yoh. 6:11 14Yalòng nø Yesu shìyv́ng kèní zun lú:ngì mèpvng, coqcv́nrì sv̀ng Àng dvtanshì we vshø̀m kvt wakvt íe. #Yoh. 20:19,26
Yesu nv̀ng Piter
15Àngmaq sháng v́mpà v́m dá:ngí, Yesuí Simon Piter sv̀ng, “Yohan àngcè Simoná, àngmaqí èshòng mvdv̀m, nàí Ngà sv̀ng té èshòngà má?” wa rø:tnòe. Piterí, “Íe, Kàngpèá, ngàí shòng we Nàí èshángàe,” wa vtá:nòe. Yesuí, “Ngà vyv̀ngcèrì shèv́mangà,” a:lòe. #Yoh. 1:42 16Vrá tiqkvt Yesuí, “Yohan àngcè Simoná, Ngà sv̀ng èshòngà má?” wa rø:tnòe. Piterí, “Íe, Kàngpèá, ngàí shòng we Nàí èshángàe,” wa vtá:nòe. Yesuí, “Ngà vyv̀ngrì èrokngangà,” a:lòe. #1Pt. 5:2-4 17Vshø̀m kvt wakvt Yesuí, “Yohan àngcè Simoná, Ngà sv̀ng èshòngà má?” wa rø:tnòe. Yesuí vshø̀m kvt wakvt, “Ngà sv̀ng nàí èshòngà má?” wa rø:tnò rvtnø̀ Piter nøt dvshà lú:ngì. Piterí, “Kàngpèá, í dv́ngte shvngbe Nàí èsháòe. Ngàí Nà sv̀ng shòng we Nàí èshángàe,” wa vtá:nòe. Yesuí, “Ngà vyv̀ngrì shèv́mangà. #Yoh. 13:38; 16:30 18Ngàí nà sv̀ng kàdøng vlvtnø̀ng, nà gùchàngré èí dvgvp nø, nà nø nà wa juqnv́m ènv́mshì nø̀, nà dí mèyǿ yv́ng dí èlú:nòe. Íwe nà cèrǿng ra dvgvp, nà wur nàgàng nø̀, vsà:ngí nà sv̀ng juqnv́m ènv́mavt nø, nà dí mèmèyǿ yv́ngsv̀ng èshøl bøe,” a:lòe. 19(Yesuí yadø shø̀:nò we nø, Gvray ngø̀rdvgùng shvring lúnlv́m dvpvt Piter kadø shì long we dvta:nò kà íe). Yakà shø̀:nò dá:ngí Yesuí àng sv̀ng, “Ngà mèpvng ècv̀n ra,” a:lòe. #Yoh. 13:36
20Piter lv́mposhì nìnø, Yesu shóngshì we coqcv́npèí cv̀na:tnà we sv̀ng yvng bǿà. (Coqcv́n wepè nø cáyaq dørø̀m vmpà vm dvga:pmí Yesu pøtpúm taq námshì sórí, “Kàngpèá, Nà sv̀ng nvmv́mlv́m pè nø kagǿ íe má?” wa rø:tnò pè íe). #Yoh. 13:23 21Piterí àng sv̀ng yv̀ng bǿà nìnø, Yesu kaq, “Kàngpèá, yapè nà, kadø í long má?” wa rø:tnòe. 22Yesuí, “Ngà døng dak ni høq àng sv̀ng la v́l dvzv́r mvyǿngnø̀ng gø, nà pà shø̀nlv́m màvl. Nà mv̀ng nø Ngà mèpvng ècv̀n ra,” a:lòe. 23Wervt coqcv́n wepè nø mvshì long, wa kà vnvm vchvngrì dvhø̀ø shv̀ngá:mì. Íwe Yesuí àng nø mvshì long màa:lò. “Ngà døng dak ni høq àng sv̀ng la v́l dvzv́r mvyǿngnø̀ng gø, nà pà shø̀nlv́m màvl,” mv̀ng a:lò we íe.
24Yadv́ng pv̀n shvkse wáshì nø̀ vruò pè nø, coqcv́n yapè ni íe. Àng shvksekà nø dìng we sv̀ng nøngmaqí sháìe. #Yoh. 15:27; 19:35 25Yesuí wà yà:ngà we dvgá gø mvme pv̀n vle. Íwe werì mvti mvni la nàruò nìnø, rvgaq yalòng taq gø nàruò we kàru bokrì damvcv́ngni, wvng dvdvmòe. #Yoh. 20:30
Поточний вибір:
Yohan 21: GSM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Rvcv́ngcè Kàru Gomidi Kristu Shvngø̀mré. All Rights Reserved.
