Tito 2
2
Dìng we shvngøt kà
1Íwe, nàí mv̀ng nø dìng we shvngøtkà nv̀ng vbóng dø shèngø:tnò. #2Tm. 1:13 2Shaqrépèla sv̀ng nø nøttǿng nøtdøng wáshì nø̀, vpǿlv́m dø wáshì we nv̀ng vdè sv̀ng øp dv́ngshìlv́m shèngø:tnò. Àngmaq nø kv́mnøt, shóngnøt nv̀ng tønzánnøt taq ngv̀ngdøng we vsv̀ng í ràe. #1Tm. 5:1 3Wedø tiqdvchá, shaqrémèla sv̀ng gø, Gvray kaq vpǿ svre sórí cúnshìlv́m, vsv̀ng mvyitkélv́m, nø̀ wú vsv̀ng mvwáshìlv́m nv̀ng shvla we tvrà shvngøtshú lè wáshìlv́m shèngø:tnò. #1Tm. 3:11 4-5Wekvt àngmaqí tiqdvtv̀ng vbat cv̀m we dø̀ngkumèla sv̀ng vdè chø̀mpè nv̀ng vdè cèrì kaq shóngshìlv́m, vdè sv̀ng øp dv́ngshìlv́m, laqyà mv́ngshèrlv́m, chø̀m dø̀ngku bv̀nlì taq nøt tøplv́m, nøt shvlálv́m nv̀ng vdè chø̀mpèí øp we sv̀ng cv̀nlv́m shvngøt lún lú:ngòe. Wekvt Gvray mòngkà sv̀ng shvyǿm we vsv̀ng màvl long. #Eps. 5:22
6Wedø tiqdvchá, vbat cv̀m we vlù vlàngpèla sv̀ng gø vdè sv̀ng øp dv́ngshìlv́m dèshat dèzi:tnò.#2:6 “pv̀n vrv̀m taq vdè sv̀ng øp dv́ngshìlv́m,” wa nø rø shvlae. 7Pv̀n vrv̀m taq nà vdè nø bv̀nlì shvlá wàò we shvbóng shvmvtshìrà èwáshì. Nàí shèngø:tnò we mvshǿl taq nøtdøng nø̀, vpǿlv́m dø èwáshì. #1Tm. 4:12; 1Pt. 5:3 8Nà nø shvràlv́m màvl we, dìng we kà wa èshø̀n. Wekvt nøngmaq sv̀ng vtúshúrì nø nøngmaq dang zershìlv́m kà màvl yv́ngkèní shvraqshìvme. #1Pt. 2:15
9Vshuqrì nø àngmaq àngkàngrì wv́mshì dø wáaò nø̀ pv̀n vrv̀m taq øp we sv̀ng cv́n ràe. Àngmaq nø vzvtshì mvdaq, #Eps. 6:5; 1Tm. 6:1; 1Pt. 2:18 10kǿ mvdaq. Lè nø, pà wàò nìgø kv́mv́m vrvm dø wáshì rae. Wekvt dang vrv̀m taq nøngmaq Chv́ng Kàngpè Gvray mvshǿl sv̀ng vsà:ngí vpǿ lú:ngòe.#Tit. 1:3
11Kadø íe wani Gvrayí nø vsv̀ng shvngbe dvpvt chutchv́nglv́m tvrà èwáa daqshà yv́ngkèní Àng jejú dvtan daqà. 12-13Nøngmaqò ring we Gvray, Chv́ng Kàngpè Yesu Kristu nø pòngbàng ngø̀r dø dvtánshì daq nø̀ ìshøt vl we Àngni sv̀ng vlǿmshàì sórí caì dvgvp, Gvray dang nøt mvlø̀m we nv̀ng rvgaq mapnøtrì sv̀ng chut gurlv́m, ya lvpat taq cúnshàì ke vdè góng sv̀ng øp dv́ngshìlv́m, døngmanlv́m, Gvray dang nøtlø̀mlv́m gø Gvrayí jejú kèní shèngø:tnìe. #Rom. 5:2; 1Kr. 1:7; Eps. 1:4; Pil. 3:20; 1Yh. 2:16 14Nøngmaq sv̀ng mvrà shvngbe kèní chv́nglv́m, dvshàn dvshérlv́m nv̀ng shvla we bv̀nlì wàlv́m taq nøtlø̀m we Àng vdèò bashàrì ílv́m, Yesu Kristu nø Àng góng ni nøngmaq dvpvt zíshì bǿì. #Gal. 1:4; Eps. 2:10; Shz. 130:8; Ezk. 37:23 15Yadv́ng pv̀n nàí shvngøt ràe. Vmíng vkv́ng shvngbeí dèshat dèzi:tnò nø̀ ènga:nò. Nà sv̀ng yv́ng mvtv̀mvm we tiqgǿ gø laq màvl.#1Tm. 4:12
Поточний вибір:
Tito 2: GSM
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024, Rvcv́ngcè Kàru Gomidi Kristu Shvngø̀mré. All Rights Reserved.