Joni 12
12
Sa lumuta na yava i Jisu ko Meri, 1-8. E lewe vuqa na tamata sa lako mai me raici Lasaro, 9-11. Sa lako ko Jisu ki Jerusalemi, 12-19. Sa via raici Jisu e so maivei ira na veimatanitu kisau, 20-22. Sa vakatakila mai na nona mate ko Jisu, 23-36. Era sa loma butobuto na kai Jutia, 37-41. E so na turaga era sa vakabauti Jisu, a ra sa tawa tukuna, 42-50.
1NI sa vo na bogi e ono ki na solevu ni lako-sivia, sa lako mai ko Jisu ki Pecania, sa tiko kina ko Lasaro, ka mate eliu; o koya ka vakatura cake tale mai na mate ko koya. 2A ra sa cakava kina na kenai vakayakavi; a sa qarava ko Marica: a sa dua vei ira sa tiko vata kaya me kana ko Lasaro.
3Sa qai kauta mai ko Meri e dua nai vakarau waiwai talei sara, a narita dina, ka lumuta na yava i Jisu, ka solota na yavana e na drau ni uluna: ka curuoso na vale e na kena boi na waiwai.
4Sa qai kaya e dua vei iratou na nona tisaipeli, o Juta Isikarioti, na luve i Saimoni, o koya ena soli koya yani, 5Sa sega ni volitaki na waiwai o qo e na tola e vasagavulu, ka soli vei ira na dravudravua, e na vuku ni cava? 6Sa sega na nona nanumi ira na dravudravua, sa vosa kina vakaoqo ko koya; ia e na vuku ga ni sa butabutako, ka taura na taga i lavo, a sa kauta na ka sa biu kina. 7Sa qai kaya ko Jisu, Biuti koya ga: sa maroroya na ka o qo ko koya ki na siga kaʼu na bulu kina: 8ni sa tiko vakadua kei kemudou ko ira na dravudravua; ia koi au, kaʼu sa sega ni tiko vakadua kei kemudou.
9Ia sa lewe vuqa sara vei ira na kai Jutia, ni ra sa kila sa tiko maikina ko koya, era sa lako mai, sa sega e na vuku i Jisu ga, a ya me ra raici Lasaro talega, o koya ka vakatura cake tale mai na mate ko koya. 10Ia ko ira na bete levu era sa bose vata mo ra vakamatei Lasaro talega: 11e na vuku ni ra sa lewe vuqa na kai Jutia sa lako yani e na vukuna, ka vakabauti Jisu.
12E na sabogibogi e lewe vuqa sara era sa lako mai ki na solevu, ni ra sa rogoca ni sa lako mai ki Jerusalemi ko Jisu, 13era sa kauta na drau ni niu, a ra sa lako yani me veitata kaya, ka kacivaka, Osana! sa kalougata na nodra Tui na Isireli, o koya sa lako mai e na yaca ni Turaga.
14Ia ko Jisu, ni sa kunea e dua na luve ni asa, sa vodoka; me vaka sa volai, 15O iko sa toka mai Saioni, kakua ni rere: raica, sa lako mai na nomu Tui, ka vodo tu e na dua na luve ni asa. 16Ia na veika o qo eratou sa sega ni kila mada ko iratou na nona tisaipeli: ia ni sa vakarokorokotaki oti ko Jisu, eratou sa qai nanuma ni sa volai ko koya e na veika o qo, a ra sa kitaka na veika o qo vei koya.
17O ira na tamata era sa tiko kaya ni sa kacivi Lasaro mai nai bulubulu, ka vakaturi koya cake tale mai na mate, era sa tukuna. 18E na vuku ni ka o qo sa veitata kaya talega na lewe vuqa, ni ra sa rogoca ni sa cakava na ka-mana o qo ko koya. 19O ira na Farisi era sa qai kaya vakai ira, Dou sa kila beka ni dou sa sega ni rawata e dua na ka? raica, sa muri koya na kai vuravura kecega.
20Ia sa so mai na veimatanitu kisau, era sa lako cake mai ki na solevu me ra soro: 21o ira o qo era sa lako mai vei Filipo, a kai Peciseita e Kalili, ka tarogi koya, ka kaya, Keitou via raici Jisu, saka. 22Sa lako ko Filipo, ka tukuna vei Adriu: ia koi rau ko Adriu kei Filipo, erau sa tukuna vei Jisu.
23A sa vosa vei rau ko Jisu, ka kaya, Sa qai yaco mai na gauna me vakarokorokotaki kina na Luve ni tamata. 24E dina, e dina, au sa kaya vei kemudou, Kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu. 25O koya sa lomana na nona bula, ena vakayalia: ia ko koya sa cata na nona bula e vuravura o qo, ena maroroya ki na bula tawa mudu. 26Kevaka sa qaravi au e dua, me muri au ga; ia na vanua kaʼu sa tiko kina, ena tiko talega kina ko koya sa qaravi au: ia kevaka sa qaravi au e dua, ena vakarokorokotaki koya ko Tamaqu. 27Sa qai rarawa na lomaqu; ia ka cava meʼu kaya? Tamaqu, vakabulai au mai na gauna o qo; ia na ka o qo kaʼu sa lako mai kina ki na gauna o qo. 28Tamaqu, vakarokorokotaka na yacamu.
Sa qai rorogo mai e dua na domo mai lomalagi, Au sa vakarokorokotaka, kaʼu na vakarokorokotaka tale. 290 ira na tamata sa tiko ka rogoca, era sa kaya ni sa kurukuru: sa kaya e so tani, Sa dua na agilose sa vosa vei koya. 30Sa vosa ko Jisu, ka kaya, Sa sega ni lako mai na domo o qo e na vukuqu, e na vukumudou ga. 31Sa qai lewai ko ira na kai vuravura o qo: sa qai biu ki tautuba na turaga ni vuravura o qo. 32Ia niʼu sa laveti cake mai vuravura, au na yarataki ira na tamata kecega vei au. 33Ia sa vosataka na ka o qo ko koya, me vakatakila na mate ena mate kina ko koya.
34Sa kaya vua na lewe vuqa, Keitou a rogoca mai na vunau ni sa tiko vakadua na Karisito; ia ko sa kaya vakacava, Ena laveti cake na Luve ni tamata? o cei na Luve ni tamata o qo? 35Sa qai kaya vei ira ko Jisu, Sa tiko vakalailai ga vei kemudou na rarama: dou lako ni sa tu vei kemudou na rarama, de yacovi kemudou na butobuto: ia ko koya sa lako e na butobuto, sa sega ni kila se sa lako kivei. 36Ni sa tu vei kemudou na rarama, dou vakabauta na rarama, mo dou yaco me luve ni rarama.
Sa vosataka na veika o qo ko Jisu, ka lako yani, ka vuni koya vei ira.
37Ia e dina ya ni sa cakava ko koya e vuqa vakaoqo na ka-mana e matadra, a ra sa sega ga ni vakabauti koya: 38me vakayacori kina na ka sa vosataka ko Isaia na parofita, ka vaka, Jiova, o cei sa vakabauta na neitoui tukutuku? a sa vakatakilai vei cei na liga i Jiova? 39A ka o qo era sa sega ni vakabauta rawa kina; ni sa kaya tale ko Isaia, 40Sa vakamatabokotaki na matadra, ka vakaukauwataki na lomadra: me kakua ni rai na matadra, se kila na lomadra, ka saumaki mai, ka meʼu vakabulai ira. 41Sa vosataka na veika o qo ko Isaia, ni sa raica na nona serau, ka tukuni koya.
42Ia sa lewe vuqa ga vei ira na turaga era sa vakabauti koya; ia, e na vukudra na Farisi, era sa sega ni tukuna, de ra biu mai na vale ni lotu: 43ni ra sa vinakata vakalevu me vakarokorokotaki ira ko ira na tamata, ka vakalailai ga me vakarokorokotaki ira ko na Kalou.
44Sa qai kaci ko Jisu, ka kaya, O koya sa vakabauti au, sa sega ni vakabauti au ga, o koya talega sa talai au mai: 45ia ko koya sa raici au, sa raici koya sa talai au mai. 46Au sa lako mai ki vuravura me rarama, me kakua ni tiko e na butobuto ko koya yadua sa vakabauti au. 47Ia kevaka e dua sa rogoca na noqu vosa, ka sega ni vakabauta, au sa sega ni lewai koya: niʼu sa sega ni lako mai me lewai ira na kai vuravura, a ya me vakabulai ira na kai vuravura. 48Sa dua sa lewai koya sa biuti au, ka sega ni vakabauta na noqu vosa: a vosa kaʼu sa vosataka, sai koya o qo ena lewai koya e na siga maimuri. 49Niʼu sa sega ni vosa vakai au; ia ko Tamaqu sa talai au mai, sa vakarota vei au na ka meʼu kaya, kei na ka meʼu tukuna. 50Ia kaʼu sa kila ni sa vu ni bula tawa mudu na nonai vakaro: o koya ga, e na ka kecega kaʼu sa vosataka, au sa vosa me vaka na ka sa kaya vei au ko Tamaqu.
Поточний вибір:
Joni 12: FIJ1864
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First full Bible in the Fijian language © British and Foreign Bible Society, 1864.
