Joni 11
11
Sa vakaturi Lasaro cake tale mai na mate ko Jisu, 1-44. Era sa lewe vuqa na kai Jutia sa vakabauta, 45, 46. Sa bosei Jisu ko ira na bete levu kei ira na Farisi, ka sa vuni koya ko Jisu, 47-54. Era sa vakasaqarai koya me vakamatea, 55-57.
1IA sa dua na tamata sa tauvi-mate, ko Lasaro, na kai Pecania, a nodrau koro ko Meri kei Marica na tuakana. ( 2Ia ko Meri o qo sa lumuta na Turaga e na waiwai, ka solota na yavana e na drau ni uluna, a sa tauvi-mate na ganena ko Lasaro.) 3O koya sa talaki kina koi rau na ganena vei koya, ka kaya, Turaga, raica, ko koya ko sa lomana sa tauvi-mate.
4Ia ni sa rogoca ko Jisu, sa kaya, Ena sega ni ciba ko koya e na mate o qo, ia ena vakarokorokotaki kina na Kalou, ena vakarokorokotaki talega kina na Luve ni Kalou.
5A sa daulomani Marica ko Jisu, kei tacina, kei Lasaro. 6Ni sa qai rogoca ko koya ni sa tauvi-mate ko koya o qori, sa tiko tale ka bogi rua e na tikina ko ya. 7Ni sa oti o qo sa qai kaya vei iratou na tisaipeli, Me datou lako tale ki Jutia. 8Sa kaya vua ko iratou na tisaipeli, Vakavuvuli, era a via viriki iko edaidai walega e na vatu ko ira na kai Jutia; ia ko sa baki lako tale ki na tikina ko ya? 9Sa kaya ko Jisu, Sa sega li ni tinikarua na tikina e na siga? kevaka sa lako e dua e na siga, sa sega ni tarabe ko koya, e na vuku ni sa raica na rarama kei vuravura o qo: 10ia kevaka sa lako e dua e na bogi, sa tarabe ko koya e na vuku ni sa sega ni tu vei koya na rarama.
11Sa vosataka na ka o qo ko koya: ia ka oti sa qai kaya vei iratou, Sa moce na wekadatou ko Lasaro; ia kaʼu sa lako meʼu vakayadrati koya. 12Sa qai kaya ko iratou na nona tisaipeli, Turaga, kevaka sa moce ga ko koya, ena bula. 13Ia ka sa vosataka na nona mate ko Jisu: ia eratou sa nanuma ni sa vosataka ko koya na vakacegu ni moce. 14Sa qai tukuna vakavinaka vei iratou ko Jisu, Sa mate ko Lasaro: 15ia kaʼu sa reki e na vukumudou niʼu a sega ni tiko kina, mo dou vakabauta; ia me datou lako ga vua.
16Sa qai kaya ko Tomasi, o koya sa vakatokai ko Titimo, vei iratou na kenai caba na tisaipeli, Me datou lako talega, me datou mate vata kaya.
17Ni sa qai lako mai ko Jisu, sa kunea ni sa qai bogi va koto ko koya e nai bulubulu.
18A sa voleka ki Jerusalemi ko Pecania, a kena vakayawa e rua beka na maili. 19Ia sa lewe vuqa na kai Jutia era a lako mai vei Marica kei Meri, me ra vakalecataki rau e na vuku ni ganedrau. 20Ni sa qai rogoca ko Marica ni sa lako mai ko Jisu, sa laʼki tavaki koya: a sa tiko ga ko Meri e na vale.
21Sa qai kaya ko Marica vei Jisu, Turaga, kevaka ko a tiko eke, sa sega ni ciba na ganequ: 22ia kaʼu sa kila ni na solia vei iko edaidai ko na Kalou na ka kecega ko na kerea vua na Kalou. 23Sa kaya vua ko Jisu, Ena tu cake tale na ganemu. 24Sa kaya vua ko Marica, Au sa kila ni na tu cake tale ko koya e na siga maimuri era na tu cake tale kina na tamata. 25Sa kaya vua ko Jisu, Oi au na vu ni tu cake tale, kei na vu-ni-bula: o koya sa vakabauti au, kevaka sa mate, ena bula ga: 26ia ko koya yadua sa bula ka vakabauti au, ena sega sara ni mate. O sa vakadinata na ka o qo, se segai? 27Sa kaya vua ko koya, Io, Turaga: au sa vakadinata ni sai Karisito ko iko, na Luve ni Kalou, o koya sa dodonu me lako mai ki vuravura.
28Ia ni sa vosa vakaoqo ko koya, sa lako yani, ka kaciva lo na tacina ko Meri, ka kaya, Sa lako mai nai Vakavuvuli, a sa kacivi iko. 29Ni sa qai rogoca ko koya, sa tu cake sara, ka lako yani vua. ( 30A sa bera ni curu ki na koro ko Jisu, a sa tiko ga e na vanua erau sa veitata kina kei Marica.) 31O ira na kai Jutia era sa tiko vata kei Meri e na vale, ka vakalecataki koya, ni ra sa raica ni sa tu cake sara ko koya, ka lako yani, era sa muri koya, ka kaya, Sa lako ki nai bulubulu ko koya me tagi maikea.
32Ni sa qai tadu mai ko Meri ki na vanua sa tiko kina ko Jisu, ka raici koya, sa bale sobu ki na yavana, ka kaya vua, Turaga, kevaka ko a tiko eke, sa sega ni ciba na ganequ. 33Ni sa qai raica ko Jisu na nona tagi, kei na nodra tagi na kai Jutia era sa lako vata kaya mai, sa vutugu ko koya e na yalona, a sa rarawa na lomana, 34ka kaya, Evei na vanua dou a vakotori koya kina? Era sa kaya vua, Turaga, lako mai ka raica. 35Sa tagi ko Jisu. 36Era sa qai kaya na kai Jutia, Raica na kena levu ni nona loloma vei koya! 37Ia e so vei ira sa kaya, Sa sega beka ni rawata ko koya o qo, o koya sa basuka na mata ni mataboko, me qisia talega na tamata o qo me kakua ni mate?
38Sa qai vutugu tale e na yalona ko Jisu, ka lako mai ki nai bulubulu. Ia sa qara-vatu o qo, ka sa kenai sogo e dua na vatu. 39Sa kaya ko Jisu, Dou kauta tani na vatu. Sa kaya vua ko Marica, a gane i koya sa mate, Turaga, sa qai bona ko koya: ni sa qai bogi va. 40Sa kaya vua ko Jisu, Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta? 41Era sa qai kauta tani na vatu mai na tikina sa koto kina na mate.
A sa ta cake ko Jisu na matana, ka kaya, Tamaqu, au sa vakavinavinaka vei iko ni ko a rogoci au mai: 42ia kaʼu sa kila ni ko sa rogoci au tikoga: ia kaʼu sa vosa e na vukudra na tamata sa tiko eke, me ra vakadinata ni ko sa talai au mai. 43Ia ni sa vosa oti vakaoqo, sa kaci e na domo levu, Lasaro, lako mai. 44Ia ko koya ka mate sa lako mai, ka viviraki tu na ligana kei na yavana e nai sulu ni bulu: ka viviraki e na uluna e dua nai tavoi. Sa kaya vei ira ko Jisu, Dou sereki koya, ka biuta me lako.
45A ra sa lewe vuqa vei ira na kai Jutia sa lako mai kei Meri, ni ra sa raica na ka sa kitaka ko Jisu, era sa vakabauti kova. 46Ia ko ira e so sa lako yani vei ira na Farisi, ka tukuna vei ira na ka sa cakava ko Jisu.
47Sa qai soqoni vata ko ira na bete levu kei ira na Farisi me ra bosea, a ra sa kaya, A cava mada me da kitaka? ni sa cakava na caka-mana e vuqa na tamata o qo. 48Kevaka eda sa biuti koya vakaoqo, era na vakabauti koya na tamata kecega: era na qai lako mai na kai Roma, ka vaqeavutaka na noda koro kei na noda matanitu. 49A sa dua vei ira, ko Kaiafa, o koya sa bete levu e na yabaki ko ya, sa kaya vei ira, Dou sa sega ni kila e dua na ka, 50se vakananuma ni sa yaga vei keda mo mate e dua na tamata e na vukudra na tamata, ka me kakua ni rusa na matanitu taucoko. 51A sa sega ni vosataka na ka o qo ko koya vakai koya: ia ni sa bete levu e na yabaki ko ya, sa vakatakila ko koya ni na mate ko Jisu e na vuku ni matanitu ko ya; 52ka sega e na vuku ni matanitu ko ya duaduaga, a ya talega me vakasoqoni ira vata na luve ni Kalou sa duiveiseyaki me ra dua bau.
53Mai na siga ko ya era sa qai bosei koya me ra vakamatea. 540 koya o qo sa sega kina ni lako votu tale ko Jisu e na kedra maliwa na kai Jutia; a sa lako yani maikea ki na vanua sa voleka ki na veikau, ki na dua na koro na yacana ko Ifireimi, a sa tiko kina kei iratou na nona tisaipeli.
55A sa voleka na nodra solevu ni lako-sivia na kai Jutia: a ra sa lewe vuqa sa lako cake ki Jerusalemi, mai na yasana kisau, ni sa bera na solevu ni lako-sivia, me ra vakasavasavataki ira. 56A ra sa qai vakasaqarai Jisu, ka veivosaki vakai ira ga, ni ra sa tu e na vale ni soro, A cava dou vakananuma? ena lako mai ko koya ki na solevu, se segai? 57Ia sa vakarota ko ira na bete levu kei ira na Farisi, kevaka e dua sa kila na vanua sa tiko kina ko koya, me tukuna mai, me ra mai taura.
Поточний вибір:
Joni 11: FIJ1864
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
First full Bible in the Fijian language © British and Foreign Bible Society, 1864.
